yaɛqub 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

غويلّي دار ءيگّوت ءولا غويلّي دار ءيدروس

¹ واي‑ايتما، ا‑ور‑تسكارم س‑وودماون غيلاد غ‑تومژم اغاراس ن‑سيديتنّغ ياسوع لماسيح باب لّمجد.

² را‑كُن‑سقساغ، ما‑را‑تسكرم غ‑ومناگّار‑نّون ءيغ‑ن‑يكشم يان دار تالخاتمت ن‑وورغ د‑تملسيت يُغلان، ءيكشم‑ن ءولا يان‑ومژلوض س‑يبردان‑نس بّينين؟

³ ءيس‑را‑تنسالّامّ د‑بو‑تملسيت ءيشوان تينيم‑اس «زايد ا‑سيدي ا‑تسكيوست غ‑لگدّام،» تينيم ءي‑ومژلوض «بيدّ غ‑تغوردين» نغد «گاور‑ن غين»؟

⁴ والاينّي ءيغ‑ا‑تسكارم غمكان ءيس‑ورد ءودماون‑نّيت اين تسكارم، ار‑تّحكامّ ف‑ينگراتون س‑تنباضين أُخشنّين؟

⁵ سفلدات اي‑ايتما عزّانين. ءيس‑ور‑تسّينم ماياد؟ ربّي ءيستي غويلّي دار ما‑يدروسن غ‑دّونيت اد‑دارسن‑ييگات ليمان، كشمن س‑لوورت ن‑تگلديت لّي‑ف‑ينّا را‑ت‑يفك ءي‑ويلّي رانين ربّي.

⁶ ءيمّا كونّي ار‑تّحگارم ءيمژلاض. را‑كُن‑سقساغ، مانوي‑كُن‑سّرفوفونّين ار‑كُن‑زوكورن س‑لمحكامات؟ ءيس‑ورد غويلّي دار ءيگّوت‑وايدا؟

⁷ ءيس‑ورد نتني ا‑يرگّمن ءيسم ءيفولكين ن‑والّي مي تگام وينس؟

⁸ هاتي افولكي ايد تسكارم ءيغ‑ا‑تسكارم س‑لوصيت ءيهيّان ن‑تگلديت ن‑ربّي غمكلّي ءيتياران «ا-تّيريت ادجار‑نّك زوند ءيخف‑نّك.»

⁹ والاينّي ءيغ‑ا‑تسكارم س‑وودماون هان دّنوب ايان، ءيحكام فلّاون شّرع ن‑ربّي اشكو تفّوغم زغ‑گيس.

¹⁰ اشكو يان ءيسكارن كولّو س‑شّرع ن‑ربّي، ءيغ‑زگيس‑يفّوغ غير س‑يات‑تغاوسا، هاتي يوورّي ءيگا زوند يان‑زگيس‑يفّوغن كولّوت.

¹¹ اشكو ربّي لّي‑ينّان «ا‑ور‑تزنوت» ءينّا‑داغ «ا‑ور‑تنغت.» ءيغ‑تونفت ءي‑زّنا والاينّي تنغيت، هاتي توورّيت تگيت واد ءيفّوغن زغ‑شّرع.

¹² ساوالات ار‑تسكارم س‑مكلّي‑د‑يقّانّ مدّن لّي‑ف‑را‑يحكام ربّي س‑لوصيت لّي‑اغ‑يرژمن زغ‑يسكراف‑ان.

¹³ اشكو وانّا ءور‑يتصاماحن، را‑فلّاس‑يحكام ربّي بلا‑ياس‑يصامح. ءيمّا وانّا ءيتصاماحن، ءور‑را‑ت‑يلكم لحوكم.

غوالّي يومنّ د‑والّي ءيسكارن

¹⁴ واي‑ايتما، ما‑لّفايتّ ا‑را‑ييلي ءيغ‑ينّا كرا ن‑يان «ها‑يّي ءومنغ» والاينّي ءور‑ا‑يسكار ءيفولكيتن؟ ءيس‑را‑ت‑يجّنجم وان ليمان‑ان؟

¹⁵ ما‑لّفايتّ گيگون ءيلّان ءيغ دارون گماتون نغد ءولّتماتون ءيلكم ف‑ما‑يلسّا نغد ما‑يشتّا

¹⁶ تينيم‑اس: «زايد س‑سّلامت، اد‑اك‑د‑ياوي ربّي ما‑تلسّات ءولا ما‑تشتّات،» بلا‑ياس‑تفكام كونّي مايلّي‑ف‑تلكم دّات‑نس؟

¹⁷ والاينّي غمكان ا‑يگا وانّا يومنّ ءور‑ا‑يسكار افولكي. هاتي ءيمّوت ليمان‑نس.

¹⁸ والاينّي ما‑راد‑ينيغ ءيغ‑يلّا كرا ن‑يان ءينّا‑يّي «ليمان ا‑دارك‑يلّان، ءيمّا نكّي لّان داري ءيفولكيتن»؟ راد‑اس‑رارغ «مل‑يّي ليمان‑نّك بلا ءيفولكيتن، ملغ‑اك ليمان‑ينو س‑يفولكيتن لّي‑سكارغ.

¹⁹ كيّي تومنت ءيزد ربّي يان ا‑يگا. تُغژانت. ءولا لجنون أُخشنّين ءومنّ س‑مايان، ار‑ترگيگيين س‑تكساض.»

²⁰ واي‑ارگاز ءيفسّوسن، ءيس‑تريت اد‑زايدغ ملغ‑اك ءيزد ليمان بلا ءيفولكيتن ءور‑يگي يات؟

²¹ ما‑س‑يرضا ربّي س‑باباتنّغ ءيبراهيم؟ ءيرضا سرس ف‑سّيبت ن‑ما‑يسكر. ييوي يوس ءيسحاق اد‑اس‑يغرس ف‑وكركور ءيفك‑ت ءي‑ربّي.

²² ءيس‑ور‑تفهيمت مايان؟ يومن ءيبراهيم ءيسكر، ءيكمّل ليمان‑نس س‑يسكّيرن‑نس.

²³ ءيجرا غمكلّي ءيتياران غ‑وارّا ن‑ربّي لّي‑ينّان: «ءيبراهيم يومن ربّي. مايان ا‑ف‑ت‑يگا ربّي د‑واد‑ف‑يرضا.» ييني‑داغ ف‑يبراهيم ءيس‑يگا امدّاكُّل ن‑ربّي.

²⁴ ءيس‑ور‑تژريم غيلاد؟ ربّي ار‑سرنّغ‑يترضو ف‑سّيبت ن‑ما‑نسكار ءورد ف‑سّيبت ن‑ما‑نومن ءوكان.

²⁵ غمكان ا‑تگا ءولا تامگّانت راحاب، ءيرضا سرس ربّي ف‑سّيبت ن‑كرا تسكر. اشكو تسّرگس ءيمازانّ، تعاون‑تن اد‑دّون ف‑يان‑وغاراس ياضني.

²⁶ هان ءيمّوت ليمان غ‑ور‑لّين ءيفولكيتن، غمكلّي تّمتات دّات نّا‑غ‑ور‑تلّي رّوح ن‑تودرت.