Галадуудта 4 - Шэнэ Хэлсээн

Таанар зарасанар бэшэ, харин Бурханай үхибүүд гээшэт

¹ Уг залгамжалагша балшар үхибүүн ябахадаа бүхы юумэнэй эзэн байбашье, зарасаһаа юугээрээшье илгардаггүй юм.

² Тиимэһээ Эсэгын тогтооһон саг болзор хүрэтэр тэрэ үхибүүн даалгагдаһан хүнүүдэй болон гэрэй захирагшын харууһа доро байдаг.

³ Бидэшье бага балшар наһандаа энэ дэлхэйн эмхи гуримгүй хүсэнүүдэй мэдэлдэ ороод байгаабди.

^4-5 Харин саг болзорой ерэхэдэ, эхэнэрһээ түрэһэн Хүбүүгээ Бурхан эльгээбэ. Хуулиин эрхэ мэдэлдэ байһан хүнүүдые абархын тула, Бурханай найдуулһан юумэнэй уг залгамжалагшад болгохын тула түлөөһэ үгэжэ, эльгээһэн тэрэ Хүбүүниинь Хуулиин ёһоор ажамидаржа байгаа бэлэй.

⁶ Таанадай Бурханай уг залгамжалагшад болоһон хадатнай, Бурхан таанадта: «Аба, Эсэгэ», – гэжэ ооглоһон Хүбүүнэйнгээ Һүлдые эльгээгээ.

⁷ Иихэдээ ши зараса бэшэ, харин Христосоор дамжан, Бурханай хүбүүниинь, уг залгамжалагшань болобо гээшэш.

Павел галадуудта һанаагаа зобоно

⁸ Урдань таанад Бурханиие мэдэхэгүй байһан дээрэһээ үнэн дээрээ бурхад бэшэ «бурхадуудта» алба хэжэ байгаа бэлэйт.

⁹ Мүнөө таанад Бурханиие мэдэһэн аад лэ, тодорхойлон хэлэбэл, Бурханай таанадые мэдэһэн хойно таанад яагаад һүр хүсэгүй, ахир тулюур хүсэнүүдтэ дахин бусабат, тиигээд тэдэндэ алба хэхэеэ һанабат?

¹⁰ Таанад шажанай тусхай һайндэрнүүдые тэмдэглэн үнгэргэнэт.

¹¹ Танай дунда дэмы һурган номножо ябаа гээшэ гүб гэжэ би һанаагаа зобоноб.

¹² Аха дүүнэрни, намдал адли Хуулиин мэдэлһээ мултаран гарыт гэжэ би гуйнаб, юундэб гэхэдэ, би Хуулиин мэдэлһээ гаран, таанадтал адли хүн болоо һэнби. Таанад намайе огто гомдоогоогүй ха юмта.

¹³ Үбшэн ядуу байхадаа анха түрүүшынхиеэ таанадта һургаал номноһыемни таанад һанана ёһотойт.

¹⁴ Үбшэн ядуу байхадамни таанад һэжэглэнгүй, намайе өөһэдһөө түлхингүй, Бурханай Эльгээмэл мэтэ, Иисус Христостол адляар угтажа абаа бэлэйт.

¹⁵ Урматнай хосороо гээшэ гү? Тэрэ үедэ таанар нюдөөшье хайрлангүй, таһа татажа гаргаад, намда үгэхөөр бэлэн байгаа һэнта гэжэ би гэршэлнэб.

¹⁶ Таанадта үнэн зүбые номножо байһан дээрэһээ дайсантнай болобо гүб?

¹⁷ Тэдэ хүнүүд таанарта муу һанана, таанад тухай һанаагаа зобоһон хэбэр үзүүлхэ гэһэн хара һанаатай байна. Тэдэнэр бидэнэй эб таһалаад, анхаралыетнай өөһэдтөө хандуулха һанаатай юм.

¹⁸ Гансашье минии таанадтай суг байха сагта бэшэ, мүн хододоо нам тухай һонирхожо байбалтнай ехэ һайн байгаа.

¹⁹ Үхибүүдни, Христосто һүзэглэжэ байһантнай эли болохын тула би түрэжэ байһан эхэнэртэл адли зобожо байнаб, найдажа байнаб.

²⁰ Мүнөө таанадай дунда байбал, таанадтай ондоохоноор хөөрэлдэхэ байгааб, харин эндэһээ таанадтай юу хэхэеэ ойлгохоёо болёод байнаб.

Агарь Сарра хоёр болбол хоёр хэлсээнүүдтэл адли юм

²¹ Хуули сахихые һанаһан таанар мүнөө намда хэлэжэ үгыт, таанад Хуули гүйсэд ойлгоно аалта?

²² Абраһам хоёр хүбүүтэй байгаа: нэгыень зараса эхэнэр түрөө, нүгөөдыень сүлөөтэй эхэнэр түрөө гэжэ тэрэ Хуули соо бэшээтэй юм.

²³ Зараса эхэнэрһээ гараһан хүбүүниинь хүнүүдэй шиидхэбэреэр түрөө, харин сүлөөтэй эхэнэрһээ гараһан хүбүүниинь Бурханай найдуулһан ёһоор түрөө бэлэй.

²⁴ Энэ ушар гүнзэгы удхатай юм: эдэ хоёр эхэнэрнүүд хоёр хэлсээнүүдтэл адли бшуу. Синай хада дээрэ үгтэһэн нэгэдэхи хэлсээниинь Хуули дээрэ үндэһэлнэ. Энэ хэлсээн зараса Агарьдал адли, барлагуудай хэлсээн юм.

²⁵ Агарь гэжэ Аравида оршодог Синай хада нэрлэдэг юм. Энэнь дарлалта доро байһан мүнөө үеын Иерусалим хотые бүхы хүн амитантайнь тэмдэглэдэг.

²⁶ Харин тэнгэриин Иерусалим эрхэ сүлөөтэй юм. Тэрэ Иерусалим бидэнэй эхэ гээшэ.

²⁷ Тэрээн тухай Нангин Бэшэгтэ иигэжэ хэлэгдэнэ: «Үхибүү түрөөгүй, үри хүүгэдгүй эхэнэр, хүхин баясыш! Үхибүү түрэхын зоболон мэдэрээгүй эхэнэр, хүхииш, баярлыш! Юуб гэхэдэ, хадамда гараагүй эхэнэр хадамтай эхэнэртэ ороходоо тоогүй олон үхибүүтэй байха».

²⁸ Аха дүүнэрни, таанад баһа Исаагтал адли Бурханай найдуулһан ёһоор түрөө гээшэт.

²⁹ Тиихэдэ хүнүүдэй хэлсээгээр түрэһэн хүбүүн Бурханай найдуулгаар түрэһэн хүбүүе яажа хашан мүрдөө һэм, тиигэжэл мүнөө таанадыешье хашажа байна.

³⁰ Нангин Бэшэг соо энээн тухай: «Барлаг эхэнэрэй хүбүүн сүлөөтэй эхэнэрэй хүбүүнтэй хамта уг залгамжалхагүйн тула ши барлаг эхэнэрые хүбүүнтэйнь намна», – гэжэ бэшэгдэнхэй.

³¹ Тиимэһээ, аха дүүнэрни, бидэ зараса эхэнэрэй бэшэ, харин сүлөөтэй эхэнэрэй үхибүүд гээшэбди.