Филимондо 1 - Шэнэ Хэлсээн

Амаршалга

^1-3 Маанадтай хамта хүдэлдэг эрхим хүндэтэ Филимон, шамда Иисус Христосой түлөө түрмэдэ һууһан Павел ба һүзэглэгшэ Тимофей хоёр бэшэнэ. Манай Бурхан Эсэгэһээ болон Дээдын Эзэн Иисус Христосһоо үршөөл хайра ба амгалан тайбаниие айладханабди. Гэртэшни суглардаг һүзэглэгшэдэй бүлгэмдэ, хүндэтэ Апфи дүүдэмнай, бидэнтэй хамта алба хэдэг Архипда мэндые хүргөөрэй.

Филимоной хайра дуран ба һүзэг этигэл

⁴ Зальбаралга бүхэндөө шамайе дурдажа, Бурхандаа баясхалан хүргэжэ байдагби.

⁵ Бурханай бүхы хүнүүдтэ хайра дуратай байһан тухайшни, Дээдын Эзэн Иисус Христосто һүзэглэжэ байһан тухайшни дуулажа байдагби.

⁶ Бидэ хоёр һүзэглэгшэдэй хани нүхэсэл Иисус Христостой нэгэдэһэн манай амидаралда үршөөл бүхэнэй гүнзэгы удхые мэдэрхэдэшни туһалха тухай зальбаржа байдаг хүнби.

⁷ Хүндэтэ дүүмни, хайра дураншни намайе ехэтэ баясуулаа, аргагүй урмашуулаа. Ши Бурханай бүхы хүнүүдэй зүрхэ сэдьхэлыень амаруулаа ха юмши.

Онисимай түлөө гуйлта

⁸ Тиимэ ушарһаа би Христосоор ахашни болоһон хадаа хэхэ ёһотой юумэеэ хэ гэжэ захирха эрхэтэйшье һаа,

⁹ шамда дуратай байһан дээрэһээ шамайе миин лэ гуйжа байнаб. Мүнөө Иисус Христосой түлөө түрмэдэ һууһан би Павел гуйжа байнаб.

¹⁰ Христосто этигээд, намаар заалгажа хүбүүмни болоһон Онисимай түлөө би шамайе гуйнаб. Түрмэдэ һуужа байхадаа би тэрээндэ ухаа заадаг эсэгэнь болооб.

¹¹ Нэгэ сагта Онисим шамда хэрэггүй байгаа, харин мүнөө сагта тэрэ шамдашье, намдашье хэрэгтэй юм.

¹² Мүнөө би тэрэниие шамда гэдэргэнь ябуулнаб. Би тэрээндэ аргагүй дуратайб, ши тэрэниие һайнаар угтажа абаарай.

¹³ Һайн Мэдээсэлые номноһонойнгоо түлөө түрмэдэ һуухадаа, шинии орондо намда туһалжа байхаарнь тэрэниие хажуудаа байлгаха дуратайл байгааб.

¹⁴ Гэхэдээ би шинии зүбшөөлгүйгөөр юумэ хэхэ дурагүй байгааб. Баалалтагүйгөөр, харин өөрынгөө һайн дураар һайн юумэ хэбэлшни намда һайшаагдаха байгаа.

¹⁵ Шамтай ходо байхын тула Онисим саг зуура шамһаа ондоо тээшээ ошоһон байжа магадгүй.

¹⁶ Мүнөө тэрэ ганса барлаг бэшэ, харин барлагһаа үлүү ехэ юм: тэрэ хайрата дүү гээшэ. Мүнөө би тэрээниие ехэл һайшаанаб. Харин хүн байһан хубидаа, Дээдын Эзэнээр дүүшни гэжэ нэрлэгдэһэн хубидаа тэрэ шамда бүришье хайратай байхал.

¹⁷ Ши намайе нүхэрни гэжэ һанажа байбал, намайе угтажа байһантай адляар лэ тэрэниие угтажа абаарай.

¹⁸ Хэрбээ тэрэ шамда ямар нэгэ муу юумэ хэжэ, юумэ үритэй байбалнь, үрииень намда тоогоорой.

¹⁹ Тэрэ үрииень түлэхэб гэжэ би, Павел, өөрынгөө гараар бэшэжэ байнаб. Ши өөрөө ами наһаараа намда үритэй һэнши гэжэ би шамда һануулнагүйб.

²⁰ Хайрата дүүмни, Христосоор дүүмни гэжэ нэрлэгдэһэн хадаа Дээдын Эзэнэй түлөө энэ үлзытэй һайн хэрэг бүтээжэ, тэрээгээрээ намайе баярлуулаарай, һаналыемни тэгшэлүүлээрэй даа.

²¹ Хэлэһэн юумыемни хэхэш гэһэн этигэлтэйгээр эдэ бүхэниие шамда бэшэжэ байнаб. Хэлэһэнһээмни үлүүшье юумэ хэжэ болохош гэжэ би мэдэжэ байнаб.

²² Тиихэ үедөө намда нэгэ таһалга бэлдэжэ байгаарай. Та бүхэнэй зальбаралые Бурхан дуулажа, намайе таанадта эльгээхэ гэжэ би найданаб.

Һүүлшын амаршалга

²³ Иисус Христосой түлөө намтай суг түрмэдэ һуужа байһан Епафрас, намтай хамта хүдэлжэ байһан

²⁴ Марк, Аристарх, Димас, Луканар шамда мэндые хүргэжэ байна.

²⁵ Дээдын Эзэн Иисус Христосой үршөөл хайра та бүхэнтэй оршожо байхань болтогой.