ruma 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

باباتنّغ ءيبراهيم

¹ ما‑را‑نيني ف‑يبراهيم لّي‑يگان باباتنّغ زغ‑تسگا ن‑دّات؟ ماد‑اس‑يلّان؟

² مراد ءيزد ف‑سّيبت ن‑كرا ءيسكار ءيبراهيم ا‑ف‑فلّاس‑يرضا ربّي، را‑دارس‑ييلي ما‑س‑ا‑يتشكار ءيخف‑نس. والاينّي ءور‑يژضار يان ا‑يشكر ءيخف‑نس غ‑لگدّام ن‑ربّي.

³ ءيتيارا غ‑وارّا ن‑ربّي: «ءيبراهيم يومن ربّي، مايان ا‑ف‑ت‑يگا ربّي د‑واد‑ف‑يرضا.»

⁴ وانّا ءيتخدامن ار‑يتامژ تيغراد‑نس، ءورد تيكّي اد‑گانت، والاينّي ف‑تووري لّي‑يسكر ا‑ف‑ا‑تنت‑يتامژ.

⁵ ءيمّا وانّا يومنّ س‑والّي ياكّان سّلامت ءي‑مدّن أُخشنّين، را‑ت‑يگ ربّي د‑واد‑ف‑يرضا ف‑سّيبت ن‑ما‑يومن، ءورد ف‑سّيبت ن‑كرا ءيسكار.

⁶ ءولا داود ءيملا ءيزد امباركي ا‑يگا وانّا‑ف‑يرضا ربّي بلا ءيسكر يات،

⁷ ييني: «ءيمباركين اد‑گان وينّا مي ءيصامح ربّي ف‑دّنوب‑نسن، ءيسّيتّي فلّاسن غايلّي‑تن‑يشّحشّامن.

⁸ امباركي ا‑يگا وانّا مي ءور‑يحاسب ربّي لمعصيات‑نس.»

⁹ ما‑را‑نيني ف‑لباراكا‑ياد ف‑يساول داود؟ ءيس‑تلّا غير ءي‑ويلّي ژّولّانين ءي‑دّات‑نسن؟ ءوهو، تلّا ءولا ءي‑ويلّي ءور‑ژّولّينين ءي‑دّات. اشكو نغرا ما‑يتياران ف‑يبراهيم، نغر ءيزد ف‑سّيبت ن‑ما‑يومن ا‑ف‑ت‑يگا ربّي د‑واد‑ف‑يرضا.

¹⁰ ءيمّا رّضا‑ياد، ماناگو اد‑اس‑ت‑يفكا ربّي؟ ءيزد غاكود لّيغ ءور‑تا‑يژّولّي ءيبراهيم ءي‑دّات‑نس، نغد غ‑تغوردين ن‑ماد‑اس‑يژّولّا؟ ءيفكا‑ياس‑ت ربّي لّيغ ءور‑تا‑يژّولّي.

¹¹ تگا‑ياس‑تژالّيت‑ان تاماتارت ما‑س‑ا‑د‑يكتّي رّضا لّي‑اس‑يفكا ربّي ف‑سّيبت ن‑ما‑يومن لّيغ ءور‑تا‑يژّولّي ءي‑دّات‑نس. غمكاد ا‑س‑يوورّي ءيگا ءيبراهيم باباتسن ن‑كولّو ويلّي ءومنّين ربّي، ا‑تن‑يگان د‑ويلّي‑ف‑يرضا ربّي واخّا ءور‑ژّولّين ءي‑دّات.

¹² ءيمّا ءيبراهيم ءيگا باباتسن ءولا ن‑ويلّي ژّولّانين ءي‑دّات، ءورد غير ف‑سّيبت ن‑تژالّيت والاينّي ف‑سّيبت ن‑ماد‑ومنّ ربّي ءولا نتني غمكلّي يومن ءيبراهيم لّيغ ءور‑تا‑يژّولّي ءي‑دّات‑نس.

ءيرضا ربّي ف‑يبراهيم

¹³ اوال ءيزگان ا‑س‑ينّا ربّي ءي‑يبراهيم ءولا تاروا‑نس، ييني‑اس: «را‑توورتم كولّو دّونيت.» ءورد ف‑سّيبت ن‑شّرع ا‑ف‑اس‑ينّا اوال‑ان، والاينّي ف‑سّيبت ن‑ما‑يومن ءيبراهيم ءيرضو فلّاس ربّي.

¹⁴ مراد ءيزد ايت‑شّرع ا‑را‑يوورت دّونيت ءور‑را‑ييلي يات ءي‑ويلّي ءومنّين ءولا‑را‑يزگا‑واوال‑ان ن‑ربّي.

¹⁵ ءيمّا شّرع را‑د‑ياوي لعقوبيت ن‑ربّي ف‑ويلّي سّنّين شّرع. والاينّي غويلّي‑ت‑ور‑سّينّين، نتني ءور‑زگيس‑فّوغن.

¹⁶ ءيمّا غويلّي ءومنّين، نتني ا‑را‑يامژ كولّو ماياد. نتني ا‑مي‑را‑يسّافو ربّي اوال‑نس، باش ا‑ياكّا لباراكا‑نس ءي‑كولّو وينّا گانين تاروا ن‑يبراهيم، ءورد غير ءي‑ويلّي سكارنين س‑شّرع، والاينّي را‑ستّ‑ياكّا ءي‑ويلّي ءومنّين غمكلّي يومن ءيبراهيم. اشكو ءيبراهيم يوورّي ءيگا باباتنّغ كولّواغ،

¹⁷ غمكلّي ءيتياران: «گيغ‑ك د‑باباتسن ن‑ايت‑تميزار گّوتنين.» غمكاد ا‑س‑يگا ءيبراهيم باباتنّغ دار ربّي لّي‑س‑يومن، ا‑ت‑يگان د‑والّي ءيسّدّرن غويلّي مّوتنين، ار‑يتامر ما‑ور‑يلّين ا‑ييلي س‑يلّا.

¹⁸ ءيمّا ءيبراهيم، واخّا ءور‑تا‑ياس‑يلّي يات غ‑مايلّي ءيترجو، ءيزوويد ار‑سول‑يترجو س‑ليمان ءيگّوتن ايلّيغ‑نّيت يوورّي ءيگا «باباتسن ن‑ايت‑تميزار گّوتنين.» ءينّا‑ياس ربّي: «غونشكاد ا‑راد‑گن تاروا‑نّك.»

¹⁹ نتّا ءور‑يشكّا غ‑ماد‑اس‑ينّا ربّي، واخّا ءيسّن ءيس‑دارس‑يلّا ما‑يتگّان ميّا ن‑وسگُّاس، تووسّر دّات‑نس باهرا ءولا تژضار‑تمغارت‑نس سارا ا‑تربّو.

²⁰ يومن ربّي بلا‑اكُّ ءيشكّا غ‑واوال لّي‑س‑اس‑ينّا. ءيزايد ءيدوس غ‑ليمان‑نس ار‑يتالغ ربّي،

²¹ ييسّان باهرا ءيس‑يژضار ربّي ا‑يكمّل مايلّي‑س‑اس‑ينّا س‑واوال ءيزگان.

²² ماياد ا‑ف‑ت‑يگا ربّي د‑واد‑ف‑يرضا، اشكو يومن.

²³ والاينّي لّيغ ءيتيارا «ءيگا‑ت د‑واد‑ف‑يرضا،» ءورد غير ف‑سّيبت ن‑يبراهيم ا‑ف‑يتيارا‑واوال‑ان.

²⁴ ءيتيارا ف‑سّيبت‑نّغ ءولا نكُّني. اشكو ربّي راد‑اغ‑يگ د‑ويد ف‑يرضا ءولا نكُّني، ف‑سّيبت ن‑ما‑نومن سرس نتّان لّي‑د‑يسّنكرن سيديتنّغ ياسوع زغ‑لموت.

²⁵ ءيدحي‑ت ا‑يمّت ف‑سّيبت ن‑دّنوب‑نّغ، ءيسّنكر‑ت‑يد ا‑يسكر سّلامت غ‑گراتنّغ ديدس.