yaɛqub 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ سفلدات اي‑يد‑بو‑وايدا. الّات غيلاد ار‑تسّغويّوم ف‑تگوضي لّي‑راد‑اون‑ييلي.

² هان ايدا‑نّون ءيمدا، د‑يبردان‑نّون تشّا‑تن‑تووكّا.

³ هان ءورغ‑نّون ءولا نّوقرت‑نّون تغويت‑تن تانيگت. غمكان ا‑را‑تشّ تانيگت‑ان تيفيّي‑نّون زوند لعافيت، تفك فلّاون توگّا غ‑واسّ لّحساب. اشكو كونّي تسّمونم كيگان ءي‑يخف‑نّون غ‑ووسّان گُّرانين.

⁴ هان تيغراد لّي‑ور‑تفكيم ءي‑ويلّي مگّرنين غ‑يگران‑نّون. ار‑سّمومُّين ءيشوّالن، لكمنت تغويّا‑نسن ءيمزگان ن‑سيدي ربّي ءيتجهّدن.

⁵ تزّريم ءوسّان‑نّون غ‑دّونيت س‑كولّو ما‑تّيريم، ار‑تشتّام ار‑تّفراحم ار‑تّعالافم دّات‑نّون ءي‑واسّ ن‑تغرسي.

⁶ تسّضرم لباضل ف‑ايت‑وفولكي تنغم‑تن، ءور‑ن‑رورن ف‑يخف‑نسن س‑يات.

صّبر د‑وجنجم

⁷ ءيمّا كونّي اي‑ايتما، صبرات ارد‑د‑ياشك سيديتنّغ، زوند افلّاح لّي‑يتقلن ارد‑اس‑دي‑تغلي صّابت ءيعزّان غ‑يگر‑نس، ار‑يتصبار ارد ءيضر‑ونژار امنزو ءولا اماژّوژ.

⁸ ءولا كونّي، ءيلّا فلّاون ا‑تّصبارم ار‑تزّعامّ ءولاون‑نّون، اشكو ياكمور‑د‑واسّ لّي‑غ‑را‑د‑ياشك سيديتنّغ.

⁹ واي‑ايتما، ا‑ور‑تّنگموگم ءي‑نگراتون ا‑ور‑فلّاون‑يتّوت لحوكم. ها‑لقاضي ءيمقّورن ءيبيدّ‑د غ‑يمي.

¹⁰ سوانگمات اي‑ايتما غ‑لانبيا لّي‑ساوالنين س‑يسم ن‑سيديتنّغ غايد ءيزرين، اشكو صبرن نتني غ‑كولّو‑تمّاريو‑نسن.

¹¹ نگا‑تن د‑يمباركين اشكو صبرن سول زگان. تسفلدم كونّي ف‑ايّوب غمكلّي ءيصبر ءيزگا، تيسّانم مامنك ا‑ت‑يبارك سيدي ربّي تيگيرا. اشكو سيديتنّغ ار‑باهرا‑يتحنّا ار‑بدّا‑يسكار افولكي.

¹² ءيمّا تاغاوسا ءيهيّان اي‑ايتما، تگا غمكا: ا‑ور‑تّگالّام، لا س‑يگنّا ءولا س‑واكال ءولا س‑كرا ن‑تگالّيت ياضني. والاينّي ءيغ‑يگا‑واوال‑نّون «يياه» تينيم «يياه.» ءيغ‑يگا «ءوهو» تينيم «ءوهو» باش ا‑فلّاون‑ور‑يتّوت لحوكم.

¹³ ءيغ‑يلّا كرا ن‑يان گيگون يوتن تامّارا، ءيلّا فلّاس ا‑يضالب ءي‑ربّي ف‑غايان. ءيغ‑يلّا كرا ن‑يان گيگون ءيفرحن، ءيلّا فلّاس ا‑يالغ ربّي س‑ومارگ لّفرح.

¹⁴ ءيغ‑يلّا كرا ن‑يان گيگون يوضنّ، ءيلّا فلّاس ا‑يازن س‑يمغارن ن‑ومناگّار باش ا‑ن‑دارس‑اشكين ضالبن ربّي فلّاس ژغورن‑ت س‑زّيت س‑يسم ن‑سيديتنّغ.

¹⁵ را‑يسكر سيديتنّغ ما‑زگيس‑ضالبن غويلّي ءومنّين، ءيجّوجّي اماضون ءيسّدوس‑ت. ءيغ‑يسكر كرا ن‑دّنوب را‑تن‑فلّاس‑يسّيتّي.

¹⁶ ف‑ماياد ا‑ف‑راد‑اون‑ينيغ، قرّات س‑دّنوب‑نّون ءي‑نگراتون، ار‑تّضالابم ربّي ف‑ينگراتون باش ا‑تجّيم. هاتي تاژالّيت ن‑يان ءيرضان ربّي ار‑دي‑تّاوي كيگان.

¹⁷ ءولا نّابي ءيليّا ءيگا بنادم زوند نكُّني، ءيمّا نتّا ءيضالب باهرا ءي‑ربّي ا‑ور‑ييلي‑ونژار، س‑ور‑د‑يضر‑ونژار ف‑واكال كراض ءيسگُّاسن د‑مناصّ.

¹⁸ ءيضالب‑ت‑داغ س‑د‑فكان ءيگنوان انژار، اوين‑د ءيكالّن صّابت‑نسن.

¹⁹ واي‑ايتما، ءيغ‑گيگون‑يلّا كرا ن‑يان ءيفّوغن زغ‑لحقّ ءيرار‑ت‑يد وايّاض س‑وغاراس،

²⁰ سوانگمات ماياد: وانّا‑د‑يرورن يان ءيجلان زغ‑ما‑يُخشنّ، را‑ت‑يسّانف ءي‑لموت لّيخرت، ءيسّاگّوگ‑ت زغ‑كيگان د‑دّنوب.