matta 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تاسوتين لّي‑زغ‑يگا لماسيح

¹ ارّا ن‑تلاليت ن‑ياسوع لماسيح يوس ن‑داود يوس ن‑يبراهيم.

² ءيبراهيم يورو ءيسحاق. ءيسحاق يورو ياعقوب. ياعقوب يورو ياهودا د‑ايتماس.

³ ياهودا يورو فاريص د‑زاراح (تگا ءينّاتسن تامار). فاريص يورو حاصرون، حاصرون يورو ارام،

⁴ ارام يورو عامّيناداب، عامّيناداب يورو ناحشون، ناحشون يورو سالمون.

⁵ سالمون يورو بوعاز (تگا ءينّاس راحاب). بوعاز يورو عوبيد (تگا ءينّاس راعوت). عوبيد يورو ياسّا،

⁶ ياسّا يورو داود اگلّيد. داود يورو سوليمان (ءينّاس ن‑سوليمان تكّا‑تّين تگا تامغارت ن‑ورّيّا).

⁷ سوليمان يورو راحبعام، راحبعام يورو ابيّا، ابيّا يورو اسا،

⁸ اسا يورو ياهوشافاط، ياهوشافاط يورو يورام، يورام يورو عوزّيّا،

⁹ عوزّيّا يورو يوتام، يوتام يورو احاز، احاز يورو حازقيّا،

¹⁰ حازقيّا يورو ماناسّا، ماناسّا يورو امون، امون يورو يوشيّا،

¹¹ يوشيّا يورو ياكونيّا د‑ايتماس غاكود لّيغ نكرن ايت‑بابيل اوين كولّو ايت‑يودايا س‑تمازيرت ن‑بابيل.

¹² تيگيرا ن‑ما‑تن‑يوين س‑بابيل ياكونيّا يورو شالتيل، شالتيل يورو زاروبّابيل،

¹³ زاروبّابيل يورو ابيهودا، ابيهودا يورو الياقيم، الياقيم يورو عازور،

¹⁴ عازور يورو صادوق، صادوق يورو اخيم، اخيم يورو اليود.

¹⁵ اليود يورو اليعازر، اليعازر يورو ماتّان، ماتّان يورو ياعقوب.

¹⁶ ياعقوب يورو يوسف ارگاز ن‑ماريام لّي‑يگان ءينّاس ن‑ياسوع لّي‑مي‑تّينين لماسيح.

¹⁷ كّوژط د‑مراوت ن‑تاسوت ا‑يلّان زغ‑يبراهيم ار داود. كّوژط د‑مراوت ن‑تاسوت ا‑يلّان زغ‑داود ار اكود لّيغ ءيوين ايت‑يودايا س‑بابيل. د‑كّوژط د‑مراوت ن‑تاسوت ا‑يلّان زغ‑لّيغ‑تن‑يوين س‑بابيل ار اكود لّيغ ءيلول لماسيح.

تالاليت لّماسيح

¹⁸ غمكاد ا‑تگا‑تلاليت ن‑ياسوع لماسيح. ءينّاس ماريام تّياوضالاب ءي‑يوسف، ءور‑تا‑ستّ‑ييوي. تاف‑ن ءيخف‑نس ءيس‑ا‑تربّو زغ‑تحكيمت ن‑رّوح لقودوس ن‑ربّي.

¹⁹ ءيمّا يوسف لّي‑ستّ‑ين‑يضالبن ءيگا واد بدّا ءيران ا‑يرضو ربّي. ءيسوانگم اد‑اس‑يفرو س‑تنتلا، اشكو ءور‑يري ا‑ستّ‑يشّحشّم غ‑لگدّام ن‑مدّن.

²⁰ ار‑سول‑يسوينگيم غ‑مايان س‑اس‑د‑يبان يا‑لّمالاك ن‑سيدي ربّي غ‑توارگيت ييني‑اس: «وا‑يوسف يوس ن‑داود، اد‑ور‑تيكساطّ ا‑تاويت ماريام ا‑تگ تامغارت‑نّك، اشكو نتّات زغ‑تحكيمت ن‑رّوح لقودوس اين‑س‑تفّوغ ار‑تربّو.

²¹ را‑تارو يان‑وارّاو، تگت‑اس ءيسم ‹ياسوع› اشكو را‑يجّنجم مدّن‑نس زغ‑دّنوب‑نسن.»

²² كولّو ماياد ءيجرا باش ا‑يافو مايلّي ءينّا سيدي ربّي ف‑يلس ن‑نّابي غايد ءيزرين ءينّا:

²³ «ها‑يات‑تاعيّالت را‑تفّوغ ار‑تربّو، تارو يان‑وارّاو. راد‑اس‑تّينين ‹عيمّانوّيل›.» تگا لمعنا‑نس ‹ربّي ديدنّغ›.

²⁴ لّيغ‑د‑يفاق يوسف زغ‑يطس ءيسكر غمكلّي‑اس‑ينّا لمالاك ن‑سيدي ربّي. ياوي ماريام ا‑تگ تامغارت‑نس

²⁵ والاينّي ءور‑ديدس‑يگين ايلّيغ تورو ارّاو‑ان. ءيگ‑اس غاكودان ءيسم ‹ياسوع›.