matta 25 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لمعنا ن‑مراوت‑تفرخين د‑لقنادل

¹ «غ‑ووسّان‑ان را‑تگ‑تگلديت ن‑يگنّا زوند مراوت‑تفرخين، ءوسينت لقنادل فّوغنت ا‑ن‑مناگّارنت اسلي.

² سمّوست گيسنت گانت ءيست‑لعاقل، سمّوست ءور‑سوانگمنت غ‑ما‑را‑تند‑د‑يقّان.

^3-4 ءيست‑لعاقل، لّيغ ءوسينت لقنادل‑نسنت اوينت ديدسنت تابوقّالت ن‑زّيت. ءيمّا ختيلّي ءور‑سوانگمنين ءور‑ديدسنت‑يوينت زّيت.

⁵ لّيغ‑ن‑يماطل‑وسلي، ياوي‑تنت ءيطس كولّوتنت گنّت.

⁶ غ‑طوژّونت ن‑ييض سفلدنت ءي‑كرا ن‑يان يولّ اوال‑نس ءينّا ‹هاي‑اسلي يوشكا‑د، فّوغامد‑د ا‑ت‑ين‑تمناگّارمت.›

⁷ نكرنت‑تفرخين كولّوتنت، سّنگادّانت تيفتيلين ءي‑لقنادل‑نسنت.

⁸ ءينينت ءيلمّا ختيلّي ءور‑سوانگمنين ءي‑تييّاض ‹فكامت‑اغ ءيميكّ زغ‑زّيت‑نّونت اشكو راد‑اغ‑خسين لقنادل‑نّغ.›

⁹ ءيمّا ءيست‑لعاقل نّانت‑اسنت ‹ءيس‑راد‑اغ‑كولّو‑توودو زّيت‑اد نكُّنينتي ءولا كونّينتي؟ زايدامت س‑دار ءيد‑بو‑زّيت تسغمد‑د ما‑كُنت‑يخصّان.›

¹⁰ دّونت نتنتي، س‑د‑يروح‑وسلي. نكرنت ختيلّي ءوجادنين مونّت ديدس س‑تمغرا. ءيقّن‑د ءيمي ن‑تگمّي.

¹¹ اشكيند‑د‑تفرخين‑لّي ياضني ار‑اقرانت ار‑تّينينت ‹وا‑سيدي، وا‑سيدي، رژم‑اغ.›

¹² ءيمّا نتّا ءيرور‑اسند‑د ‹لحقّ ا‑راد‑اونت‑ينيغ، ءور‑كُنت‑سّينغ.› »

¹³ ءيزايد ياسوع ييني‑اسن: «ضوفات اشكو ءور‑تسّينم مان اسّ ءولا مان تاساعت ا‑راد‑د‑اشكغ.

لمعنا ن‑كراض ءيخدّامن د‑لوزنات ن‑نّوقرت

¹⁴ «را‑تگ‑تگلديت ن‑يگنّا زوند يان‑ورگاز ءيرا ا‑يمودّو، ءيغر‑د ءي‑يخدّامن‑نس س‑دارس، ءيفل كولّو ايدا‑نس غ‑يفاسّن‑نسن.

¹⁵ ءيفك ءي‑يان سمّوست لوزنات ن‑نّوقرت، ءيفك ءي‑وايّاض سنات، ءيفك ءي‑وايّاض يات، كرايگاتّ يان د‑غونشك نّا‑مي‑يژضار، ءيفّوغ ءيلمّا ءيمودّو.

¹⁶ ءيدّو غوالّي مي ءيفكا سمّوست لوزنات ن‑نّوقرت ار‑سرسنت‑يساغ ار‑يزّنزا ايلّيغ‑د‑سرسنت‑يرور سمّوست لوزنات ياضني.

¹⁷ غمكاد ا‑يسكر ءولا غوالّي دار سنات لوزنات، ءيرار‑د سرسنت سنات ياضني.

¹⁸ ءيمّا غوالّي دار يات لوزنت ءيدّا ءيغزا غ‑واكال ءيحضو نّوقرت ن‑سيديس.

¹⁹ ءيزري ما‑يزرين س‑د‑يوورّي سيديتسن، ءينحاساب د‑يخدّامن‑نس.

²⁰ ياشك‑يد غوالّي مي ءيفكا سمّوست لوزنات، ياسي‑د ديدسنت سمّوست ياضني ييني‑اس ‹وا‑سيدي، ها‑سمّوست لوزنات لّي‑داري‑تفلت، رورغ‑د سرسنت سمّوست ياضني نّيگاتسنت.›

²¹ ييني‑اس سيديس ‹ءيشوا ماياد، اي‑اخدّام ءيفولكين ءيصلحن. تسكرت ما‑ك‑يد‑يقّانّ س‑مايلّي ءيدروسن. ءيمّا غيلاد راد‑فلغ غ‑وفوس‑نّك ما‑يگّوتن. كشم‑د تفرحت د‑سيديك.›

²² ياشك‑يد ءيلمّا غوالّي دار سنات لوزنات ييني‑اس ‹وا‑سيدي، ها‑سنات لوزنات لّي‑داري‑تفلت، رورغ‑د سرسنت سنات ياضني نّيگاتسنت.›

²³ ييني‑اس سيديس ‹ءيشوا ماياد، اي‑اخدّام ءيفولكين ءيصلحن. تسكرت ما‑ك‑يد‑يقّانّ س‑مايلّي ءيدروسن. ءيمّا غيلاد راد‑فلغ غ‑وفوس‑نّك ما‑يگّوتن. كشم‑د تفرحت د‑سيديك.›

²⁴ ياشك‑يد ءيلمّا غوالّي مي ءيفكا يات لوزنت ييني‑اس ‹وا‑سيدي سّنغ ءيزد ارگاز ءيشقان ا‑تگيت، ار‑تمگّرت ما‑ور‑تكرزت، ار‑تسّمونوت ما‑ور‑تلوحت.

²⁵ كسوضغ غاكودان، دّوغ حضوغ لوزنت‑نّك غ‑دّو‑واكال. ها‑لامانت‑نّك ءيويغ‑اك‑تّ‑يد.›

²⁶ ءيرار‑اس سيديس ‹واي‑اخدّام يُخشنّ ءيدّولّان، ءيس‑تسّنت ءيس‑ا‑د‑مگّرغ ما‑ور‑كرزغ، ار‑د‑سّمونوغ ما‑ور‑ن‑لوحغ؟

²⁷ لّيغ تسّنت ماياد، ءيلّا فلّاك ا‑ن‑تسرست نّوقرت‑ينو غ‑دار ءيصرّارفين، اكود نّا‑د‑وورّيغ امژغ‑د لامانت‑ينو نتّات د‑ما‑دي‑ترور ءيكّا نّيگاس.›

²⁸ ييني ءيلمّا: ‹كّيسّات‑اس لوزنت‑ان، تفكم‑تّ ءي‑والّي دار مراوت لوزنات.

²⁹ اشكو وانّا دار ءيلّا، راد‑اس‑يتياوفكا ءوگُّار، ييلي‑اس ما‑يگّوتن. ءيمّا وانّا ءور‑دار‑يلّي، راد‑اس‑يتياوكّاس ءولا ما‑دارس‑يلّان.

³⁰ ءيمّا اخدّام‑اد ءور‑يسكيرن يات، لوحات‑ت‑ين غ‑توگّوگت ن‑تيلّاس. غين ا‑غ‑راد‑الّان ار‑تگژاژن ءوخسان‑نسن.› »

مايلّي را‑يجرو غ‑واسّ لّحساب

³¹ ءيزايد ياسوع ييني‑اسن: «غاكود لّيغ راد‑د‑وورّيغ س‑دّونيت‑اد، مونّ‑د ديدي كولّو لمالايكا س‑لمجد ءيگّوتن، راد‑سكيوسغ نكّي لّي‑يگان يوس ن‑بنادم ف‑لعرش ن‑تگلديت‑ينو،

³² اشكين‑د س‑لگدّام‑ينو كولّو ايت‑تميزار ن‑دّونيت. را‑تن‑اطّوغ ءي‑نگراتسن غمكلّي ياطّو‑ومكسا ءيهراي زغ‑واغاضن.

³³ راد‑گغ ءيهراي ف‑وفاسيي‑ينو، گغ اغاضن ف‑وژلماض‑ينو،

³⁴ ساولغ ءيلمّا، نكّي لّي‑يگان اگلّيد، س‑ويلّي لّانين ف‑وفاسي ءينيغ‑اسن ‹اشكاد‑د ا‑يمباركين ن‑بابا ربّي، كشمات س‑تگلديت لّي‑اون‑يجّوجاد زغ‑يسيزوار ن‑دّونيت.

³⁵ اشكو ياغ‑يّي لاژ تفكم‑يّي اد‑شّغ، ياغ‑يّي ءيريفي تفكم‑يّي اد‑سوغ، گيغ اغريب تشّكشمّ‑يّي س‑دارون،

³⁶ ياغ‑يّي‑وسمّيض تفكم‑يّي ماد‑لسّاغ، ءوضنغ تگابلم‑يّي، لّيغ‑ن غ‑لحبس تاشكيم‑ن س‑داري.›

³⁷ غاكودان را‑يّي‑سقسان غويلّي ف‑يرضا ربّي ‹ماناگو ا‑سيدي، ا‑ك‑نژرا ياغ‑ك لاژ نفك‑اك ا‑تشّت، نغد ياغ‑ك ءيريفي نفك‑اك ا‑تسوت؟

³⁸ ماناگو ا‑ك‑نژرا تگيت اغريب نشّكشم‑ك‑يد س‑دارنّغ، نغد ياغ‑ك‑وسمّيض نفك‑اك ما‑تلسّات؟

³⁹ ماناگو ا‑ك‑نژرا توضنت نغد تلّيت غ‑لحبس ناشك‑ين دارك؟›

⁴⁰ راد‑اسن‑رارغ، نكّي لّي‑يگان اگلّيد، ‹لحقّ ا‑راد‑اون‑ينيغ، غاكود نّا‑تي‑تسكرم غ‑يان زغ‑ايتما‑ياد مژّينين، هاتي تسكرم‑ت گيگي نكّي.›

⁴¹ ءينيغ ءيلمّا ءي‑ويلّي لّانين ف‑وژلماض ‹ءيتّيات‑ن زغ‑گيگي ا‑ويلّي ءيخزا ربّي، تدّوم س‑لعافيت لّي‑ور‑را‑سار‑يخسي، تّياوسكار ءي‑يبليس د‑لمالايكا‑نس.

⁴² اشكو ياغ‑يّي لاژ ءور‑يّي‑تفكيم اد‑شّغ، ياغ‑يّي ءيريفي ءور‑يّي‑تفكيم اد‑سوغ،

⁴³ گيغ اغريب ءور‑يّي‑تشّكشيمّ س‑دارون، ياغ‑يّي‑وسمّيض ءور‑يّي‑تفكيم ماد‑لسّاغ، ءوضنغ ءيليغ‑ن غ‑لحبس ءور‑يّي‑تگابلم.›

⁴⁴ غاكودان را‑يّي‑سقسان ءولا نتني ‹ماناگو ا‑سيدي ا‑ك‑نژرا ياغ‑ك لاژ نغد ءيريفي، نغد تگيت اغريب نغد ياغ‑ك‑وسمّيض نغد توضنت نغد تلّيت غ‑لحبس ءور‑ن‑دارك‑نوشكي ا‑ك‑نعاون؟›

⁴⁵ راد‑اسن‑رارغ ‹لحقّ ا‑راد‑اون‑ينيغ، لّيغ ءور‑تي‑تسكيرم غ‑يان غ‑يمژّيين‑اد، ءور‑ت‑گيگي‑تسكيرم نكّي.›

⁴⁶ راد‑دّون نتني س‑لعقوبيت لّيخرت. ءيمّا غويلّي‑ف‑يرضا ربّي راد‑د‑كشمن س‑تودرت ءيدومن.»