tiṭus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

المّود يُغژانّ

¹ ءيمّا كيّي، ءيلّا فلّاك ا‑تسّلمادت مدّن اد‑سكارن كولّو س‑ما‑د‑يمشاشكان د‑ولمّود يُغژانّ.

² ءيني ءي‑يرگازن مقّورنين اد‑زگان غ‑يخف‑نسن، ار‑بدّا‑تفولكين د‑مدّن، ار‑تنباضن غ‑كولّو ماد‑سكارن. تينيت‑اسن اد‑دوسن غ‑وغاراس لّماسيح ار‑تحنّون غ‑وييّاض ار‑تزايادن غمكاد بلا‑دا‑ترماين.

³ ءيني ءولا ءي‑تمغارين مقّورنين اد‑سكارنت غمكلّي‑د‑يقّانّ ختيلّي توقّارنين ربّي. تينيت‑اسنت ا‑ور‑ساوالنت غ‑مدّن ءولا‑دا‑تّبلونت س‑تيسّي ءيكتين. ءيلّا فلّاسنت اد‑سّلمادنت تيمغارين مژّينين ف‑ما‑يفولكين

⁴ ار‑اسنت‑مالانت مامنك ا‑تگا تايري لّي‑س‑راد‑تعاوانّت ءيرگازن‑نسنت ءولا تاروا‑نسنت.

⁵ ار‑اسنت‑مالانت مامنك ا‑راد‑يژضارنت اد‑تنباضنت غ‑كولّو ماد‑سكارنت س‑وول ءيغوسن، ار‑تخدامنت غ‑تگمّي ار‑تفولكينت د‑مدّن ار‑سفليدنت س‑يرگازن‑نسنت باش ا‑ور‑د‑يرار يان تيرگّام ءي‑واوال ن‑ربّي.

⁶ ءيني ءي‑يعيّالن اد‑تنباضن غ‑يخف‑نسن.

⁷ ءولا كيّي ءيلّا فلّاك ا‑بدّا‑تسكارت افولكي د‑مدّن باش اد‑اسن‑تمالات مامنك ا‑تن‑د‑يقّان اد‑سكارن ءولا نتني. سّلماد‑تن س‑لحقّ د‑لمعقول

⁸ س‑يواليون أُغژانّين لّي‑ف‑ور‑يژضار يان ا‑فلّاسن‑يژي. ءيغ‑ا‑تسكارت غمكان را‑يتحشام وانّا ءيران ا‑ك‑يضاضّ، اشكو ءور‑را‑ياف ما‑فلّانّغ‑يتّيني يُخشن.

⁹ ءيني ءي‑يخدّامن اد‑سفليدن س‑يد‑سيديتسن ار‑تن‑ترضون غ‑كولّو ماد‑سكارن. ا‑ور‑فلّاسن‑سّيقارن ءيخفاون‑نسن

¹⁰ ءولا‑دا‑تن‑تاكُرن. ءيلّا فلّاسن ا‑بدّا‑سكارن س‑نّييت‑نسن، باش اد‑ژرن مدّن منشك ا‑س‑يفولكي‑ولمّود‑نّغ ف‑ربّي لّي‑اغ‑يجّنجمن.

¹¹ ءيسّبايّن‑د ربّي لحنانت‑نس غيلاد ا‑سرس‑يجّنجم كولّو مدّن.

¹² ار‑اغ‑يسّلماد ا‑نتانف ءي‑كولّو ما‑ت‑ور‑يرضين ءولا شّهوات ن‑دّونيت‑اد. ار‑اغ‑يسّلماد ا‑نتنباض غ‑يخف‑نّغ ار‑نسكار س‑لحقّ ءولا كولّو ما‑ت‑يرضان غيلاد غ‑سول‑نقاما غ‑دّونيت.

¹³ ار‑نتقل ار‑نترجو اسّ‑ان امباركي لّي‑غ‑را‑د‑يبان لمجد ن‑ربّي‑نّغ ءيمقّورن ياسوع لماسيح لّي‑اغ‑يجّنجمن.

¹⁴ ءيفكا ءيخف‑نس اد‑اغ‑يفرو زغ‑كولّو ما‑يُخشنّ، ءيسّغوس‑اغ باش ا‑نگ مدّن‑نس لّي‑باهرا‑يتّيرين اد‑سكارن ما‑يفولكين.

¹⁵ سّلماد تيغاوسيوين‑اد ءي‑ايتماتن، ار‑اسن‑تّينيت اد‑سكارن غمكاد، ار‑تشّحشّامت وانّا ءيسكارن ما‑يُخشن س‑لامر لّي‑اك‑يتياوفكان. ا‑ور‑تادجت يان ا‑ك‑يحگر.