Коринфынхидтэ 1-дэхи 6 - Шэнэ Хэлсээн

Һүзэглэгшэд хоорондоо заргалдаха ёһогүй

¹ Та һүзэглэгшэд хоорондоо заргалдахадаа, яахадаа Бурханай хүнүүдтэ ошонгүй, харин һүзэггүй зоноор заргаяа шиидхүүлнэ гээшэбта?

² Бурханай хүнүүд энэ дэлхэйн зониие шиидхэхэ юм гэжэ таанад мэдэхэгүй аалта? Хэрбээ таанад энэ дэлхэйн зониие шиидхэхэ ушартай юм болбол, жэжэ асуудалнуудаар шиидхэбэри гаргаха аргагүй аалта?

³ Бидэ Бурханай Эльгээмэлнүүдтэ шиидхэбэри гаргахабди гэжэ таанад мэдэхэгүй аалта? Тиихэдэ энэ дэлхэйн хэрэгүүдые бүришье бэлээр шиидхэхэ бэшэ аалта?

⁴ Харин таанад заргалдаанай хэрэгүүдые шиидхэхэдээ һүзэглэгшэдэй бүлгэмдэ ямаршье нэрэ хүндэгүй хүниие яахадаа заргашанаар табижа, тэрээндэ заргаяа үргэнэбта?

⁵ Ай, эшхэбтэр юумэ байна! Һүзэглэгшэдэй хоорондохи арсалдаае шиидхэхэ аргатай сэсэн ухаантай нэгэшье хүн таанадай дунда олдобогүй гээшэ гү?

⁶ Харин тиихэдэ һүзэглэгшэ хүн һүзэглэгшэ аха дүүгэйнгээ урдаһаа зарга барижа, үшөө тиихэдэ һүзэггүй зоноор асуудалаа шиидхүүлжэ байна.

⁷ Хоорондоо заргалдаһан ушартнай таанадай илагдаһые харуулна. Гомдохуулһан, мэхэлүүлһэн байбалтнай дээрэ байха бэшэ һэн гү?

⁸ Тиигэхын орондо таанад өөһэдөө бэе бэеэ, һүзэглэгшэ аха дүүнэрээ гомдохоонот, мэхэлнэт.

⁹ Харата хэрэг үйлэдэгшэд Бурханай хаан орониие залгамжалхагүй юм гэжэ таанад мэдэхэгүй аалта? Бү эндүүрэгты: забхайралдагшадшье, онгонуудта шүтэгшэдшье, нүхэртөө, али эхэнэртээ урбагшадшье, эрэшүүлтэй гүйлдэдэг эрэ хүнүүдшье,

¹⁰ хулгайшадшье, алта мүнгэндэ шунагшадшье, архиншадшье, хардагшадшье, мэхэшэдшье, эдэнэй али нэгэньшье Бурханай хаан орониие залгамжалхагүй.

¹¹ Танай заримантнай урдань тиимэл нүгэлтэн байһан юм. Гэхэдээ таанад нүгэлнүүдһээ арилгагдаһан, Бурханда зорюулагдаһан, Дээдын Эзэн Иисус Христосой ба манай Бурханай Һүлдын ашаар Бурханай урда сагааруулагдаһан байгаат.

Дээдын Эзэндэ зорюулһан бэе тухай

¹² Бидэ ямаршье юумэ хэхэ эрхэтэйбди гэжэ зарим хүнүүд хэлэхэ, гэхэтэй зэргэ бүхы юумэн таанадта аша туһатай бэшэ юм. Би ямаршье юумэ хэхэ эрхэтэйб гэжэ хэлэхэб, гэхэтэй сасуу би алишье юумэнэй барлагынь болохогүйб.

¹³ Эдеэ хоол ходоододол орохын тула байдаг, харин ходоодо хоол барихын тула байдаг юм гэжэ зарим хүнүүд хэлэхэ. Гэхэдэ Бурхан али алинииеньшье үгы болгохо. Махабад бэе ташаяан хурисалай тулада бүтээгдээ бэшэ, харин Дээдын Эзэндэ алба хэхээр бүтээгдэһэн юм, тон тиигэжэл Дээдын Эзэншье махабад бэеые хаража анхаржа байдаг юм.

¹⁴ Бурхан Дээдын Эзэниие амидыруулаа, тиин бидэнииешье һүр хүсөөрөө амидыруулха.

¹⁵ Танай махабад бэе Христосой бэеын хэһэгынь юм гэжэ таанад мэдэхэгүй аалта? Тиихэдээ би Христосой бэеын хэһэгые абажа, янханай бэеын хэһэг болгохо аалби? Үгыл даа!

¹⁶ Янхан эмэтэй ниилэһэн хүн тэрээнтэй нэгэ бэе болоно гэжэ таанад мэдэхэгүй аалта? «Хоёр хүн нэгэ бэе болохо», – гэжэ Нангин Бэшэг соо элеэр бэшээтэй ха юм.

¹⁷ Харин Дээдын Эзэнтэй ниилэһэн хүн һүнэһэ һүлдөөрөө тэрээнтэй нэгэдэдэг юм.

¹⁸ Ташаяан хурисалһаа зайсажа байгты. Хүнэй үйлэдэдэг бусад нүгэлнүүд махабад бэеые ехэ гэмдэ орууладаггүй юм, харин янхаржа байһан хүн өөрынгөө бэеые ехэл гэмдэ оруулна гээшэ.

¹⁹ Танай махабад бэе зосоотнай оршодог Бурханһаа таанадта үгтэһэн Нангин Һүлдын һүмэ юм гэжэ таанад мэдэхэгүй аалта? Таанад өөһэдынгөө дураар бэшэт, таанад Бурханай мэдэлдэ байнат.

²⁰ Бурхан таанадые үнэтэй сэнгээр худалдажа абаа. Тиимэһээ махабад бэеэрээ Бурханиие алдаршуулжа байгты.