Коринфынхидтэ 1-дэхи 16 - Шэнэ Хэлсээн

Һүзэглэгшэ аха дүүнэртэ үзүүлхэ туһаламжа тухай

¹ Мүнөө дуталдажа байһан Иудей можын Бурханай хүнүүдтэ алта мүнгэ суглуулжа туһалха талаар хэлэһүүб. Галадай һүзэглэгшэдэй бүлгэмүүдтэ юу хэхыень захяа һэнби. Таанадшье тэрэ захяае дүүргэгты.

² Гарагай нэгэн, воскресени бүхэндэ хүн бүхэнтнай оролгоһоон боломжоороо мүнгэ гаргаад, тэрэнээ суглуулжа байг. Тиигэбэлтнай, ерэхэдэмни алта мүнгэ суглуулха хэрэг гарахагүй.

³ Би ерэхэдээ, шэлэжэ абаһан хүнүүдтэтнай бэшэгээ үгөөд, бэлэгүүдтэйнь Иерусалим хото ябуулхаб.

⁴ Хэрбээ тэдэнтэй ябалсахамни зохид байбал, тэдэнтэй ябуужаб.

Һүүлшын заабаринууд тухай

⁵ Би Македонёор дайраад, һүүлээрнь таанадта ерэхэб. Македони дайраха ёһотой хүнби.

⁶ Нэгэ хэды саг соо таанадтай байхаб, үбэлжэжэшье магадгүйб, һүүлээрнь таанад намайе замдамни үдэшэхэт.

⁷ Би таанадтай халта уулзаад лэ хахасаха дурагүй байнаб. Хэрбээ Дээдын Эзэнэй үршөөбэл, таанадтайгаа удаан байһайб гэжэ хүсэнэб.

⁸ Эндэ Эфестэ би Табидахи үдэрэй һайндэр болотор байхаб.

⁹ Эндэ эсэргүүсэгшэдэй олон байгаашье һаань, агууехэ шухала хэрэг бэелүүлхэ боломжо гараад байна.

¹⁰ Хэрбээ Тимофейн таанадта ошобол, танай дунда айлта зоболтогүй байха тухайнь бодооройт, тэрэ намдал адли Дээдын Эзэнэй аша туһада ажаллажа байна ха юм.

¹¹ Хэншье тэрэниие доогуур бү хараг. Тэрэнэй намда бусажа ерэхэ замайнь энхэ тайбан тухай бодон тэрэниие үдэшэхэ ёһотойт. Би тэрэниие һүзэглэгшэ аха дүүнэртэйгээ ерэхыень хүлеэжэ байнаб.

¹² Мүнөө манай һүзэглэгшэ нүхэр Аполлос тухай хэлэһүүб. Би тэрэниие таанадта һүзэглэгшэ аха дүүнэрээр хамта ошохыень ехэл гуйһан байгааб. Теэд тэрэ мүнөө таанадта ошохо аргагүй байна, гэхэдэ боломжо гарабал, тэрэ таанадта заабол ошохо.

¹³ Һэргэг байгты. Һүзэгөө алдангүй, зоригтой, хатуу байгты.

¹⁴ Ямаршье юумэ хэхэдээ дуратайгаар хэжэ байгты.

¹⁵ Таанад Стефан ба тэрэнэй гэр бүлэ тухай мэдэнэт, тэдэнэр Ахайяын зоной дундаһаа анха түрүүн Дээдын Эзэндэ һүзэглэһэн, Бурханай хүнүүдэй алба хэхэдэ өөһэдыгөө бүрин зорюулһан юм. Аха дүүнэрни,

¹⁶ тиимэл хүнүүдэй ба тэдэнтэй ажаллажа, алба хэжэ байһан хүнүүдэй хүтэлбэри доро ябагты гэжэ таанадые гуйнаб.

¹⁷ Стефан, Фортунат, Ахаик гурбанай ерэһэндэ би аргагүй ехээр баярлажа байнаб, тэдэнтэй байхадаа, таанадай үгы байһые ойлгонгүй үнгэрбэб.

¹⁸ Тэдэнэр намайешье, таанадыешье баярлуулаа. Тиимэ зониие хүндэлжэ байгты.

¹⁹ Аси можын һүзэглэгшэдэй бүлгэмүүд таанадта мэндые хүргэнэ. Акила Прискилла хоёр, тэдэнэй гэртэ суглардаг һүзэглэгшэдэй бүлгэм таанадта Дээдын Эзэндэ һүзэглэгшэдэй халуун мэндые хүргэнэ.

²⁰ Таанадта эндэхи һүзэглэгшэ аха дүүнэр булта мэндые хүргэнэ. Бэе бэеэ арюун нангинаар таалажа мэндэшэлээрэйт.

²¹ Энэ мүрнүүдые өөрынгөө гараар бэшэнэб: Павел таанадта амар мэндые хүргэнэ.

²² Дээдын Эзэндэ дурагүй байһан хүнэй толгой дээрэ хараал бууг. Манай Дээдын Эзэн, ерыш даа!

²³ Дээдын Эзэн Иисусай үршөөл хайра таанадтай байһай!

²⁴ Минии хайра дуран Иисус Христос соо та бүхэнтэй оршохонь болтогой!