yaɛqub 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لخُشانت ن‑دّونيت ءولا لباراكا ن‑ربّي

¹ ماخ ايلّيغ ا‑تّمّاغم ار‑تّژيم ءي‑نگراتون؟ ءيس‑ورد ف‑سّيبت ن‑ما‑گيگون‑تمّاغن ءيسوينگيمن ن‑ما‑يتّيري ءيخف‑نّون؟

² ار‑تّيريم كرا ءور‑تلكيمّ، غاكودان ار‑تنكّرم ا‑تنقّام. ار‑تّژوژضم ما‑مي‑ور‑تژضارم، غاكودان ار‑تمّاغم ار‑فلّاس‑تكّاتم. هان ءور‑ا‑تطّافم ما‑تّيريم اشكو ءور‑ا‑تي‑تّضالابم زغ‑ربّي.

³ والاينّي ءيغ‑ا‑تّضالابم كرا زغ‑ربّي ءور‑ا‑ياون‑ت‑ياكّا، اشكو ءورد ف‑وفولكي ا‑ف‑ا‑تي‑تّضالابم والاينّي غير ما‑س‑ا‑تسّفراحم ءيخف‑نّون.

⁴ هان تفّوغم اغاراس باهرا. ءيس‑ور‑تسّينم ماياد؟ وانّا دار تعزّا دّونيت، ءيرور تيغوردين‑نس س‑ربّي. يان دار ءيعزّا ما‑يگان وين دّونيت، ءيگا ءيخف‑نس د‑واد ءيژين د‑ربّي.

⁵ ءيس‑تغالم ءيس‑ور‑يُغژان مايلّي ءيتياران غ‑وارّا ن‑ربّي ءينّا: «ءول لّي‑گينّغ‑يگا ربّي ار‑يتّيري كيگان»؟

⁶ والاينّي ءوگُّار ا‑تگا لباراكا لّي‑اغ‑ياكّا، غمكلّي ءيتياران: «ربّي ار‑يتضاضّا وانّا ءيسّيمغورن ءيخف‑نس، والاينّي ار‑يتباراك وانّا ءيژّيمژاين ءيخف‑نس.»

⁷ مايان ا‑ف‑راد‑اون‑ينيغ، فكات ءيخف‑نّون غ‑دّو‑وفوس ن‑ربّي. ضاضّات ءيبليس س‑يروول زغ‑گيگون.

⁸ اكمورات‑ن س‑ربّي، ياكمور‑د سرون. وا‑كونّي لّي‑يسكارن دّنوب، سيردات ءيفاسّن‑نّون. وا‑كونّي لّي‑يكّاتن ف‑سين ءيغاراسن، سّغوسات ءولاون‑نّون

⁹ تيگُراژ‑كُن طيّر‑اون ار‑تالّام. كّيسات تاضصا، تسكرم ف‑يمطّاون. سّيتّيات لفرح، تسكرم ف‑تگوضي.

¹⁰ كنوات غ‑لگدّام ن‑سيديتون يالّ‑كُن.

¹¹ واي‑ايتما، ا‑ور‑ترگّمّ ءي‑نگراتون. اشكو وانّا ءيرگمن غ‑گماس، نغد ءينّا فلّاس ءيس‑يُخشن، هاتي ءيگا ءيخف‑نس د‑واد يوگُرن لوصيّات ن‑ربّي، ءيرار‑تنت زوند ءيغ‑ور‑گينت يات. ءيغ‑تگيت ءيخف‑نّك ف‑يگّي ن‑شّرع ن‑ربّي، ءور‑سول‑تگيت واد سرس ءيسكارن والاينّي واد فلّاس ءيتحكامن.

¹² هان ربّي واحدوت ا‑يژضارن ا‑ياكّا لوصيّات، د‑نتّان واحدوت ا‑يژضارن ا‑يكّات لحوكم ار‑يجّنجام ار‑يتهلاك. والاينّي ما‑تگيت كيّي ايلّيغ تريت ا‑تينيت ف‑وايّاض ءيس‑يُخشن؟

¹³ سفلدات، ا‑كونّي لّي‑يتّينين «را‑ندّو غاسّاد نغد ازكّا س‑تمدينت ياضني، نگاور‑ن گيس يان‑وسگُّاس ار‑نساغ ار‑نزّنزا ار‑نتامژ ءيقاريدن.»

¹⁴ والاينّي ءور‑تسّينم ما‑را‑ييلي ازكّا. ماد‑اكُّ‑تگا تودرت‑نّون؟ هاتي تودرت‑نّون تگا زوند تامدلوت ءيمژّين لّي‑د‑يبانّ يان كرا س‑تّ‑لاح.

¹⁵ والاينّي ءيلّا فلّاون ا‑تّينيم «ءيغ‑يرا سيديتنّغ، را‑ندّر نسكر غمكا ءولا غمكا.»

¹⁶ ءيمّا كونّي ار‑تّالغم ءيخف‑نّون ار‑تسّفورّوگم ف‑ما‑را‑تسكرم. هان أُخشنّ ءيسفورّوگن‑ان.

¹⁷ ءيمّا يان ءيسّنّ ا‑يسكر افولكي ءور‑ت‑يسكير، دّنوب اد‑اس‑يگا غايان.