matta 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لماسيح ءيجّوجّي اكوشام

¹ ءيكشم ياسوع س‑تاناوت يوورّي‑د س‑تسگا‑ياد ن‑ومدا، ءيروح‑د تامدينت لّي‑غ‑يزدغ.

² اشكين‑د دارس كرا ن‑مدّن اوين‑اس‑د يان‑ورگاز ءيكوشمن ءيگن ف‑يمجدين‑نس. ياسوع ءيژرا مامنك اد‑باهرا‑سرس‑ومنّ، ءيساول س‑وكوشام ييني‑اس: «تهنّا ا‑يوي، ءيتّين فلّاك دّنوب‑نّك.»

³ ءيلين غين كرا ن‑يمسلمدن ن‑شّرع، ءينين د‑يخف‑نسن: «غواد، اوال لّكوفر ايد ءينّا.»

⁴ ءيمّا ياسوع ءيسّن ماد‑سوانگمن، ييني‑اسن: «ماخ ايلّيغ تودجام ءيسوينگيمن أُخشنّين اد‑كشمن س‑يخفاون‑نّون؟

⁵ ما‑گيسن‑يرخان، اد‑ينيغ ‹ءيتّين فلّاك دّنوب‑نّك› نغد اد‑ينيغ ‹نكر ار‑تّيدوت›؟

⁶ ءيمّا غيلاد راد‑اون‑ملغ ءيس‑داري تاژضّارت غ‑دّونيت اد‑سّيتّيغ دّنوب، نكّي لّي‑يگان يوس ن‑بنادم.» ءيساول ءيلمّا س‑وكوشام ييني‑اس: «نكر، تاسيت ءيمجدين‑نّك، تدّوت س‑تگمّي.»

⁷ ءينكر غاكودان ءيدّو س‑تگمّي‑نس.

⁸ لّيغ‑ت‑ژران، غووضن مدّن‑ان كولّوتن ار‑تالغن ربّي لّي‑يفكان تاژضّارت‑اد ءيگّوتن ءي‑بنادم.

ءيغرا لماسيح ءي‑ماتّا

⁹ ءيفتو ياسوع زغ‑غين، س‑يژرا يان بو‑نكّاس ءيسم‑نس ماتّا، ءيسكيوس غ‑يلّيغ ا‑تامژن ءيقاريدن ن‑نكّاس. ييني‑اس ياسوع: «اشك‑يد مون ديدي.» ءينكر غاكودان ءيمون ديدس.

¹⁰ ءيگاور ياسوع غ‑تگمّي ن‑ماتّا، اشكين‑د ءيد‑بو‑نكّاس گّوتنين د‑وييّاض أُخشنّين، درون د‑ياسوع د‑يمحضارن‑نس.

¹¹ لّيغ‑ت‑ژران ءيفاريسين، سقسان ءيمحضارن‑نس: «ماخ ايلّيغ ا‑يشتّا‑ومسلمد‑نّون د‑ايت‑نكّاس د‑وييّاض أُخشنّين؟»

¹² ءيمّا ياسوع، لّيغ ءيسفلد ءي‑ماد‑نّان ءيرار‑اسن: «ءورد غويلّي دوسنين ا‑يحتاجّان اطبيب والاينّي غويلّي ءوضنّين.

¹³ زايدات تسوانگمّ غ‑وارّا ن‑ربّي لّي‑ينّان ‹ريغ دارون لحنانت، ءورد تيغرسي.› ءيمّا نكّي، ءور‑د‑وشكيغ ا‑ن‑غرغ ءي‑ويلّي غالنين ءيس‑فولكين، والاينّي ءوشكيغ‑د ا‑ن‑غرغ ءي‑ويلّي أُخشنّين.»

اسقسي ف‑وژوم

¹⁴ اشكين‑د ءيمحضارن ن‑يوحانّا امسدّام س‑دار ياسوع ءينين‑اس: «ار‑نتاژوم نكُّني د‑يفاريسين. ماخ ايلّيغ ءور‑ا‑تاژومن ءيمحضارن‑نّك؟»

¹⁵ ييني‑اسن: «ءيس‑را‑طيّر ءي‑ايت‑تمغرا د‑وسلي ديدسن؟ والاينّي راد‑د‑اشكين‑ووسّان لّي‑غ‑را‑فلّاسن‑ييتّي‑وسلي. غاكودان ا‑راد‑تاژومن.

¹⁶ ءور‑يلّي ما‑يتگّان تادغارت ن‑تّوب لّجديد ءي‑تملسيت تاقديمت، اشكو را‑تكّيس‑تدغارت لّجديد زغ‑تقديمت، تبّي س‑وگُّار.

¹⁷ ءور‑يلّي ما‑يتگّان امان ن‑واضيل ءيكتين لّجديد غ‑يلماون ءيقديمن، اشكو راد‑ستغن ءيلماون ءيقديمن، فّين‑وامان خسرن ءيلماون. والاينّي ار‑تگّان امان ن‑واضيل لّجديد غ‑يلماون لّجديد. غمكان ا‑س‑راد‑قامان فولكين س‑سين.»

لماسيح ءيجّوجّي ءيلّيس ن‑ومغار د‑تمغارت لّي‑يگّرن ءي‑تملسيت‑نس

¹⁸ سول ا‑يساوال ياسوع س‑د‑يوشكا يان‑ومغار، ءيضر‑د غ‑دار ءيضارن‑نس ييني‑اس: «تاساعت‑اد تمّوت ءيلّي ءيمژّين. والاينّي اشك‑يد تگت فلّاس افوس‑نّك تدّر.»

¹⁹ ءينكر ياسوع ءيمون ديدس نتّا د‑يمحضارن‑نس.

²⁰ تلّا غين يات‑تمغارت توضن، ييلي‑بدّا‑گيس‑وسگُّرد ن‑يدامّن سين د‑مراو ن‑وسگُّاس. تروح‑د تيغوردين ن‑ياسوع تگّر ءي‑تاما ن‑تملسيت‑نس،

²¹ تيني د‑يخف‑نس: «ءيغ‑ن‑گّرغ غير ءي‑تملسيت‑نس راد‑جّيغ.»

²² ءيگراول ياسوع ءيسّماقّل گيس ييني‑اس: «تهنّا ا‑يلّي، تجّيت غيلاد اشكو تومنت.» غاكودان ا‑تجّي‑تمغارت.

²³ لّيغ ءيلكم ياسوع تيگمّي ن‑ومغار ياف‑ن غويلّي كّاتنين تاعوّاتّ د‑مدّن گّوتنين ار‑سّغويّون.

²⁴ ييني‑اسن: «ءيتّيات. هان تافروخت ءور‑تمّوت. غير تگن.» ءيمّا نتني ار‑گيس‑ضصّان.

²⁵ لّيغ سّوفغن مدّن‑ان كولّوتن، ءيكشم ياسوع س‑دار‑تفروخت. يامژ‑اس غ‑وفوس، تنكر‑د.

²⁶ اوين ءيلمّا لخبار‑نس س‑تمازيرت‑ان كولّوتّ.

لماسيح ءيجّوجّي سين ءيبوكاضن

²⁷ ءيفتو ياسوع زغ‑غين، ضفورن‑ت سين ءيبوكاضن ار‑تغوّاتن ار‑تّينين: «حنّو گينّغ ا‑يوس ن‑داود.»

²⁸ لّيغ ءيكشم ياسوع س‑يات‑تگمّي روحن‑ت‑يد ءيبوكاضن‑لّي. ءيسقسا‑تن: «ءيس‑تومنم ءيس‑ژضارغ اد‑سكرغ ماياد؟» ءينين‑اس: «نومن ا‑سيدي.»

²⁹ ءيگّر ءي‑والّن‑نسن ييني‑اسن: «اد‑اون‑ييلي ما‑س‑تومنم.»

³⁰ وورّين سفاون غاكودان. يوصّا‑تن ءيلمّا س‑لمعقول ييني‑اسن: «رارات لعاقل، ا‑ور‑تينيم ءي‑يان ف‑ماياد.»

³¹ ءيمّا نتني دّان ار‑ساوالن ف‑ياسوع غ‑تمازيرت‑ان كولّوتّ.

لماسيح ءيجّوجّي اژنژوم

³² غير دّان نتني س‑د‑وشكان كرا ن‑مدّن ياضني، اوين‑اس‑د يان‑ورگاز اژنژوم، ييلي گيس يا‑لّجنّ.

³³ لّيغ‑زگيس‑يفّوغ لجنّ يوورّي‑وژنژوم ار‑يساوال. ار‑تعجّابن مدّن كولّوتن ار‑تّينين: «ءور‑جّو‑يلّي زوند ماياد غ‑دار ايت‑ربّي.»

³⁴ ءيمّا ءيفاريسين ار‑تّينين: «نتّان س‑تحكيمت ن‑وگلّيد لّجنون ا‑س‑ا‑يسّوفوغ لجنون.»

ءولّي بلا امكسا

³⁵ ار‑يتكّا ياسوع كولّو تيمدينين ءولا ءيدوران، ار‑يسّلماد غ‑تگُمّا ن‑تژالّيت ار‑يتبرّاح س‑لخبار ءيفولكين ن‑تگلديت ن‑يگنّا، ار‑يجّوجّي مدّن زغ‑كرايگاتّ تاماضونت ءولا كرايگاتّ اطّان نّا‑گيسن‑يلّان.

³⁶ لّيغ ءيمناد غ‑مدّن‑ان گّوتنين، قامان گيس باهرا، اشكو ءيژرا تامّارا د‑تاغوفت لّي‑غ‑لّان زوند ءولّي بلا امكسا.

³⁷ ييني ءيلمّا ءي‑يمحضارن‑نس: «تگّوت‑تمگرا والاينّي دروسن ءيخدّامن.

³⁸ ضالبات بو‑تمگرا ا‑يازن ءيخدّامن اد‑سّمونّ تامگرا‑نس.»