Колоссынхидтэ 1 - Шэнэ Хэлсээн

Амаршалга

^1-2 Аха дүүнэр, Иисус Христостой нэгэдэһэн Колоссы хотын һүзэг этигэлтэй Бурханай хүнүүд, Бурханай эрхэ мэдэлээр Христос Иисусай элшэн болоһон би Павел ба манай дүү Тимофей таанадые амаршалнабди. Бурхан Эсэгэһээ таанадта үршөөл хайра ба амгалан тайбаниие айладханабди.

Павел баясхалан хүргэн зальбарна

^3-4 Иисус Христосто этигэдэг тухайтнай, Бурханай бүхы зондо дуратай байдаг тухайтнай бидэ дуулаа һэмди. Тиимэһээ та бүхэнэй түлөө зальбархадаа, бидэ Дээдын Эзэн Иисус Христосой Эсэгэ Бурханда ходо баясхалан хүргэжэ байдагбди.

⁵ Үнэн зүб үгые, Һайн Мэдээсэлые анхан таанадта номноходомнай, таанад найдалга тухай дуулаа һэнта. Бурханай тэнгэри дээрэ бэлдээд байһан юумэндэ найдажа байһан дээрэһээ таанад һүзэглэнэт, дуратай байнат.

⁶ Һайн Мэдээсэл бүхы замбуулин дэлхэй дээрэ ехэ һайнаар дэлгэржэ, үрэ дүн асаржа байна. Бурханай буян хэшэг тухай анха дуулаад, үнэн ушарынь мэдэхэдэтнай тэрэ таанадай дунда баһа һайнаар дэлгэржэ байһан юм.

⁷ Бидэнтэй хамта хүдэлдэг, бидэнэй аша туһада Христосто этигэл найдалтайгаар алба хэдэг инаг хайрата Епафрасһаа Бурханай үршөөл хайра тухай мэдэһэн байгаат.

⁸ Таанадта үгэжэ байһан Нангин Һүлдын хайра дуран тухай тэрэ бидэндэ дуулгаһан байгаа.

⁹ Тиимэһээ бидэ таанад тухай дуулаһан үдэрһөө эхилжэ үргэлжэ таанадай түлөө зальбаржа байдагбди. Бурханай Һүлдын үгэдэг гүн ухаан, ойлгосо таанадтай байха тухайнь, тиигэхэдэ Бурханай дура хүсэлөө таанадта харуулжа байха тухайнь бидэ Бурханиие гуйдагбди.

¹⁰ Тиигэбэл таанад Дээдын Эзэнэй хүсэһэн ёһоор ажамидаржа, тэрээндэ һайшаагдаха юумые хэдэг байхат. Таанад һайн һайхан хэрэгүүдые бүтээжэ, Бурханиие бүрил һайн мэдэрдэг болохо һэнта.

^11-12 Тэрэнэй алдарта хүсэ шадалаар бэхижэн, таанад аргагүй ехэ тэнхээ тэсэбэритэй болохот. Тиимэһээ тэнгэриин гэрэл туяада өөрынгөө хүнүүдтэ бэлдээд байһан юумые хубаалсаха эрхэ таанадта үгэһэн Эсэгэдээ баяртайгаар баясхалан хүргэгты.

Христос ба тэрэнэй ажал тухай

¹³ Бурхан бидэниие харанхы мунхагай хүсэнһөө аршалжа, инаг хайрата Хүбүүнэйнгээ эрхэ засагта оруулаа юм.

¹⁴ Тэрэ Хүбүүниинь бидэнэй нүгэлнүүдые хүлисөөд, бидэниие эрхэ сүлөөтэй болгоо юм.

¹⁵ Харагдадаггүй Бурханиие бидэ Христос соо хараха аргатайбди. Христос Бурханай ууган Хүбүүн юм, Тэрэ бүтээгдэһэн бүхы юумэнэй дээгүүр юм.

¹⁶ Газар дэлхэй, тэнгэри огторгой дээрэхи Харагдадагшье, харагдадаггүйшье юумэнүүдые, тэдэнэй тоодо хаануудые, эзэдые, засаглагшадые, захирагшадые Бурхан тэрэнэй ашаар бүтээгөө. Бүхы юумые тэрэнэй ашаар, Бүхы юумые тэрэнэй тулада Бурхан бүтээгөө юм.

¹⁷ Бүхы юумэнүүдэй бүтээгдэхэһээ урда Христос байгаа, тиимэһээл тэрэнэй ашаар бүхы юумэн оршожо байна.

¹⁸ Тэрэ һүзэглэгшэдэй бүлгэмэй толгойнь юм, һүзэглэгшэдэй бүлгэм тэрэнэй бэень юм. Тэрэ тус бэеын амидаралай эхин болоно. Бүхы юумэнүүдэй дээгүүр байхын тула тэрэ ууган Хүбүүн үхөөд, хамагай түрүүндэ амидыруулагдаһан юм. Тэрэ хамаг юумэнэй түрүүндэ юм.

¹⁹ Бурхан бүхы шанарнуудаа Хүбүүндээ шэнгээхэ дуратайл байгаа.

²⁰ Хүбүүнэйнгээ ашаар бүхы юртэмсэтэй Бурхан эблэрхэ һанаатай байгаа. Хэрээһэндэ хадуулаад үхэһэн Хүбүүнэйнгээ шуһаар Бурхан энхэ тайбаниие тогтоожо, газар дэлхэй болон тэнгэри огторгой дээрэхи бүхы юумэнүүдтэй эбээ нэгэдхүүлээ юм.

²¹ Нүгэлтэ юумэнүүдые һанаашалжа, үйлэдэжэ байһан дээрэһээ хэзээ нэгэн сагта таанад Бурханһаа холо байгаат, тэрэнэй дайсадынь байгаат.

²² Харин мүнөө өөрынгөө урда таанадые нангин, арюун сэбэр, гэмгүй байлгахын тула Хүбүүнэйнгээ үхэлөөр Бурхан таанадтай эбээ нэгэдхүүлбэ.

²³ Тиимэһээ таанад хатуу ба сухаришагүй һүзэглэжэ байха ёһотойт, Һайн Мэдээсэлые шагнажа этигэһэн найдабарияа алдаха ёһогүйт. Ушарынь юуб гэхэдэ, би Павел газар дэлхэй дээрэ бүхы амитадта номногдоһон тэрэ Һайн Мэдээсэлэй зарасань болооб.

Һүзэглэгшэдэй бүлгэмэй албатан Павелай ажал

²⁴ Мүнөө би таанадай түлөө зоболон эдлэжэ байхадаа жаргалтай байнаб, ушарынь ямар бэ гэхэдэ, Христосой бэень болохо һүзэглэгшэдэй бүлгэмэй түлөө би Христостол адляар зобоноб, тиихэдээ дутуу зоболонгуудые хүсэлдүүлжэ байнаб.

^25-26 Бурхан намайе һүзэглэгшэдэй бүлгэмэй алба хэгшээр табяад, таанадай һайн һайханай түлөө Бурханай үгые гүйсэд номнохо ажал даалгаа. Тэрэ Бурханай үгэ үнгэрһэн үе сагта хүн түрэлхитэнһөө далда байгаа, харин мүнөө Бурханай зондо элирхэйлэгдээ.

²⁷ Энэ нюусаяа Бурхан өөрынгөө хүнүүдтэ мэдүүлхэ гэжэ түсэблэжэ байна, гэхэтэй сасуу энэ үнэтэй ба алдарта нюусань бүхы хүнүүдтэ юм. Тэрэ нюусань – Христос таанадай досоо гэһэн удхатай, таанад Бурханай алдарые хубаалсахат гэһэн удхатай юм.

²⁸ Тиимэһээ бидэ Христосые хүн бүхэндэ номножо байнабди. Иисус Христостой нэгэдэһэн хүн бүхэниие Бурханай урда байлгахын тула бидэ бүхы ухаан бодолоороо тэдэниие һурганабди, идханабди.

²⁹ Тэрэ бүхэнэй тулада би Христосой үгэжэ байһан, минии зосоо ажаллажа байһан агуу хүсые ашаглан оролдосотойгоор хүдэлжэ байнаб.