yaɛqub 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيلس ن‑بنادم

¹ واي‑ايتما، ا‑ور‑تيريم ا‑كولّو‑تگم ءيمسلمدن، اشكو تسّنمم نكُّني‑اد ءيسّلمادن، ءيتابعا‑ياغ لحساب ءوگُّار ن‑وييّاض.

² س‑كيگان ا‑س‑ا‑نتمزاگال كولّواغ. ءيغ‑يلّا ما‑ور‑يتمزاگالن غ‑ما‑يتّيني، را‑يگ نتّان واد ءيكمّلن ييژضار ا‑يتنباض غ‑دّات‑نس كولّوتّ.

³ ءولا اگمار، ار‑اس‑نتگّا اغامو غ‑يمي ما‑س‑ا‑نتحكام غ‑دّات‑نس كولّوتّ باش ا‑فلّاس‑نتّيدو س‑ينّا نرا.

⁴ ءولا اناو غ‑ومدا، واخّا ءيمقّور باهرا ءيتجهّد‑واضو لّي‑ت‑يدحاين، ار‑ت‑يسّلولّي باب‑نس س‑يات‑تفلوت ءيمژّين باش ا‑يتّيدو س‑ينّا ءيرا.

⁵ غمكان ا‑يگا ءيلس ن‑بنادم. واخّا ءيمژّي، ار‑يسّفورّوگ ف‑تغاوسيوين مقّورنين. منشك ا‑تلّا تاگانت ار‑تّي‑تجدّر‑تسافوت ءيمژّين.

⁶ زوند غمكان ا‑يجدّر ءيلس، اشكو ءيعمّر س‑لخُشانت غ‑وگُنس ن‑دّات‑نّغ، ار‑يسّيُخشان بنادم كولّوت. ار‑يتزناد ءي‑دّونيت س‑لعافيت لّي‑د‑يفّوغن زغ‑جهنّاما.

⁷ ژرات لوحوش، ءيژضار بنادم ا‑تن‑يامژ. لوحوش ن‑تاگانت د‑يگضاض د‑يفاغرن د‑يسلمان، ار‑تن‑نتامژ كولّوتن.

⁸ والاينّي ءور‑يلّي يان ءيژضارن ا‑يامژ ءيلس‑نس. ار‑بدّا‑يلدّي س‑ما‑يُخشنّ، ياگُي ا‑يزگا، ءيعمّر س‑سّمّ لّي‑ينقّان.

⁹ س‑يلس ا‑س‑ا‑نتالغ سيدي ربّي باباتنّغ. س‑يلس‑داغ ا‑س‑ا‑نرگّم بنادم لّي‑يتياوسكارن ف‑صّورت ن‑ربّي.

¹⁰ هان يان‑يمي ا‑د‑يتكّا لا شّوكر ءولا تارگّيمت. واي‑ايتما، ءور‑اكُّ‑يشوي ا‑گيگون‑ييلي زوند غايان.

¹¹ ءيس‑تلّا تالعينت دي‑تكّان‑وامان ميمنين ءولا ويد سمّومنين؟

¹² ءيزد اي‑ايتما، تلّا تازارت ءيسكارن زّيت، نغد دّاليت ءيسكارن ءيكوزارن؟ ءور‑سار‑راد‑فتون‑وامان ميمنين زغ‑تالعينت ءيسمّومن.

تاحكيمت لّي‑د‑يكّان ءيگنّا

¹³ مانوا گيگون اد‑دار تاحكيمت ييسّان ما‑يلّان؟ ءيلّا فلّاس ا‑يمل تاحكيمت‑نس س‑ما‑يسكار، ار‑يتفولكي د‑مدّن ار‑يژّيمژاي ءيخف‑نس س‑تحكيمت لّي‑يصحان.

¹⁴ والاينّي ءيغ‑تلّا‑تنوّاشت غ‑وول‑نّون نغد ار‑تّيريم ا‑تاگُرم تزوورم وييّاض، ا‑ور‑تالغم ءيخف‑نّون ءولا تسّكاركسم ف‑لحقّ.

¹⁵ اشكو وان تاحكيمت‑ان، ءورد ءيگنّا ا‑دي‑تكّا، والاينّي توشكا‑د زغ‑دّونيت. ءورد تين رّوح لقودوس ا‑تگا، والاينّي تگا تين ءيبليس.

¹⁶ ءيغ‑ا‑تّيرين مدّن اد‑اگُرن زوورن وييّاض، را‑تيگات تاژيت ءولا كولّو ما‑يُخشنّ.

¹⁷ والاينّي يان دار تاحكيمت لّي‑د‑يكّان ءيگنّا، غمكاد ا‑را‑يگ. امزوارو ءيغوس‑وول‑نس، ييري سّلامت، ار‑يترخو د‑مدّن، ار‑سرسن‑يسفليد، ار‑گيسن‑يتحنّو، ار‑د‑يتاوي صّابت ن‑وفولكي. ءور‑ا‑يسكار س‑وودماون ءولا‑دا‑يسكار زوند ءيغ‑يگا كرا ءور‑يگي.

¹⁸ هاتي تامگرا ن‑وفولكي، ار‑تّ‑مگّرن غويلّي‑د‑يوينين امود ن‑سّلامت ار‑ت‑ين‑تلوحن س‑سّلامت.