matta 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لماسيح ءيجّوجّي انجدام

¹ لّيغ‑د‑يگّوز ياسوع زغ‑وورير، ضفورن‑ت مدّن گّوتنين.

² ياشك‑يد دارس يان‑ونجدام ءيضر‑د غ‑لگدّام‑نس ييني‑اس: «وا‑سيدي، تژضارت ا‑يّي‑تسّغوست ءيغ‑تريت.»

³ ءيگّر‑اس ياسوع س‑وفوس‑نس ييني‑اس: «ريغ نكّي. غوس.» ييتّي زغ‑گيس لجدام غاكودان ءيغوس.

⁴ ءيزايد ياسوع ييني‑اس: «اد‑ور‑تينيت يات ءي‑يان، والاينّي دّو تملت ءيخف‑نّك ءي‑ونمغور ن‑تگمّي ن‑ربّي، تفكت‑اس تيغرسي لّي‑ف‑يوصّا موسا ا‑تگ توگّا ءي‑مدّن.»

لماسيح ءيجّوجّي اخدّام لّقبطان

⁵ ءيكشم ياسوع س‑تمدينت ن‑كافرناحوم. ياشك‑يد دارس يا‑لّقبطان ن‑يعسكرين ن‑رّومان، ءيضالب‑ت باهرا

⁶ ييني‑اس: «وا‑سيدي، ءيكوشم‑وخدّام‑ينو، ءيگن غ‑تگمّي ءيتياومرّات باهرا.»

⁷ ييني‑اس ياسوع: «را‑ن‑اشكغ جّوجّيغ‑ت.»

⁸ ءيمّا لقبطان ءيساول‑د ييني‑اس: «وا‑سيدي، ءور‑ستهلّاغ ا‑تكشمت س‑تگمّي‑نو، والاينّي ءيني غير يان‑واوال س‑يجّي‑وخدّام‑ينو.

⁹ ها‑يّي ءولا نكّي ار‑سكارغ س‑واوال ن‑ما‑يّي‑يوگُرن، ءيلين ءيعسكرين غ‑دّو‑وفوس‑ينو. ءيغ‑نّيغ ءي‑يان ‹دّو› ءيدّو. ءيغ‑نّيغ ءي‑وايّاض ‹اشك‑يد› ياشك‑يد. ءيغ‑نّيغ ءي‑وخدّام‑ينو ‹سكر تاووري‑اد› ءيسكر‑تّ.»

¹⁰ لّيغ ءيسفلد ياسوع ءي‑ماياد ءيتعجّب، ييني ءي‑ويلّي ديدس مونّين: «لحقّ ا‑راد‑اون‑ينيغ، ءور‑جّو‑وفيغ كرا ن‑يان يومنّ زوند غواد، ءولا غ‑گر ايت‑ربّي.

¹¹ راد‑اون‑ينيغ، گّوتن ءيبرّانيين لّي‑را‑د‑ياشك زغ‑شّرق ءولا لغرب مونّ‑د د‑يبراهيم د‑يسحاق د‑ياعقوب ف‑يمنسي ءيمقّورن ن‑تگلديت ن‑يگنّا.

¹² ءيمّا غويلّي‑ف‑يقصاد ربّي غايد ءيزرين اد‑گن ايت‑تگلديت‑نس، را‑تن‑يلوح غ‑تيلّاس اگّوگنين. غين ا‑غ‑راد‑الّان ار‑تگژاژن ءوخسان‑نسن.»

¹³ ييني ءيلمّا ياسوع ءي‑لقبطان: «زايد س‑تگمّي. راد‑اك‑ييلي غمكلّي تومنت.» غاكودان ا‑يجّي‑وخدّام‑نس.

لماسيح ءيجّوجّي مدّن گّوتنين

¹⁴ ءيفتو ياسوع س‑تگمّي ن‑بطرُس، ياف‑ن تاضگُّالت ن‑بطرُس تگن، توضن س‑تاولا.

¹⁵ ءيگّر‑اس ءي‑وفوس، تيتّي زگيس تاولا، تنكر ار‑فلّاس‑تّسخّار.

¹⁶ لّيغ‑دي‑تروح‑تدگُّات اوين‑د ءي‑ياسوع مدّن گّوتنين لّي‑غ‑لّان لجنون. ار‑زگيسن‑يسّوفوغ لجنون س‑يان‑واوال، ءيجّوجّي كولّو ويلّي ءوضنّين.

¹⁷ غمكان ا‑س‑يووفا‑واوال ن‑نّابي ءيشاعيا ءينّا «نتّان ا‑يسّيتّين تيموضان‑نّغ، ياسي اطّان‑نّغ.»

ما‑را‑يمون د‑لماسيح؟

¹⁸ ءيژر ياسوع مدّن گّوتنين مونّ‑د فلّاس، ييني ءي‑يمحضارن‑نس ف‑اد‑سكرن اد‑ديدس‑سّودون س‑تسگا ياضني ن‑ومدا،

¹⁹ س‑د‑دارس‑يوشكا يان‑ومسلمد ن‑شّرع ييني‑اس: «واي‑امسلمد، راد‑ديدك‑مونغ س‑ينّاس را‑تدّوت.»

²⁰ ءيرار‑اس ياسوع ييني‑اس: «ءيبوغاغ دارسن تانسيوين‑نسن، ءولا ءيگضاض ن‑يگنوان دارسن ءوسودن‑نسن، ءيمّا يوس ن‑بنادم ءور‑دارس مانيغ ا‑يسراس اگايّو‑نس.»

²¹ ءيساول‑د ءيلمّا يان ياضني زغ‑گر ويلّي ديدس ءيتمونون ييني‑اس: «وا‑سيدي، ادج‑يّي زوار اد‑وورّيغ ارد‑ن‑مضلغ بابا.»

²² ءيمّا ياسوع ءينّا‑ياس: «اشك‑يد مون ديدي. فل غويلّي ءور‑طّافنين تودرت ا‑ن‑مضلن وينّا‑ياسن‑مّوتنين.»

لماسيح يومر اضو د‑ومدا

²³ ءيكشم ياسوع س‑تاناوت، سّودون ديدس ءيمحضارن‑نس.

²⁴ غاكودان ءينكر‑د‑واضو ءيتجهّدن، اتّوينت تاضانگيوين ار‑كّاتنت تاناوت ايلّيغ ا‑تّعمّار س‑وامان. ءيمّا ياسوع ءيگن.

²⁵ دّون ءيمحضارن سّفاقن‑ت ءينين‑اس: «جّنجم‑اغ ا‑سيدي. ها‑ياغ را‑نهلك.»

²⁶ ييني‑اسن ياسوع: «ماخ ايلّيغ تكسوضم؟ ءيس‑ور‑تومينم؟» ءينكر يامر اضو ءولا تاضانگيوين اد‑زگان، س‑يوورّي‑ومدا ءيهنّا باهرا.

²⁷ ءيضر‑اسن لعجب ار‑تّينين: «ما‑يگا‑ورگاز‑اد ايلّيغ ا‑سرس‑يسفليد‑واضو ءولا امدا؟»

لماسيح ءيجّوجّي سين ءيمجنان

²⁸ لّيغ ءيلكم ياسوع تامازيرت ن‑گادارا غ‑تسگا ياضني ن‑ومدا، فّوغن‑د دارس سين ءيرگازن زغ‑گر ءيسمضال. لّان گيسن لجنون، شقون باهرا. ءور‑يژضار يان ا‑يك اغاراس‑ان.

²⁹ غوّتن س‑جّهد ءينين‑اس‑د: «وا‑يوس ن‑ربّي، ما‑يلّان غ‑گراتنّغ ديدك؟ ءيس‑دي‑توشكيت اد‑اغ‑تسّرفوفنت ءور‑تا‑د‑يلكيم‑وزمز؟»

³⁰ تّياوكسا غين يات‑تووروت ءيگّوتن ن‑والفان، ءور‑ن‑باهرا‑تاگّوگ.

³¹ ضالبن‑ت لجنون باهرا ءينين‑اس: «ءيغ‑اغ‑تسّوفغت، تازنت‑اغ ا‑نكشم س‑والفان‑ان.»

³² ءيرار‑اسن: «زايدات.» فّوغن زغ‑يرگازن، كشمن س‑والفان. تازّل‑تووروت غاكودان س‑جّهد زغ‑وجاريف س‑ومدا، خسين‑ين كولّو غ‑وامان.

³³ روولن ءيمكساون، وورّين س‑تمدينت، اوين لخبار ف‑كولّو مايان ءولا ف‑ما‑يجران ءي‑يمجنان.

³⁴ اشكين‑د كولّو ايت‑تمدينت اد‑ژرن ياسوع. لّيغ‑ت‑ين‑مناگّارن ضالبن‑ت باهرا ا‑يفّوغ تامازيرت‑نسن.