Филиппынхидтэ 2 - Шэнэ Хэлсээн

Христос номгон даруу, тиихэдээ агууехэ юм

¹ Христос таанадые урмашуулжа, хайра дурань һанааетнай заһадаг, Бурханай Һүлдэ таанадые нэгэдхэдэг юм бол, таанадай бэе бэеэ анхаржа, хайрлажа ябадаг юм бол,

² таанад нэгэ һанал бодолтой, бэе бэедээ хайра дуратай, һанал нэгэн, бодол нэгэн байжа, намайе бүрин баяр жаргалтай болгыт даа.

³ Юумэ хэхэдээ, өөр тухайгаал бодоод бү ябагты, али хүнэй магтаалда хүртэхын лэ тула оролдолго бү гаргагты. Харин даруу номгон байгты, бусад зониие өөрһөө дээгүүр бодожо байгты.

⁴ Гансал өөһэдынгөө бэшэ, харин бусадайнгаа һайн һайханай түлөө һаналаа табижа байгты.

⁵ Таанад Иисус Христостол адли һанал бодолтой байгты:

⁶ Тэрэ анханһаа Бурханай шанартай байһан аад, Бурхантай нэгэ зиндаада байха ёһотойб гэжэ өөр тухайгаа бодоогүй юм.

⁷ Харин орондонь хамаг эрхэ түрэеэ тэрэ дуратайгаар орхёод, зарасын дүрсэ дүрсэлжэ, маанадтал адли болон, хүн түхэлтэй мүндэлбэ.

⁸ Тэрэ номгон даруу байгаа, үхэн үхэтэрөө, хэрээһэн дээрэ үхэтэрөө Бурханай үгэ дууладаг байгаа.

⁹ Тиимэһээ Бурхан тэрэниие дээгүүр үргэжэ, бусад алдарнуудһаа ушаргүй үндэр нэрэ түрэдэ хүртөөбэ.

¹⁰ Тиимэһээл Иисусай алдарта нэрэ түрэдэ дээдэ огторгойн, газар дэлхэйн, доодо тамын амитан бүхэн мүргэн һүгэдэхэ,

¹¹ тиигээд Эсэгэ Бурханай алдар солодо, Иисус Христос болбол Дээдын Эзэн юм гэжэ Хүн бүхэн айладхажа байха.

Энэ дэлхэйн гэрэл туяа болохот

¹² Инаг хайрата нүхэдни, таанадтайгаа суг байхадамни, үгыемни ходо дууладаг һэнта. Теэд мүнөө хажуудатнай үгы байхадамни, бүришье һайнаар үгыемни дуулажа байха ёһотойт. Гүйсэд абарагдахын тула һүрдэн һүгэдэн ажаллажа байгты.

¹³ Ушарынь гэхэдэ, Бурхан өөрөө сэдьхэлдэтнай хүсэлнүүдые бадараадаг, хэхэ ёһотой юумэеэ хэжэ байха тээшэ таанадые хүтэлдэг юм.

^14-16 Ямаршье гэмгүй, арюун сэбэр, эрхим һайн Бурханай үхибүүдынь байхын тула таанад юушье хэхэдээ бү гэмэрэлдэгты, арсалдаа бү гаргагты. Забхай зальхай, нүгэл шэбэлтэй зоной дунда амидархадаа амидарал хайрладаг мэдээсэлые хатуугаар баримталан, таанад тэдэ зоной дунда тэнгэридэ гэрэлтэжэ байһан одо мүшэдтэл адли яларжа толоржо байха ёһотойт. Тиигэбэлтнай Христосой заларан ерэхэ үдэр би таанадаар бахархан омогорхохо шалтагаантай байхаб, бүхы оролдолгонуудни, үйлэ хэрэгүүдни дэмы үнгэрөөгүй гэжэ мэдэхэлби.

¹⁷ Танай этигэл һүзэгтнай, албантнай Бурханда үргэгдэһэн үргэлдэ адли юм. Тэрэ үргэлтэйтнай хамта миниишье шуһан үргэл болон адхарха ёһотой байжа магадгүй. Тиигэбэл би та бүхэнтэй хамта баярлажа байнаб.

¹⁸ Тон тиигэжэл таанадшье намтай суг баярлаха ёһотойт.

Тимофей Епафродит хоёр

¹⁹ Таанад тухай мэдээсэл абажа өөрыгөө урмашуулха дуратай байнаб. Тиимэһээ Дээдын Эзэн Иисусай эрхэ мэдэлээр таанадта һаядаа Тимофейе эльгээхэб гэжэ найданаб.

²⁰ Минии хажууда Тимофейһээ ондоо хэншье тиигэжэ ехээр таанадта һаналаа табижа ябадаггүй юм.

²¹ Бусад зон бүгэдөөрөө Иисус Христосто һайшаагдаха юумэ бүтээхэ тухай огто бодонгүй, өөрынгөө амидаралай түлөө оролдожо ябадаг.

²² Тимофейн үнэн шударгуу байһанаа баталһыень, тэрэ бидэ хоёрой эсэгэ хүбүүн хоёртол адляар хамта Һайн Мэдээсэл дэлгэрүүлхын түлөө хүдэлжэ байһые таанад өөһэдөө мэдэнэт.

²³ Намтай юунэй ушарха тухай мэдэхэтэйгээ сасуу би таанадта тэрэниие эльгээхэб гэжэ найданаб.

²⁴ Би өөрөөшье Дээдын Эзэнэй эрхэ мэдэлээр һаядаа таанадта ошохоб гэһэн бата этигэлтэй байнаб.

²⁵ Намда туһалхаар таанадай эльгээһэн, намтай хамта эндэ ажаллажа, тэмсэжэ байһан манай һүзэглэгшэ дүү Епафродитые бусаажа таанадта ябуулха хэрэгтэй гэжэ би бодобоб.

²⁶ Тэрэ та бүгэдые харахаяа аргагүй ехээр хүсөө, өөрынь үбдэһэн тухай таанадай дуулаһанда тон ехээр шаналаа.

²⁷ Тэрэ үнэхөөрөө үбдэжэ, үхэхэеэ байгаа. Гэбэшье Бурхан тэрэниие хайрлан үршөөгөө; намайешье баһа үшөө ехэ гашуудал зоболондо дарагдахаһаа хамгаалан үршөөгөө.

²⁸ Тэрэниие хараад таанад дахин баясахат, тиигээд бишье голхорхоёо болихоб гэһэн бодолтойгоор тэрэниие таанадта бушуухан ябуулбаб.

²⁹ Дээдын Эзэнэй тэрэ һүзэглэгшые баяртайгаар угтажа абагты. Тэрээндэл адли хүнүүдые бултыень хүндэтэйгөөр угтажа байгты.

³⁰ Епафродит Христосой түлөө ажаллажа байхадаа үхэн алдаа, таанадай хэхэ аргагүй юумэ намда хэжэ, тэрэ ами наһаяа хайрлаагүй юм.