yahuda 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑وخدّام ن‑ياسوع لماسيح، ياهودا گماس ن‑ياعقوب. ءي‑ويلّي‑ف‑يحنّا ربّي باباتنّغ ءيغر‑اسن‑د، ار‑تن‑يسّنتال ياسوع لماسيح.

² اد‑اون‑تيگات رّحمت د‑سّلامت د‑لحنانت.

المّود لّيمان

³ واي‑ايتما عزّانين، سكرغ ف‑اد‑اون‑ين‑اراغ س‑لفرح ف‑وجنجم لّي‑س‑كولّو‑ننجم نكُّني ديدون، والاينّي ءوفيغ‑ن ءيس‑يّي‑يخصّا اد‑اون‑ين‑اراغ ف‑ا‑كُن‑زّعامغ ا‑تّجاحادم ف‑ولمّود لّيمان ءيزگان لّي‑د‑يسّبايّن ربّي ءي‑يمژلاين‑نس.

⁴ اشكو كشمن‑ين كرا ن‑مدّن س‑گراتون س‑تنتلا. ءيتيارا فلّاسن زغ‑يسيزوار ف‑لحوكم لّي‑را‑فلّاسن‑يضر. نتني ءور‑ا‑توقّارن ربّي. ار‑تفسادن ار‑تّينين ءيزد غمكان ا‑تگا لباراكا ن‑ربّي. رارن تيغوردين‑نسن س‑ياسوع لماسيح، د‑نتّان واحدوت ا‑يگان باب‑نّغ ءيگ سيديتنّغ.

⁵ ريغ اد‑اون‑د‑سّكتيغ مايلّي مي تسفلدم غايد ءيزرين. تسّنم ءيس‑يجّنجم ربّي مدّن‑نس ءيسّوفغ‑تن‑د زغ‑تمازيرت ن‑ميصر، والاينّي تيگيرا ن‑مايان ءيهلك غويلّي ءور‑ومنّين اوال‑نس.

⁶ تسفلدم ف‑لمالايكا لّي‑فّوغنين زغ‑تزدغت‑نسن، ءور قامان غ‑يلّيغ‑تن‑يگا ربّي. تيسّانم ءيس‑تن‑ين‑يحضا ربّي غ‑تيلّاس اگّوگنين ا‑ن‑غين‑تياوكرّافن ار اسّ ءيمقّورن لّحساب لّي‑غ‑را‑فلّاسن‑يوت لحوكم.

⁷ تيسّانم ءيس‑يهلك ربّي تيمدينين ن‑سادوم د‑عامورا د‑تييّاض لّي‑ن‑تاما‑نسنت ف‑سّيبت ن‑شّهوات أُخشنّين لّي‑سكارن، ار‑تفسادن يوتمان ءي‑نگراتسن. ءيقّان‑د مدّن اد‑سوينگيمن ماد‑اسن‑يجران باش ا‑ور‑تياوهلاكن ءولا نتني س‑لعافيت لّي‑ور‑يخسين.

مدّن أُخشنّين

⁸ ءيمّا غيلاد ار‑سكارن ايت‑توارگيوين‑ان غمكان غ‑دارون. ار‑سّيُخشانّ دّات‑نسن، ءور‑ا‑توقّارن غوالّي ءيتحكامن، ار‑رگّمن ايت‑يگنوان.

⁹ ءورد غمكان ا‑يسكر لمالاك ءيمقّورن ميخايل لّيغ ءيمّاغ د‑يبليس ف‑مانوا گيسن ا‑را‑يامژ دّات ن‑موسا. ءور‑يزعم نتّا ا‑يرگم ءيبليس. ءور‑اس‑ينّي ابلا: «ا‑ك‑يسّفسّا ربّي.»

¹⁰ مدّن‑ان ار‑رگّمن غ‑ما‑ور‑سّينّ. ءيمّا غايلّي سّنّ زغ‑يخف‑نسن زوند لوحوش بلا لعاقل، غايان ا‑تن‑يتاوين س‑لهالاك.

¹¹ تاگوضي ا‑راد‑اسن‑ييلي، اشكو ءومژن اغاراس ن‑قاين، زّنزن ءيخف‑نسن اد‑سّكيركيسن زوند بالعام، ار‑تژين د‑ينمغورن ن‑ربّي زوند قوراح. هان غمكلّي ءيتياوهلاك قوراح ا‑راد‑تياوهلاكن ءولا نتني.

¹² ءيركان اد‑گان غ‑دارون لّيغ ا‑ديدون‑تمونون ف‑يمنسيون‑نّون، ار‑شتّان ار‑ضصّان ءي‑نگراتسن بلا‑دا‑تحشامن، ار‑تسالان غير ءيخفاون‑نسن. گان زوند تيمدلا لّي‑غ‑ور‑لّين‑وامان، ار‑تنت‑يدحاي‑واضو. گن زوند ءيسغارن بلا لغلّت غ‑وزمز‑نس، مّوتن ف‑سنات‑توال، اكوفن زغ‑يژوران.

¹³ گن زوند تاضانگيوين ن‑ومدا ءيدووين س‑وكشكوش ن‑تيلّاي‑نسن أُخشنّين. گن زوند ءيتران جلانين غ‑يگنوان، ءيسكر ربّي فلّاسن تيلّاس اگّوگنين ا‑ن‑گيسنت‑بدّا‑قامان.

¹⁴ مدّن‑ان ا‑ف‑يساول اخنوخ لّي‑يگان زغ‑تيس سضيصط تاسوتين غ‑تغوردين ن‑ادام. ءيملا‑ياس ربّي اوال ءينّا: «ژرات سيديتنّغ را‑د‑ياشك، مونّ‑د ديدس كيگان د‑وافضان ن‑يمژلاين‑نس،

¹⁵ باش ا‑يحكام ف‑كولّو مدّن. را‑يهلك كولّو ويلّي سرس رورنين تيغوردين ف‑سّيبت ن‑يسكّيرن‑نسن أُخشنّين لّي‑سكارن س‑لخُشانت لّي‑گيسن‑يلّان، ءولا ف‑كولّو تيرگّام لّي‑س‑ت‑رگمن.»

¹⁶ هان نتني ار‑تنگموگن ار‑تژين ار‑سكارن كولّو ما‑يتّيري ءيخف‑نسن، ار‑سّفورّوگن ار‑تالغن مدّن باش ا‑تن‑شتّان.

¹⁷ واي‑ايتما عزّانين، سوانگماد‑د ءيواليون ن‑يرقّاسن ن‑سيديتنّغ ياسوع لماسيح لّي‑س‑اون‑نّان ف‑ما‑را‑يجرو.

¹⁸ نّان‑اون: «غ‑ووسّان گُّرانين ا‑راد‑د‑اشكين كرا ن‑يطنّاژن. راد‑سكارن س‑لخُشانت لّي‑يتّيري ءيخف‑نسن.»

¹⁹ ءيمّا غيلاد تژرام ءيزد نتني ا‑ياطّون ايتماتن، ار‑سكارن س‑ما‑يتّيري‑وول ن‑بنادم، ءور‑دارسن رّوح لقودوس.

تينباضين لّيمان

²⁰ ءيمّا كونّي اي‑ايتما عزّانين، سّدوسات ءيخفاون‑نّون غ‑ليمان ءيعزّان لّي‑اون‑يفكا ربّي، ار‑تّژالّام غمكلّي‑اون‑يمالا رّوح لقودوس.

²¹ تحضوم ءيخفاون‑نّون غ‑لحنانت ن‑ربّي غيلاد غ‑ا‑تّقلم س‑تودرت لّيخرت لّي‑س‑را‑كُن‑ين‑يشّكشم سيديتنّغ ياسوع لماسيح س‑رّحمت‑نس.

²² حنّوات غ‑وانّا ءيشكّان،

²³ تكّيسم‑د كرا ءي‑لعافيت ار‑تن‑تّفوكّوم. تحنّوم غ‑وييّاض تيكساضم زغ‑ماد‑سكارن، ار‑تّكرهوم ءولا تيملسيت نّا‑يمسلن س‑يركان ن‑دّات.

^24-25 ءيمّا غوالّي ءيژضارن ا‑كُن‑ينجّا باش ا‑ور‑تضرم، ءيسّلكم‑كُن‑ين س‑لگدّام لّمجد‑نس س‑لفرح ءيگّوتن بلا گيگون ءيلّا كرا لّعيب، نتّان ا‑مي‑يلّا لمجد د‑تموغرا د‑تژضّارت د‑لقوّا غيلاد ءولا كولّو غايد ءيزرين ءولا كولّو مايد‑د‑يفتان. د‑غمكاد ا‑ف‑راد‑بدّا‑نتالغ غوالّي ءيگان ربّي انجّام‑نّغ س‑يسم ن‑سيديتنّغ ياسوع لماسيح، امين.