luqa 20 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اسقسي ف‑ما‑د‑يوزنّ ياسوع

¹ يان‑واسّ ءيلّا ياسوع غ‑تگمّي ن‑ربّي ار‑يسّلماد مدّن ار‑اسن‑يتبرّاح س‑لخبار ءيفولكين. اشكين‑د ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن. لكمن‑د ياسوع

² سقسان‑ت: «ءيني‑اغ، ما‑ك‑يد‑يوزنّ ا‑تسكارت كولّو غاياد؟ اوال ن‑مي ايد‑س‑ا‑تي‑تسكارت؟»

³ ءيساول ياسوع ييني‑اسن: «ءولا نكّي را‑كُن‑سقساغ يان‑وسقسي. ءينيات‑يّي،

⁴ يوحانّا امسدّام، ما‑ت‑يد‑يوزنّ ا‑يسّدّام مدّن؟ ءيزد ربّي نغد بنادم؟»

⁵ بدون ار‑سّمقسان ءي‑نگراتسن ار‑تّينين: «ما‑راد‑اس‑نيني؟ اشكو ءيغ‑ننّا ‹ربّي ا‑ت‑يد‑يوزنّ› راد‑اغ‑ييني ‹ماخ ايلّيغ ءور‑تومينم ماد‑اون‑ينّا؟›

⁶ والاينّي ءيغ‑ننّا ‹بنادم ا‑ت‑يد‑يوزنّ› راد‑اغ‑كّاتن كولّو مدّن‑اد س‑يژران، اشكو ار‑تّينين نتني ءيزد س‑صّاحت يوحانّا يان‑نّابي ا‑يگا.»

⁷ ساولن ءيلمّا ءينين‑اس: «ءور‑نسّين ما‑ت‑يد‑يوزنّ.»

⁸ ءيرار‑اسن ياسوع: «ءولا نكّي ءور‑راد‑اون‑ينيغ ما‑يّي‑د‑يوزنّ اد‑سكارغ كولّو ماياد.»

لمعنا ن‑يخمُّاصن د‑يگر ن‑واضيل

⁹ ءيساول ياسوع س‑مدّن، يوت‑اسن لمعنا‑ياد ييني‑اسن: «ها‑يان‑ورگاز ءيژّا اضيل غ‑يگر‑نس. ءيفل‑ت ءي‑يخمُّاصن، ءيفتو ءيمودّو س‑تمازيرت ياضني ءيگاور‑ن غين.

¹⁰ لّيغ‑د‑يروح‑وزمز يازن يان‑وخدّام‑نس س‑دار ءيخمُّاصن، اد‑اس‑د‑فكن ما‑ت‑يد‑يوشكان غ‑لغلّت ن‑يگر‑نس. والاينّي ءيخمُّاصن غوين اخدّام‑ان، سّغورشن‑ت رارن‑ت بلا يات.

¹¹ يازن اخدّام ياضني. ءولا نتّا، سّغورشن‑ت ءيخمُّاصن سّرفوفنّ‑ت رارن‑ت بلا يات.

¹² يازن ويس كراض. ءولا نتّا، سّياگّاسن‑ت لوحن‑ت‑ين س‑برّا.

¹³ ءيسوانگم باب ن‑يگر د‑يخف‑نس ييني: ‹ما‑راد‑سكرغ غيلاد؟ راد‑ازنغ ءيوي ءيعزّان. نتّا، را‑ت‑وقّرن.›

¹⁴ ءيمّا ءيخمُّاصن‑لّي، لّيغ‑ت‑ژران مشاوارن ءي‑نگراتسن ءينين: ‹غواد ا‑را‑يوورت ءيگر. اشكاد‑د ا‑ت‑ننغ ءيگ لوورت وينّغ.›

¹⁵ نكرن لوحن‑ت‑ين س‑برّا ن‑يگر نغن‑ت.» ءيسقسا‑تن ياسوع: «ما‑راد‑اسن‑يسكر باب ن‑يگر‑ان ن‑واضيل؟

¹⁶ را‑د‑ياشك ءيهلك ءيخمُّاصن‑ان ءيفك ءيگر ءي‑وييّاض.» لّيغ سفلدن مدّن ءي‑غايان ءينين: «اد‑اغ‑ينجّا ربّي.»

¹⁷ ءيسّماقّل گيسن ياسوع ييني‑اسن: «ما‑يگا مايد ءيتياران غ‑وارّاتن ن‑ربّي؟ ‹اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو.›

¹⁸ ءيمّا اژرو‑اد، كولّو وانّا فلّاس ءيضرن را‑يرژ، د‑وانّا‑ف‑يضر را‑ت‑يلبج د‑واكال.»

اسقسي ف‑ضابييت ءي‑قايصر

¹⁹ ءيرين ءيمسلمدن ن‑شّرع د‑ينمغورن ن‑تگمّي ن‑ربّي اد‑امژن ياسوع، اشكو سّنّ ءيزد نتني ا‑ف‑يوت لمعنا‑ياد، والاينّي كسوضن زغ‑مدّن.

²⁰ سول‑ت‑گابلن، ازنّ‑د كرا ن‑يرگازن اد‑سكارن زوند ءيغ‑ا‑تّيرين اغاراس ن‑ربّي، والاينّي ران غير اد‑امژن ياسوع ف‑واوال‑نس باش ا‑ت‑ين‑دحين ءي‑لحاكم ن‑رّومان ا‑فلّاس‑يحكام.

²¹ اشكين‑د ءينين‑اس: «واي‑امسلمد، نسّن ءيزد لحقّ ايد تّينيت ار‑تي‑تسّلمادت. ءور‑ا‑تّمنادت ءودماون ن‑مدّن والاينّي ار‑تسّلمادت اغاراس ن‑ربّي غمكلّي ءيگا.

²² ءيني‑اغ، ءيس‑يحلّا ا‑ناكّا ضابييت ءي‑قايصر نغد ءوهو؟»

²³ ءيمّا ياسوع ءيسّن ماد‑نوّان غ‑لحيلت‑نسن، ييني‑اسن:

²⁴ «ملات‑يّي‑د يان‑وقاريد. ءينيات‑يّي، وين‑ميت ا‑يگا‑وودم‑اد د‑يسم‑اد گيس ءيلّان؟» ءينين‑اس: «وين قايصر.»

²⁵ ءيرار‑اسن: «فكات ءي‑قايصر ما‑يگان وين قايصر، تفكم ءي‑ربّي ما‑يگان وين ربّي.»

²⁶ ءيضر‑اسن لعجب ف‑مايد‑س‑اسن‑يرور. فسّان كولّو، ءور‑ژضارن ا‑ت‑امژن ف‑واوال‑نس غ‑لگدّام ن‑كولّو مدّن‑ان.

اسقسي ف‑تنكرا زغ‑لموت

²⁷ اشكين‑د دارس كرا ن‑يصادّوقين. نتني غ‑لمدهب‑نسن ار‑تّينين «ءور‑يلّي ما‑را‑د‑ينكر زغ‑لموت.»

²⁸ سقسان‑ت: «واي‑امسلمد، يورا‑ياغ موسا ءينّا ‹ءيغ‑يمّوت كرا ن‑يان ءيفل‑د تامغارت‑نس بلا تاروا، ءيلّا ف‑گماس ن‑ورگاز‑ان ا‑يتاهل تامغارت‑ان ا‑ديدس‑يسكر تاروا ف‑يسم ن‑گماس لّي‑يمّوتن.›

²⁹ ها‑سّا ن‑ايتماتن. ييوي‑ومزوارو تامغارت، ءيمّت ءور‑د‑يفيل تاروا.

³⁰ ياوي‑تّ ويس سين،

³¹ نتّا ءولا ويس كراض، ايلّيغ‑تّ‑يوين س‑سّا، مّتن كولّوتن ءور‑د‑فيلن تاروا.

³² غ‑يسيگُّرا تمّت‑تمغارت ءولا نتّات.

³³ ءيني‑اغ، غ‑تنكرا لّي‑غ‑راد‑نكرن كولّوتن، تامغارت ن‑مانوا گيسن ا‑را‑تگ؟ هاتّي تكّا‑تّين تگا تامغارت‑نسن س‑سّا.»

³⁴ ءيساول ياسوع ييني‑اسن: «ايت‑دّونيت‑اد ار‑تاهالن ار‑تاهالنت،

³⁵ ءيمّا غويلّي ف‑يرضا ربّي اد‑نكرن زغ‑لموت دّرن غ‑ليخرت، نتني ءور‑را‑تاهالن ءولا‑دا‑تاهالنت.

³⁶ هاتني زوند لمالايكا ا‑راد‑گن اشكو ءور‑سول‑راد‑مّتن. گن تاروا ن‑ربّي اشكو لولن س‑تودرت لّيخرت.

³⁷ ءيمّا تانكرا ن‑ويلّي مّوتنين، يورا فلّاس ءولا موسا غ‑وارّا ن‑تزگُّارت لّي‑يجدّرن، ييني ف‑سيدي ربّي ءيس‑يگا ربّي ن‑يبراهيم ءيگ ربّي ن‑يسحاق ءيگ ربّي ن‑ياعقوب.

³⁸ اوال‑ان ءيملا‑ياغ ءيس‑دّرن نتني واخّا مّوتن، اشكو سول دّرن كولّوتن غ‑لگدّام ن‑ربّي.»

³⁹ ءينين‑اس كرا ن‑يمسلمدن ن‑شّرع: «يُغژان مايد تنّيت اي‑امسلمد.»

⁴⁰ اشكو ءور‑سول‑زعمن ا‑ت‑سقسان.

اسقسي ف‑ما‑يگا لماسيح

⁴¹ ءيزايد ياسوع ييني‑اسن: «ماخ ايلّيغ ا‑تّينين مدّن ‹را‑يگ لماسيح يان زغ‑تاسوت ن‑وگلّيد داود›؟

⁴² هاتي داود ءولا نتّا ءيساول ف‑لماسيح غ‑وارّا ن‑يموريگن ءينّا: ‹ها‑سيدي ربّي ءينّا ءي‑سيدي، سكيوس ف‑وفاسيي‑ينو

⁴³ ارد گغ ءينوّاشن‑نّك غ‑دّو ءيضارن‑نّك.›

⁴⁴ ها‑داود س‑يخف‑نس ءيبدر غوالّي ءيگان لماسيح ءيگ‑ت د‑سيديس. مامنك ا‑را‑يگ غير يان زغ‑تاسوت‑نس؟»

ءيمسلمدن ن‑شّرع

⁴⁵ ءيساول ياسوع س‑يمحضارن‑نس غ‑لگدّام ن‑مدّن‑ان كولّوتن ييني‑اسن:

⁴⁶ «رارات لعاقل‑نّون زغ‑يمسلمدن ن‑شّرع، اشكو ءيعزّا دارسن اد‑فتّون س‑تملسا غزّيفنين شوانين، ءيعزّو دارسن اد‑فلّاسن‑تسلّامن مدّن غ‑لاسواق، ءيعزّو دارسن اد‑زگّورون س‑لگدّام غ‑تگُمّا ن‑تژالّيت ءولا غ‑وسكيوس ن‑يمنسيون.

⁴⁷ ار‑شتّان تيگُمّا ن‑تهجّالين، ار‑سّيغزّيفن تيژولّا‑نسن باش اد‑سّبايّنّ ءيخفاون‑نسن ءيس‑فولكين. نتني را‑فلّاسن‑يتّوت لحوكم ن‑ربّي س‑وگُّار.»