ruma 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سكارات ف‑ما‑را‑يسّدوس ايتماتون

¹ قبلات غ‑ينگراتون وانّا ءور‑يدوسن غ‑ليمان، والاينّي ا‑ور‑ديدس‑تّمجاحادم ف‑يسوينگيمن‑نس.

² را‑ييلي كرا ن‑يان يومن ءيس‑يحلّا ا‑يشتّا كرايگاتّ كرا، ييلي يان ياضني ءور‑يدوس غ‑ليمان ءور‑يري ا‑يشتّا ابلا لخضرت.

³ ءيمّا غوالّي ءيشتّان كرايگاتّ كرا، ءيلّا فلّاس ا‑ور‑يحگر غوالّي ءيتكّيسن كرا زغ‑ومشّو، ييلي ف‑والّي ءيتكّيسن ا‑ور‑يحكام ف‑والّي ءيشتّان كرايگاتّ كرا، اشكو ربّي ا‑ت‑يقبلن.

⁴ ما‑تگيت كيّي ايلّيغ تريت ا‑تحكامت ف‑وخدّام ن‑وايّاض؟ سيديس ا‑را‑فلّاس‑يرضو نغد نتّان ا‑را‑ت‑يرگم. س‑صّاحت را‑فلّاس‑يرضو، اشكو سيديس ءيژضار ا‑ت‑يگ د‑واد‑ف‑يرضا.

⁵ را‑ييني كرا ن‑يان: «غاسّاد يوف ءوسّان ياضني،» ييني وايّاض: «ءوسّان كولّوتن يان اد‑گان.» والاينّي ءيقّان‑د كرايگاتّ يان ا‑ييسّان مامنك ا‑يتنباض غ‑يخف‑نس.

⁶ وانّا ءيژلاين اسّ، ار‑ت‑يژلاي باش ا‑يتوقّار سيديتنّغ. وانّا ءيشتّان ار‑يشتّا باش ا‑يتوقّار سيديتنّغ، ار‑يتشكار ربّي ف‑ما‑يشتّا. وانّا ءيتكّيسن كرا زغ‑ومشّو ار‑ت‑يتكّيس باش ا‑يتوقّار سيديتنّغ، ار‑يتشكار ربّي ءولا نتّا.

⁷ كولّواغ، ءيغ‑ندّر ءولا ءيغ‑نمّوت، ءورد ءيخف‑نّغ ا‑نترضو.

⁸ ءيغ‑ندّر را‑نرضو سيديتنّغ، ءيغ‑نمّوت را‑نرضو سيديتنّغ. اشكو ءيغ‑ندّر ءولا ءيغ‑نمّوت، وين سيديتنّغ ا‑نگا.

⁹ ماياد ا‑ف‑يمّوت لماسيح ءينكر‑د زغ‑لموت، باش ا‑يگ سيديتسن ن‑ويلّي مّوتنين ءولا سيديتسن ن‑ويلّي دّرنين.

¹⁰ ءيمّا كيّي، ماخ ايلّيغ ا‑تّحكامت ف‑گماك؟ ماخ ايلّيغ ا‑تّحگارت گماك؟ غ‑لگدّام ن‑ربّي ا‑غ‑را‑نبيدّ كولّواغ. نتّان ا‑را‑فلّانّغ‑يحكام،

¹¹ غمكلّي ءيتياران: «ءينّا سيدي ربّي ‹ءيزگا‑واوال‑اد زوند تودرت‑ينو. غ‑لگدّام‑ينو ا‑غ‑را‑د‑يكنو كرايگاتّ افود، ءيقرّا كرايگاتّ ءيلس ءي‑ربّي.› »

¹² كرايگاتّ يان گينّغ را‑يرار لحساب ف‑يخف‑نس ءي‑ربّي.

¹³ ماياد ا‑ف‑د‑يقّان ا‑ور‑سول‑نتحكام ف‑ينگراتنّغ، والاينّي ا‑نتنباض غ‑يخف‑نّغ ا‑ور‑سار‑نسرس كرا ن‑تبايضّرت غ‑لگدّام ن‑گماتنّغ ءولا كرا را‑ت‑يسّضر.

¹⁴ سّنغ ماياد باهرا اشكو ءيملا‑ياغ‑ت سيديتنّغ ياسوع: ءور‑يلّي كرا ن‑ومشّو ءيحرمن. والاينّي يان ءيغالن ءيس‑يحرم، راد‑اس‑يتياوحرام.

¹⁵ ءيغ‑تسّنت ءيس‑را‑يتياگّاس گماك س‑ما‑تشتّات كيّي، ءورد لحنانت اين‑س‑ا‑ديدس‑تسكارت. ا‑ور‑تادجت امشّو‑نّك ا‑يهلك غوالّي ف‑يمّوت لماسيح.

¹⁶ ا‑ور‑تادجم مدّن اد‑رگّمن غ‑مايلّي دارون ءيفولكين.

¹⁷ اشكو تاگلديت ن‑ربّي ءور‑تگي امشّو نغد تيسّي، والاينّي افولكي د‑سّلامت د‑لفرح ا‑تگا، س‑تحكيمت ن‑رّوح لقودوس.

¹⁸ وانّا ءيتخدامن ءي‑لماسيح غمكاد، را‑فلّاس‑يرضو ربّي ار‑تي‑تالغن مدّن.

¹⁹ ءيمّا غيلاد ءيلّا فلّانّغ ا‑بدّا‑نتّيري ما‑د‑يتاوين سّلامت ءولا ماد‑اغ‑يسّدوسن ءي‑نگراتنّغ.

²⁰ ا‑ور‑تهلكت تاووري ن‑ربّي ف‑سّيبت ن‑ومشّو. ءيحلّا‑كولّو‑ومشّو، والاينّي يان ءيشّان كرا ءيسّطارن وايّاض، هان لخُشانت اين ءيسكر.

²¹ را‑ياف ا‑ور‑تشّت تيفيّي نغد ا‑تسوت تيسّي ءيكتين نغد ا‑تسكرت كرا ياضني ءيغ‑يژضار گماك ا‑يضر ف‑سّيبت ن‑ما‑تسكارت.

²² تينباضين نّا‑دارك‑لّانين، حضو‑تنت غ‑وول‑نّك غ‑گراك د‑ربّي. امباركي ا‑يگا وانّا ءور‑دار ما‑س‑ا‑يتشكّو غ‑يخف‑نس غاكود نّا‑يسكار ما‑يرا.

²³ ءيمّا وانّا ءيشكّان غ‑ما‑يشتّا، ءيلّا فلّاس لحوكم اشكو ءور‑ا‑يسكار س‑تنباضين لّيمان‑نس. وانّا ءور‑يسكارن س‑ليمان، دّنوب اد‑اس‑يگا.