ruma 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيمّا غيلاد، ما‑را‑نيني ف‑ايت‑يودايا؟ ءيس‑ور‑دارسن تيميخار ن‑ربّي ءوگُّار ن‑مدّن ياضني؟ ءيمّا تاژالّيت ن‑دّات، ءيس‑ور‑گيس‑تلّي كرا لّفايتّ؟

² راد‑اون‑ينيغ، نتني اد‑دار تيميخار س‑كيگان. تاماخيرت تامزواروت: نتني ا‑مي‑يفكا ربّي ءيواليون‑نس.

³ والاينّي لّيغ ءور‑زگان كرا ن‑ايت‑يودايا غ‑يواليون ن‑ربّي، ءيس‑يفّوغ نتّان زغ‑يواليون‑ان؟

⁴ ءوهو، ءور‑ا‑يتفّوغ ربّي زغ‑واوال‑نس. ار‑بدّا‑يسكار س‑لحقّ واخّا دا‑كولّو‑سكارن مدّن س‑تكركاس. غمكلّي ءيتياران: «را‑يبان ءيس‑يُغژان‑واوال‑نّك، ژرن ءيمصراضن‑نّك ءيزد كيّي ا‑دار لحقّ.»

⁵ والاينّي ءيغ‑ا‑يتبان لحقّ ن‑ربّي س‑وگُّار ف‑سّيبت لّخُشانت لّي‑نسكار نكُّني، ءيزد را‑نيني «ربّي ءور‑يغوي لحقّ لّيغ فلّانّغ ءيغضب.» ها‑يّي ساولغ زوند مدّن ن‑دّونيت‑اد،

⁶ والاينّي ءور‑را‑نيني غمكان. اشكو ربّي، مراد ءيس‑ور‑دارس لحقّ ءور‑را‑ييژضار ا‑يحكام ف‑دّونيت.

⁷ ءيغ‑نفّوغ زغ‑لحقّ، نمل ءيزد ربّي ا‑دار لحقّ. والاينّي ءيغ‑نسّبايّن تيموغرا ن‑ربّي س‑غمكان، ماخ ايلّيغ سول ءيرا ا‑فلّانّغ‑يحكام ءيگ‑اغ د‑ويلّي أُخشنّين؟

⁸ ءيغ‑يگا غمكان ءيس‑ور‑را‑ياف ا‑نيني: «نكرات ا‑نسكار لخُشانت باش ا‑يبان‑وفولكي ن‑ربّي س‑وگُّار»؟ لّان‑نّيت كرا ن‑مدّن ار‑گينّغ‑رگّمن، غالن ءيزد غمكان ا‑س‑ا‑نتّيني. ءيمّا نتني را‑فلّاسن‑يتّوت لحوكم لّي‑اسن‑يگان.

كولّو مدّن سكرن دّنوب

⁹ ءيمّا نكُّني ن‑ايت‑يودايا، ءيس‑نوف مدّن ياضني؟ ءوهو ءور‑تن‑نوف، اشكو ءيلّا لحوكم ن‑ربّي ف‑كولّو مدّن غمكلّي‑ياد نّيغ، ييلي ف‑ايت‑يودايا ييلي‑داغ ف‑ايت‑تميزار ياضني، اشكو ار‑كولّو‑سكارن دّنوب.

¹⁰ غمكلّي ءيتياران غ‑وارّا ن‑ربّي: «ءور‑يلّي يان ءيفولكين،

¹¹ ءور‑يلّي يان ءيفهمن، ءور‑يلّي يان ءيسيگّيلن ربّي.

¹² فّوغن اغاراس كولّوتن، جلان. ءور‑يلّي يان ءيسكارن افولكي، ءور‑اكُّ‑يلّي يان.

¹³ ار‑رژّمن اقرجوض‑نسن زوند امضّال ءيخوان. تيكركاس كا‑تاسين س‑يلس. سّمّ زوند ءيلگمّاضن ا‑يتكّان ءينفورن‑نسن.

¹⁴ ءيمي‑نسن ار‑د‑يسّوفوغ نّعلات د‑ترگّام.

¹⁵ ار‑بدّا‑توجادن اد‑سّياگّاسن وييّاض.

¹⁶ ار‑تاوين تامّارا د‑تگوضي كولّو ماني تكّان.

¹⁷ اغاراس ن‑سّلامت ءور‑جّو‑ت‑سّينّ.

¹⁸ ءور‑اكُّ‑ا‑توقّارن ربّي.»

¹⁹ كولّو ما‑يتياران غ‑شّرع، نسّن ءيس‑يتيارا ف‑سّيبت ن‑ويلّي دار شّرع، باش ا‑يقّن ءيمي ءي‑كرايگاتّ يان، تيلي دّونيت كولّوتّ غ‑دّو لحوكم ن‑ربّي.

²⁰ اشكو ءور‑يژضار يان ا‑يسكر سّلامت غ‑گراس د‑ربّي س‑يسكّيرن ن‑شّرع. والاينّي شّرع اد‑اغ‑يمالان ما‑يگان دّنوب.

رّحمت ن‑ربّي

²¹ ءيمّا غيلاد ءيملا‑ياغ ربّي اغاراس لّي‑س‑يسكر سّلامت غ‑گراس د‑مدّن. ءورد شّرع ا‑س‑تّ‑يسكر، والاينّي ار‑نّيت‑يمالا شّرع ءولا لانبيا ءيزد لحقّ ا‑يگا.

²² اشكو ربّي ار‑يسكار سّلامت غ‑گراس د‑ويلّي ءومنّين س‑ياسوع لماسيح. ار‑تّ‑ياكّا ءي‑كولّو وانّا يومنّ، اشكو بنادم يان ا‑يگا.

²³ كولّو مدّن سكرن دّنوب، اگّوگن ف‑لمجد ن‑ربّي.

²⁴ والاينّي س‑رّحمت‑نس ا‑س‑اسن‑يفكا لباراكا‑ياد، ءيسكر سّلامت غ‑گراس ديدسن ف‑سّيبت لّماسيح ياسوع.

²⁵ يوزن‑د لماسيح ا‑يمّت ءيفرو مدّن س‑يدامّن‑نس باش ا‑يصامح ءي‑وينّا سرس ءومنّين. غمكاد ا‑س‑يملا ربّي ءيزد س‑لحقّ ا‑س‑ا‑بدّا‑يسكار. غايد ءيزرين ءيصبر باهرا، ءور‑ا‑يتحكام ف‑دّنوب ن‑مدّن.

²⁶ ءيمّا غيلاد ءيملا مامنك ا‑يزّگا لحقّ، ءيفك سّلامت ءي‑وانّا يومنّ س‑ياسوع.

²⁷ ءيس‑سول‑نژضار ا‑نتشكار ءيخف‑نّغ؟ ءوهو، ءور‑اكُّ‑نژضار ا‑نشكر ءيخف‑نّغ، اشكو ءور‑ا‑فلّانّغ‑يترضو ربّي ف‑سّيبت ن‑كرا نسكار والاينّي ف‑سّيبت ن‑ما‑نومن.

²⁸ نلمد ءيس‑يسكر ربّي سّلامت غ‑گراس د‑مدّن ف‑سّيبت لّيمان‑نسن، ءورد ف‑سّيبت ن‑يسكّيرن ن‑شّرع.

²⁹ را‑كُن‑سقساغ غيلاد: ءيزد ربّي وين ايت‑يودايا كا‑يگا؟ ءيس‑ور‑يگي وين ايت‑تميزار ياضني ءولا نتني؟ س‑صّاحت، ءيگا ربّي ن‑ايت‑تميزار ياضني،

³⁰ اشكو ءور‑يلّي ابلا نتّان. را‑يسكر سّلامت غ‑گراس د‑ايت‑يودايا ف‑سّيبت ن‑ماد‑ومنّ، ءيسكر سّلامت غ‑گراس د‑ايت‑تميزار ياضني ف‑سّيبت ن‑ماد‑ومنّ ءولا نتني.

³¹ والاينّي ءيغ‑ا‑نتامن غمكاد ءيس‑را‑نيري ا‑ن‑نلوح شّرع؟ ءوهو، ءور‑اكُّ‑را‑ن‑نلوح شّرع، والاينّي ار‑ت‑سول‑نزّگا.