ruma 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس اخدّام لّماسيح ياسوع. ءيغرا‑يّي‑د ءيژلي‑يّي اد‑گغ ارقّاس‑نس ار‑تبرّاحغ س‑لخبار ءيفولكين ن‑ربّي.

² لخبار‑اد ءيگا غوالّي‑ف‑وران لانبيا غايد ءيزرين غ‑وارّاتن ن‑ربّي، ءيملا‑ياسن مامنك ا‑را‑ييلي.

^3-4 ءيگا لخبار ف‑يوس سيديتنّغ ياسوع لماسيح. نتّان زغ‑تسگا ن‑دّات ءيگا زغ‑تاسوت ن‑داود. ءيمّا زغ‑تسگا ن‑رّوح ءيبان گيس ءيس‑يگا يوس ن‑ربّي امژلاي س‑تحكيمت ءيتجهّدن لّيغ‑د‑ينكر زغ‑لموت.

⁵ ف‑وودم‑نس ا‑ف‑اغ‑يبارك ربّي ءيفك‑اغ تارقّاست‑اد س‑يسم‑نس، باش اد‑امنّ مدّن غ‑كرايگاتّ تامازيرت سكرن س‑واوال‑نس.

⁶ ءولا كونّي تگام زغ‑ويلّي مي ءيغرا ربّي اد‑گن وين ياسوع لماسيح.

⁷ ءي‑كولّو ويلّي‑غ‑يحنّا ربّي غ‑تمدينت ن‑روما لّي‑مي‑يغرا اد‑گن ءيمژلاين‑نس. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح.

ءيفرح بولُس س‑ايتماتن غ‑روما

⁸ اوال ءيزوارن ءيگا‑ت: ار‑تشكارغ ربّي‑نو فلّاون كولّوكن ف‑وودم ن‑ياسوع لماسيح، اشكو ار‑سفليدن مدّن غ‑كولّو دّونيت ف‑مامنك ا‑سرس‑تومنم.

⁹ ربّي لّي‑مي‑تخدامغ س‑نّييت ن‑وول‑ينو س‑تبرّاحت لّخبار ءيفولكين ن‑يوس، نتّان ا‑يسّنّ مامنك ا‑بدّا‑گيگون‑سوينگيمغ غاكود نّا‑تژالّاغ،

¹⁰ ار‑تي‑تضالابغ اد‑يّي‑يسّنم اغاراس ءيغ‑يرا، باش ا‑ن‑دارون‑اشكغ غ‑مايد‑د‑ياكمورن.

¹¹ اشكو ريغ باهرا ا‑كُن‑ژرغ اد‑اون‑ين‑اويغ كرا لّباراكا ن‑رّوح لقودوس ما‑كُن‑يسّدوسن غ‑ليمان.

¹² ريغ‑نّيت ا‑نزّعام ءي‑نگراتنّغ نكّي ديدون غ‑وغاراس لّماسيح.

تابرّاحت لّخبار ءيفولكين

¹³ ريغ ا‑تيسّانم اي‑ايتما، منّاوت‑توال اد‑سكرغ ف‑ا‑ن‑دارون‑اشكغ والاينّي ار‑يّي‑يتحصار كرا. ريغ اد‑يّي‑تيلي لغلّت غ‑دارون غمكلّي‑يّي‑تلّا غ‑تميزار ن‑تسگيو ياضني.

¹⁴ اشكو ءيلّا فلّا اد‑تعاوانغ كولّو مدّن، ايت‑تمدينت ءولا ايت‑ودرار، غويلّي غرانين ءولا غويلّي ءور‑غرينين.

¹⁵ ماياد ا‑ف‑ريغ باهرا اد‑تبرّاحغ س‑لخبار ءيفولكين غ‑دارون ءولا كونّي لّي‑زدغنين غ‑روما.

¹⁶ ءور‑ا‑تحشامغ س‑لخبار‑اد ءيفولكين، اشكو ءيگا تاحكيمت ءيتجهّدن ن‑ربّي لّي‑س‑ا‑يجّنجام كولّو وانّا يومنّ، ايت‑يودايا ءيمزوورا ءولا ايت‑تميزار ياضني.

¹⁷ ار‑اغ‑يمالا لخبار‑اد مامنك ا‑س‑ا‑يسكار ربّي سّلامت غ‑گراس د‑ويلّي ءومنّين، ار‑تّ‑يسكار ف‑سّيبت لّيمان‑نسن غمكلّي ءيتياران، ءينّا ربّي: «وانّا يومنّ، نتّان ا‑ف‑راد‑رضوغ فكغ‑اس تودرت.»

لغاضاب ن‑ربّي ف‑لخُشانت ن‑بنادم

¹⁸ اشكو ءيبان‑د غيلاد لغاضاب ن‑ربّي. ءيگّوز‑د زغ‑يگنّا ف‑مدّن أُخشنّين لّي‑سرس‑رورنين تيغوردين‑نسن، ار‑سّرگاسن لحقّ س‑لخُشانت‑نسن.

¹⁹ لغاضاب‑نس ا‑فلّاسن‑يلّان اشكو سّنّ ف‑ربّي ما‑فلّاس‑سّنّ كولّو مدّن، ربّي‑نّيت اد‑اسن‑ت‑يملان.

²⁰ اشكو زغ‑لّيغ ءيخلق دّونيت، ءيبان مامنك ا‑يگا غوالّي ءور‑يژري يان، ءيبان ءيس‑دارس تاحكيمت ءيتجهّدن ن‑والّي بدّا ءيلّان، ءيبان ءيس‑يگا ربّي ءيتجهّدن. سّنّ نتني مامنك ا‑يگا اشكو ژران ما‑يسكر، ءور‑دارسن ما‑تّينين.

²¹ والاينّي واخّا سّنّ مدّن مامنك ا‑يگا ربّي، ءور‑ت‑وقّيرن غمكلّي‑تن‑د‑يقّانّ ءولا‑دا‑تي‑تشكارن. جلان نتني س‑يسوينگيمن‑نسن خوانين، يوورّي ءيلّاس لعاقل‑نسن ايلّيغ ءور‑فهيمن يات.

²² ار‑تّينين: «نكُّني ا‑يطّافن لعاقل،» والاينّي ءينافالن اد‑گان.

²³ ءونفن ءي‑ربّي لّمجد لّي‑بدّا‑يلّان، ار‑تعبادن تيغاوسيوين لّي‑سكارن س‑يفاسّن‑نسن ار‑تنت‑سّرواسن س‑بنادم لّي‑يتمتاتن د‑يگضاض د‑لوحوش د‑يبنكالن.

²⁴ ف‑غايان ا‑ف‑تن‑يفل ربّي، يادج‑تن زايدن غ‑شّهوات‑نسن، ار‑تفسادن ار‑سكارن ءي‑نگراتسن ما‑يشّحشّامن،

²⁵ اگُين لحقّ ن‑ربّي امژن غ‑تكركاس. ار‑تعبادن ار‑سّمقاسان لمخلوقات، ءورد غوالّي‑تنت‑يخلقن. نتّان ا‑يستهلّان ا‑ت‑نتالغ غيلاد ءولا كولّو مايد‑د‑يفتان، امين.

²⁶ غايان ا‑ف‑تن‑يفل ربّي، يادج‑تن اد‑سكارن س‑شّهوات‑نسن لّي‑باهرا‑شّحشّامنين. ءولا تيمغارين‑نسن وورّينت ار‑طّارنت ءي‑نگراتسنت، ءور‑سول‑ا‑تّيرينت ءيرگازن.

²⁷ غمكان اد‑گان ءولا ءيرگازن، ار‑طّارن د‑يرگازن، ءور‑سول‑ا‑تّيرين تيمغارين. ار‑جدّرن س‑شّهوات ءي‑نگراتسن، ار‑تفسادن ءيرگازن د‑يرگازن ايلّيغ ءومژن ءي‑يخف‑نسن لعقوبيت لّي‑اسن‑يگان ف‑دّنوب‑نسن.

²⁸ اگُين مدّن‑ان ا‑ستّ‑اوين غ‑ربّي. غايان ا‑ف‑تن‑يفل اد‑زايدن س‑يسوينگيمن‑نسن ركانين د‑يسكّيرن‑نسن هرشنين.

²⁹ عمّرن س‑كولّو ما‑يگان لخُشانت د‑تشيطانت د‑طّماع د‑لعار. ار‑تنوّاشن غ‑كولّو ما‑تن‑يوفن، ءوجادن‑بدّا اد‑نقّان. ار‑تمّاغن ار‑تكنادن ار‑تژين. ار‑باهرا‑ساوالن غ‑وييّاض،

³⁰ ار‑رگّمن مدّن ار‑تكرهون ربّي. ءور‑ا‑توقّارن يان، ار‑سّفورّوگن ار‑سّيمغورن ءيخف‑نسن ار‑بدّا‑سيگّيلن تيلّاي لّجديد. اگُين اد‑سفليدن س‑ايت‑دارسن.

³¹ ءيقّور‑وول‑نسن باهرا، ءور‑ا‑تقامان غ‑واوال‑نسن. ار‑تشقون د‑كولّو مدّن، ءور‑ا‑تحنّون غ‑يان.

³² نتني سّنّ اوال ن‑ربّي لّي‑س‑ينّا لموت ا‑د‑يقّانّ وانّا ءيسكارن تيغاوسيوين‑اد، والاينّي ار‑تنت‑سول‑سكارن ار‑نّيت‑تفراحن س‑وييّاض نّا‑تنت‑سكارنين.