ruma 16 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيسلّم‑ن بولُس ف‑ايتماتن

¹ ريغ ا‑كُن‑وصّاغ ف‑وولّتماتنّغ ءيعزّان فيبي لّي‑يگان تامعاونت ءي‑ومناگّار غ‑كانخاريّا.

² سّمرحبات سرس س‑يسم ن‑سيديتنّغ غمكلّي‑س‑د‑يقّان ءيمژلاين ن‑ربّي. عاونات‑ستّ س‑اينّا‑ن‑دارون‑تحتاجّا، اشكو نتّات تعاون مدّن گّوتنين تعاون‑يّي ءولا نكّي.

³ ار‑ن‑تسلّامغ ف‑بريسكيلّا د‑اكيلا لّي‑ديدي‑خدمنين غ‑تووري لّماسيح ياسوع.

⁴ نتني كّان‑تّين ءوجادن اد‑فكن ءيخف‑نسن ار لموت ف‑سّيبت‑ينو. ار‑تن‑تشكارغ باهرا، ءورد غير نكّي والاينّي ار‑تن‑تشكارن كولّو ءيمناگّارن ن‑ايت‑تميزار اگّوگنين.

⁵ ار‑ن‑داغ‑تسلّامغ ف‑ومناگّار لّي‑دارسن‑يتمونون غ‑تگمّي‑نسن. ار‑ن‑تسلّامغ ءولا ف‑ومدّاكُّل‑ينو ءيعزّان ابينيتوس. ءيگا نتّان امزوارو لّي‑يومنّ س‑لماسيح غ‑تمازيرت ن‑اسيّا.

⁶ ار‑ن‑تسلّامغ ف‑ماريام لّي‑باهرا‑يتخدامن غ‑گراتون.

⁷ ار‑ن‑تسلّامغ ءولا ف‑اندرونيكوس د‑يونياس لّي‑گانين زغ‑ايت‑داري. كّان‑تّين ديدي غ‑لحبس. تياوسّانّ نتني غ‑يرقّاسن، ءومژن اغاراس لّماسيح ءور‑تا‑ت‑ومژغ نكّي.

⁸ ار‑ن‑تسلّامغ ف‑امبلياتوس لّي‑يگان امدّاكُّل‑ينو ءيعزّان غ‑سيديتنّغ.

⁹ ار‑ن‑تسلّامغ ءولا ف‑وربانوس لّي‑ديدنّغ‑يتخدامن غ‑تووري لّماسيح، نتّا د‑ومدّاكُّل‑ينو ءيعزّان ستاخيس.

¹⁰ ار‑ن‑تسلّامغ ف‑ابالّيس لّي‑يتيارامن ءيزگا غ‑لماسيح. ار‑ن‑تسلّامغ ءولا ف‑ايت‑تگمّي ن‑اريستوبولُس.

¹¹ ار‑ن‑تسلّامغ ف‑هيروديون لّي‑يگان زغ‑ايت‑داري. ار‑ن‑تسلّامغ ءولا ف‑ويلّي گانين وين سيديتنّغ زغ‑ايت‑تگمّي ن‑ناركيسّوس.

¹² ار‑ن‑تسلّامغ ف‑تخدّامين ن‑سيديتنّغ تريفينا د‑تريفوسا. ار‑ن‑تسلّامغ ءولا ف‑وولّتماتنّغ ءيعزّان بارسيس لّي‑باهرا‑يتخدامن ءي‑سيديتنّغ.

¹³ ار‑ن‑تسلّامغ ف‑روفوس لّي‑يتياوژلاين ءي‑تووري ن‑سيديتنّغ. ار‑ن‑تسلّامغ ءولا ف‑ينّاس لّي‑زگيگي‑يسكارن زوند يوس.

¹⁴ ار‑ن‑تسلّامغ ف‑اسينكريتوس د‑فليگون د‑هارميس د‑باتروباس د‑هارماس نتني د‑ايتماتن لّي‑ديدسن‑لّانين.

¹⁵ ار‑ن‑تسلّامغ ف‑فيلولوگوس د‑يوليا د‑نيريوس د‑وولّتماس، نتني د‑ولومباس د‑كولّو ءيمژلاين ن‑ربّي لّي‑ديدسن‑لّانين.

¹⁶ نسالّامات ءي‑نگراتون س‑ونسالّام ن‑تاگُمات. ار‑ن‑فلّاون‑تسلّامن كولّو ءيمناگّارن لّماسيح.

المّود لّحقّ

¹⁷ ضالبغ‑كُن اي‑ايتما، ا‑ستّي‑تّاويم غ‑ويلّي اطّونين ايتماتن ار‑اسن‑تگّان ءيفيكش ما‑تن‑يسّطارن، ار‑تفّوغن زغ‑ولمّود لّي‑تلمدم غايد ءيزرين. ءينيغ‑اون، انفات‑اسن

¹⁸ اشكو غويلّي سكارنين غمكاد ءورد سيديتنّغ ا‑مي‑تخدامن والاينّي اديس‑نسن. س‑يواليون شوانين ميمنين ا‑س‑ا‑جلّون لعاقل ن‑وانّا ءيگان لغشيم.

¹⁹ ءيمّا كونّي، فرحغ ف‑سّيبت‑نّون اشكو سفلدن كولّو مدّن ف‑مامنك ا‑تومژم غ‑لماسيح. والاينّي ريغ ا‑توورّيم تيسّانم كولّو ما‑يفولكين، تانفم ءي‑كولّو ما‑يُخشنّ.

²⁰ ءيمّا ربّي لّي‑بدّا‑ياكّان سّلامت، يان ءيميكّ را‑يرار شيطان ا‑يگ البّيج غ‑دّو ءيضارن‑نّون. اد‑اون‑تيلي لباراكا ن‑سيديتنّغ ياسوع.

²¹ ار‑ن‑فلّاون‑يتسلّام تيموتاوس لّي‑ديدي‑يتخدامن، نتّا د‑لوكيوس د‑ياسون د‑سوسيباتروس لّي‑گانين زغ‑ايت‑داري.

²² ءولا نكّي تارتيوس لّي‑يوران تابرات‑اد س‑وفوس‑ينو، ار‑ن‑فلّاون‑تسلّامغ س‑يسم ن‑سيديتنّغ.

^23-24 ار‑ن‑فلّاون‑يتسلّام گايوس لّي‑دار گّوزغ ءوسّان‑اد. تيگمّي‑نس ا‑غ‑ا‑تمونون كولّو ايتماتن ن‑ومناگّار. ار‑ن‑فلّاون‑يتسلّام اراستوس لّي‑يگان بو‑صندوق ن‑تمدينت‑اد، نتّا ءولا گماتنّغ كوارتوس.

²⁵ ءيمّا غيلاد، ا‑نالغ ربّي لّي‑يژضارن ا‑كُن‑يزّگا غ‑ليمان‑نّون غمكلّي‑اون‑نّيغ س‑لخبار ءيفولكين لّي‑س‑ا‑تبرّاحغ ف‑لماسيح ياسوع.

²⁶ اشكو مايلّي ءينتلن كولّو غايد ءيزرين، ءيسّبايّن‑ت‑يد ربّي غيلاد، ءيمل‑اغ‑ت غ‑وارّاتن لّانبيا، باش اد‑وورّين امنّ مدّن غ‑كولّو تيميزار ن‑دّونيت ار‑سكارن س‑واوال‑نس، غمكلّي يوصّا ربّي لّي‑بدّا‑يلّان.

²⁷ ربّي لّي‑دار كولّو تاحكيمت، نتّان ا‑باهرا‑نتالغ ف‑ياسوع لماسيح غيلاد ءولا كولّو مايد‑د‑يفتان. امين.