Лука 1 - Шэнэ Хэлсээн

Юундэ Лука энэ ном бэшэһэн байгааб

¹ Эрхим хүндэтэ Феофил! Манай дунда болоһон ушар ябадалнууд тухай туужа олон зон бэшэхэ гэжэ шармайна.

² Эхинһээнь байлсаһан, болоһон бүгэдые хараһан зоной маанадта хөөрэһые тэдэ нүхэд буулгажа бэшэнэ.

^3-4 Бишье баһа болоһон бүгэдые эхинһээнь нарин нягтаар шудалаад, шамда номногдоһон һургаалай сохом үнэниие мэдэжэ байхыншни тула тохёолдоһон бүгэдые үнэн байдалаарнь хойно хойноһоонь дараалан шамда бэшэжэ дамжуулха гэжэ шиидэбэб.

Уһаар Арюудхагша Иоаннай түрэһэн тухай айладхагдаба

⁵ Иудейн орон нютагые Ирод хаанай зонхилжо байхада Захария Елизавета гэжэ нэрэтэй үбгэ һамга хоёр ажаһуугаа: үбгэниинь Авия бүлэгэй санаартан, тиин һамганиинь Аарон гэжэ ахамад санаартанай үри һадаһан мүн байгаа.

⁶ Тэдэ хоюулан Бурханай хүсэл бодото дээрэнь бэелүүлэн, Хуулиин захяа заабаринуудые жэншэдгүй һайханаар сахидаг һэн.

⁷ Елизавета һамганиинь анханай үригүй байжа, тэдэ хоёр үндэр наһа наһалтараа үхибүүгүй байгаа.

^8-9 Нэгэтэ Захария санаартанай Бурханда алба хэхэ уялгата үдэрэй ерэхэдэ, тэрээндэ жээрэбээр Эзэн Бурханай Һүмэ соо орожо, сан табиха ехэ үршөөл тудаба.

¹⁰ Сан санзай уталгын тэрэ үедэ үй түмэн зон Һүмын хорёо соо мүргэжэ зальбаржа байба.

¹¹ Харин Һүмэ дотор сан табидаг шэрээгэй баруун таладань гэнтэ Бурханай Эльгээмэл бии болобо.

¹² Тэрэниие хараад, Захария мэгдэшэбэ, тэрэнэй айдаһаниинь хүрэшэбэ.

¹³ Харин Бурханай Эльгээмэл иигэбэ: «Захария, бү ай, шинии зальбаралые Бурхан дуулаа, Елизавета һамганшни шамда хүбүү түрэхэ. Хүбүүгээ Иоанн гэжэ нэрлэхэш.

¹⁴ Ши ехээр баярлаха, хүхихэш, тиин үшөөшье олон бусад зон хүбүүнэйшни түрэһэндэ баярлаха,

¹⁵ юундэб гэхэдэ, хүбүүншни Бурханай нюдэндэ агууехэ хүн байха: архи дарһа амсахагүй, бүри эхынгээ умайда байхадаа Нангин Һүлдэ тогтоожо абаха,

¹⁶ Израилиин олон зониие өөһэдынь Бурхан болохо Дээдын Эзэндэ һөөргэнь бусаажа хандуулха.

¹⁷ Хүбүүншни Дээдын Эзэнэй түрүүндэ Илиядал адли һүр хүсөөр, һүнэһэ һүлдөөр дүүрэн ерэхэ. Тиигэжэ үбгэ эсэгэнэрые үри хүүгэдтэйнь эблэрүүлхэ, өөрынхеэрээ ябадаг хүнүүдые Бурханай эрхэ хүсэл бэелүүлхэ тээшэнь тэгүүлхэ. Иигэжэ арад зониие Дээдын Эзэнтэй уулзуулхада бэлэн болгожо байха».

¹⁸ «Би үбгэрөөб, һамгамнишье наһатай болонхой. Тиимэһээ хэлэһэн үгэнүүдшни хүсэлдэхэ юм гэжэ би яагаад этигэхэ гээшэбиб?» – гэжэ Захария Бурханай Эльгээмэлһээ һураба.

¹⁹ «Би болбол Бурханай ойро оршодог Гавриил гээшэб. Энэ һайн мэдээсэл дуулгахыемни Бурхан намайе шамда эльгээгээ юм.

²⁰ Сагайнгаа ерэхэдэ хүсэлдэхэ эдэ үгэнүүдтэмни этигээгүй юм хадаа, эдэ бүгэдын тохёолдохо үдэр болотор ши аниргүй, дуугаржа шадахагүй ябахаш», – гэжэ Бурханай Эльгээмэл хэлэбэ.

²¹ Тиигэхэ зуурань арад зон Захариягай гарахые хүлеэжэ, Һүмэ соо яагаа удаан болоноб гэжэ гайхажа байгаа һэн.

²² Тэрэнэй Һүмэһөө гараад, дуугаржа шадахагүй байхыень харахадаа, Һүмэ соо хий үзэгдэл хараа байна гэжэ зон ойлгобо. Хэлэгүй болоһон Захария гар хургаараа заажа байгаад зонтой ойлголсобо.

²³ Албаяа хэжэ дүүргээд, Захария гэртээ хариба.

²⁴ Уданшьегүй тэрэнэй Елизавета һамганиинь хээлитэй болоод, табан һарын туршада гэрһээн гарабагүй.

²⁵ «Одоошье Дээдын Эзэн намайе үршөөгөө, хүн зоной хэлэ аманһаа хамгаалаа», – гэжэ тэрэ эхэнэр өөртөө хэлэжэ байба.

²⁶ Елизаветын зургаадахи һарадаа ябахада, Бурхан Гавриил гэдэг Эльгээмэлээ Галилейн Назарет хотодо ажаһуудаг

²⁷ Мария басаганда эльгээбэ. Тэрэ басаган Давид хаанай үри һадаһан болохо Иосиф гэжэ хүнтэй хуби заяагаа холбохоо байгаа.

²⁸ Бурханай Эльгээмэл Марияда ерээд: «Амар мэндэ, аза жаргалтай басаган! Дээдын Эзэн шамтай байна, шамайе буян хэшэгтээ элбэг дэлбэгээр хүртөөбэ!» – гэжэ хэлэбэ.

²⁹ Иимэ юумэ дуулахадаа, Мария ехээр мэгдэжэ сошобо, юун гэбэ гээшэб гэжэ бодобо.

³⁰ «Бү ай, Мария, ши Бурханай буян хэшэгтэ хүртэбэш.

³¹ Ши хүндэ болохош, хүбүү түрэхэш, тэрээндээ Иисус гэжэ нэрэ үгэхэш.

³² Тэрэшни агууехэ хүн болохо, Дээдын Бурханай Хүбүүн гэжэ нэрэшэхэ. Эзэн Бурхан хүбүүешни үбгэ эсэгэ Давидтайнь адли хаан болгохо.

³³ Тиигэжэ тэрэ Израилиин арад зониие хэтын хэтэдэ захирха, тэрэнэй хаан түрэ хэзээш һүнэхэгүй», – гэжэ Бурханай Эльгээмэл хэлэбэ.

³⁴ «Минии хадамда гараагүй байхада яажа тиимэ юумэн болохоб?» – гэжэ Мария асууба.

³⁵ Бурханай Эльгээмэл харюусаба: «Нангин Һүлдэ шам дээрэ бууха, Дээдын Бурханай хүсэн шамайе хушаха. Тиимэһээл түрэхэ нангин үришни Бурханай Хүбүүн гэжэ нэрлэгдэхэ.

³⁶ Тиихэдэ шинии түрэл садан Елизавета наһатай болоошье һаа, баһал хүбүүтэй болохо гэжэ байна. Үригүй гэжэ хэлүүлдэг байһан аад, мүнөө зургаадахи һара дээрээ ябана.

³⁷ Бурханай хэжэ шадахагүй юумэн үгы ха юм».

³⁸ «Эзэн Бурханай мэдэлдэ ха юмбиб даа. Хэлэһэнтнай бэелхэнь болтогой!» – гэжэ Мария хэлэбэ. Тиигээд Бурханай Эльгээмэл басаганһаа холодобо.

³⁹ Удангүй Мария яаралтайгаар харгыда гаража, хадалиг Иудей уласай хото хүрөөд,

⁴⁰ Захариягай гэртэ орожо, Елизаветые мэндэшэлбэ.

⁴¹ Мариягай мэндэеэ хэлэхэтэйнь адли Елизаветын хэбэлдэ байһан үхибүүн тэршэлээд абаа һэн ха. Тэрэ дороо Елизавета Нангин Һүлдөөр дүүрэбэ,

⁴² тиигээд шангаар хэлэбэ: «Ши бусад эхэнэрнүүдһээ үлүү ехээр Бурханай буян хэшэгтэ хүртэбэш, мүн хэбэл соо хэбтэһэн үришни буян хэшэгтэ хүртэбэ!

⁴³ Минии Дээдын Эзэнэй эжы, иимэ һайнаар намда орожо ерэһэндэшни би баяртай байнаб.

⁴⁴ Шинии мэндэшэлгэ дуулахатаймни сасуу, хүбүүмни хэбэл соом баясажа тэршэлээл.

⁴⁵ Эзэн Бурханай айладхаһан үгэ бэелхэ гэжэ этигэһэн ши амар жаргалтайш!»

⁴⁶ Тиихэдэнь Мария иигэжэ үгэлбэ: «Би үнэн сагаан сэдьхэлһээ Эзэн Бурханаа алдаршуулан магтанаб,

⁴⁷ Бурхан тухай, намайе Абарагша тухай сэдьхэн, Эльгэ зүрхэмни урма баяраар халиба.

⁴⁸ Ахир жаахан намайе Бурхан хаража, Агуу эбигээл хайрадаа хүртөөбэ. Бүхы угсаата зон энээнһээ хойшо намайе Амар жаргаланта эхэнэр гэжэ нэрлэдэг болохонь гээшэл.

⁴⁹ Түгэс хүсэтэ Бурхан туйлай ехэ хэрэг намда бүтээгээл, тэрэнэй алдар нэрэнь арюун нангин лэ!

⁵⁰ Өөртэнь бэшэрдэг, этигэдэг зониие Үршөөл хайрадаа тэрэ Үеын үедэ хүртөөжэ байдаг лэ!

⁵¹ Тэрэ өөрынгөө гараар агуу хүсэ үзүүлэн, ехэрхүү һайзгайнарые һарнюулаа.

⁵² Һүр хүсэтэй засаг баригшадые хаан шэрээһээнь буулгаад, номгон даруу зониие дээшэнь үргөө.

⁵³ Үлэсхэлэн үгытэйшүүлдэ элбэг дэлбэг юумэ үгөөд, дээрэлхүү баяшуулые гар хооһон ябуулаал.

⁵⁴ Үбгэ эсэгэнэртэмнай амалһанаа Тэрэ гүйсэд бэелүүлээл, Израиль зарасадаа аша туһатай байгаал,

⁵⁵ манай үдэрнүүд хүрэтэр мартангүй Абраһамда болон тэрэнэй үри һадаһадтань үеын үедэ үршөөл хайраа хайрлажа байгаал!»

⁵⁶ Мария гурба һара шахуу Елизаветэтэй хамта байгаад, гэртээ харяа бэлэй.

Уһаар арюудхагша Иоаннай түрэһэн түүхэ

⁵⁷ Елизаветын хүнгэрхэ саг ерэжэ, тэрэ хүбүү түрэбэ.

⁵⁸ Дээдын Эзэнэй Елизаветэдэ хүртөөһэн эбигээл хайра арьбадхаба гэжэ дуулахадаа, хүршэнэрынь, түрэл саданиинь тэрээнтэй хамта ехэтэ баярлаба.

⁵⁹ Түрэһөөр наймадахи үдэртэнь нарай хүбүүнэй бэлгэ отолуулха ёһололдо хүнүүд сугларжа, тэрээндэ Захария гэжэ эсэгынь нэрэ үгэхэ гэлсэбэ.

⁶⁰ Тиихэдэнь эхэнь: «Үгы, хүбүүндээ Иоанн гэжэ нэрэ үгэхэбди», – гэбэ.

⁶¹ «Түрэл саданайтнай дунда тиимэ нэрэтэй хүн оройдоо үгы ха юм», – гэжэ Елизаветэдэ хэлэбэд.

⁶² Тиигээд хэн гэжэ нэрэ хүбүүндээ үгэхэбши гэжэ эсэгэһээнь гараараа заажа харуулжа байгаад һурахадань,

⁶³ Захария багахан хабтагай асаруулаад, «Хүбүүнэймни нэрэ – Иоанн!» гэжэ бэшэбэ. Хүнүүд булта гайхалсаа һэн.

⁶⁴ Тэрэ дары Захариягай аман нээгдэжэ, хэлэниинь табигдажа, тэрэ Бурханиие магтажа оробо.

⁶⁵ Энэ ушарһан гайхамшагта үйлэ хэрэг тухай һураг бүхы Иудейн хадалиг улас соогуур таража, оршондонь ажаһуудаг зон булта айн һүрдэбэ.

⁶⁶ Дуулаһан хүнүүд энээниие сэдьхэл зүрхэндөө бүхөөр хадуужа: «Энэ хүбүүн хэн юун болохо хаб?» – гэлдэбэ. Үнэхөөрөөшье Иоаннай хажууда Дээдын Эзэнэй оршожо байһань эли байба.

Захария Дээдын Эзэнэй абарал буулгана

⁶⁷ Нарай хүбүүнэй эсэгэ Захария Нангин Һүлдөөр дүүрэжэ, иимэ абарал буулгаба:

⁶⁸ «Израилиин Бурхан болохо Дээдын Эзэндэ алдар соло дуудаял! Аюул оһолһоо абархаяа Тэрэ арадтаа ерээ.

⁶⁹ Зараса Давидайнгаа үри һадаһадһаа Манда һүр хүсэтэй Абарагшые үгөөл.

^70-71 Дайсадһаатнай, таниие үзэн ядагша бүхы зонһоо абархаб гэжэ тэрэ эртэ урдын сагта гэгээн лүндэншэдөөрөө дамжуулан,

⁷² үбгэ эсэгэнэрыетнай найдуулһан ёһоор таанадые үршөөл хайрада хүртөөхэб, мүн өөрынгөө нангин хэлсээ,

⁷³ танай үбгэ эсэгэ Абраһамда үгэһэн тангаригаа дурдан һанахаб,

⁷⁴ Дайсадайтнай гарһаа мулталан абархаб гээ. Тиимэһээ бидэ айлтагүйгөөр Эзэндээ алба хэжэ,

⁷⁵ Наһан туршадаа арюун һайханаар, боди сэдьхэлээр тэрээндэ мүргэл хэжэ ябаха заяатайбди.

⁷⁶ Тиин ши, жаахан хүбүүмни, Дээдын Бурханай лүндэншэ гэжэ нэрлэгдэхэш, Дээдын Эзэнэй урдань ябажа, заларха замыень бэлдэхэш.

⁷⁷ Нүгэлөө арилгажа абарагдахат гэжэ Бурханай арадта ши айладхахаш.

⁷⁸ Бурхамнай гүн ехэ хайраараа огторгойһоо шараһан Гэгээн Наран мэтээр

⁷⁹ үхэлэй харанхы һүүдэртэ хушагдаһан маанадые гэрэлтүүлхэ, энхэ тайбанай замаар хүтэлэн, алхамуудыемнай шэглүүлхэ юм».

⁸⁰ Хүбүүхэн урган боргожожо, сэдьхэл зоригынь хатуужажа байба. Израилиин арадта айладхаха сагайнгаа ерэтэр тэрэ хүбүүн сүл губида байба.