Галадуудта 3 - Шэнэ Хэлсээн

Этигэл һүзэгтэй байха гү, али Хуули сахиха гү?

¹ Ай, мунхаг тэнэг галадууд! Хэн таниие эльбэдэбэ гээшэб? Минии номноходо хэрээһэндэ саазалагдаһан Христосые таанад нюдөөрөө хаража байһандал байгаа бэшэ һэн гүт?

² Таанад Хуули сахижа байһан дээрэһээ гү, али Христосто этигэһэн дээрэһээ Нангин Һүлдэдэ хүртэбэ гүт гэжэ би таанадһаа һураха һанаатай байнаб.

³ Нангин Һүлдөөр дахуулжа ябаһан аад, мүнөө махабад бэедээ татуулаа гүт? Тиихэдээ таанад иимэ балар мунхаг хүнүүд гээшэ гүт?

⁴ Али таанадтай ушарһан бүхы юумэн дэмы үнгэрөө гээшэ гү? Дэмы үнгэрөөгүйл байгаа даа!

⁵ Хуули сахижа байһан дээрэһээтнай бэшэ, харин Христосто этигэһэн дээрэһээтнай Бурхан таанадта Нангин Һүлдые хайрлажа, гайхамшагта үйлэ хэрэгүүдые бүтээгээ юм.

⁶ Энээндэл адляар Абраһамай Бурханда этигэхэдэ, Бурхан тэрэниие үнэн сэдьхэлтэн гэжэ тоолоо һэн.

⁷ Абраһамдал адли Бурханда һүзэглэдэг зон Абраһамай үри һадаһад гэжэ таанар мэдэжэ байгты.

⁸ Арадуудые этигэлээрнь Бурхан аршалан сүлөөлхэ юм гэжэ Нангин Бэшэгтэ үни гэһээр уридшалан бэшэгдэһэн байна. Тэндэ Абраһамда: «Бурхан шамаар дамжуулан, бүхы арадуудые абарха», – гэжэ хэлэгдэһэн байна.

⁹ Тиимэһээ Бурханда һүзэглэһэн зон Абраһамтай хамта үршөөгдэхэ.

¹⁰ Харин Хуули сахижа аршалагдахаб гэжэ һанаһан хүн бүхэн хэһээгдэхэ. Юундэб гэхэдэ, «Хуулиин зүйл бүхэниие үргэлжэ гүйсэдхэжэ байгаагүй хүн бүхэн хэһээгдэхэ», – гэжэ Нангин Бэшэгтэ хэлээтэй байдаг.

¹¹ Хуули сахижа байһанаараа хэншье Бурханай абарал үршөөлдэ хүртэхэгүй, юундэб гэхэдэ, Нангин Бэшэгтэ: «Үнэн сэдьхэлтэн этигэлээрээ амидарха», – гэжэ бэшэгдэнхэй юм.

¹² Хуули гээшэмнай һүгэдэлгэ бэшэ, тиимэһээ тэндэ: «Хуулиин зүйл бүхэнииел гүйсэдхэдэг хүн амидарха», – гэжэ хэлэгдэнэ.

¹³ Дээрэмнай бууха ёһотой байһан Хуулиин хэһээлтэһээ бидэниие Христос аршалжа, тэрэ хэһээлтые өөр дээрээ даажа абаһан юм. Тиимэһээ Хуули соо баһа иигэжэ бэшэгдэһэн байна: «Модондо үлгэжэ саазалуулһан хүн хараалда хүртөө».

¹⁴ Иисус Христосоор дамжан найдуулагдаһан Нангин Һүлдые этигэлээрээ тогтоожо абахынь тула Абраһамай үршөөл хайра мүнөө бүхы арадуудта үгтэбэ гээшэ.

Бурханай найдуулга ба Хуули тухай

¹⁵ Аха дүүнэрни! Юрэ хэлэбэл, хүнэйшье бэшээд орхиһон һүүлшын захяае хэншье хубилгажа шадахагүй юм.

¹⁶ Харин Абраһамда, тэрэнэй үридэ Бурхан найдуулга үгэһэн байгаа. Үри хүүгэдтэш гэжэ хэлэгдээгүй, харин үридэшни гэжэ нэгэл хүн тухай хэлэгдээ, тиин тэрэ нэгэнь – Христос гээшэ.

¹⁷ Христос тухай хэлсээе Бурханай баталһан сагһаа дүрбэн зуун гушан жэл үнгэрһэн хойно бии болоһон Хуули энэ хэлсээе болюулха аргагүй, тиимэһээ Бурханай найдуулгань хүсэндөө үлэбэ гэжэ би хэлэнэб.

¹⁸ Юундэб гэхэдэ, хэрбээ уг залгамжалга Хуулиин ёһоор үгтэдэг һаа, найдалга хэрэггүй байгаа. Гэбэшье Бурхан Абраһамые найдуулһан ёһоороо шагналдаа хүртөөгөө ха юм.

¹⁹ Юундэ Хуули үгтэһэн байгааб? Абраһамай үри бэеын ерэхэ гэжэ Бурханай найдуулһан саг хүрэтэр гэмтэ ябадал юун бэ гэжэ ойлгожо байхын тула энэ Хуули үгтэһэн байна. Энэ Хуули хүн зондо Эльгээмэлээр болон зууршалагшаар дамжуулан үгтэһэн байна.

²⁰ Теэд Бурхан гансаараа ха юм, тэрэ зууршалагшые хэрэглэдэггүй юм.

²¹ Иихэдээ Хуули Бурханай найдуулга буруушаана гү? Үгы даа! Хэрбээ Хуули хүниие абарха аргатай байбал, Хуули гүйсэд сахидаг хүн бүхэн үнэн сэдьхэлтэн болохо һэн.

²² Гэбэшье хүн бүхэн нүгэл шэбэлдэ унаад байна гэжэ Нангин Бэшэг соо хэлэгдэнэ. Энэ бэшэгдэһэн бүхэнэй ушарынь гэхэдэ, Иисус Христосто һүзэглэһэн бүхы зон этигэлээрээ Бурханай найдуулһые хүлеэжэ абаха байна.

²³ Этигэлэй сагай ерээдүйдэ, этигэл һүзэгэй бидэндэ нээгдэтэр бидэ Хуулиин эрхэ мэдэлдэ ороод байгаабди.

²⁴ Иихэдээ Хуули гээшэмнай этигэл һүзэгөөрнай абардаг Христосто этигэхыемнай бидэниие бэлдэһэн шэрүүн һургагша байгаа гээшэ.

²⁵ Тиимэһээ этигэлэй сагай ерэхэдэ бидэ энэ шэрүүн һургагшын мэдэлһээ мултаран гараабди.

²⁶ Мүнөө таанад булта Иисус Христосто һүзэглэһэн этигэлээрээ Бурханай үхибүүд гээшэт.

²⁷ Иисус Христосой нэрэ алдараар уһаар арюудхуулһан зон, таанад булта Иисус Христостой нэгэдэбэ гээшэт.

²⁸ Тиимэһээ мүнөө еврейнүүдшье, бусад арадуудшье илгаагүй, барлагуудшье, сүлөөтэйшүүлшье илгаагүй, эрэшүүлшье, эхэнэрнүүдшье илгаагүй. Таанад булта мүнөө нэгэн адли боложо, Иисус Христостой нэгэдэбэт.

²⁹ Хэрбээ Христостой нэгэдээд байбал, таанад Абраһамай үри һадаһад гээшэт, тиигээд Абраһамда найдуулһан бүхэниие залгамжалжа абахат.