marqus 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لمعنا ن‑وامود د‑يكالّن

¹ ءيزايد ياسوع ار‑يسّلماد غ‑تاما ن‑ومدا. مونّ‑د فلّاس مدّن گّوتنين ايلّيغ‑ت‑يد‑يقّان ا‑يكشم س‑تاناوت، ءيسكيوس گيس غ‑ومدا، اكمورن‑د مدّن ار تاما ن‑وامان.

² ار‑تن‑يسّلماد س‑لمعني ف‑تغاوسيوين گّوتنين، ييني‑اسن:

³ «سفلدات، هاي‑افلّاح ءيفّوغ ا‑ن‑يلوح امود.

⁴ لّيغ‑ت‑يلوح ءيضر‑ن كرا غ‑وغاراس اشكين‑د ءيگضاض گرون‑ت.

⁵ ءيضر‑ن كرا غ‑گر ءيژران غ‑يلّيغ ءيدروس‑واكال، ءيمغي‑د حاينا اشكو ءور‑ت‑باهرا‑يديل‑واكال.

⁶ والاينّي لّيغ‑دي‑تغلي تافوكت تجدر‑ت، ييقار اشكو ءور دارس ءيژوران.

⁷ ءيضر‑ن كرا غ‑وزگُّار، ءيغلي د‑وزگُّار ءيشّقاجّي‑ت ءور‑د‑ييوي صّابت.

⁸ ءيضر‑ن كرا غ‑واكال ءيفولكين، ءيمغي‑د ييمغور ءيفك صّابت، ءيفك يان كراض ءيد‑مراو، ءيفك وايّاض سضيص ءيد‑مراو، ءيفك وايّاض ميّا.»

⁹ ييني‑اسن: «وانّا دار ءيمزگان ا‑سرسن‑يسفليد، ءيلّا فلّاس ا‑يسفلد.»

¹⁰ لّيغ ءيفّوغ ياسوع زغ‑گر مدّن‑ان گّوتنين اشكين‑د دارس ءيمحضارن‑نس س‑سين د‑مراو، نتني د‑وييّاض زغ‑وسمون‑نس، سقسان‑ت ف‑لمعني‑اد.

¹¹ ييني‑اسن ياسوع: «كونّي ءيتياوفكا‑ياون ا‑تيسّانم ف‑تگلديت ن‑ربّي ما‑ينتلن ف‑مدّن ياضني. ءيمّا غوين ن‑برّا راد‑اسن‑كولّو‑يتياونّا س‑لمعني.

¹² غمكلّي ءيتياران ‹راد‑باهرا‑تمنادن والاينّي ءور‑راد‑يسّانّ ماد‑منادن. راد‑باهرا‑سفليدن والاينّي ءور‑راد‑فهمن ما‑مي‑سفلدن. ءور‑رين ا‑د‑سري‑وورّين ا‑فلّاسن‑سّيتّيغ دّنوب‑نسن.› »

¹³ ءيزايد ييني‑اسن: «ءيس‑ور‑تسّينم ءولا لمعنا‑ياد؟ مامنك ا‑س‑را‑تيسّانم لمعني ياضني كولّوتنت؟

¹⁴ افلّاح ءيگا‑ت واد ءيزراعن اوال ن‑ربّي.

¹⁵ كرا ن‑مدّن گان زوند امود لّي‑يضرن غ‑وغاراس. لّيغ سفلدن ءي‑واوال ياشك‑يد شيطان، ءيكّيس‑اسن اوال لّي‑دارسن‑يلّان.

¹⁶ كرا ن‑مدّن گان زوند امود لّي‑يضرن غ‑گر ءيژران. سفلدن ءي‑واوال امژن‑ت حاينا، فرحن سرس.

¹⁷ والاينّي ءور‑يكشيم‑واوال‑ان س‑وول‑نسن. قامان غير كرا ن‑ووسّان ارد تيلي تاسّاست نغد تارفوفنت ف‑سّيبت ن‑واوال س‑كنوكين.

¹⁸ كرا ن‑مدّن گان زوند امود لّي‑يضرن غ‑وزگُّار. سفلدن ءي‑واوال

¹⁹ والاينّي دّان اسين تيغوفيوين ن‑دّونيت لهون س‑وايدا ءيرين تيغاوسيوين ياضني. غايان ا‑يشّقاجّين اوال‑ان ايلّيغ ءور‑د‑ييوي صّابت.

²⁰ والاينّي كرا ن‑مدّن گان زوند امود لّي‑يضرن غ‑واكال ءيفولكين. سفلدن ءي‑واوال ن‑ربّي سكرن سرس فكن صّابت. ءيفك يان كراض ءيد‑مراو، ءيفك وايّاض سضيص ءيد‑مراو، ءيفك وايّاض ميّا.»

لقنديل د‑لعبرت

²¹ ءيساول‑داغ ياسوع ييني‑اسن: «ءيس‑را‑دي‑تاويم لقنديل ا‑تي‑تسرسم غ‑دّو لعبرت نغد غ‑دّو تيسي؟ ءيس‑ورد ف‑يگّي ن‑ماني ياتّوين ا‑ف‑را‑ت‑ين‑تسرسم؟

²² هان كولّو ما‑ينتلن را‑ت‑ژرن مدّن تيگيرا، د‑كولّو ما‑يدلن را‑ت‑زّودفن.

²³ يان دار ءيمزگان ا‑سرسن‑يسفليد، ءيلّا فلّاس ا‑يسفلد.»

²⁴ ءيزايد ييني‑اسن: «رارات لعاقل س‑مايد مي تسفليدم. هاتي س‑لعبرت لّي‑س‑ا‑تّعبّارم ا‑س‑راد‑اون‑يتياوعبّار ءيتياوفكا‑ياون س‑وگُّار.

²⁵ اشكو وانّا دار ءيلّا، راد‑اس‑يزايد ربّي، ءيمّا وانّا ءور‑دار‑يلّي، راد‑اس‑يكّيس ءولا مايلّي دارس ءيلّان.»

لمعنا ن‑وامود لّي‑د‑يمغين

²⁶ ءيزايد ياسوع ييني‑اسن: «غمكاد ا‑تگا‑تگلديت ن‑ربّي. تگا زوند يان‑ورگاز ار‑يتلوح امود غ‑واكال.

²⁷ ار‑يگان ار‑ينكّر غ‑ييض ءولا ازال، ءيمغي‑د‑وامود ار‑يتيمغور، ءيمّا ارگاز‑ان ءور‑يسّين مامنك.

²⁸ هاتي اكال ا‑ت‑يد‑يسّمغاين. غ‑يسيزوار گانت اگُلاس، يان كرا گنت تيزلفين، غ‑يسيگُّرا گنت طومژّين عمّرنين.

²⁹ ءيغ‑نوانت‑طمژّين را‑د‑ياسي اسمّاود اشكو تروح‑تمگرا.»

لمعنا ن‑تاقّايت ءيمژّين

³⁰ ييني‑اسن ياسوع: «ما‑س‑را‑نسّرواس تاگلديت ن‑ربّي؟ ما‑لّمعنا ا‑س‑را‑فلّاس‑نساول؟

³¹ ترواس يات تاقّايت لّخردل. لّيغ‑ن‑تضر غ‑واكال، تمژّي ف‑كولّو تاقّايين ن‑يمادن لّي‑لّانين.

³² والاينّي يان كرا ار‑دي‑تّمغاي ار‑تّيمغور، توورّي تاگُر كولّو ءيمندي. ار‑تسكار تيصطّوين مقّورنين ايلّيغ ا‑سرسنت‑كشّمن ءيگضاض ن‑يگنوان، زدغن غ‑ومالو‑نس.»

³³ ار‑سرسن‑يساوال ياسوع س‑لمعني گّوتنين زوند ختيد، ياوي‑اسن‑د اوال ن‑ربّي س‑ونشكنّا مي ژضارن ا‑ت‑فهمن.

³⁴ مدّن‑ان غير س‑لمعني ا‑س‑ا‑سرسن‑يساوال. والاينّي ءيمحضارن‑نس، لّيغ لّان واحدوتن ار‑اسن‑يمالا تيغاوسيوين‑اد كولّوتنت باش ا‑تنت‑يسّانّ غمكلّي گانت.

لماسيح يومر اضو د‑ومدا

³⁵ لّيغ تلكم‑تدگُّات ن‑غاسّان ييني‑اسن: «ا‑ندّو س‑تسگا‑يان ياضني ن‑ومدا.»

³⁶ فلن مدّن غين، كشمن ءيمحضارن س‑تاناوت لّي‑غ‑يلّا ياسوع. مونّ ديدسن كرا ن‑مدّن غ‑تاناوين ياضني.

³⁷ غاكودان ءينكر‑د‑واضو ءيتجهّدن، اتّوينت تاضانگيوين ار‑كّاتنت تاناوت ايلّيغ ا‑تّعمّار س‑وامان.

³⁸ ياسوع ءيلّا غ‑تغوردين غ‑تاناوت، ءيسرس ءيخف‑نس ف‑يات لمخدّا، ءيگن. سّفاقن‑ت ءيمحضارن‑نس ءينين‑اس: «ءيس‑ور‑اك‑گينّغ‑يلّي يات را‑نهلك؟»

³⁹ ءينكر ياسوع يامر اضو ا‑يفسّا، ييني ءي‑ومدا: «زگا، تهنّات.» س‑يبّي‑واضو يوورّي‑ومدا ءيهنّا باهرا.

⁴⁰ ييني ءي‑يمحضارن‑نس: «ماخ ايلّيغ تكسوضم؟ ءيس‑ور‑تومينم؟»

⁴¹ ءيمّا نتني گُّدن س‑وگُّار ار‑تّينين ءي‑نگراتسن: «ما‑يگا غواد ايلّيغ ا‑سرس‑يسفليد‑واضو ءولا امدا؟»