marqus 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

ءيجّوجّي لماسيح غ‑واسّ ن‑وسونفو

¹ ءيكشم‑داغ ياسوع س‑تگمّي ن‑تژالّيت. ءيلّا غين يان‑ورگاز ءيمّوت‑اس‑وفوس.

² ءيلين كرا ن‑مدّن ران اد‑افن غ‑ياسوع ما‑س‑ا‑ياس‑صراضن، گابلن‑ت اد‑ژرن ءيس‑را‑ت‑يجّوجّي غ‑واسّ ن‑وسونفو.

³ ءيساول ياسوع س‑والّي مي ءيمّوت‑وفوس ييني‑اس: «اشك‑يد س‑وامّاس.»

⁴ ءيساول ءيلمّا س‑وييّاض ييني‑اسن: «ما‑يحلّان غ‑واسّ ن‑وسونفو؟ ا‑نسكار ما‑يفولكين نغد ا‑نسكار ما‑يُخشنّ؟ ءيزد ا‑نجّنجم يان نغد ا‑ت‑نهلك؟» ءيمّا نتني فسّان.

⁵ ءيگراول گيسن طيّر‑اس تُگراژ‑ت اشكو قّورن‑وولاون‑نسن باهرا. ءيساول س‑ورگاز‑لّي ييني‑اس: «مدي‑د افوس‑نّك.» ءيمدي‑اس‑ت‑يد س‑يجّي، ءيدوس‑وفوس‑نس.

⁶ فّوغن ءيفاريسين غاكودان، دّون ار‑تمشاوارن د‑يمدّوكُّال ن‑وگلّيد هيرودوس ف‑مامنك ا‑راد‑نغن ياسوع.

ءيساول لماسيح ءي‑مدّن غ‑تاما ن‑ومدا

⁷ ءيفتو ياسوع د‑يمحضارن‑نس س‑ومدا، ضفورن‑ت مدّن گّوتنين زغ‑تمازيرت‑ان ن‑جاليل.

⁸ لّيغ سفلدن وييّاض ف‑ما‑يسكر، اشكين‑د زغ‑يودايا د‑تمدينت ن‑وروشاليم ءولا تامازيرت ن‑يدوميّا د‑تسگا ياضني ن‑واسيف ن‑وردون ءولا تيسگيو ن‑صور د‑صايدا.

⁹ ييني ءيلمّا ياسوع ءي‑يمحضارن‑نس اد‑اس‑د‑اوين يات تاناوت، ا‑تيلي غ‑تاما‑نس باش ا‑سرس‑يكشم ءيغ‑ت‑سّنوكمان مدّن باهرا.

¹⁰ اشكو غ‑ووسّان‑ان ار‑يجّوجّي مدّن گّوتنين ايلّيغ ا‑د‑فلّاس‑طّارن كولّو ما‑غ‑لّانت‑تموضان باش اد‑اس‑گّرن.

¹¹ ءولا لجنون غاكود نّا‑ت‑ژران ضرن‑د غ‑دار ءيضارن‑نس ار‑سّغويّون ار‑تّينين: «كيّي تگيت يوس ن‑ربّي.»

¹² ءيمّا ياسوع ار‑تن‑يتامر ا‑ور‑ينين ءي‑يان ف‑ما‑يگا.

سين د‑مراو ن‑ورقّاس

¹³ ءيغلي ياسوع س‑يان‑وورير ءيغر‑د ءي‑ويلّي ءيرا، اشكين‑د س‑دارس.

¹⁴ ءيستي سين د‑مراو اد‑گن ءيرقّاسن‑نس، باش اد‑ديدس‑تمونون يازن‑تن ءيلمّا ا‑تبرّاحن

¹⁵ تيلي‑اسن‑تژضّارت اد‑سّوفوغن لجنون.

¹⁶ ءيستي سيمعان، ءيفك‑اس ءيسم لّجديد ‹بطرُس›.

¹⁷ ءيستي ياعقوب يوس ن‑زابدي د‑يوحانّا گماس ن‑ياعقوب، ءيفك‑اسن ءيسم لّجديد ‹بو‑انارجيس›، تگا لمعنا‑نس ‹تاروا ن‑يگّيگ›.

¹⁸ ءيستي اندراوس د‑فيليبّوس د‑بارتولاماوس د‑ماتّا د‑توما د‑ياعقوب يوس ن‑حالفا د‑تادّاوس د‑سيمعان اواطاني،

¹⁹ نتني د‑ياهودا ءيسخاريوط لّي‑را‑يزّنز ياسوع تيگيرا.

كرا ن‑مدّن ءور‑سّينّ ما‑يگا ياسوع

²⁰ يوورّي‑د ياسوع غاكودان س‑تگمّي. مونّ‑د‑داغ فلّاس مدّن گّوتنين ايلّيغ ءور‑اكُّ‑ژضارن اد‑شّن اغروم.

²¹ ءولا ايتماس ن‑ياسوع سفلدن فلّاس. اشكين‑د نتني ا‑ت‑اوين اشكو نّان: «ءيفّوغ ءيخف‑نس.»

²² ءيمّا ءيمسلمدن ن‑شّرع لّي‑د‑وشكانين زغ‑تمدينت ن‑وروشاليم، ار‑تّينين: «ءيلّا گيس ‹بعل‑زابول.› هاتي س‑تحكيمت ن‑وگلّيد لّجنون ا‑س‑ا‑يسّوفوغ لجنون.»

²³ ءيمّا ياسوع ءيغرا‑ياسن‑د س‑دارس، ار‑سرسن‑يساوال س‑لمعني ييني‑اسن: «مامنك ا‑را‑ييري شيطان ا‑يسّوفوغ ءيخف‑نس؟

²⁴ ءيغ‑ا‑تّمّاغ يات‑تگلديت د‑يخف‑نس ءور‑را‑تقاما‑تگلديت‑ان.

²⁵ ءيغ‑ا‑تّمّاغ يات‑تگمّي د‑يخف‑نس ءور‑را‑تقاما‑تگمّي‑ان.

²⁶ ءولا شيطان، ءيغ‑يمّاغ د‑يخف‑نس ءور‑را‑يقاما والاينّي را‑يضر.

²⁷ ءور‑يژضار يان ا‑يكشم س‑تگمّي ن‑يان‑يدوسن ا‑د‑ياكُر ايدا‑نس ءيغ‑ور‑زوار‑يكرس غوالّي ءيدوسن. ءيغ‑ت‑يكرس، غاكودان ا‑راد‑اس‑د‑ياكُر تيگمّي‑نس.

²⁸ «لحقّ ا‑راد‑اون‑ينيغ، كولّو دّنوب ن‑بنادم، ءيژضار ربّي اد‑اسن‑يصامح فلّاسن، ءولا تيرگّام لّي‑س‑ا‑رگّمن ربّي.

²⁹ والاينّي يان ءيرگّمن رّوح لقودوس ءور‑سار‑اس‑فلّاس‑يصامح. نتّا راد‑بدّا‑فلّاس‑ييلي لحوكم ن‑ربّي.»

³⁰ ءيساول غمكاد اشكو ار‑تّينين: «ءيلّا گيس يان‑رّوح يُخشنّ.»

ايتماس لّماسيح د‑ينّاس

³¹ تاشك‑يد ءينّاس ن‑ياسوع د‑ايتماس، بيدّن‑د غ‑برّا ن‑تگمّي، ازنّ‑د ماد‑اس‑د‑ياقران.

³² ءيمّا نتّا سوتلن‑اس مدّن، ءيسكيوس غ‑وامّاس‑نسن. ءينين‑اس‑د: «ها‑ينّاك د‑ايتماك غ‑برّا، ار‑سرك‑سيگّيلن.»

³³ ءيساول ياسوع ييني‑اسن: «ما‑يگان ءينّا ءولا ايتما؟»

³⁴ ءيسّماقّل غ‑ويلّي ديدس سكيوسنين ييني‑اسن: «ها‑ينّا د‑ايتما.

³⁵ اشكو وانّا ءيسكارن ما‑يرا ربّي، نتّان ا‑يگان گما ءيگ ءولّتما ءيگ ءينّا.»