marqus 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لعادات ن‑ويلّي زرينين

¹ مونّ‑د ءيفاريسين ف‑ياسوع نتني د‑كرا ن‑يمسلمدن ن‑شّرع لّي‑د‑وشكانين زغ‑تمدينت ن‑وروشاليم.

² ژران كرا زغ‑يمحضارن‑نس ار‑شتّان اغروم س‑يفاسّن‑نسن سول حرمن، اشكو ءور‑تن‑سيردن غمكلّي سيريدن مدّن‑ان.

³ ءيفاريسين د‑ايت‑يودايا كولّوتن، ءيغ‑ور‑باهرا‑سيردن ءيفاسّن‑نسن ءور‑راد‑شّن. نتني ار‑سكارن س‑لعادا ن‑يمغارن لّي‑زرينين.

⁴ غاكود نّا‑د‑وشكان زغ‑سّوق ءور‑راد‑شّن ارد سيردن. گّوتنت لعادات ياضني لّي‑تامژن، ار‑سيريدن لكيسان د‑تمكيلين د‑يروكوتن ن‑واناس د‑يبردان.

⁵ سقسان‑ت ءيفاريسين د‑يمسلمدن ن‑شّرع ءينين‑اس: «ماخ ايلّيغ ءور‑ا‑فتّون ءيمحضارن‑نّك ف‑لعادا ن‑يمزوورا‑نّغ لّي‑زرينين؟ ها‑نتني ار‑شتّان اغروم س‑يفاسّن‑نسن سول حرمن.»

⁶ ءيساول ياسوع ييني‑اسن: «وا‑يد‑بو‑سين‑وودماون، س‑لحقّ ا‑س‑فلّاون‑ينّا ربّي ف‑يمي ن‑نّابي ءيشاعيا، ءينّا ‹مدّن‑اد ار‑يّي‑تالغن س‑يلس‑نسن، ءيمّا ءول‑نسن ياگّوگ‑ن فلّا.

⁷ بلا لفايتّ ا‑يّي‑تعبادن اشكو ءور‑ا‑سّلمادن غ‑ولمّود‑نسن ابلا تينباضين ن‑بنادم.›

⁸ ها‑كونّي ار‑تفالم لوصيّات ن‑ربّي، ار‑تامژم لعادات ن‑بنادم.»

⁹ ءيزايد ييني‑اسن: «غمكاد ا‑س‑ا‑تّانفم ءي‑لوصيّات ن‑ربّي باش ا‑تسكارم س‑لعادات‑نّون.

¹⁰ يوصّا‑كُن موسا ءينّا ‹اوي‑تّ غ‑باباك د‑ينّاك.› ييني‑داغ ‹وانّا ءيرگمن باباس نغد ءينّاس ءيلّا فلّاس ا‑يمّت.›

¹¹ ءيمّا كونّي، ءيغ‑ينّا كرا ن‑يان ءي‑باباس نغد ءينّاس ‹فكيغ ءي‑ربّي مايلّي ترام اد‑اون‑ت‑فكغ، وين ربّي ا‑يگا،›

¹² ءيغ‑ينّا اوال‑اد ار‑اس‑تّينيم ا‑ور‑سول‑يسكار يات ف‑باباس د‑ينّاس.

¹³ غمكاد ا‑س‑ا‑تّانفم ءي‑واوال ن‑ربّي س‑لعادا‑نّون. كيگان د‑تغاوسيوين ا‑تسكارم زوند غاياد.»

غايلّي ءيسّحرامن بنادم

¹⁴ ءيغر‑داغ ياسوع ءي‑مدّن س‑دارس ييني‑اسن: «سفلدات‑يّي كولّوكن ا‑تيسّانم.

¹⁵ ءور‑يلّي يات غ‑برّا ن‑بنادم ءيژضارن ا‑ت‑يسّحرم ءيغ‑سرس‑يكشم. والاينّي غايلّي‑د‑يتفّوغن زغ‑بنادم، نتّان ا‑ت‑يسّحرامن.

¹⁶ يان دار ءيمزگان ا‑سرسن‑يسفليد، ءيلّا فلّاس ا‑يسفلد.»

¹⁷ لّيغ ءيفل مدّن‑ان ءيكشم س‑تگمّي، سقسان‑ت ءيمحضارن‑نس ف‑لمعنا‑ياد.

¹⁸ ييني‑اسن: «ءيزد ءولا كونّي ءور‑تفهيمّ؟ ءيس‑ور‑تسّينم ءيزد كولّو ما‑يكشّمن س‑بنادم زغ‑برّا ءور‑يژضار ا‑ت‑يسّحرم؟

¹⁹ اشكو ءورد ءول ا‑س‑ا‑يكشّم والاينّي س‑واحليگ، ار‑يزراي زغ‑دّات س‑لخلا.» ءيملا ياسوع س‑واوال‑اد ءيس‑يحلّا كولّو ماد‑شتّان مدّن.

²⁰ ءيزايد ييني‑اسن: «غايلّي‑د‑يتفّوغن زغ‑بنادم نتّان ا‑ت‑يسّحرامن،

²¹ اشكو زغ‑وگُنس ن‑وول ن‑بنادم، ا‑زغ‑ا‑دي‑تفّوغن ءيسوينگيمن أُخشنّين د‑لفساد د‑تمخّارت د‑تناغا د‑زّنا

²² د‑طّماع د‑لمونكر د‑لغُشّ د‑شّهوات د‑تنوّاشت د‑تكنداوت د‑لكيبر د‑ونوفل.

²³ كولّو لخُشانات‑اد ار‑دي‑تفّوغنت زغ‑وگُنس ن‑بنادم ار‑ت‑سّحرامنت.»

تامغارت لّي‑يومنّ باهرا

²⁴ ءينكر ياسوع ءيفّوغ زغ‑غين ءيفتو س‑تسگا ن‑صور د‑صايدا. ءيكشم س‑يات‑تگمّي. ءور‑يري ا‑ت‑اكُزن مدّن، والاينّي ءور‑يژضار ا‑يرگس.

²⁵ غاكودان تسفلد فلّاس يات‑تمغارت، دارس ءيلّيس ءيمژّين ءيلّا‑ياس گيس يا‑لّجنّ يُخشنّ باهرا. تاشك‑يد تضر‑د غ‑دار ءيضارن ن‑ياسوع.

²⁶ تگا نتّات تابرّانيت تگ ءولّت‑فينيقيّا زغ‑تمازيرت ن‑شّام. تضالب‑ت باهرا ا‑يسّوفغ لجنّ زغ‑يلّيس،

²⁷ ءيمّا ياسوع ءينّا‑ياس: «ادج تاروا اد‑زوار‑شبعان، اشكو ءور‑يشوي ا‑نامژ اغروم ن‑تاروا نلوح‑ت‑ين ءي‑ييضان.»

²⁸ تساول‑د نتّات تيني‑اس: «وا‑سيدي، ءولا ءيضان غ‑دّو لميدا ار‑شتّان ءيبروزيين لّي‑طّارنين ءي‑تاروا.»

²⁹ ييني‑اس ياسوع غاكودان: «ف‑سّيبت ن‑واوال‑اد س‑يّي‑تنّيت، نّيغ‑ام زايد س‑تگمّي. هان لجنّ ءيفّوغ زغ‑يلّيم.»

³⁰ تفتو س‑تگمّي‑نس تاف‑ن تافروخت تگن ف‑تيسي، ءيفّوغ زغ‑گيس لجنّ.

لماسيح ءيجّوجّي اتيتاو اضرضور

³¹ يوورّي‑د ياسوع غاكودان زغ‑تسگا‑يان ن‑صور، ءيزري زغ‑صايدا ءولا تامازيرت ن‑مراوت‑تمدينين، ءيروح‑د س‑ومدا ن‑جاليل.

³² اشكين‑د دارس كرا ن‑مدّن اوين‑اس‑د يان‑ورگاز ءيگا اتيتاو اضرضور. ضالبن‑ت ا‑فلّاس‑يسرس افوس‑نس.

³³ ياوي‑ت ياسوع زغ‑گر مدّن واحدوت. ءيگ‑ن ءيضوضان‑نس غ‑يمزگان ن‑ورگاز، ءيسّوفس ف‑يضوضان‑نس ءيگّر‑ن ءي‑يلس ن‑ورگاز.

³⁴ يالّ الّن‑نس س‑يگنوان يوت س‑ونفوس‑نس، ييني‑اس: «ءيفاتا.» تگا لمعنا‑نس ‹رژم›.

³⁵ غاكودان رژمن ءيمزگان‑نس ءيفسي ءيلس‑نس، ءيساول ءينم‑واوال‑نس.

³⁶ يوصّا ياسوع مدّن‑ان اد‑ور‑ينين ءي‑يان ف‑مايد ءيجران، والاينّي كرا‑س‑ا‑تن‑يتوصّا نتني ار‑تاوين لخبار‑نس باهرا.

³⁷ ار‑تعجّابن س‑وگُّار ار‑تّينين: «كولّو ما‑يسكار ءيفولكي. هاتي ار‑يترارا ءيضرضار ار‑سفليدن ءولا ءيژنژام ار‑ساوالن.»