ruma 10 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

غمكاد ا‑س‑راد‑نجمن

¹ واي‑ايتما، منشك ا‑باهرا‑تّيريغ اد‑نجمن ايت‑تمازيرت‑ينو. ار‑باهرا‑تضالابغ ربّي فلّاسن.

² ژضارغ ا‑فلّاسن‑فكغ توگّا ن‑يس‑ا‑باهرا‑تّيرين ربّي، والاينّي ءور‑سّينّ ربّي غمكلّي ءيگا.

³ ءور‑فهيمن اغاراس لّي‑س‑ا‑يترضو ربّي ف‑مدّن، والاينّي ار‑تّيرين اد‑رضون ربّي س‑مامنك ياضني، ايلّيغ ءور‑اكُّ‑ومژن اغاراس لّي‑يرا نتّا.

⁴ اشكو لماسيح ءيكمّل شّرع، باش ا‑يسكر سّلامت غ‑گر ربّي د‑كولّو وانّا سرس يومنّ.

⁵ يورا موسا ف‑ويلّي رانين اد‑ترضون ربّي س‑شّرع ءينّا: «وانّا ءيسكارن ما‑يلّان غ‑شّرع را‑يدّر ف‑سّيبت ن‑شّرع.»

⁶ والاينّي ءينّا ءي‑وانّا‑ف‑يرضا ربّي ف‑سّيبت ن‑ما‑يومن: «اد‑ور‑تّينيت د‑يخف‑نّك ‹ما‑را‑يغلي س‑يگنّا ا‑يضالب لماسيح ا‑د‑يگّوز؟›

⁷ ءولا‑دا‑تّينيت ‹ما‑را‑يگّوز س‑تدروت ن‑واكال ا‑يضالب لماسيح ا‑د‑يغلي زغ‑گر ويلّي مّوتنين؟› »

⁸ اشكو ءينّا‑داغ: «هاي‑اوال ن‑ربّي ءيلكم‑ك‑يد، ييلي غ‑يمي‑نّك ييلي غ‑وول‑نّك.» اوال‑ان ا‑ت‑يگان د‑غواد‑س‑ا‑نتبرّاح ف‑مامنك ا‑يترضو ربّي ف‑وينّا ءومنّين.

⁹ اشكو ءيغ‑تنّيت غ‑لگدّام ن‑مدّن «ياسوع ا‑يگان سيدي» تامنت ءيس‑ت‑يد‑يسّنكر ربّي زغ‑لموت، هاتي را‑تنجمت.

¹⁰ اشكو س‑وول ا‑س‑ا‑نتامن نطّاف سّلامت د‑ربّي. س‑ينفورن ا‑س‑ا‑ت‑نتّيني غ‑لگدّام ن‑مدّن ننجم.

¹¹ ءيتيارا غ‑وارّا ن‑ربّي: «وانّا فلّاس ءيتّكلن ءور‑سار‑تي‑تُگراژ.»

¹² ربّي ءور‑ا‑يژّمژلاي ايت‑يودايا زغ‑ايت‑تميزار ياضني، والاينّي ءيگا سيديتسن كولّوتن. ار‑ياكّا تيميخار‑نس ءي‑كولّو وينّا گيس زاوگنين،

¹³ اشكو ءيتيارا: «وانّا ءيزاوگن غ‑يسم ن‑سيديتنّغ، را‑ينجم.»

¹⁴ والاينّي مامنك ا‑راد‑زاوگن غ‑يسم‑نس ءيغ‑ور‑سرس‑ومينّ؟ مامنك ا‑راد‑امنّ ءيغ‑ور‑فلّاس‑سفلدن؟ مامنك ا‑راد‑سفلدن ءيغ‑ور‑يلّي ماد‑اسن‑ين‑ييوين لخبار؟

¹⁵ مامنك ا‑را‑ن‑اوين لخبار ءيغ‑ور‑يلّي ما‑تن‑يوزنّ؟ غمكلّي ءيتياران: «منشك ا‑س‑يفولكي ا‑نژر غويد‑د‑يوينين لخبار ءيشوان.»

¹⁶ والاينّي ءور‑ا‑تّيرين كولّوتن اد‑سفليدن س‑لخبار ءيفولكين. ءينّا‑داغ ءيشاعيا: «وا‑سيدي ربّي، ما‑يران ا‑يامن اوال لّي‑اسن‑د‑نيوي؟»

¹⁷ والاينّي غويلّي سفليدنين، نتني ا‑را‑يامن. غويلّي مي‑ن‑نتاوي لخبار لّماسيح، نتني ا‑را‑يسفلد.

¹⁸ ءيمّا ايت‑ربّي ءيس‑ور‑سفلدن ف‑لخبار‑اد غايد ءيزرين؟ نسّن ءيس‑فلّاس‑سفلدن، اشكو ءيتيارا: «تيميتار‑نسن كّانت كرايگاتّ ماني، تروح‑تواغرا‑نسن تّمي ن‑واكال.»

¹⁹ والاينّي مدّن‑ان ن‑ايت‑ربّي، ءيس‑ور‑ژضارن اد‑فهمن مايلّي مي سفلدن؟ موسا اد‑اغ‑يملان ءيس‑ت‑فهمن، اشكو ف‑يمي‑نس ا‑ف‑ينّا ربّي: «را‑كُن‑رارغ ا‑تّيريم ما‑يلّان غ‑دار ءيغريبن. راد‑اون‑تّ‑سّطيّرغ س‑ويلّي مي تّينيم ‹ءور‑سّينّ يات.› »

²⁰ ءولا ءيشاعيا ءيزعم ءينّا: «ءوفان‑يّي غويلّي ءور‑سري‑سيگّيلنين، سّبايّنغ ءيخف‑ينو ءي‑ويلّي ءور‑گيگي‑سقسانين.»

²¹ والاينّي ءيزوويد ربّي ءينّا ف‑ايت‑دارس: «ها‑يّي اسّ كولّو مديغ‑ن ءيفاسّن‑ينو ءي‑مدّن لّي‑سري‑رورنين تيغوردين‑نسن، اگُين اد‑سفليدن س‑واوال‑ينو.»