yuḥanna 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تامغارت لّي‑يتياماژن ف‑زّنا

¹ ءيمّا ياسوع ءيدّا س‑وورير ن‑زّيتون.

² زيكّ صباح ءيكشم‑داغ س‑تگمّي ن‑ربّي، مونّ‑د فلّاس مدّن گّوتنين. ءيگاور غين ار‑تن‑يسّلماد.

³ اشكين‑د سرس كرا ن‑يمسلمدن ن‑شّرع د‑يفاريسين، اوين‑اس‑د يات‑تمغارت لّي‑د‑ومژن ف‑زّنا. سّبيدّن‑تّ‑يد غ‑وامّاس ن‑مدّن،

⁴ ءينين ءي‑ياسوع: «واي‑امسلمد، ها‑تامغارت‑اد نومژ‑تّ‑يد ف‑زّنا.

⁵ يوصّا‑ياغ موسا غ‑شّرع ا‑نكّات زوند ختاد س‑يژران ارد تمّت. ءيمّا كيّي ما‑را‑فلّاس‑تينيت؟»

⁶ ساولن ديدس غمكاد باش ا‑فلّاس‑امژن كرا ن‑واوال ما‑س‑ا‑ياس‑صراضن. ءيمّا ياسوع ءيكُنا ار‑يتارا س‑وضاض‑نس غ‑واكال.

⁷ زايدن ار‑ت‑سقسان ايلّيغ‑د‑ينم ييني‑اسن: «وانّا گيگون ءور‑جّو‑يسكيرن دّنوب ا‑يزوور ا‑ن‑فلّاس‑يلوح اژرو.»

⁸ ءيكنو‑داغ ار‑يتارا غ‑واكال.

⁹ ءيمّا نتني، لّيغ سفلدن ءي‑غونشكان بدون ار‑تّيدون يان س‑يان، زغ‑يمقّورن ار ءيمژّيين، ايلّيغ ءور‑يقاما غير ياسوع، د‑تمغارت‑ان ا‑سول‑يبيدّن غ‑لگدّام‑نس.

¹⁰ ءينم‑د ياسوع ييني‑اس: «مانزا‑تن ا‑تامغارت؟ ءيس‑ور‑فلّام‑يحكام يان؟»

¹¹ تيني‑اس‑د: «ءور‑يلّي يان ا‑سيدي.» ييني‑اس ياسوع: «ءولا نكّي ءور‑را‑فلّام‑حكامغ. زايد غيلاد، ا‑ور‑سول‑تسكارت دّنوب.»

لماسيح ءيگا تيفاوت ن‑دّونيت

¹² ءيساول‑داغ ياسوع س‑مدّن ييني‑اسن: «نكّي ا‑يگان تيفاوت ن‑دّونيت. وانّا ديدي ءيتمونون راد‑اس‑تيلي تيفاوت ن‑تودرت، ءور‑را‑سار‑يفتّو غ‑تيلّاس.»

¹³ ءينين‑اس‑د ءيفاريسين: «ها‑كيّي ار‑تاكّات توگّا ف‑يخف‑نّك. ءور‑زگانت توگّا‑ياد.»

¹⁴ ءيرار‑اسن ياسوع: «ءيغ‑اكُّ‑فكيغ توگّا‑ياد ف‑يخف‑ينو هاتي لحقّ اد‑گانت توگّا‑نو، اشكو سّنغ مانيزغ‑د‑وشكيغ ءولا مانيس راد‑دّوغ. ءور‑تسّينم كونّي مانيزغ‑د‑وشكيغ ءولا تسّنم مانيس راد‑دّوغ.

¹⁵ كونّي ار‑تّحكامّ س‑تنباضين ن‑دّونيت‑اد، ءيمّا نكّي ءور‑ا‑تحكامغ ف‑يان.

¹⁶ مراد ءيس‑حكامغ را‑يُغژان لحوكم‑ينو، اشكو ءورد واحدويّي ا‑راد‑حكامغ. ءيلّا‑بدّا ديدي بابا لّي‑يّي‑د‑يوزنّ.

¹⁷ ءيتيارا غ‑شّرع‑نّون ‹ءيغ‑د‑مشاشكانت توگّا ن‑سين ءيناگان تيسّانم ءيس‑يُغژان‑واوال‑نسن.›

¹⁸ ها‑يّي گيغ ءينيگي ن‑يخف‑ينو، ءينيگي ياضني ءيگا‑ت بابا لّي‑يّي‑د‑يوزنّ.»

¹⁹ ءينين‑اس‑د: «مانزا باباك؟» ءيرار‑اسن ياسوع: «ءور‑يّي‑تسّينم ءولا تسّنم بابا. مراد ءيس‑يّي‑تسّنم را‑تيسّانم بابا ءولا نتّا.»

²⁰ كولّو ماياد، ءينّا‑ت ياسوع لّيغ ا‑يسّلماد غ‑تگمّي ن‑ربّي غ‑ودغار لّي‑غ‑يلّا صّندوق. ءور‑ينكير يان ا‑ت‑يامژ، اشكو ءور‑تا‑دي‑تروح تاساعت‑نس.

ءيگّوت ما‑يومنّ س‑لماسيح

²¹ ءيساول‑داغ ياسوع ييني‑اسن: «راد‑دّوغ نكّي، تسيگّلم سري، تمّتم سول غ‑دّنوب‑نّون. ءور‑تژضارم ا‑تدّوم س‑يلّيس راد‑دّوغ.»

²² سقسان مدّن‑ان ن‑ايت‑يودايا ءي‑نگراتسن ءينين: «ماخ ايلّيغ ءينّا ‹ءور‑تژضارم ا‑تدّوم س‑يلّيس راد‑دّوغ›؟ ءيس‑را‑ينغ ءيخف‑نس؟»

²³ ءيزايد ياسوع ييني‑اسن: «كونّي تگام زغ‑واكال، ءيمّا نكّي گيغ زغ‑يگنّا. كونّي تگام وين دّونيت‑اد، ءيمّا نكّي ءور‑گيغ وين دّونيت‑اد.

²⁴ ماياد ا‑ف‑اون‑نّيغ را‑تمّتم غ‑دّنوب‑نّون. ءيغ‑ور‑تومينم ءيس‑گيغ غوالّي بدّا ءيلّان، راد‑نّيت‑تمّتم غ‑دّنوب‑نّون.»

²⁵ ءينين‑اس‑د: «ما‑تگيت كيّي؟» ءيرار‑اسن ياسوع: «نّيغ‑اون‑ت غ‑يسيزوار.

²⁶ ءيگّوت داري ما‑گيگون‑تّينيغ، ييگات داري ما‑ف‑ا‑فلّاون‑تحكامغ. ءيمّا غوالّي‑يّي‑د‑يوزنّ، لحقّ ا‑يگا، د‑مايلّي مي دارس سفلدغ ايد تّينيغ ءي‑دّونيت.»

²⁷ ءيمّا نتني ءور‑سّينّ ءيزد ربّي باباس ايد‑ف‑ا‑يساوال.

²⁸ ءيزايد ياسوع ييني‑اسن: «ار تالّم يوس ن‑بنادم ف‑وگّجدي، غاكودان ا‑را‑تيسّانم ءيس‑گيغ غوالّي بدّا ءيلّان، تيسّانم ءيس‑ا‑ساوالغ س‑ماد‑يّي‑يملا بابا، ءور‑ا‑سكارغ يات زغ‑يخف‑ينو.

²⁹ غوالّي‑يّي‑د‑يوزنّ ءيلّا‑بدّا ديدي. ءور‑يّي‑يفل واحدويّي، اشكو ار‑بدّا‑سكارغ ما‑ت‑يرضان.»

³⁰ لّيغ سفلدن مدّن ءي‑غونشكان، ءيگّوت ما‑سرس‑يومنّ.

لماسيح ا‑يفسين ءي‑مدّن زغ‑يسكراف

³¹ ءيساول‑داغ ياسوع س‑ويلّي سرس ءومنّين غ‑گر مدّن‑ان ن‑ايت‑يودايا ييني‑اسن: «ءيغ‑تزگام غ‑واوال‑ينو، س‑صّاحت ءيمحضارن‑ينو ا‑را‑تگم.

³² را‑تيسّانم لحقّ، د‑لحقّ ا‑راد‑اون‑يفسي زغ‑يسكراف.»

³³ رارن‑اس‑د: «نكُّني نگا تاروا ن‑يبراهيم، ءور‑جّو‑يلّي ماد‑اغ‑يكرسن. ماخ ا‑تّينيت ‹راد‑اون‑يفسي›؟»

³⁴ ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ. كولّو وانّا ءيسكارن دّنوب ءيگا ءيسمگ ءي‑دّنوب.

³⁵ يان ءيگان ءيسمگ ءور‑راد‑بدّا‑يقاما غ‑تگمّي ن‑سيديس، والاينّي يوس ن‑تگمّي راد‑بدّا‑يگ گو‑تگمّي.

³⁶ ءيغ‑اون‑د‑يفسي يوس، س‑لحقّ ءور‑سول‑را‑تيليم غ‑يسكراف.

³⁷ سّنغ ءيزد تاروا ن‑يبراهيم ا‑تگام، ءيمّا كونّي ار‑تّيريم ا‑يّي‑تنغم اشكو اوال‑ينو ءور‑ن‑گيگون‑يوفي مانيغ ا‑يتّيلي.

³⁸ ار‑ساوالغ ف‑ماد‑ژريغ غ‑دار بابا، ءيمّا كونّي ار‑تسكارم ما‑مي‑تسفلدم زغ‑باباتون.»

³⁹ ءينين‑اس‑د: «ءيبراهيم ا‑يگان باباتنّغ.» ءيرار‑اسن ياسوع: «مراد ءيس‑تگام تاروا ن‑يبراهيم را‑تسكارم غمكلّي ءيسكار ءيبراهيم.

⁴⁰ والاينّي ها‑كونّي غيلاد ار‑تّيريم ا‑يّي‑تنغم، نكّي لّي‑اون‑ينّان لحقّ لّي‑مي‑سفلدغ غ‑دار ربّي. ءورد غمكان ا‑يسكر ءيبراهيم.

⁴¹ ءيمّا كونّي ار‑تسكارم زوند باباتون.» رارن‑اس‑د: «ءورد تاروا لّفساد ا‑نگا. يان باباتنّغ كا‑دارنّغ‑يلّان، ا‑ت‑يگان د‑ربّي.»

⁴² ييني‑اسن ياسوع: «مراد ءيس‑يگا ربّي باباتون را‑يّي‑تيريم نكّي، اشكو ءوشكيغ‑د زغ‑ربّي كغ‑د دارس. ءور‑د‑وزنغ ءيخف‑ينو والاينّي نتّان ا‑يّي‑د‑يوزنّ.

⁴³ ماخ ايلّيغ ءور‑ا‑تّفهامّ مايد‑اون‑تّينيغ؟ ءور‑ا‑تّفهامّ اشكو ءور‑ا‑تّيريم ا‑تسفليدم س‑واوال‑ينو.

⁴⁴ وين باباتون ءيبليس ا‑تگام، ار‑تّيريم ا‑تسكارم ما‑يرضان باباتون. ءيگا واد ءينقّان زغ‑يسيزوار، ءور‑جّو‑يسكير س‑لحقّ اشكو لحقّ ءور‑دارس‑يلّي. غاكود نّا‑يسّكاركس ار‑يسكار س‑ما‑گيس‑يلّان، اشكو بو‑تكركاس ا‑يگا، ءيگ باباس ن‑كولّو ما‑يسّكيركيسن.

⁴⁵ ءيمّا نكّي ار‑اون‑تّينيغ لحقّ، ماياد ا‑ف‑ور‑يّي‑تومينم.

⁴⁶ مانوا گيگون ا‑فلّا‑يزّگان كرا ن‑دّنب؟ والاينّي لّيغ ا‑ياون‑تّينيغ لحقّ ماخ ايلّيغ ءور‑يّي‑تومينم؟

⁴⁷ وانّا ءيگان وين ربّي، را‑يسفليد س‑يواليون ن‑ربّي. كونّي ءور‑تگيم وين ربّي، ماياد ا‑ف‑ور‑ا‑تسفليدم.»

ءيلّا لماسيح ءور‑تا‑يلّي ءيبراهيم

⁴⁸ ساولن‑د مدّن‑ان ن‑ايت‑يودايا ءينين‑اس: «ءيس‑ور‑نُغژان ءيغ‑ا‑فلّاك‑نتّيني تگيت گو‑ساميرا ءيكشم‑ك يا‑لّجنّ؟»

⁴⁹ ييني‑اسن ياسوع: «ءور‑يّي‑يكشيم كرا لّجنّ. نكّي ار‑توقّارغ بابا، ءيمّا كونّي ءور‑ا‑يّي‑تّوقّارم.

⁵⁰ ءور‑ا‑سكارغ ف‑ا‑يّي‑توقّارن مدّن، والاينّي ءيلّا يان ءيتحكامن، ييري مدّن ا‑يّي‑توقّارن.

⁵¹ لحقّ اياد، لحقّ ا‑راد‑اون‑ينيغ. وانّا ءيزگان غ‑واوال‑ينو، ءور‑سار‑يمّوت.»

⁵² رارن‑اس‑د مدّن‑ان: «ءيبان گيك غيلاد ءيس‑ك‑يكشم كرا لّجنّ. ءيمّوت ءيبراهيم ءولا لانبيا، ءيمّا كيّي ار‑تّينيت ‹وانّا ءيزگان غ‑واوال‑ينو، ءور‑سار‑يمّوت.›

⁵³ ءيس‑توگُرت باباتنّغ ءيبراهيم ءولا لانبيا لّي‑مّوتنين؟ ماد‑اكُّ‑تغالت ءيس‑تي‑تگيت كيّي؟»

⁵⁴ ءيساول ياسوع ييني‑اسن: «مراد ءيس‑ا‑تالغّ ءيخف‑ينو ءور‑يّي‑يگي يات، والاينّي بابا لّي‑مي‑تّينيم ربّي‑نّون، نتّان ا‑يّي‑يتالغن.

⁵⁵ ءور‑تي‑تسّينم كونّي، والاينّي سّنغ‑ت نكّي. مراد ءيس‑نّيغ ‹ءور‑ت‑سّينغ› ءيكون سّكاركسغ زوند كونّي، والاينّي سّنغ‑ت زگاغ غ‑واوال‑نس.

⁵⁶ ءيفرح باباتون ءيبراهيم لّيغ ءيسّن ءيس‑را‑يژر ءوسّان‑ينو، ءيژرا‑تن ءيفرح باهرا.»

⁵⁷ رارن‑اس‑د‑داغ مدّن‑ان ن‑ايت‑يودايا ءينين‑اس: «كيّي ءور‑تا‑تكّيت سمّوس ءيد‑مراو‑وسگُّاس. ءيس‑تژريت ءيبراهيم؟»

⁵⁸ ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ، لّيغ نكّي ءور‑تا‑يلّي ءيبراهيم.»

⁵⁹ لّيغ سفلدن ءي‑مايان، اسين ءيژران ما‑س‑ا‑ت‑كّاتن، والاينّي ءينتل فلّاسن ياسوع ءيفّوغ زغ‑تگمّي ن‑ربّي.