marqus 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لقوّا لّماسيح

¹ يوورّي‑د ياسوع س‑تمدينت ن‑كافرناحوم. زرين كرا ن‑ووسّان س‑سفلدن مدّن ءيس‑يلّا غ‑تگمّي.

² مونّ‑د فلّاس مدّن گّوتنين ايلّيغ ءور‑يقاما كرا ن‑وغژو غ‑وگُنس ءولا غ‑يمي ن‑برّا. ار‑تن‑يسّلماد س‑واوال ن‑ربّي.

³ اشكين‑د كّوژ مدّن اسين‑د يان‑ورگاز ءيكوشمن.

⁴ ءور‑ژضارن ا‑ت‑ين‑سّاكمورن ءي‑ياسوع اسكو تعمّر‑تگمّي س‑مدّن گّوتنين. غلين ءيلمّا س‑وكفاف، سّيتّين يان‑ووزون غ‑يگّي ن‑يلّيغ ءيلّا ياسوع، رژمن انقوبّي، زّوگزن‑ين ءيمجدين لّي‑ف‑يگن‑وكوشام.

⁵ ياسوع ءيژرا مامنك ا‑باهرا‑سرس‑ومنّ، ءيساول س‑وكوشام ييني‑اس: «واي‑يوي، ءيتّين فلّاك دّنوب‑نّك.»

⁶ لّان غين كرا ن‑يمسلمدن ن‑شّرع، گاورن ار‑سوينگيمن د‑يخف‑نسن:

⁷ «ماخ ا‑يساول غواد س‑غمكاد؟ اوال لّكوفر ايد ءينّا. ما‑يژضارن ا‑يسّيتّي دّنوب ابلا ربّي واحدوت؟»

⁸ ءيمّا ياسوع ءيسّن غ‑رّوح‑نس ما‑غ‑ا‑سوينگيمن، ييني‑اسن: «ماخ ايلّيغ ا‑تسوينگيمّ د‑يخفاون‑نّون غمكاد؟

⁹ ما‑گيسن‑يرخان، اد‑ينيغ ءي‑غواد ءيكوشمن ‹ءيتّين فلّاك دّنوب‑نّك› نغد اد‑ينيغ ‹نكر، تاسيت ءيمجدين‑نّك ار‑تّيدوت›؟

¹⁰ والاينّي راد‑اون‑ملغ ءيس‑داري تاژضّارت غ‑دّونيت اد‑سّيتّيغ دّنوب، نكّي لّي‑يگان يوس ن‑بنادم.» ءيگراول غ‑وكوشام ييني‑اس:

¹¹ «نّيغ‑اك، نكر تاسيت ءيمجدين‑نّك، تدّوت س‑تگمّي‑نّك.»

¹² ءينكر غاكودان ياسي ءيمجدين‑نس ءيفّوغ غ‑لگدّام ن‑مدّن‑ان. ار‑تعجّابن كولّوتن ار‑تالغن ربّي ار‑تّينين: «ءور‑جّو‑نژري زوند ماياد.»

ءيغرا‑د لماسيح ءي‑لاوي

¹³ ءيفّوغ‑داغ ياسوع س‑تاما ن‑ومدا، اشكين‑د دارس مدّن گّوتنين ار‑تن‑يسّلماد.

¹⁴ ءيفتو يان ءيميكّ ءيژر لاوي يوس ن‑حالفا ءيسكيوس غ‑يلّيغ ا‑تامژن ءيقاريدن ن‑نكّاس. ييني‑اس: «اشك‑يد، مون ديدي.» ءينكر لاوي ءيمون ديدس.

ءيشّا لماسيح د‑يد‑بو‑نكّاس

¹⁵ ءيگاور ياسوع د‑يمحضارن‑نس غ‑تگمّي ن‑لاوي، ءيدرو د‑يد‑بو‑نكّاس گّوتنين د‑وييّاض أُخشنّين. ءيگّوت گيسن ما‑يتمونون د‑ياسوع.

¹⁶ ءيمّا ءيمسلمدن ن‑شّرع لّمدهب ن‑يفاريسين، لّيغ‑ت‑ژران ار‑يشتّا د‑مدّن أُخشنّين د‑ويلّي تامژنين نكّاس، سقسان ءيمحضارن‑نس: «ماخ ايلّيغ ا‑يشتّا د‑يد‑بو‑نكّاس د‑مدّن‑ان أُخشنّين؟»

¹⁷ لّيغ ءيسفلد ياسوع ءي‑ماد‑نّان ييني‑اسن: «ءورد غويلّي دوسنين ا‑يحتاجّان اطبيب والاينّي غويلّي ءوضنّين. ءور‑د‑وشكيغ ا‑ن‑غرغ ءي‑ويلّي غالنين ءيس‑فولكين، والاينّي ءوشكيغ‑د ا‑ن‑غرغ ءي‑ويلّي أُخشنّين.»

اسقسي ف‑وژوم

¹⁸ غ‑ووسّان‑ان ار‑تاژومن ءيمحضارن ن‑يوحانّا امسدّام، نتني د‑يفاريسين. اشكين‑د كرا ن‑مدّن سقسان ياسوع: «ماخ ايلّيغ ا‑تاژومن ءيمحضارن ن‑يوحانّا نتني د‑يفاريسين، ءيمّا ءيمحضارن‑نّك كيّي ءور‑ا‑تاژومن؟»

¹⁹ ءيساول ياسوع ييني‑اسن: «ءيس‑ژضارن ايت‑تمغرا اد‑اژومن د‑وسلي ديدسن؟ ءيغ‑سول‑ديدسن‑يلّا‑وسلي ءور‑ژضارن اد‑اژومن.

²⁰ والاينّي راد‑د‑اشكين‑ووسّان لّي‑غ‑را‑فلّاسن‑ييتّي‑وسلي. غ‑ووسّان‑ان ا‑غ‑راد‑تاژومن.

²¹ ءور‑يلّي ما‑يگنّون تادغارت ن‑تّوب لّجديد ف‑تملسيت تاقديمت. ءيغ‑يسكر غمكان را‑تكّيس‑تدغارت لّجديد زغ‑تقديمت تبّي س‑وگُّار.

²² ءور‑يلّي ما‑يتگّان امان ن‑واضيل ءيكتين لّجديد غ‑يلماون ءيقديمن. ءيغ‑يسكر غمكان راد‑ستغن‑وامان لّجديد ءيلماون ءيقديمن فّين‑وامان خسرن ءيلماون. والاينّي ار‑تگّان امان ن‑واضيل لّجديد غ‑يلماون لّجديد.»

اسقسي ف‑واسّ ن‑وسونفو

²³ يان‑واسّ ن‑وسونفو ءيفتا ياسوع د‑يمحضارن‑نس غ‑يگران غ‑گر ءيمندي. لّيغ ا‑تّيدون ار‑تكّيسن ءيمحضارن تيزلفين.

²⁴ ساولن‑د كرا ن‑يفاريسين ءينين‑اس: «ژر، ماخ ايلّيغ ا‑سكارن غ‑واسّ ن‑وسونفو غايلّي ءور‑گيس‑يحلّان؟»

²⁵ ءيرار‑اسن ياسوع: «ءيس‑ور‑تغريم ف‑داود ما‑يسكر غاكود لّيغ‑ت‑باهرا‑ينغا لاژ، نتّا د‑ويلّي ديدس مونّين؟

²⁶ ءيكشم س‑تگمّي ن‑ربّي غ‑ووسّان ن‑ابياتار انمغور ن‑تگمّي ن‑ربّي، ءيشّ اغروم لّي‑يتياوفكان ءي‑ربّي. ءور‑يحلّا ا‑ت‑يشّ يان ابلا ءينمغورن ن‑تگمّي ن‑ربّي. ءيشّا‑ت داود ءيفك‑ت ءي‑وسمون‑نس.»

²⁷ ءيزايد ياسوع ييني‑اسن: «ربّي ءيسكر اسّ ن‑وسونفو ف‑سّيبت ن‑بنادم، ءورد بنادم ف‑سّيبت ن‑واسّ ن‑وسونفو.

²⁸ ماياد ا‑ف‑گيغ سيديس ءولا ن‑واسّ ن‑وسونفو، نكّي لّي‑يگان يوس ن‑بنادم.»