ruma 5 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سّلامت غ‑گراتنّغ د‑ربّي

¹ ءيمّا غيلاد تلّا‑ياغ سّلامت غ‑گراتنّغ د‑ربّي ف‑وودم ن‑سيديتنّغ ياسوع لماسيح، اشكو ءيگا‑ياغ د‑ويد‑ف‑يرضا ف‑سّيبت ن‑ما‑سرس‑نومن.

² ف‑وودم لّماسيح ا‑ف‑اغ‑تلّا لباراكا‑ياد لّيغ سرس نومن. ار‑باهرا‑نتفراح س‑رّجا‑ياد‑اغ‑يفكا، اشكو نسّن ءيس‑راد‑اغ‑يشّكشم س‑لمجد ن‑ربّي.

³ والاينّي ءورد غير مايان ا‑س‑ا‑نتفراح. ار‑نتفراح ءولا س‑ترفوفنت نّا‑دارنّغ‑يلّان، اشكو نسّن ءيزد س‑ترفوفنت ا‑س‑را‑گينّغ‑يتزاياد صّبر.

⁴ ءولا س‑صّبر ا‑س‑را‑نتنرو تاسّاست نّا‑يلّان. ءولا س‑تنري ا‑س‑را‑دارنّغ‑ييلي رّجا.

⁵ ءولا رّجا ءور‑راد‑اغ‑يژّيگُراژ، اشكو ربّي ءيعمّر ءولاون‑نّغ س‑لحنانت‑نس س‑تحكيمت ن‑رّوح لقودوس لّي‑اغ‑يفكا.

⁶ غاكود لّي‑يقصاد ربّي، لّيغ سول نضعف، ءيمّوت لماسيح اد‑اغ‑يجّنجم نكُّني لّي‑ن‑يرورن تيغوردين‑نّغ س‑ربّي.

⁷ ءيس‑ور‑را‑يشقو ا‑يمّت كرا ن‑يان ف‑يان ءيسكارن لحقّ؟ ءيژضار ا‑ييلي ما‑را‑يزعم ارد ءيمّت ف‑يان ءيفولكين،

⁸ والاينّي ربّي ءيملا‑ياغ منشك ا‑س‑گينّغ‑يحنّا، اشكو ءيمّوت فلّانّغ لماسيح لّيغ سول ا‑نتسالا دّنوب.

⁹ ءيمّا غيلاد غ‑يسكر سّلامت غ‑گراتنّغ د‑ربّي س‑لموت‑نس، نسّن باهرا ءيس‑راد‑اغ‑يجّنجم لماسيح زغ‑لغاضاب ن‑ربّي.

¹⁰ اشكو لّيغ سول نگا ويد تژينين د‑ربّي، ءيسكر سّلامت غ‑گراتنّغ ديدس س‑لموت ن‑يوس. ءيمّا غيلاد غ‑تلّا سّلامت غ‑گراتنّغ ديدس، نسّن س‑وگُّار ءيس‑راد‑اغ‑يجّنجم س‑تودرت‑نس.

¹¹ والاينّي ءورد غير مايان ا‑دارنّغ‑يلّان. نكُّني س‑لفرح ءيگّوتن ا‑س‑ا‑نتفراح س‑ربّي، اشكو ءيفكا‑ياغ سّلامت غيلاد غ‑گراتنّغ ديدس ف‑سّيبت ن‑سيديتنّغ ياسوع لماسيح.

باباتنّغ ادام ءولا سيديتنّغ لماسيح

¹² ف‑سّيبت ن‑باباتنّغ ادام ا‑س‑د‑كشمن دّنوب س‑دّونيت، اوين‑د لموت. مايان ا‑ف‑ا‑تمتاتن كولّو مدّن، اشكو كولّو سكرن دّنوب.

¹³ كّان‑تّين دّنوب غ‑دّونيت ءور‑تا‑يتياوفكا شّرع. ءور‑ا‑يتحاساب ربّي دّنوب‑ان لّيغ ءور‑يلّي شّرع،

¹⁴ والاينّي ار‑كولّو‑تمتاتن مدّن‑ان. ار‑تن‑تّنرو لموت زغ‑ووسّان ن‑ادام د‑سول غ‑ووسّان ن‑موسا، ار‑تّنرو ءولا غويلّي ءور‑فّوغنين زغ‑كرا ن‑واوال ن‑ربّي غمكلّي ءيفّوغ ادام س‑لمعصيت لّي‑يسكر نتّان. ءيرواس ادام ءي‑ياسوع لّي‑د‑يوشكان تيگيرا‑نس.

¹⁵ والاينّي ءورد يان اد‑گان، اشكو تاوافكا ن‑ربّي ءور‑تگي زوند لمعصيت ن‑ادام. گّوتن غويلّي مّوتنين ف‑سّيبت لّمعصيت ن‑ورگاز‑ان، والاينّي ءوگُّار ا‑تگا لباراكا ن‑ربّي ءولا تاوافكا لّي‑س‑يبارك مدّن گّوتنين ف‑وودم ن‑ورگاز ياضني ا‑ت‑يگان د‑ياسوع لماسيح.

¹⁶ تاوافكا‑ياد ءور‑تگي زوند لمعصيت‑ان. اشكو لّيغ ءيعاصا ادام يات‑توال، يوت ربّي فلّاس لحوكم س‑لعقوبيت ءيشقان. ءيمّا غيلاد غ‑باهرا‑عاصان مدّن گّوتنين، ءيفكا‑ياغ تاوافكا‑ياد ن‑سّلامت غ‑گراتنّغ ديدس.

¹⁷ تكّا‑تّين لموت ار‑تّنرو ف‑سّيبت لّمعصيت ن‑ادام، والاينّي ءوگُّار ن‑مايان ا‑را‑ننرو س‑تودرت لّي‑اغ‑يلّان ف‑سّيبت ن‑ياسوع لماسيح، نكُّني لّي‑مي‑يفكا ربّي لباراكا ءيگّوتن د‑توافكا ن‑سّلامت غ‑گراتنّغ ديدس.

¹⁸ غاكود لّيغ ءيعاصا ادام، ا‑تلّا لعقوبيت ءي‑كولّو مدّن. غاكود لّيغ ءيسكر ياسوع ما‑يرضان ربّي، ا‑تلّا سّلامت د‑تودرت ءي‑كولّو مدّن.

¹⁹ غاكود لّيغ ءيفّوغ ادام زغ‑واوال ن‑ربّي، ا‑يرور مدّن گّوتنين فّوغن زغ‑واوال‑نس. غاكود لّيغ ءيسكر ياسوع س‑واوال ن‑ربّي، ا‑يرور مدّن گّوتنين ءيرضو فلّاسن ربّي.

²⁰ ءيفك ءيلمّا ربّي شّرع باش اد‑يگاتن لمعصيات. والاينّي غونشك لّي‑تّيگاتن دّنوب ءوگُّار‑ان ا‑تگا لحنانت ن‑ربّي.

²¹ هاتي لقوّا ن‑دّنوب ار‑دي‑تّاوي لموت، ءيمّا لقوّا لّحنانت ن‑ربّي ار‑دي‑تّاوي سّلامت د‑تودرت ءيدومن ف‑وودم ن‑ياسوع لماسيح سيديتنّغ.