yaɛqub 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑ياعقوب اخدّام ن‑ربّي د‑سيديتنّغ ياسوع لماسيح، ءي‑ايت‑ربّي لّي‑اكوتنين غ‑دّونيت كولّوتّ. اد‑اون‑تيلي سّلامت.

لباراكات ن‑ربّي غ‑ووسّان ن‑تنوكموت

² فرحات باهرا اي‑ايتما غاكود نّا‑تّيارامّ س‑تنوكموت نّا‑يلّان،

³ اشكو تسّنم ءيغ‑تزريم غ‑تنوكموت سول‑تزگام غ‑وغاراس لّماسيح، را‑كُن‑يسّدوس مايان باش ا‑تيژضارم ا‑تّصبارم س‑وگُّار.

⁴ ءيمّا غيلاد، زايدات تصبرم ارد تلكمّ تّمي باش ا‑تيمغورم تكمّلم بلا‑كُن‑يخصّا يات.

⁵ والاينّي ءيغ‑يلّا كرا گيگون ءور‑يطّاف تاحكيمت، ءيلّا فلّاس ا‑يضالب ربّي لّي‑ياكّان ما‑يگّوتن ءي‑كولّو مدّن بلا‑دا‑تي‑تيگُراژ، راد‑اس‑تّ‑يفك.

⁶ والاينّي ءيغ‑يضالب، ءيقّان‑ت‑يد ا‑يامن بلا ءيشكّا. اشكو يان ءيشكّان ءيگا زوند تاضانگت ن‑ومدا، ار‑تّ‑يسّموسّو‑واضو ار‑تّ‑يتاوي س‑تسگا‑يا د‑ختا.

⁷ وانّا ءيگان غمكان، ا‑ور‑يغال ءيس‑را‑يامژ كرا زغ‑سيديتنّغ،

⁸ اشكو ار‑ن‑يتافا ءيخف‑نس غ‑گر سنات‑تنباضين، ءور‑ا‑يتزگا غ‑كولّو ما‑را‑يسكر.

⁹ واي‑ايتما، وانّا گيگون دار ءيدروس لخير، ءيلّا فلّاس ا‑يفرح ءيغ‑ت‑يولّ ربّي.

¹⁰ ءيمّا وانّا گيگون دار ءيگّوت، ءيلّا فلّاس ا‑يفرح ءيغ‑ت‑يزّوگز ربّي. اشكو را‑يزري بو‑وايدا زوند اجدّيگ ن‑توگا،

¹¹ ار‑دي‑تاقلاي تافوكت س‑ترغي‑نس ءيحرّان، تجدر توگا ءيضر‑وجدّيگ‑نس لاح افولكي‑نس. غمكان ا‑س‑راد‑لاح بو‑وايدا لّيغ ا‑سول‑يتسالا تاووري‑نس.

¹² امباركي ا‑يگا وانّا ءيصبرن ءيزگان غ‑تاساعت ن‑تنوكموت. اشكو لّيغ ءيتيارام سول‑يزگا، راد‑اس‑ييلي تّاج ن‑تودرت ءيدومن لّي‑ف‑ينّا ربّي را‑ت‑يفك ءي‑ويلّي رانين ربّي.

¹³ والاينّي ءيغ‑يتيارام كرا ن‑يان، اد‑ور‑ييني «ربّي ايد‑يّي‑يتارمن،» اشكو ربّي ءور‑ا‑يسكار ما‑يُخشنّ ءولا‑دا‑يلدّي يان ا‑يسكر لخُشانت.

¹⁴ والاينّي ءيغ‑يتيارام كرا ن‑يان، هان شّهوات‑نس ا‑ت‑ين‑يلدين ارد‑تي‑تغوي‑تژقّورت.

¹⁵ غاكودان ءيغ‑گيس‑قامانت شّهوات راد‑ارونت دّنوب. ءولا دّنوب، ءيغ‑گيس‑زوويدن راد‑د‑اوين لموت.

¹⁶ واي‑ايتما عزّانين، ا‑ور‑تجلوم ءيخف‑نّون.

¹⁷ كولّو ما‑يگان تاوافكا ءيشوان ءولا كولّو ما‑يگان لباراكا ءيفولكين، زغ‑وفلّا ا‑زغ‑د‑يوشكا، زغ‑ربّي لّي‑يسكرن تيفاوين ن‑يگنوان. ءيمّا نتّان ءور‑ا‑يتموتّي ءولا‑دا‑يتبدّال ءولا‑دا‑يتلّاس.

¹⁸ ءيسكر ما‑يقصاد، ءيفك‑اغ تودرت لّجديد س‑واوال لّحقّ، باش ا‑نوورّي نگ لغلّت تامنزوت ن‑كولّو ما‑يخلق.

اوال ن‑ربّي د‑ليمان ءيصحان

¹⁹ واي‑ايتما عزّانين، سوانگمات غ‑ماياد: ءيلّا ف‑كود يان ا‑ييفسوس ا‑يسفلد، ييژّاي ا‑يساول، ييژّاي ا‑ور‑يقلاقل.

²⁰ اشكو يان ءيتقلاقالن ءور‑را‑ييژضار ا‑يسكار افولكي لّي‑يترضون ربّي.

²¹ كّيسات زغ‑گيگون ءيسكّيرن ركانين ءولا لخُشانت لّي‑يگّوتن غ‑مدّن. تادرات ءي‑يخف‑نّون ار‑تّقبالم اوال لّي‑گيگون‑يتژّو ربّي، اشكو ءيژضار‑واوال‑ان ا‑كُن‑يجّنجم.

²² ءيلّا فلّاون ا‑تگم ويد سكارنين س‑واوال ن‑ربّي، ءورد ويد سفليدنين ءوكان. ا‑ور‑تجلّوم ءيخف‑نّون،

²³ اشكو يان ءيسفليدن ءي‑واوال ن‑ربّي بلا‑دا‑سرس‑يسكار، ءيگا زوند يان‑ن‑يوگُّان س‑لمري ا‑يژر ءودم‑نس.

²⁴ غير يوگُّا‑ن ءيژر ءيخف‑نس ييتّي، س‑يتّو مان ءودم ا‑يسكر.

²⁵ ءيمّا وانّا ءيتمنادن غ‑ولمّود ءيفولكين لّي‑يرژمن ءي‑مدّن زغ‑يسكراف، ار‑تّ‑گيس‑يتاوي ار‑سرس‑يسكار بلا‑دا‑يتتّو مايلّي مي ءيسفلد، نتّان ا‑را‑يبارك ربّي غ‑كولّو ما‑يسكار.

²⁶ ءيغ‑يلّا كرا ن‑يان ءيغالن ءيزد امومن ا‑يگا والاينّي ءور‑ا‑يتنباض غ‑يلس‑نس، هاتين ءيجلا د‑يخف‑نس. ليمان‑نس ءور‑يگي يات.

²⁷ ءيمّا يان دار ليمان ءيفولكين ءيصحان غ‑يژري ن‑ربّي باباتنّغ، غمكاد ا‑را‑يگ: ار‑يتعاوان ءيگيگيلن د‑تهجّالين غ‑تنوكموت‑نسن، ار‑يتانف ءي‑يركان ن‑دّونيت.