matta 15 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لعادات ن‑ويلّي زرينين

¹ اشكين‑د كرا ن‑يفاريسين د‑يمسلمدن ن‑شّرع زغ‑تمدينت ن‑وروشاليم س‑دار ياسوع. سقسان‑ت:

² «ماخ ايلّيغ ا‑تفّوغن ءيمحضارن‑نّك زغ‑لعادا ن‑يمزوورا‑نّغ لّي‑زرينين؟ ها‑نتني ار‑شتّان بلا‑دا‑سّغوسن ءيفاسّن‑نسن س‑يسيريد لّي‑تن‑د‑يقّانّ.»

³ ءيساول ياسوع ييني‑اسن: «ءيمّا كونّي، ماخ ايلّيغ ا‑تّفّوغم زغ‑لوصيت ن‑ربّي باش ا‑تسكارم س‑لعادا‑نّون؟

⁴ هان ربّي ا‑ينّان ‹اوي‑تّ غ‑باباك د‑ينّاك.› ييني‑داغ ‹وانّا ءيرگمن باباس نغد ءينّاس ءيلّا فلّاس ا‑يمّت.›

⁵ ءيمّا كونّي، ءيغ‑ينّا كرا ن‑يان ءي‑باباس نغد ءينّاس ‹فكيغ ءي‑ربّي مايلّي ترام اد‑اون‑ت‑فكغ،›

⁶ ءيغ‑ينّا اوال‑اد ار‑اس‑تّينيم ءور‑سول‑ت‑يخصّا ا‑ستّ‑يتاوي غ‑باباس. غمكاد ا‑س‑تونفم ءي‑واوال ن‑ربّي س‑لعادا‑نّون.

⁷ وا‑يد‑بو‑سين‑وودماون، س‑لحقّ ا‑س‑فلّاون‑ينّا ربّي ف‑يمي ن‑نّابي ءيشاعيا، ءينّا

⁸ ‹مدّن‑اد ار‑يّي‑تالغن س‑يلس‑نسن، ءيمّا ءول‑نسن ياگّوگ‑ن فلّا.

⁹ بلا لفايتّ ا‑يّي‑تعبادن اشكو ءور‑ا‑سّلمادن غ‑ولمّود‑نسن ابلا تينباضين ن‑بنادم.› »

غايلّي ءيسّحرامن بنادم

¹⁰ ءيغر‑د ياسوع ءي‑مدّن س‑دارس ييني‑اسن: «سفلدات‑يّي ا‑تيسّانم.

¹¹ ءورد مايلّي ءيكشّمن زغ‑يمي ن‑بنادم ا‑ت‑يسّحرامن. والاينّي غايلّي‑د‑يتفّوغن زغ‑يمي‑نس، نتّان ا‑ت‑يسّحرامن.»

¹² اشكين‑د دارس ءيلمّا ءيمحضارن‑نس ءينين‑اس: «ءيس‑ور‑تسّينت ءيس‑تّي‑تسّطيّرت ءي‑يفاريسين س‑واوال‑اد؟»

¹³ ءيساول ياسوع ييني‑اسن: «را‑ياكوف كود اسغار نّا‑ور‑يژّي بابا ربّي ن‑يگنّا.

¹⁴ غير تهنّايات زغ‑گيسن. نتني گان ءيبوكاضن ار‑زگّورون ءي‑يبوكاضن. ءيغ‑يزوار‑وبوكاض ءي‑وايّاض را‑ن‑ضرن س‑سين غ‑وگضي.»

¹⁵ ييني‑اس بطرُس: «مل‑اغ ما‑تقصادت س‑لمعنا‑ياد.»

¹⁶ ءيرار‑اسن ياسوع: «ءيزد ءولا كونّي ءور‑تا‑تفهيمّ؟

¹⁷ ءيس‑ور‑تسّينم ءيزد كولّو ما‑يكشّمن زغ‑يمي ن‑بنادم ار‑يزراي زغ‑واحليگ‑نس س‑لخلا؟

¹⁸ ءيمّا غايلّي‑د‑يتفّوغن زغ‑يمي، ءول‑نس ا‑د‑يتكّا. نتّان ا‑يسّحرامن بنادم.

¹⁹ اشكو زغ‑وول‑نس ا‑زغ‑ا‑دي‑تفّوغن ءيسوينگيمن أُخشنّين ءولا تاناغا د‑زّنا د‑لفساد د‑تمخّارت د‑توگّا ن‑تكركاس د‑ترگّام.

²⁰ غويد ا‑يسّحرامن بنادم. ءيمّا يان ءيشّان ءور‑يسيرد ءيفاسّن‑نس، ءور‑را‑ت‑يسّحرم مايان.»

تامغارت لّي‑يومنّ باهرا

²¹ ءينكر ياسوع ءيفّوغ زغ‑تمازيرت ن‑ايت‑ربّي ءيفتو س‑تسگا ن‑صور د‑صايدا.

²² تاشك‑يد دارس يات‑تمغارت ءولّت‑تمازيرت‑ان ن‑كانعان، ار‑اس‑دي‑تاقرا ار‑تّيني: «حنّو زغ‑گيگي ا‑يوس ن‑داود. ها‑يلّي ءيلّا گيس يا‑لّجنّ، تمرّت باهرا.»

²³ ءيمّا ياسوع ءيفسّا، ءور‑اس‑ينّي يات. مونّ‑د ءيلمّا ءيمحضارن‑نس ءينين‑اس: «سّمسر‑تّ ا‑سيدي، اشكو سول‑اغ‑تضفار ار‑تسّغويّو.»

²⁴ ءيساول سرس ياسوع ييني‑اس: «غير ءولّي ن‑تووروت ءيجلان لّي‑يگان ايت‑ربّي ا‑ف‑دي‑تيازانغ.»

²⁵ ءيمّا نتّات توشكا‑د تضر‑د غ‑لگدّام‑نس تيني‑اس: «وا‑سيدي، عاون‑يّي.»

²⁶ ييني‑اس: «ءور‑يشوي ا‑نامژ اغروم ن‑تاروا، نلوح‑ت‑ين ءي‑ييضان.»

²⁷ تيني‑اس: «وا‑سيدي، ءولا ءيضان ار‑شتّان ءيبروزيين لّي‑طّارنين زغ‑لميدا ن‑سيديتسن.»

²⁸ ءيساول ياسوع ييني‑اس: «وا‑تامغارت، تومنت باهرا. اد‑ام‑ييلي غمكلّي تريت.» تجّي ءيلّيس غاكودان.

لماسيح ءيجّوجّي ءيموضان گّوتنين

²⁹ ءيفتو ياسوع زغ‑غين ءيزري زغ‑تاما ن‑ومدا ن‑جاليل، ءيغلي س‑يان‑وورير ءيگاور گيس.

³⁰ مونّ‑د فلّاس مدّن گّوتنين، اوين‑اس‑د ءيكوشامن د‑يبيضارن د‑يبوكاضن د‑يژنژام د‑وييّاض گّوتنين، سرسن‑تن‑د غ‑دار ءيضارن‑نس ءيجّوجّي‑تن.

³¹ ار‑كولّو‑تعجّابن مدّن‑ان لّيغ ژران ءيژنژام ار‑ساوالن، د‑يكوشامن ار‑تدوسن، د‑يبيضارن ار‑فتّون، د‑يبوكاضن ار‑تّيسفيون. ار‑كولّو‑تالغن ربّي ن‑ايت‑يودايا.

لماسيح ءيشّوشا كّوژ ءيد‑والف

³² ءيغر‑د ياسوع ءيلمّا ءي‑يمحضارن‑نس س‑دارس، ييني‑اسن: «ها‑مدّن‑اد قامان گيگي باهرا، اشكو كراض‑ووسّان ايد ديدي لّان، ءور‑دارسن ماد‑شتّان. ءور‑ريغ ا‑تن‑ازنغ د‑نتني ءينغا‑تن لاژ ا‑ور‑تغاشان غ‑وغاراس.»

³³ ءينين‑اس ءيمحضارن‑نس: «غير لخلا اياد. مانيغ را‑ناف اغروم ما‑س‑ا‑نشّباع كولّو مدّن‑اد گّوتنين؟»

³⁴ ءيسقسا‑تن ياسوع: «منّاوت‑تنگُال اد‑دارون؟» ءينين‑اس: «سّا ن‑تنگُال د‑كرا ن‑تسلمين مژّينين.»

³⁵ يوصّا مدّن اد‑سكيوسن س‑واكال

³⁶ ياسي سّا ن‑تنگُال د‑تسلمين، ءيشكر ربّي ءيبّي‑تنت ءيفك ءي‑يمحضارن‑نس، بضون‑تنت ف‑مدّن.

³⁷ شّن كولّو مدّن‑ان ايلّيغ شبعان. سّمونّ‑د توفّاژ لّي‑د‑قامانين، عمّرن سّا ن‑تريالين.

³⁸ غويلّي شّانين، كّوژ ءيد‑والف ن‑ورگاز اد‑گان، ءيلينت ءولا تيمغارين د‑تاروا مژّينين.

³⁹ ءينكر ياسوع ءيلمّا، ءيمسافاض د‑مدّن. ءيكشم س‑تاناوت ءيسّودو غ‑ومدا س‑تسگيو ن‑ماگادان.