ruma 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لحوكم ن‑ربّي

¹ ءيمّا كيّي ا‑بنادم، ءور‑دارك ما‑تّينيت. اشكو ءيغ‑ا‑تحكامت ف‑مدّن ياضني، هاتين تحكامت ءولا ف‑يخف‑نّك، اشكو كيّي لّي‑يتحكامن، ار‑تسكارت زوند نتني.

² نسّن ءيزد س‑لحقّ ا‑س‑ا‑يكّات ربّي لحوكم ف‑ويلّي سكارنين تيغاوسيوين‑ان.

³ ءيمّا كيّي ا‑بنادم، ءيس‑تغالت ءيس‑را‑تنجمت زغ‑لحوكم ن‑ربّي؟ ار‑تحكامت ف‑ويلّي سكارنين غمكان، والاينّي ار‑تسكارت غمكان ءولا كيّي.

⁴ ءيس‑ا‑تّينيت د‑يخف‑نّك «ربّي ءور‑را‑فلّا‑يحكام اشكو تگّوت دارس لحنانت د‑ومهال د‑صّبر»؟ والاينّي ءيس‑ور‑تسّينت ربّي ار‑سول‑گيك‑يتحنّو اشكو ءيرا گيك ا‑تفلت كولّو ما‑يُخشنّ توورّيت س‑وغاراس‑نس؟

⁵ ءيمّا كيّي ءيقّور‑وول‑نّك ءور‑تريت ا‑دي‑توورّيت. هاتي ار‑تسّيگاتّ ف‑يخف‑نّك لعقوبيت لّي‑را‑فلّاك‑يضر غ‑واسّ لّي‑غ‑را‑يوت ربّي لحوكم س‑لحقّ ءيمل منشك ا‑باهرا‑يكورها لخُشانت.

⁶ اشكو ربّي را‑يرار ءي‑كرايگاتّ يان ف‑ما‑يسكر.

⁷ لّان كرا ن‑مدّن ار‑بدّا‑سكارن افولكي ار‑ن‑ترجون غ‑دار ربّي ا‑تن‑يسّاتّوي ار‑تن‑يسّيمغور ءيفك‑اسن تودرت ءيدومن. نتني راد‑اسن‑يفك ربّي تودرت لّيخرت.

⁸ ءيمّا وييّاض ار‑تمّاغن غير ف‑يخف‑نسن، ار‑سكارن س‑كولّو ما‑يُخشنّ، اگُين اد‑سكارن س‑لحقّ. نتني را‑فلّاسن‑يوت ربّي لعقوبيت س‑لغاضاب ءيتجهّدن.

⁹ كولّو بنادم نّا‑يسكارن ما‑يُخشنّ، راد‑اس‑تيلي‑تمّارا د‑تگوضي. را‑تيلي زوار ءي‑ايت‑يودايا تيلي ءولا ءي‑ايت‑تميزار ياضني.

¹⁰ ءيمّا كولّو وانّا ءيسكارن افولكي، را‑ت‑يسّاتّوي ربّي ءيسّيمغور‑ت ءيفك‑اس سّلامت. را‑ستّ‑يفك زوار ءي‑ايت‑يودايا ءيفك‑تّ ءولا ءي‑ايت‑تميزار ياضني.

¹¹ اشكو ربّي ءور‑ا‑يسكار س‑وودماون.

¹² وينّا سكارنين دّنوب والاينّي ءور‑سّينّ شّرع ن‑ربّي، راد‑كولّو‑تياوهلاكن بلا شّرع. ءيمّا وينّا سّنّين شّرع ار‑سول‑سكارن دّنوب، شّرع ا‑را‑فلّاسن‑يحكام.

¹³ اشكو ربّي ءور‑ا‑يترضو ف‑ويلّي غير سفليدنين ءي‑شّرع، والاينّي ف‑ويلّي سكارنين س‑شّرع.

¹⁴ هان مدّن ن‑تميزار ياضني ءور‑سّينّ شّرع، والاينّي غاكود نّا‑ياسن‑ينّا‑وگايّو‑نسن اد‑سكارن غمكلّي ءيتّيني شّرع، ار‑مالان ءيس‑سّنّ ما‑تن‑د‑يقّانّ ا‑ت‑سكارن، واخّا ءور‑سّينّ شّرع.

¹⁵ ار‑مالان ءيس‑تّيارا لمعنا ن‑شّرع غ‑وولاون‑نسن، ار‑سّحسّون س‑توگّا لّي‑لّانين غ‑يگويّا‑نسن. ار‑گيسن‑تمّاغن ءيسوينگيمن‑نسن ارد ءيسّانّ مايد سكارن ءيزد لخُشانت نغد افولكي.

¹⁶ را‑گيسن‑يبان كولّو ماياد غ‑واسّ لّي‑غ‑را‑يحكام ربّي س‑يسم لّماسيح ياسوع ف‑كولّو ما‑ينتلن غ‑وول ن‑بنادم. غمكاد ا‑يتّيني لخبار ءيفولكين لّي‑س‑ا‑تبرّاحغ.

ايت‑يودايا ءولا شّرع ن‑موسا

¹⁷ ءيمّا كيّي ما‑را‑تسكرت، كيّي لّي‑يتّينين ف‑يخف‑نّك گو‑يودايا ا‑تگيت؟ ار‑تبنّوت ف‑شّرع، ار‑تّينيت تگيت وين ربّي.

¹⁸ ار‑تّينيت تسّنت ما‑يرا ربّي، تيسّانت ما‑را‑يفولكي اشكو ءيملا‑ياك‑ت شّرع.

¹⁹ كيّي تگيت ءيخف‑نّك د‑ومزوار ءي‑يبوكاضن ءولا تيفاوت ءي‑ويلّي لّانين غ‑تيلّاس.

²⁰ ءيعزّو دارك ا‑تملت اغاراس ءي‑يمجلان ار‑تسّلمادت ءيبوجاديين. تغالت ءيس‑تطّافت كولّو تاواسّنا د‑لحقّ ف‑سّيبت ن‑ما‑تسّنت شّرع.

²¹ ءيمّا كيّي لّي‑يسّلمادن وييّاض، ءيس‑ور‑را‑تسّلمادت ءيخف‑نّك؟ تميارت اد‑اسن‑تّينيت «ا‑ور‑تاكُرم» والاينّي ءيس‑ورد كيّي ايد ءيتاكُرن؟

²² تميارت ا‑تّينيت «ا‑ور‑تزنوم» والاينّي ءيس‑ورد كيّي ايد ءيتزنون؟ ار‑باهرا‑تّژيت ف‑لاصنام، والاينّي ءيس‑ورد كيّي ا‑يتاوين ما‑يتّيلين غ‑تگُمّا لّاصنام؟

²³ ار‑تّينيت ف‑يخف‑نّك ءيس‑توفت مدّن ياضني اشكو تسّنت شّرع ن‑ربّي، والاينّي ءيس‑ورد كيّي ا‑يتكنادن ربّي تفّوغت زغ‑شّرع‑نس؟

²⁴ غمكلّي ءيتياران غ‑وارّا ن‑ربّي: «ايت‑تميزار ياضني ار‑رگّمن غ‑يسم ن‑ربّي ف‑سّيبت‑نّون كونّي.»

²⁵ راد‑اك‑يشوو ءيغ‑تگيت زغ‑ويلّي تژالّانين ءي‑دّات‑نسن، ءيغ‑ا‑تسكارت س‑شّرع. والاينّي ءيغ‑ور‑ا‑تسكارت س‑شّرع، هان تاژالّيت ن‑دّات‑نّك ءور‑تگي يات.

²⁶ ءيمّا وانّا ءور‑يژّولّين ءي‑دّات، ءيغ‑ا‑يسكار س‑شّرع را‑فلّاس‑يرضو ربّي ءولا نتّا زوند ءيغ‑يژّولّا ءي‑دّات.

²⁷ غمكاد ا‑س‑كُن‑وفن ايت‑تميزار ياضني اشكو نتني ار‑سكارن س‑شّرع واخّا ءور‑دارسن تاژالّيت ن‑دّات، ءيمّا كونّي ن‑ايت‑يودايا تفّوغم زغ‑شّرع واخّا تژّولّام ءي‑دّات ءيلين‑وارّاتن ن‑شّرع غ‑گر ءيفاسّن‑نّون.

²⁸ ما‑يگان گو‑يودايا باب ن‑تژالّيت س‑لحقّ؟ ءور‑ت‑يگي غوالّي ءيسّغوسن دّات‑نس س‑تژالّيت لّي‑يتبانّ ءي‑مدّن.

²⁹ ا‑يگان گو‑يودايا س‑لحقّ د‑والّي ءيسّغوسن ءول‑نس. ءيسّغوس‑ت س‑تحكيمت ن‑رّوح لقودوس ءورد س‑وارّاتن ن‑شّرع، ءيبدّل زغ‑وگُنس‑نس ءورد برّا‑نس. وانّا ءيسكارن غمكاد، ءورد بنادم ا‑را‑ت‑يالغ والاينّي ربّي ا‑را‑ت‑يالغ.