ruma 15 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تمعاوانات ءي‑نگراتون

¹ نكُّني لّي‑يدوسن غ‑ليمان، ءيلّا فلّانّغ ا‑نتعاوان غويلّي ضعفنين غ‑اينّا فلّاسن ءيژّاين. ا‑ور‑نتّيري غير ا‑نرضو ءيخف‑نّغ.

² هاتي ءيلّا ف‑كرايگاتّ يان ا‑يترضو گماس ار‑گيس‑يسكار لخير ار‑ت‑يسّدوس غ‑وغاراس لّماسيح.

³ اشكو لماسيح ءولا نتّا ءور‑تّين‑يكّي ار‑يترضو ءيخف‑نس. ءيجرا‑ياس غمكلّي ءيتياران: «فلّا ا‑ف‑ا‑د‑طّارنت‑ترگّام ن‑ويلّي گيك رگّمنين.»

⁴ كولّو ما‑يتياران غ‑ووسّان لّي‑زرينين، ءيتيارا باش ا‑نلمد نكُّني، نصبر نزعم نزگا غ‑رّجا ف‑سّيبت ن‑مايلّي ناقرا غ‑وارّاتن‑ان.

⁵ ضالبغ ربّي لّي‑ياكّان صّبر د‑زّعامت، اد‑اون‑يفك ا‑بدّا‑دي‑تّمشاشكام ءي‑نگراتون غ‑تامونت لّماسيح ياسوع،

⁶ باش ا‑كولّو‑تّمونوم س‑يان‑واوال ا‑تّالغم ربّي باباس ن‑سيديتنّغ ياسوع لماسيح.

⁷ ماياد ا‑ف‑اون‑نّيغ ا‑تّقبالم ءي‑نگراتون غمكلّي‑كُن‑يقبل لماسيح، باش ا‑گيگون‑يبايّن لمجد ن‑ربّي.

⁸ اشكو لماسيح يوورّي ءيگا اخدّام ءي‑ايت‑يودايا باش ا‑يمل ءيس‑يقاما ربّي غ‑لحقّ، ءيسّافو ءيواليون زگانين لّي‑س‑ينّا ءي‑لاجدود‑نسن.

⁹ ءيسكر غمكاد باش اد‑ژرن ايت‑تميزار ياضني رّحمت ن‑ربّي الغن‑ت ءولا نتني. غمكلّي ءيتياران: «ماياد ا‑ف‑را‑كي‑تشكارغ غ‑گر ايت‑تميزار اگّوگنين، الغّ ءيسم‑نّك س‑يموريگن لّفرح.»

¹⁰ ءيتيارا‑داغ: «واي‑ايت‑تميزار اگّوگنين، فرحات د‑مدّن ن‑ربّي.»

¹¹ ءيتيارا‑داغ: «سبّحات ءي‑ربّي ا‑بنادم كولّوكن، تالغم‑ت ا‑كولّو ءيمزدغن ن‑دّونيت.»

¹² ءينّا‑داغ ءيشاعيا: «را‑د‑ياشك يان زغ‑تاسوت ن‑ياسّا. را‑ت‑يسّاتّوي ربّي ا‑يحكام غ‑ايت‑تميزار اگّوگنين. نتّان ا‑غ‑را‑ن‑كولّو‑ترجون.»

¹³ ضالبغ ربّي لّي‑ياكّان رّجا، ا‑كُن‑يعمّر س‑لفرح د‑سّلامت ءيگّوتن غيلاد غ‑سرس‑تومنم، باش ا‑باهرا‑گيگون‑يتّيگات رّجا‑ياد س‑تحكيمت ن‑رّوح لقودوس.

تاووري ن‑بولُس

¹⁴ واي‑ايتما، سّنغ نكّي ءيس‑تعمّرم س‑وفولكي ءولا تاواسّنا، تيژضارم ا‑تّنصاحم ءي‑نگراتون.

¹⁵ والاينّي س‑زّعامت ايد‑س‑اون‑ين‑وريغ ف‑تغاوسيوين‑اد. زعمغ اد‑اون‑تنت‑يد‑سّكتيغ اشكو ربّي اد‑يّي‑يفكان لباراكا‑ياد،

¹⁶ ءيگ‑يّي د‑وخدّام لّماسيح ياسوع غ‑گر ايت‑تميزار اگّوگنين. ار‑تخدامغ زوند يان‑ونمغور ن‑تگمّي ن‑ربّي، ار‑سّاكمورغ مدّن ن‑ايت‑تميزار ءي‑ربّي س‑تبرّاحت لّخبار ءيفولكين، باش ا‑فلّاسن‑يرضو ربّي ءيژلي‑تن ءي‑يخف‑نس س‑وسغوس ن‑رّوح لقودوس.

¹⁷ ءيلّا داري ما‑س‑ا‑تفراحغ س‑يسم لّماسيح ياسوع غ‑تووري‑اد لّي‑س‑ا‑تخدامغ ءي‑ربّي،

^18-19 اشكو ءور‑راد‑زعمغ اد‑ساولغ ف‑يات ابلا ما‑يسكر لماسيح ف‑وفوس‑ينو. اشكو س‑يواليون د‑يسكّيرن د‑لقوّات د‑تميتار تجهّدنين ءولا س‑تحكيمت ن‑رّوح لقودوس ا‑س‑يرور ايت‑تميزار اد‑امژن اغاراس ن‑ربّي. غمكاد ا‑س‑سّلكمغ لخبار‑نس ءي‑كولّو تيميزار زغ‑تسگا ن‑وروشاليم ار تاسگا ن‑يلّيريكون.

²⁰ هاتي يات‑تغاوسا كاد‑ريغ: اد‑تبرّاحغ س‑لخبار ءيفولكين غ‑ينّاغ ءور‑جّو‑سفلدن ف‑لماسيح، اشكو ءور‑ريغ اد‑بنّوغ ف‑لّساس ن‑كرا ن‑يان ياضني.

²¹ غمكلّي ءيتياران: «غويلّي ءور‑يروح لخبار‑نس ا‑را‑ت‑يژر. غويلّي ءور‑فلّاس‑سفلدنين ا‑را‑ت‑ييسّان.»

ءيرا بولُس ا‑يدّو س‑روما

²² مايان ا‑يّي‑يتكّيسن ايلّيغ ءور‑ا‑ن‑تّاشكيغ س‑دارون.

²³ كيگان د‑يسگُّاسن ايد تّيريغ ا‑ن‑دارون‑اشكغ. والاينّي غيلاد غ‑كمّلغ تاووري‑نو غ‑تسگيو‑اد

²⁴ ار‑باهرا‑ترجوغ ا‑كُن‑ين‑سليغ غاكود نّا‑غ‑راد‑مودّوغ س‑صبانيا، باش اد‑فرحغ غ‑گراتون، تعاونم‑يّي ءيلمّا اد‑كمّلغ ف‑ومودّو‑نو.

²⁵ ءيمّا غيلاد راد‑دّوغ زوار س‑وروشاليم اد‑عاونغ ءيمژلاين ن‑ربّي غين.

²⁶ اشكو ايتماتن غ‑ماكيدونيّا د‑اخايا، ءيبايّن‑اسن ءيس‑يفولكي اد‑ازنّ كرا لّمعاونت ءي‑ويلّي ژلضنين غ‑يمژلاين ن‑ربّي غ‑وروشاليم.

²⁷ ءيبايّن‑اسن ءيس‑يفولكي اد‑سكرن ماياد، اشكو ءيلّا فلّاسن نتني ن‑ايت‑تميزار ياضني اد‑رارن لخير ءي‑ايت‑يودايا. ءيقّان‑تن‑د ا‑تن‑تعاوانّ س‑لباراكات ن‑دّات، اشكو ءومژن زغ‑دارسن لباراكات ن‑رّوح.

²⁸ ءيغ‑اسن‑ين‑سّلكمغ لامانت‑اد كمّلغ تاووري‑اد، را‑كُن‑سليغ زريغ س‑صبانيا.

²⁹ سّنغ غاكود نّا‑ن‑دارون‑وشكيغ را‑ن‑ديدي‑اويغ كولّو لباراكا لّماسيح.

³⁰ را‑كُن‑ضالبغ اي‑ايتما، س‑يسم ن‑سيديتنّغ ياسوع لماسيح ءولا س‑لحنانت ن‑رّوح لقودوس، ا‑تبكيسم تمعاوانم ديدي س‑تژالّيت ءي‑ربّي ف‑سّيبت‑ينو.

³¹ ضالبات ربّي ا‑يّي‑يجّنجم زغ‑ويلّي ءور‑ومنّين غ‑تمازيرت ن‑يودايا. تضالبم‑ت ءولا ف‑يمژلاين‑نس غ‑وروشاليم اد‑رضون س‑مايلّي‑س‑ريغ ا‑تن‑سرس‑عاونغ،

³² باش ا‑ن‑دارون‑اشكغ س‑لفرح ءيگّوتن غمكلّي ءيرا ربّي، سونفوغ غ‑گراتون.

³³ ضالبغ ربّي لّي‑بدّا‑ياكّان سّلامت ا‑ديدون‑ييلي كولّوكن. امين