tiṭus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تينباضين ن‑وغاراس لّماسيح

¹ سّكتي‑اسن‑د ءيس‑فلّاسن‑يلّا اد‑سفليدن س‑لحوكّام ءولا كولّو وييّاض تحكامنين تامازيرت، ار‑سكارن س‑واوال‑نسن، ءوجادن ءي‑كرا ءيگان تاووري ءيصلحن.

² تينيت‑اسن ا‑ور‑رگمن غ‑يان ءولا ژين د‑يان. ءيلّا فلّاسن اد‑تصبارن ار‑ترخون د‑كولّو مدّن.

³ ءولا نكُّني نكّا‑تّين نگا ءينافالن ءيمعصان ءيمجلان، نتياوكرّاف غ‑شّهوات ءولا كولّو ما‑س‑ا‑تّبلون مدّن. نكّا‑تّين ار‑نزّراي ءوسّان‑نّغ س‑تنوّاشت د‑يسكّيرن أُخشنّين، ار‑اغ‑تكرهون مدّن ار‑تن‑نتكرهو ءولا نكُّني.

⁴ والاينّي ربّي انجّام‑نّغ ءيسّبايّن‑د منشك ا‑يفولكي ءيحوبّو بنادم.

⁵ س‑رّحمت‑نس ءيگّوتن ا‑س‑اغ‑يجّنجم، ءورد ف‑سّيبت ن‑يفولكيتن لّي‑نسكار. ءيجّنجم‑اغ ءيسيرد‑اغ ءيفك‑اغ تالاليت ن‑تودرت لّجديد س‑تحكيمت ن‑رّوح لقودوس

⁶ لّي‑س‑اغ‑يعمّر ف‑وفوس ن‑ونجّام‑نّغ ياسوع لماسيح.

⁷ غمكاد ا‑س‑گينّغ‑يحنّا ربّي ءيسكر سّلامت غ‑گراتنّغ ديدس ءيفك‑اغ لوورت ن‑تودرت ءيدومن لّي‑ن‑نرجا غيلاد.

⁸ اوال ءيزگان اياد. ريغ زغ‑گيك ا‑تزّگات تيغاوسيوين‑اد غ‑دار ويلّي ءومنّين اوال ن‑ربّي، باش اد‑تلهون ءيخف‑نسن س‑يسكّيرن شوانين. ءيفولكي ماياد، را‑ينفعا كولّو مدّن.

⁹ والاينّي انف ءي‑تجمّاعت ءيخوان ن‑ويلّي تمجاحادنين ف‑يسماون ن‑تاسوتين لّي‑زرينين، ار‑تژين ار‑تمّاغن ف‑شّرع ن‑موسا. غايان ءور‑اكُّ‑ا‑يتنفاع س‑يات.

¹⁰ ءيمّا وانّا ياطّون ايتماتن، ءيني‑اس ا‑يفسّا، تينيت‑اس‑ت تيس سنات‑توال. ءيغ‑ور‑يفسّا، انف‑اس ا‑ور‑سول‑ديدون‑يمون.

¹¹ اشكو ءيسّبايّن وان غواد ءيس‑يفّوغ اغاراس ن‑ربّي س‑دّنوب‑نس، ءيزّوگز لحوكم ف‑يخف‑نس.

¹² غاكود نّا‑ياك‑ن‑وزنغ ارتيماس نغد تيخيكوس، اشك‑ين س‑داري س‑نيكوبوليس، ا‑ور‑تماطلت. اشكو ريغ ا‑ن‑زّريغ تاگرست غين.

¹³ گ‑ن تيقّي‑نّك ا‑تعاونت لموحامي زيناس نتّان د‑ابولُس، باش اد‑كمّلن ف‑وغاراس‑نسن، تفكت‑اسن اينّا‑تن‑يخصّان.

¹⁴ ءيلّا ف‑مدّن‑نّغ اد‑ميورن اد‑تلهون س‑تووري ءيصلحن باش اد‑بيدّن د‑وانّا ءيلكمن ف‑كرا، ا‑ور‑زّرين تودرت‑نسن بلا لفايتّ.

¹⁵ ار‑ن‑فلّاك‑تسلّامن كولّو ويلّي ديدي لّانين. ار‑ن‑نتسلّام ف‑ايتماتنّغ عزّانين لّي‑ومنّين س‑لماسيح. اد‑اون‑تيلي لباراكا ن‑ربّي كولّوكن.