Фессалоникиинхидтэ 1-дэхи 5 - Шэнэ Хэлсээн

¹ Аха дүүнэрни, эдэ бүхэнэй ушарха саг, болзор тухай таанадта бэшэһэнэй хэрэггүй.

² Дээдын Эзэн ерэхэдээ һүниндөө орожо ерэһэн хулгайшандал хүлеэгээгүй байхада ерэхэ юм гэжэ таанад өөһэдөө яһала һайн мэдэжэ байнат.

³ Хүнүүдэй «амгалан тайбан, аюулгүй байнабди» гэжэ байхада тэдэниие гэнтэ һүйдхэхэ. Тэрэ һүйдхэл болбол түрэхөө байһан эхэнэрэй үбдэдэг мэтэ гэнтэ эхилхэ, тиимэһээ хүнүүд тэрээнһээ зайлажа шадахагүй.

⁴ Харин таанад, аха дүүнэрни, харанхы бүрэнхы соо байна бэшэ ха юмта. Тиимэһээ тэрэ Үдэр болбол хулгайшан мэтэ хүлеэгээгүй байхадатнай ерэхэ ёһогүй.

⁵ Таанад булта гэрэл туяа бэдэрһэн, үдэрэй харьяалай хүнүүд гээшэт. Бидэ болбол һүниин, харанхы бүрэнхыгэй хүнүүд бэшэбди.

⁶ Тиимэһээ бидэ бэшэ зондо адли унтаха ёһогүйбди. Бидэ һэргэлэн, эрүүл байха ёһотойбди.

⁷ Юундэб гэхэдэ, һүниндөөл хүнүүд унтадаг, һүниндөөл хүнүүд һогтотороо уудаг юм.

⁸ Гэхэдээ бидэ үдэрэй харьяалай хүнүүд хадаа эрүүл байха ёһотойбди. Бидэ һүзэг ба дуран хоёроо хуяг мэтэ үмдэжэ, абарагдаха найдалгаа дуулга мэтэ үмдөөд байха ёһотойбди.

⁹ Бурхан хэһээхын тула бэшэ, харин Дээдын Эзэн Иисус Христосоор дамжан абархын тула бидэниие шэлэжэ абаа юм.

¹⁰ Иисус бидэнэй орондо үхөө, тиимэһээ тэрэнэй ерэхэдэ бидэ амидышье һаа, наһа бараһаншье һаа, тэрээнтэй хамта амидарха ёһотойбди.

¹¹ Тиимэһээ таанад бэе бэеэ урмашуулдаг, бэе бэедээ туһалдаг заншалаа үргэлжэлүүлжэл байгты.

Һүүлшын захяа заабари ба амаршалга тухай

¹² Аха дүүнэрни, таанадай дунда ажаллажа, Бурханда һайшаагдаха ажамидаралда таанадые хүтэлжэ, һургажа байһан хүнүүдые хүндэлжэ байгты гэжэ бидэ гуйнабди.

¹³ Хэжэ байһан ажалайнь түлөө тэдэнээ хүндэлжэ, тэдээндээ дуратай байгты. Өөһэд хоорондоо амгалан тайбан байгты.

¹⁴ Аха дүүнэрни, залхуу хүнүүдтэ ухаан заагты, зориггүй хүнүүдые урмашуулжа байгты, һулахан хүнүүдтэ дэмжэлгэ үзүүлэгты, хүн бүхэндэ ехэ тэсэбэритэй хандажа байгты гэжэ бидэ баһа гуйха байнабди.

¹⁵ Таанадта муу юумэ хэхэдэнь харюудань муу юумэ бү хэгты, харин бэе бэедээ, хүн бүхэндэ ходо һайн юумэ хэхые оролдогты.

¹⁶ Ходо баяртай байгты.

¹⁷ Ходо зальбаржа ябагты.

¹⁸ Ямаршье нүхэсэлдэ бүхы юумэнэй түлөө бүгэдэндэ баясхалан хүргэжэ байгты. Иисус Христосой харуулһан ёһоор тиимэ юумэ хэжэ байхыетнай Бурхан таанадһаа хүсэжэ байна.

¹⁹ Нангин Һүлдынгөө гэрэлыень бү унтараагты.

²⁰ Уридшалан хэлэгдэһэн юумэнүүдые бү доромжологты.

²¹ Бүхы юумые шалгажа үзөөд, һайнииень баримталжа ябагты.

²² Элдэб гэмтэ ябадалнуудые хэнгүй байхые хэшээгты.

²³ Бидэндэ амгалан тайбаниие үршөөжэ байһан Бурхан таанадые бүримүһэн арюун нангин болгог, Дээдын Эзэн Иисус Христосой ерэтэр танай һанал бодол, һүнэһэ һүлдэ, махабад бэе бүрин бүтэнөөрөө ямаршье дутуу дутагдалгүй хадагалагдажа байг.

²⁴ Таанадые дуудаһан Бурхан найдабаритай юм хадаа тэрэ бүхэниие бэелүүлхэ.

²⁵ Аха дүүнэрни, бидэнэй түлөө баһа зальбаржа байгты.

²⁶ Бүхы һүзэглэгшэдые арюунаар таалан амаршалагты.

²⁷ Бүхы һүзэглэгшэдтэ энэ бэшэгые уншажа үгэгты гэжэ би Дээдын Эзэнэй нэрэ түрөөр гуйнаб.

²⁸ Дээдын Эзэн Иисус Христосой үршөөл хайра та бүхэнтэй оршожо байхань болтогой.