luqa 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تالاليت لّماسيح

¹ غ‑ووسّان‑ان ا‑غ‑د‑يفّوغ يا‑لّقانون زغ‑دار‑وگلّيد ءيمقّورن قايصر ءوغوسطوس، يامر كولّو مدّن غ‑كرايگاتّ ماني اد‑حاسبن ءيسم‑نسن.

² تاوالا تامزواروت ايان غ‑حاسبن مدّن، ءيجرا غ‑ووسّان لّي‑غ‑يحكام كيرينيوس تامازيرت ن‑سوريّا.

³ ار‑تمودّون مدّن كرايگاتّ يان س‑تمازيرت‑نس ا‑ن‑گيس‑يحاسب ءيسم‑نس.

⁴ ءينكر يوسف ءيفّوغ تامدينت ن‑ناصيرا غ‑جاليل ءيمودّو س‑تمدينت ن-داود لّي-مي-تّينين بيتلاحم غ‑تمازيرت ن‑يودايا، اشكو ءيگا نتّا زغ‑تاسوت ن‑داود ءولا تاروا‑نس.

⁵ ءيدّو ا‑ن‑يحاسب ءيخف‑نس نتّا د‑ماريام لّي‑ن‑يضالب ا‑تگ تامغارت‑نس، د‑نتّات ار‑تربّو.

⁶ غ‑ووسّان لّي‑غ‑لّان غين تلكم‑د لوقت ن‑تلاليت.

⁷ تارو ارّاو‑نس امزوارو، تسّموتّل‑ت غ‑وحزّام تسرس‑ت‑ين غ‑يان‑وسدس، اشكو ءور‑وفين كرا ن‑تحانوت ءيخوان غ‑لفِندق.

بانّ‑د لمالايكا ءي‑يمكساون

⁸ ءيلين كرا ن‑يمكساون غ‑تمازيرت‑ان گابلن ءولّي‑نسن غ‑لخلا غ‑ييض.

⁹ ءيبان‑اسن‑د يا‑لّمالاك ن‑سيدي ربّي، ييسفيو فلّاسن لمجد ن‑سيدي ربّي، ءيكساضن باهرا.

¹⁰ ءيساول لمالاك ييني‑اسن: «اد‑ور‑تيكساضم. هاتي ءيويغ‑اون‑د لخبار ءيفولكين ف‑لفرح ءيگّوتن لّي‑را‑ييلي ءي‑كولّو‑مدّن.

¹¹ اشكو غاسّاد غ‑تمدينت ن‑داود ءيلول‑اون‑د‑ونجّام لّي‑يگان لماسيح سيديتنّغ.

¹² غمكاد ا‑راد‑اون‑يگ تاماتارت: را‑ن‑تافم يان‑وازّان ءيموتّل غ‑وحزّام ءيتّرس‑ن غ‑وسدس.»

¹³ بانّ‑د ءيلمّا ءيكابارن لّمالايكا گّوتنين د‑لمالاك، ار‑تالغن ربّي ار‑تّينين:

¹⁴ «ا‑ييلي لمجد ءي‑ربّي غ‑تاتّويت، تيلي سّلامت ءي‑ويلّي‑ف‑يرضا غ‑دّونيت.»

¹⁵ لّيغ وورّين لمالايكا س‑يگنوان ءينين ءيمكساون ءي‑نگراتسن: «نكرات ا‑ندّو س‑بيتلاحم ا‑نژر مايد‑ف‑اغ‑ينّا سيدي ربّي.»

¹⁶ دّون غاكودان س‑تيزّلا، افن‑ين ماريام د‑يوسف، ژرن ازّان غ‑وسدس.

¹⁷ لّيغ‑ت‑ژران ساولن‑اسن ءيمكساون ف‑مايلّي‑اسن‑ينّا لمالاك ف‑وازّان‑ان.

¹⁸ ار‑تعجّابن كولّو ويلّي سفلدنين ءي‑يواليون‑نسن.

¹⁹ ءيمّا ماريام ار‑تّحضو تيغاوسيوين‑ان غ‑وول‑نس ار‑گيسنتي‑تسوينگيم.

²⁰ وورّين ءيلمّا ءيمكساون، ار‑تشكارن ربّي ار‑تي‑تالغن ف‑كولّو ما‑مي‑سفلدن ءولا ماد‑ژران. ءيلّا كولّو مايان غمكلّي‑س‑اسن‑ينّا لمالاك.

²¹ زرين سّا‑ووسّان س‑د‑يروح‑واسّ لّي‑غ‑راد‑ژّالّن ءي‑وازّان. گن‑اس غاكودان ءيسم ‹ياسوع›، ءيگا ءيسم لّي‑س‑ينّا لمالاك ءور‑تا‑دا‑تربّو ماريام.

اوال ن‑سيمعان ف‑وازّان ياسوع

²² لّيغ كمّلن ءوسّان ن‑وسغوس‑نسن سكرن غمكلّي ءيلّان غ‑شّرع ن‑موسا، اوين ازّان س‑تمدينت ن‑وروشاليم ا‑ت‑ين‑سرسن غ‑لگدّام ن‑ربّي.

²³ اشكو ءيتيارا غ‑شّرع ن‑ربّي: «ا‑تژليم كرايگاتّ اوتم ءيخفدّي ا‑يگ وين سيدي ربّي.»

²⁴ فكن ءيلمّا تيغرسي ءي‑ربّي غمكلّي‑س‑ينّا شّرع: «سين ءيمالّيون نغد سين ءيتبيرن مژّينين.»

²⁵ ييلي يان‑ورگاز غ‑وروشاليم ءيسم‑نس سيمعان، ءيفولكي باهرا ءيعزّو‑دارس‑وغاراس ن‑ربّي، ييلي فلّاس رّوح لقودوس. ار‑بدّا‑يترجو اسّ لّي‑غ‑را‑يجّنجم ربّي مدّن‑نس.

²⁶ ءيملا‑ياس رّوح لقودوس ءيس‑ور‑را‑يمّت ارد ءيژر لماسيح ن‑سيدي ربّي.

²⁷ سيمعان، ييوي‑ت رّوح لقودوس ءيكشم س‑تگمّي ن‑ربّي. اشكين‑د ايت‑دارس ن‑ياسوع غ‑تاساعت‑ان، اوين‑د ازّان اد‑كمّلن ف‑سّيبت‑نس ما‑يلّان غ‑شّرع.

²⁸ ياسي‑ت سيمعان غ‑گر ءيفاسّن‑نس، يالغ ربّي ييني:

²⁹ «غمكاد ا‑سيدي ربّي تسّووفيت‑يّي‑د اوال. ادج اخدّام‑نّك ا‑ن‑فّوغّ دّونيت غيلاد س‑سّلامت،

³⁰ اشكو ژرانت‑والّن‑ينو انجّام

³¹ لّي‑دي‑توزنت ف‑كولّو مدّن.

³² را‑يگ تيفاوت ءي‑ايت‑تميزار اگّوگنين، ياوي‑د لمجد‑نّك ءي‑ايت‑ربّي.»

³³ ءيتعجّب يوسف د‑ينّاس ن‑وازّان ف‑مايد‑فلّاس‑ينّا سيمعان.

³⁴ ءيزايد سيمعان ءيضالب ربّي ا‑تن‑يبارك، ءيساول ءيلمّا س‑ماريام ءينّاس ن‑وازّان، ييني‑اس: «ازّان‑اد، ءيگا‑ت ربّي د‑واد‑س‑راد‑ضرن كيگان د‑مدّن ن‑ايت‑ربّي، نكرن كيگان ف‑سّيبت‑نس. ءيگ‑ت د‑يات‑تماتارت لّي‑راد‑اگُين مدّن گّوتنين،

³⁵ د‑غمكان ا‑س‑راد‑سّبايّنّ تينباضين ن‑وولاون‑نسن. ءولا كمّي، راد‑ام‑تبّي تاغوفت ءول‑نّم زوند تاژّيت.»

حانّا تشكر ربّي ف‑وازّان ياسوع

³⁶ تيلي غين يات‑تهجّالت ار‑تساوال س‑ماد‑اس‑د‑يمالا ربّي. ءيگا ءيسم‑نس حانّا ءيلّيس ن‑فانويل زغ‑تقبيلت ن‑اشير. تمقّور باهرا، تزّري د‑ورگاز‑نس سّا ن‑يسگُّاسن زغ‑لّيغ‑تّ‑يلا،

³⁷ تيلي دارس تام ءيد‑مراو د‑كّوژ (84) ن‑وسگُّاس. ءور‑ا‑تّفّوغ تيگمّي ن‑ربّي، ار‑گيس‑تّعباد ربّي ار‑تّاژوم ار‑تي‑تّضالاب غ‑ييض ءولا ازال.

³⁸ تاشك‑يد غ‑تاساعت‑ان تالغ ربّي، تساول ف‑وازّان‑ان ءي‑كولّو ويلّي ترجونين اسّ لّي‑غ‑را‑يفوكّو ربّي ايت‑وروشاليم.

³⁹ لّيغ ءيكمّل يوسف د‑ماريام مايلّي فلّاسن ءيلّان غ‑شّرع ن‑سيدي ربّي، وورّين س‑تمدينت‑نسن ن‑ناصيرا غ‑تمازيرت ن‑جاليل.

⁴⁰ ار‑يتيمغور‑وازّان ار‑يتدوس. تيگات‑گيس‑تحكيمت، تيلي فلّاس لباراكا ن‑ربّي.

احشمي ياسوع غ‑تگمّي ن‑ربّي

⁴¹ اسگُّاس ار اسگُّاس ار‑تّيدون ايت‑دارس ن‑ياسوع س‑تمدينت ن‑وروشاليم غ‑لعيد ن‑وسورف.

⁴² لّيغ ءيرگل سين د‑مراو ن‑وسگُّاس دّون غمكلّي بدّا.

⁴³ غاكود لّيغ كمّلن‑ووسّان لّعيد امژن اغاراس س‑تمازيرت‑نسن. ءور‑سّينّ ايت‑دارس ءيس‑ن‑يقاما‑وحشمي ياسوع غ‑وروشاليم،

⁴⁴ غالن ءيس‑ديدسن‑يمون غ‑وكابار. زّرين اسّ كولّوت غ‑وغاراس، بدون ءيلمّا ار‑سرس‑سيگّيلن غ‑گر ايت‑دارسن د‑يمدّوكُّال‑نسن.

⁴⁵ لّيغ‑ت‑ور‑وفين وورّين س‑وروشاليم ا‑سرس‑سيگّيلن.

⁴⁶ ار ويس كراض‑ووسّان ا‑ت‑ين‑وفان غ‑گر ءيمسلمدن ن‑شّرع غ‑تگمّي ن‑ربّي، ار‑اسن‑يسفليد ار‑تن‑يسقسا.

⁴⁷ غويلّي‑اس‑سفليدنين ار‑كولّو‑تعجّابن غ‑لفهمت‑نس ءولا تاحكيمت لّي‑س‑ا‑يترارا اوال.

⁴⁸ لّيغ‑ت‑ژران ايت‑دارس ءيضر‑اسن لعجب، تيني‑اس ءينّاس: «ماخ ا‑يوي ايلّيغ‑اغ‑تسكرت غمكاد؟ ها‑نكّي د‑باباك نوسي فلّاك تاغوفت باهرا، ار‑سرك‑نسيگّيل.»

⁴⁹ ءيمّا نتّا ءينّا‑ياسن: «ماخ ايلّيغ ا‑سري‑تسيگّيلم؟ ءيس‑ور‑تسّينم ءيس‑د‑يقّان اد‑يليغ غ‑تگمّي ن‑بابا؟»

⁵⁰ ءيمّا نتني ءور‑فهيمن اوال لّي‑س‑اسن‑ينّا.

⁵¹ ءيمون ديدسن غاكودان، وورّين س‑ناصيرا، ار‑يسكار س‑يواليون‑نسن. ءيمّا ءينّاس تحضا كولّو تيغاوسيوين‑ان غ‑وول‑نس.

⁵² ار‑يتزاياد ياسوع غ‑تيدّي ءولا تاحكيمت، ءيرضو سرس ربّي ءولا مدّن.