matta 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لموت ن‑يوحانّا امسدّام

¹ غ‑ووسّان‑ان ءيسفلد‑وگلّيد هيرودوس ف‑كولّو ما‑يسكار ياسوع.

² ييني فلّاس ءي‑يخدّامن‑نس: «يوحانّا امسدّام اياد، ءينكر‑د زغ‑لموت. مايان ا‑ف‑گيس‑لّانت لقوّات‑اد.»

³ اشكو هيرودوس ا‑يوزنّ اد‑امژن يوحانّا كرسن‑ت لوحن‑ت‑ين غ‑لحبس ف‑سّيبت ن‑هيروديّا تامغارت ن‑گماس فيليبّوس.

⁴ اشكو يوحانّا ءيكّا‑تّين ار‑يتّيني ءي‑هيرودوس: «ءور‑اك‑يحلّا ا‑تاويت تامغارت ن‑گماك.»

⁵ ييري هيرودوس ا‑ينغ يوحانّا والاينّي ءيكسوض زغ‑مدّن اشكو ار‑كولّو‑تّينين ءيزد يوحانّا يان‑نّابي ا‑يگا.

⁶ والاينّي لّيغ‑د‑يروح‑واسّ لّي‑غ‑يلول هيرودوس، تكشم‑ن ءيلّيس ن‑هيروديّا ار‑تّحوش غ‑لگدّام ن‑هيرودوس د‑ويلّي ديدس گاورنين، تسّفراح‑ت.

⁷ ءيساول س‑تفروخت ءيگّالّ‑اس ارد‑اس‑يفك اينّا تضالب.

⁸ تفّوغ نتّات تسقسا‑ن ءينّاس، توورّي‑د تيني‑اس: «فك‑يّي‑د غ‑يات‑تقصرييت ءيخف ن‑يوحانّا امسدّام.»

⁹ طيّر‑اس ءي‑وگلّيد باهرا، والاينّي ف‑سّيبت ن‑تگالّيت لّي‑س‑يگّولّا غ‑لگدّام ن‑ينبگيون‑نس يوصّا اد‑اس‑يتياوفكا.

¹⁰ يازن اد‑بّين ءيخف ن‑يوحانّا غ‑لحبس.

¹¹ اوين‑د ءيخف‑نس غ‑يات‑تقصرييت، ءيفك‑ت ءي‑تفروخت تاوي‑ت‑تفروخت ءي‑ينّاس.

¹² اشكين‑د ءيلمّا ءيمحضارن ن‑يوحانّا، اوين دّات‑نس مضلن‑تّ‑ين. دّون ءينين‑ت ءي‑ياسوع.

لماسيح ءيشّوشا سمّوس ءيد‑والف

¹³ لّيغ ءيسفلد ياسوع ف‑مايد ءيجران، ءيفتو ءيسّودو غ‑يات تاناوت س‑يان‑ودغار غ‑ور‑يلّي يان. سفلدن مدّن ءيس‑يدّا، فتون ف‑وضار زغ‑يدوران‑ان ضفورن‑ت.

¹⁴ لّيغ ءيفّوغ زغ‑تاناوت ءيژر‑ن كيگان د‑مدّن، قامان گيس باهرا، ءيجّوجّي‑اسن ءيموضان‑نسن.

¹⁵ لّيغ تاكمور تاكُيا ن‑تافوكت اشكين‑د دارس ءيمحضارن‑نس ءينين‑اس: «ياغ‑وزال، ءور‑يلّي يات غ‑لخلا‑ياد. ازن مدّن اد‑دّون س‑يدوران‑ان اد‑د‑سغن ماد‑شتّان.»

¹⁶ ءيساول ياسوع ييني‑اسن: «ءور‑تن‑د‑يقّان اد‑دّون. فكات‑اسن كونّي ماد‑شتّان.»

¹⁷ ءينين‑اس: «ءور‑دارنّغ غير سمّوست‑تنگُال د‑سنات‑تسلمين.»

¹⁸ ييني‑اسن: «اويات‑تند‑د س‑داري.»

¹⁹ يوصّا مدّن‑ان گّوتنين اد‑گاورن غ‑توگا. ياسي سمّوست‑تنگُال‑لّي د‑تسلمين‑لّي س‑سنات، يالّ الّن‑نس س‑يگنوان ءيشكر ربّي. ءيبّي تينگُال ءيفك‑تنت ءي‑يمحضارن‑نس. بضون‑تنت ءيمحضارن ف‑مدّن‑ان گّوتنين.

²⁰ شّن كولّو ايلّيغ شبعان. سّمونّ‑د توفّاژ لّي‑د‑قامانين، عمّرن سنات د‑مراوت ن‑تاسلّيت.

²¹ غويلّي شّانين راد‑گن ما‑يتگّان سمّوس ءيد‑والف ن‑ورگاز، ءيلينت ءولا تيمغارين د‑تاروا مژّينين.

²² ييني ياسوع ءيلمّا ءي‑يمحضارن‑نس اد‑كشمن س‑تاناوت زوورن‑ت س‑تسگا ياضني ن‑ومدا. ءيمّا نتّا ءيقاما غين ا‑يمسافاض د‑مدّن.

ءيفتا لماسيح ف‑ومدا

²³ تيغوردين ن‑ما‑يمسافاض ياسوع د‑مدّن‑ان، ءيغلي س‑يان‑وورير واحدوت ا‑غين‑يژّالّ. ضرند‑د تيلّاس، سول ءيلّا غين واحدوت.

²⁴ ءيمّا ءيمحضارن‑نس غ‑تاساعت‑ان، تاگّوگ‑ن تاناوت‑نسن ف‑واكال. ار‑تّ‑كّاتنت تاضانگيوين، ار‑تّ‑يترارا‑واضو تيغوردين.

²⁵ غاكودان غ‑طوژّونت ن‑ييض ياشك‑يد دارسن ياسوع ءيفتو ف‑يگّي ن‑وامان.

²⁶ لّيغ‑ت‑ژران ءيمحضارن‑نس ءيفتا ف‑يگّي ن‑وامان ءيكساضن باهرا، گن تاغويّيت ءينين: «كرا ن‑واغُژن اياد.»

²⁷ غاكودان ءيساول‑د ياسوع ييني‑اسن: «اد‑ور‑تيكساضم. تهنّايات، نكّين ايا.»

²⁸ ييني‑اس بطرُس: «وا‑سيدي، ءيغد كيّي ايان، امر‑يّي ا‑ن‑دارك‑فتوغ ف‑يگّي ن‑وامان.»

²⁹ ييني‑اس‑د: «اشك‑يد.» ءيفّوغ بطرُس زغ‑تاناوت ءيفتو ف‑يگّي ن‑وامان س‑دار ياسوع.

³⁰ والاينّي ءيژرا اضو ءيتجهّد ييكساض، س‑ا‑يتدّم غ‑وامان. ءيغر ءي‑ياسوع ييني‑اس: «وا‑سيدي، جّنجم‑يّي.»

³¹ غاكودان ءيمدي‑اس‑ن ياسوع افوس‑نس، يامژ گيس ييني‑اس: «ءيس‑ور‑تومينت؟ ماخ ايلّيغ تشكّات؟»

³² غلين ءيلمّا س‑تاناوت، ءيبّي‑ن‑واضو.

³³ سجدن‑اس غويلّي لّانين غ‑تاناوت ار‑تّينين: «س‑صّاحت كيّي تگيت يوس ن‑ربّي.»

³⁴ لّيغ بّين امدا لكمن تامازيرت ن‑گانيساراط.

³⁵ اكُزن‑ت مدّن ن‑غين، سّوفغن لخبار س‑كولّو تيسگيو ن‑تمازيرت‑ان. ار‑اس‑دي‑تاوين كولّو ما‑غ‑لّانت‑تموضان.

³⁶ ار‑زگيس‑تضالابن باهرا ا‑يادج ءيموضان‑نسن اد‑اس‑گّرن، واخّا غير ءي‑تاما ن‑تملسيت‑نس. كولّو ماد‑اس‑يگّرن ءيجّي.