marqus 14 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

سكرن ءينمغورن ف‑اد‑نغن لماسيح

¹ سين‑ووسّان ا‑يقامان ءي‑لعيد ن‑وسورف د‑ووسّان ن‑ورخصيص. ار‑سيگّيلن ءينمغورن ن‑تگمّي ن‑ربّي د‑يمسلمدن ن‑شّرع مامنك ا‑راد‑امژن ياسوع س‑لحيلت ا‑ت‑نغن.

² والاينّي نّان ءي‑نگراتسن: «ءورد غ‑ووسّان لّعيد باش ا‑ور‑دووين مدّن.»

تامغارت لّي‑د‑ييوين توجّوت

³ ءيلّا ياسوع غ‑ودوّار ن‑بيتعانيا، ءيسكيوس ار‑يشتّا غ‑تگمّي ن‑سيمعان لّي‑ستّين‑يكّان ءيگا انجدام. تكشم‑د دارس يات‑تمغارت توسي‑د يات‑تبوقّالت ن‑وژرو تيلي‑گيس‑توجّوت ن‑ناردين ءيصفان، ءيگّوت‑باهرا‑واتيگ‑نس. ترژ ءيمي ن‑تبوقّالت تفّي‑تّ‑يد ف‑يخف ن‑ياسوع.

⁴ ءيمّا غويلّي لّانين غين، كرا گيسن ءيبزگ فلّاس ءينين ءي‑نگراتسن: «ماخ ا‑تجلا توجّوت‑اد؟

⁵ مراد ءيس‑تنزا را‑دي‑تاوي ءوگُّار ن‑كراض ءيد‑ميّا ن‑نّوقرت، نفك‑تن ءي‑يمژلاض.» بدون ار‑فلّاس‑سّنگموگن.

⁶ ءيمّا ياسوع ءينّا‑ياسن: «ادجات‑ستّ. ماخ ايلّيغ ديدس تشقام؟ هاتّي تسكر گيگي افولكي.

⁷ ءيمژلاض راد‑بدّا‑ديدون‑يلين. غاكود نّا‑ترام را‑تافم ما‑س‑ا‑گيسن‑تسكارم لخير. ءيمّا نكّي ءور‑راد‑بدّا‑ديدون‑يليغ.

⁸ هاتّي تسكر مايلّي مي توفا. نتّات تزوار تژغور دّات‑ينو ءي‑ومضّال.

⁹ لحقّ ا‑راد‑اون‑ينيغ، ءينّاغ ا‑تبرّاحن مدّن س‑لخبار‑اد ءيفولكين غ‑كولّو دّونيت، را‑تّينين ف‑مايد تسكر ختاد، ار‑تّ‑يد‑سرس‑كتّين.»

ءيسكر ياهودا ف‑ا‑يزّنز لماسيح

¹⁰ غاكودان ءينكر ياهودا ءيسخاريوط لّي‑يگان يان زغ‑سين د‑مراو ن‑ومحضار، ءيدّو س‑دار ءينمغورن ن‑تگمّي ن‑ربّي باش اد‑اسن‑يزّنز ياسوع.

¹¹ لّيغ سفلدن ءي‑ماد‑اسن‑ينّا، فرحن ءينين‑اس اد‑اس‑فكن ءيقاريدن. يوورّي ار‑يسوينگيم مامنك ا‑را‑تن‑يعاون اد‑امژن ياسوع.

ءيمحضارن جّوجادن ءيمنسي ن‑وسورف

¹² ءيلكم‑د‑واسّ امزوارو ن‑ووسّان ن‑ورخصيص لّي‑غ‑ا‑قّرسن مدّن ءي‑يلقّاغن. سقسان‑ت ءيمحضارن‑نس: «ماني تريت ا‑سرس‑ندّو اد‑اك‑ن‑گيس‑نجّوجاد ءيمنسي لّعيد ن‑وسورف؟»

¹³ يازن سين زغ‑يمحضارن‑نس غاكودان، ييني‑اسن: «زايدات س‑تمدينت. را‑تمناگّارم يان‑ورگاز يوسي‑د اگدور ن‑وامان.

¹⁴ ضفورات‑ت س‑تگمّي نّا‑س‑يكشم، تينيم ءي‑بو‑تگمّي‑ان ‹هاتي ءينّا‑ياك‑د‑ومسلمد، مانيغ ءيلّا‑وحانو لّي‑غ‑راد‑شّغ ءيمنسي ن‑وسورف نكّي د‑يمحضارن‑ينو؟›

¹⁵ راد‑اون‑يمل يان‑وحانو ن‑وفلّا ءيمقّورن ءيسوان ءينگادّان. غين ا‑غ‑راد‑اغ‑تجّوجادم.»

¹⁶ فّوغن ءيمحضارن، دّون س‑تمدينت افن‑ين غمكلّي‑اسن‑ينّا. جّوجادن ءيمنسي ن‑وسورف.

ءيسكيوس لماسيح د‑يمحضارن‑نس

¹⁷ تروح‑د‑تدگُّات، ءيلكم ياسوع تيگمّي نتّا د‑يمحضارن‑نس س‑سين د‑مراو.

¹⁸ لّيغ سكيوسن ار‑شتّان ييني‑اسن: «لحقّ ا‑راد‑اون‑ينيغ، را‑يّي‑يزّنز يان غ‑گراتون، كونّي لّي‑ديدي‑شتّانين.»

¹⁹ طيّر‑اسن باهرا، بدون ار‑ت‑سقسان كولّوتن، كود يان ار‑يتّيني: «ياك، ءورد نكّي؟»

²⁰ ييني‑اسن: «ءيگا يان زغ‑سين د‑مراو لّي‑ديدي‑درانين غ‑وروكو‑اد.

²¹ ها‑يوس ن‑بنادم را‑يمّت غمكلّي فلّاس ءيتياران، والاينّي تاگوضي ا‑را‑ييلي ءي‑ورگاز لّي‑يزّنزان يوس ن‑بنادم. يوف‑اس ءي‑ورگاز‑ان مراد ءيس‑ور‑اكُّ‑يلول.»

ءيمنسي ن‑سيديتنّغ

²² لّيغ ا‑شتّان ياسي ياسوع تانگولت، ءيشكر ربّي ءيبّي‑تّ، ءيفك‑اسن‑تّ ييني‑اسن: «امژات. ختاد تگا دّات‑ينو.»

²³ ياسي لكاس، ءيشكر ربّي ءيفك‑اسن‑ت. سون زغ‑گيس كولّوتن.

²⁴ ييني‑اسن: «غويد گان ءيدامّن‑ينو لّي‑را‑يفّي ف‑سّيبت ن‑مدّن گّوتنين باش اد‑گن لعهد لّجديد غ‑گراتون د‑ربّي.

²⁵ لحقّ ا‑راد‑اون‑ينيغ، ءور‑سول‑راد‑سوغ زغ‑لغلّت ن‑واضيل ار اسّ لّي‑غ‑را‑ت‑سوغ زغ‑لجديد غ‑تگلديت ن‑ربّي.»

ءيساول لماسيح ف‑ما‑را‑يجرو ءي‑بطرُس

²⁶ اسين ءيلمّا يان‑ومارگ زغ‑يموريگن ن‑ربّي، فّوغن س‑وورير ن‑زّيتون.

²⁷ ييني‑اسن ياسوع: «ها‑كونّي را‑يّي‑كولّو‑تفلم، اشكو ءيتيارا ‹راد‑وتغ امكسا، مزرنت‑وولّي.›

²⁸ والاينّي تيگيرا ن‑ما‑د‑نكرغ زغ‑لموت را‑كُن‑زوورغ س‑تمازيرت ن‑جاليل.»

²⁹ ءيساول بطرُس ييني‑اس: «واخّا‑ك‑كولّو‑فلن ءور‑سار‑ك‑فيلغ نكّي.»

³⁰ ءيمّا ياسوع ءيرور‑اس: «لحقّ ا‑راد‑اك‑ينيغ، غ‑يض‑اد ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.»

³¹ ءيمّا نتّا ءينّا‑ياس س‑جّهد: «واخّا راد‑ديدك‑مّتغ ءور‑راد‑ينيغ ءور‑ك‑سّينغ.» غمكاد اد‑نّان كولّوتن.

ار‑يتژالّا لماسيح ف‑يخف‑نس

³² اشكين‑د س‑يان‑ودغار لّي‑مي‑تّينين ‹گاتسيماني›. ييني ياسوع ءي‑يمحضارن‑نس: «گاورات غيد، راد‑ژّالّغ.»

³³ ياوي ديدس بطرُس د‑ياعقوب د‑يوحانّا. ءيغووض ياسوع غ‑تاساعت‑ان، مّاغن ءيسوينگيمن باهرا غ‑وول‑نس.

³⁴ ييني‑اسن: «تژّاي فلّا تاغوفت‑اد ار لموت. گاورات غيد تاوزم.»

³⁵ ءيزايد ءيفتو يان ءيميكّ ءيضر س‑واكال ءيژّالّ ييني: «سّيتّي فلّا تاساعت‑اد ن‑ورفوفن ءيغ‑تژضار ا‑تيتّي.»

³⁶ ءيژّالّ‑داغ ييني: «ابّا وا‑بابا، ءور‑يلّي كرا مي ءور‑تژضارت ا‑تي‑تسكرت. كّيس فلّا لكاس‑اد ن‑ورفوفن، والاينّي ا‑ييلي ما‑تريت، ءورد ماد‑ريغ نكّي.»

طّاسن ءيمحضارن

³⁷ يوورّي ياسوع ياف‑تن‑ين طّاسن. ءيساول س‑بطرُس ييني‑اس: «وا‑سيمعان، ءيس‑تطّاست؟ ءيس‑ور‑تژضارت ا‑تاوزت يات تاساعت؟

³⁸ اوزات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو. هاتي ءول ن‑بنادم ار‑يتّيري ا‑يسكار افولكي، ءيمّا دّات‑نس تضعف.»

³⁹ ءيدّو‑داغ ا‑يژّالّ ييني غمكلّي ءينّا تاوالا تامزواروت.

⁴⁰ يوورّي ياف‑تن‑ين طّاسن، ءينرا‑تن ءيطس. ءور‑سّينّ ما‑راد‑اس‑ينين.

⁴¹ يوورّي تيس كراطّ‑توال ييني‑اسن: «طّاسات غيلا تسونفوم. يوودا غونشكاد، تلكم‑د تاساعت. ءينزا يوس ن‑بنادم س‑گر ءيفاسّن ن‑مدّن أُخشنّين.

⁴² نكرات ا‑ندّو. ها‑والّي‑يّي‑يزّنزان يوشكا‑د.»

ءيتياماژ لماسيح

⁴³ سول ا‑يساوال س‑د‑يروح ياهودا لّي‑يگان يان زغ‑سين د‑مراو ن‑ومحضار. مونّ‑د ديدس كيگان د‑مدّن اسين‑د لكمامي د‑يعماد. ءوزنّ‑تن‑د ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت‑ان.

⁴⁴ غوالّي ءيزّنزان ياسوع ءيملا‑ياسن‑ياد تاماتارت‑اد، ييني‑اسن: «وانّا سّودنغ، غوان ا‑ت‑يگان. امژات‑ت تاويم‑ت تضوفم‑ت.»

⁴⁵ ياشك‑يد ياهودا ءيفتو س‑دار ياسوع ييني‑اس: «واي‑امسلمد»، ءيسّودن‑ت.

⁴⁶ گرن‑ين فلّاس ءيفاسّن امژن‑ت.

⁴⁷ ءينكر ءيلمّا يان زغ‑ويلّي لّانين د‑ياسوع ءيلدي‑د لكومّيت، يوت اخدّام ن‑ونمغور ن‑تگمّي ن‑ربّي ءيبّي‑اس امژّوغ.

⁴⁸ ءيساول ياسوع ييني‑اسن: «ما‑س‑دي‑تفّوغم س‑لكمامي د‑يعماد ا‑يّي‑تغويم زوند ءيغ‑گيغ امخّار؟

⁴⁹ لّيغ‑ن‑بدّا ديدون كرايگاتّ اسّ ار‑سّلمادغ غ‑تگمّي ن‑ربّي، ءور‑يّي‑تومژم غ‑ووسّان‑ان. والاينّي ءيجرا غمكاد باش ا‑يافو ما‑يتياران غ‑وارّاتن ن‑ربّي.»

⁵⁰ غاكودان روولن كولّو ءيمحضارن، فلن ياسوع.

⁵¹ ءيضفور‑ت‑سول يان‑وعيّال ءور‑يلسي غير احايك.

⁵² غوين‑ت مدّن‑ان، ءيمّا نتّا ءيفل احايك ءيروول ءور‑يلسي يات.

ءيبيدّ لماسيح غ‑لمحكاما

⁵³ اوين ياسوع س‑دار‑ونمغور ن‑تگمّي ن‑ربّي، مونّ‑د ءينمغورن كولّوتن د‑يمغارن ن‑تمازيرت د‑يمسلمدن ن‑شّرع.

⁵⁴ ءيمّا بطرُس ءيضفار‑ت زغ‑توگّوگت، ءيكشم س‑وامّاس ن‑تگمّي ن‑ونمغور، ءيسكيوس د‑يمخزنيين غ‑دار لعافيت ار‑ديدسن‑يرقّا.

⁵⁵ ءيمّا ءينمغورن ن‑تگمّي ن‑ربّي د‑يمغارن لّمحكاما كولّوتن ار‑سيگّيلن س‑توگّا ف‑ياسوع باش ا‑ت‑نغن، والاينّي ءور‑وفين يات.

⁵⁶ كيگان د‑مدّن ار‑فلّاس‑اكّان توگّا ن‑تكركاس، والاينّي ءور‑نگادّانت توگّا‑نسن.

⁵⁷ ءينكر كرا گيسن ار‑سّكيركيسن ءينين:

⁵⁸ «نكُّني نسفلد‑اس ءينّا ‹نكّي راد‑خلوغ تيگمّي‑اد ن‑ربّي ءيتياوسكارن س‑يفاسّن ن‑بنادم، بنوغ غ‑كراض‑ووسّان يات ياضني ءور‑يتياوسكارن س‑يفاسّن ن‑بنادم.› »

⁵⁹ ءولا غمكاد‑داغ، ءور‑نگادّانت توگّا‑نسن.

⁶⁰ ءيبيدّ‑ونمغور ن‑تگمّي ن‑ربّي غ‑وامّاس‑نسن، ءيسقسا ياسوع: «ءيس‑ور‑را‑د‑فلّاسن‑ترارت س‑يات؟ مايد‑فلّاك‑تّينين غويد غ‑توگّا‑نسن؟»

⁶¹ ءيمّا ياسوع غير ءيفسّا، ءور‑ينّي يات. ءيسقسا‑ت‑داغ‑ونمغور: «ءيزد كيّي ا‑يگان لماسيح يوس ن‑ومباركي؟»

⁶² ييني‑اس ياسوع: «نكّي ا‑ت‑يگان. را‑تژرم يوس ن‑بنادم ءيسكيوس ف‑وفاسي ن‑ربّي ءيتجهّدن، ءيفتو‑د غ‑يمدلا ن‑يگنوان.»

⁶³ لّيغ‑اس‑يسفلد‑ونمغور ن‑تگمّي ن‑ربّي، ءيبّي تيملسا‑نس ييني‑اسن: «ما‑سول‑نرا ءيناگان‑اد؟

⁶⁴ كونّي تسفلدم ءي‑واوال‑نس لّكوفر. ما‑فلّاس‑تنّام؟» حكامن فلّاس كولّوتن ءينين: «ءيقّان‑ت‑يد ا‑يمّت.»

⁶⁵ ءينكر كرا گيسن ار‑فلّاس‑سّوفوسن ار‑اس‑دالن ءودم ار‑ت‑كّاتن س‑يباريقن ار‑اس‑تّينين: «وا‑نّابي، مل‑اغ مانوا‑ك‑يوتن.» امژن‑ت ءيمخزنيين ار‑ت‑كّاتن.

بطرُس ءيناكر لماسيح

⁶⁶ ءيمّا بطرُس ءيلّا‑سول غ‑ييزدار غ‑وامّاس ن‑تگمّي. تاشك‑يد يات‑تخدّامت ن‑ونمغور ن‑تگمّي ن‑ربّي

⁶⁷ تژر بطرُس ار‑يرقّا، تسّماقّل گيس تيني‑اس: «ءولا كيّي تلّيت د‑ياسوع گو‑ناصيرا.»

⁶⁸ ءيرار‑اس نتّان: «ءور‑سّينغ، ءور‑فهيمغ ما‑س‑تنّيت.» ءيفّوغ س‑وغگُمّي. ءيغر‑وفولّوس غاكودان.

⁶⁹ تژر‑ت‑داغ‑تخدّامت‑لّي، تيني فلّاس ءي‑ويلّي بيدّنين غين: «غواد ءيگا يان زغ‑گيسن.»

⁷⁰ ءيرار‑داغ بطرُس: «ءوهو.» يان ءيميكّ س‑اس‑نّان غويلّي بيدّنين غين: «س‑صّاحت تگيت كيّي زغ‑گيسن اشكو گو‑جاليل ا‑تگيت.»

⁷¹ ءينكر بطرُس ار‑يتگالّا ار‑يتّيني س‑جّهد: «نكّي ءور‑سّينغ ارگاز‑اد ف‑ا‑تساوالم.»

⁷² ءيغر‑وفولّوس غاكودان تيس سنات‑توال. ءيكتي‑د بطرُس مايلّي‑س‑اس‑ينّا ياسوع «ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.» ءيسوانگم‑د اوال‑ان ار‑يالّا.