ruma 13 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لحوكّام ءولا ضّاريبا

¹ ءيلّا ف‑كرايگاتّ يان ا‑يسكار س‑واوال ن‑ويلّي تحكامنين تامازيرت. اشكو ءور‑يلّي يان ءيتحكامن بلا‑ت‑يژلي ربّي ءي‑تووري‑ان. ءولا غويلّي حكامنين غيلاد، ربّي ا‑تن‑يژلين.

² يان ءيضاضّن لحوكّام، هاتي ءيضاضّ مايلّي ءيرا ربّي، د‑وانّا ءيضاضّن را‑فلّاس‑يتّوت لحوكم.

³ اشكو لحوكّام ءور‑ا‑سّيكساضن غويلّي سكارنين افولكي والاينّي غويلّي سكارنين لخُشانت. ءيس‑تريت ا‑ور‑تيكساطّ زغ‑والّي ءيتحكامن؟ راد‑اك‑ينيغ، سكار افولكي س‑فلّاك‑يرضا،

⁴ اشكو ءيگا اخدّام ن‑ربّي ف‑ا‑گيك‑يسكار لخير. والاينّي ءيغ‑ا‑تسكارت ما‑يُخشنّ، ءيلّا دارك ما‑ف‑ا‑تّيكساطّ، اشكو لحاكم دارس لحقّ ا‑يوت لحوكم، ءيگ اخدّام ن‑ربّي ف‑ا‑يسّضر لعقوبيت ف‑ويلّي سكارنين ما‑يُخشنّ.

⁵ مايان ا‑ف‑فلّاون‑يلّا ا‑تسكارم س‑واوال لّحوكّام، ءورد غير باش ا‑تانفم ءي‑لغاضاب ن‑ربّي، والاينّي ف‑سّيبت ن‑ما‑تّيريم غ‑وول‑نّون ا‑بدّا‑تسكارم ما‑يُغژانّ.

⁶ ف‑ماياد ا‑ف‑ا‑تاكّام ضّاريبا ءي‑لحوكّام، اشكو گان ءيخدّامن ن‑ربّي ار‑تّي‑تاوين غ‑مايان.

⁷ اكّايات‑اسن ماد‑اون‑ضفارن، ضابييت ءي‑ايت‑ضابييت، نكّاس ءي‑ايت‑نكّاس. اكّايات‑داغ لوقر ءي‑ويلّي مي ءيلّا لوقر، ءولا شّوكر ءي‑ويلّي مي ءيلّا شّوكر.

تايري د‑لحنانت

⁸ اد‑ور‑تاسيم تامرواست ءي‑يان. غير يات‑تمرواست ا‑كُن‑د‑يقّانّ: ا‑تّحنّوم ءي‑نگراتون. وانّا ءيحنّان غ‑وييّاض، هان ءيكمّل كولّو ما‑يتياران غ‑شّرع.

⁹ اشكو لوصيّات «ا‑ور‑تزنوت» «ا‑ور‑تنغت» «ا‑ور‑تاكُرت» «ا‑ور‑تيريت ما‑يگان وين وييّاض،» نژضار ا‑تنت‑نسّمون نتنتي د‑تييّاض نّا‑لّانين س‑يان‑واوال، ا‑ت‑يگان: «ا-تّيريت ادجار‑نّك زوند ءيخف‑نّك.»

¹⁰ وانّا ءيتّيرين ادجار‑نس، ءور‑را‑ييژضار اد‑اس‑يسكر ما‑يُخشنّ. ماياد ا‑ف‑اون‑نّيغ، وانّا ءيحنّان غ‑وييّاض، ءيكمّل كولّو ما‑يتياران غ‑شّرع.

¹¹ اويات‑ستّ غ‑ماياد اشكو تسّنم ماتّا ازمز‑اد غ‑نلّا، تلكم‑د تاساعت ا‑تنكرم زغ‑ييطس. اشكو ياكمور‑د‑واسّ ن‑وجنجم‑نّغ غيلاد، ءوگُّار ن‑ما‑د‑ياكمور غاكود لّيغ نگرا غ‑وغاراس لّماسيح.

¹² ءيفتا‑ييض، علاين ا‑د‑يغلي‑واسّ. ءيلّا فلّانّغ ا‑ن‑نلوح ءيسكّيرن ن‑تيلّاس نلس ءيمقلاد ن‑تيفاوت.

¹³ ييلي فلّانّغ ا‑نسكار غمكلّي‑د‑يقّانّ ايت‑وزال. ا‑ور‑تّمونوم ف‑تيلّاي أُخشنّين ءولا‑دا‑تسّنوفولم ءيخفاون‑نّون س‑تيسّي. ا‑ور‑تّشتهوم ءولا‑دا‑تّفسادم. ا‑ور‑تّمّاغم ءولا‑دا‑تّنوّاشم.

¹⁴ لسات افولكي ن‑سيديتنّغ ياسوع لماسيح بلا‑دا‑تّلهوم س‑دّات ءولا ما‑يتّيري بنادم ءي‑يخف‑نس.