Колоссынхидтэ 4 - Шэнэ Хэлсээн

¹ Эзэд, өөһэдынгөө барлагуудта үнэн сэхээр хандажа байгты. Таанад өөһэдөө тэнгэридэ Эзэнтэй байһанаа мэдэнэ ха юмта.

Һүүлшын заабари

² Үргэлжэ Бурханда баяр хүргэн зальбаржа байгты, зальбархадаа, һэргэлэн байгты.

³ Христос тухай нюусые тайлбарилхадамнай, Бурханай үгые дэлгэрүүлхэдэмнай, Бурханай бидэндэ һайн боломжо үгэжэ байхынь тулада, таанад бидэнэйшье түлөө баһа зальбаржа байгты. Христос тухай номноһонойнгоо түлөө би мүнөө түрмэдэ һуужа байнаб.

⁴ Тэрэ нюусые номноходоо шадаха зэргээрээ ойлгосотой болгон хэлэжэ байхымни тулада зальбаржа байгты.

⁵ Сагаа гээнгүй һүзэглэдэггүй зондо аша туһа хүргэжэ байгаарайт, тэдэндэ ехэл ухаамсараар хандажа байгаарайт.

⁶ Хэлэхэдээ таанад зохисохо болон һонирхохо юумэ ходо хэлэжэ байха, тиин хүн бүхэндэ яажа зүб харюу үгэхые мэдэжэ байха ёһотойт.

Һүүлшын амаршалга

⁷ Бидэнээр хамта Дээдын Эзэндэ алба хэдэг үнэн сэхэ, инаг хайрата манай дүү Тихик нам тухай таанадта дуулгаха.

⁸ Бидэнэй яажа ажамидаржа байһан тухай таанад дуулаад, урмашахынтнай тула би тэрэниие таанадта ябуулаа һэм.

⁹ Тихиктэй хамта таанадай нэгэн болоһон, манай найдалтай болон инаг хайрата дүү Онисим ябалсаа. Тэдэнэр эндэ боложо байһан бүхы юумые таанадта хөөрэжэ үгэхэ.

¹⁰ Намтай хамта түрмэдэ һууһан Аристарх, Варнавын аша хүбүүн Марк таанадта мэндые хүргэнэ. (Маркын таанадта ошоболнь, тэрэниие угтажа абаха захиралта таанадта үгтэһэн байна).

¹¹ Иуст гэжэ нэрлэгдэдэг Иисус таанадта баһа мэндые хүргэнэ. Эдэ гурбан Бурханай эрхэ засагай мандахын тула намтай хамта хүдэлжэ байһан еврей һүзэглэгшэд юм, тиин тэдэ намда ехэл аша туһатай байгаа юм.

¹² Иисус Христосой зараса, таанадай үшөө нэгэн болохо Епафрас таанадта баһа амар мэндые хүргэнэ. Тэрэ таанадай эрхим түгэс боложо, Бурханай эрхэ хүсэлые бүрин мэдэжэ байхын тула таанадай түлөө үргэлжэ Бурханда зальбардаг юм.

¹³ Таанадай болон Лаодики, Иераполь хотодо байһан хүнүүдэй түлөө тэрэнэй ехэл эршэтэйгээр ажаллажа байдагыень би өөрөө баталжа шадахаб.

¹⁴ Манай эрхим хүндэтэ Лука эмшэ ба Демас хоёр таанадта мэндые хүргэжэ байна.

¹⁵ Лаодики хотын һүзэглэгшэдтэ, Нимфада, тэрэнэй гэртэ суглардаг һүзэглэгшэдэй бүлгэмдэ бидэнһээ мэндые дамжуулаарайт.

¹⁶ Таанад энэ хандалгые уншаад, һүүлдэнь Лаодики хотын һүзэглэгшэдэй бүлгэмдэ баһа уншуулаарайт. Тиихэтэй сасуу Лаодики хотын һүзэглэгшэдтэ минии эльгээһэн хандалгые таанад уншаарайт.

¹⁷ «Дээдын Эзэнэй даалгаһан ажалые бүтээгээрэй», – гэжэ Архипда хэлээрэйт.

¹⁸ Павел таанадые амаршална гэжэ би өөрын гараар бэшэнэб. Гэнжэнүүдээр хүлеэтэй байһан тухаймни һанажа байгаарайгты. Бурханай үршөөл хайра та бүхэнтэй оршожо байхань болтогой.