luqa 18 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

لمعنا ن‑تهجّالت د‑لقاضي

¹ ءيساول ياسوع س‑يمحضارن‑نس، ييري اد‑اسن‑يمل ءيس‑تن‑د‑يقّان ا‑بدّا‑تژالّان بلا‑دا‑ترماين. يوت‑اسن لمعنا‑ياد،

² ييني‑اسن: «ها‑يا‑لّقاضي غ‑يات‑تمدينت، ءور‑يكسوض ربّي ءولا‑دا‑ستّ‑يتاوي غ‑مدّن.

³ تيلي يات‑تهجّالت غ‑تمدينت‑ان ار‑بدّا‑تسّمومُّي غ‑دار لقاضي ار‑اس‑تّيني: ‹فوكّو‑يّي زغ‑ونوّاش‑ينو.›

^4-5 منّاو‑ووسّان ءور‑يري لقاضي اد‑اس‑يسفلد، ءيميل ييني د‑يخف‑نس: ‹تاهجّالت‑اد ار‑بدّا‑يّي‑تسّيحيل. واخّا ءور‑كسوضغ ربّي ءولا‑دا‑ستّي‑تاويغ غ‑مدّن را‑ستّ‑فوكّوغ، ا‑ور‑سول‑دي‑تّاشكي اد‑يّي‑ترژ ءيخف.› »

⁶ ييني‑اسن سيديتنّغ: «غمكاد ا‑س‑ينّا لقاضي‑ان يُخشنّ،

⁷ ءيمّا ربّي ءيس‑ور‑را‑يفوكّو مدّن‑نس لّي‑اس‑اقرانين غ‑ييض ءولا ازال؟ ءيس‑را‑يماطل اد‑اسن‑يفك مايلّي زغ‑گيس ضالبن؟

⁸ راد‑اون‑ينيغ، را‑تن‑يفوكّو حاينا. والاينّي غاسّان غ‑راد‑د‑وورّيغ س‑دّونيت‑اد نكّي لّي‑يگان يوس ن‑بنادم، ءيس‑راد‑د‑افغ ما‑سول‑يومنّ؟»

لمعنا ن‑وفاريسي د‑بو‑نكّاس

⁹ ءيزايد ياسوع ءيساول س‑كرا ن‑مدّن لّي‑يعجب ءيخف‑نسن، غالن ءيس‑فولكين ار‑تحگارن وييّاض. يوت‑اسن لمعنا‑ياد ييني‑اسن:

¹⁰ «ها‑سين مدّن كشمن س‑تگمّي ن‑ربّي اد‑ژّالّن. يان ءيگا افاريسي، ءيگ وايّاض بو‑نكّاس.

¹¹ ءيبيدّ‑وفاريسي واحدوت، ءيژّالّ د‑يخف‑نس ييني: ‹وا‑ربّي، ار‑ك‑تشكارغ اشكو ءور‑گيغ زوند مدّن ياضني. نتني ار‑تاكُرن ار‑تغُشّان ار‑تفسادن. ار‑ك‑تشكارغ اشكو ءور‑اكُّ‑گيغ زوند بو‑نكّاس‑اد.

¹² ها‑يّي ار‑تاژومغ كرايگاتّ كراض‑ووسّان، ار‑اكّاغ تيس مراوت ن‑كولّو ما‑داري‑يلّان.›

¹³ ءيمّا بو‑نكّاس، ءيبيدّ‑ن غ‑تغوردين. ءور‑يژضار ا‑يالّ الّن‑نس س‑يگّي. ار‑يكّات ف‑يدمارن‑نس ار‑يتّيني: ‹وا‑ربّي صامح‑يّي، ءيگّوت ماد‑سكرغ يُخشن.›

¹⁴ راد‑اون‑ينيغ، لّيغ وورّين س‑تگُمّا‑نسن، بو‑نكّاس‑ان ا‑ف‑يرضا ربّي، ءورد افاريسي. اشكو وانّا ءيسّيمغورن ءيخف‑نس را‑ت‑يژّيمژاي ربّي، ءيمّا وانّا ءيژّيمژاين ءيخف‑نس را‑ت‑يسّيمغور.»

لماسيح ءيبارك تاروا مژّينين

¹⁵ ار‑دي‑تّاشكين مدّن ار‑دي‑تاوين تاروا مژّينين ءي‑ياسوع، ءيرين ا‑ن‑فلّاسن‑يسرس ءيفاسّن‑نس ءيبارك‑تن. لّيغ ژران ءيمحضارن‑نس مايد سكارن، رارن‑تن ءينين‑اسن: «ا‑تن‑د‑ور‑تاويم.»

¹⁶ ءيمّا ياسوع ءيغرا‑د ءي‑تاروا س‑دارس ييني: «ادجات تاروا مژّينين ا‑د‑داري‑اشكين. ا‑تن‑ور‑تحصارم، اشكو زوند غويد ا‑مي‑تلّا‑تگلديت ن‑ربّي.

¹⁷ لحقّ ا‑راد‑اون‑ينيغ، وانّا ءور‑يرين ا‑يكشم س‑تگلديت ن‑ربّي زوند ارّاو ءيمژّين ءور‑را‑سرس‑يكشم.»

اسقسي ف‑تودرت لّيخرت

¹⁸ ياشك‑يد يان‑ونمغور ن‑تمازيرت‑ان، ءيسقسا ياسوع ييني‑اس: «واي‑امسلمد ءيفولكين، ما‑راد‑سكرغ باش اد‑طّافغ تودرت لّيخرت؟»

¹⁹ ءيساول ياسوع ييني‑اس: «ماخ ايلّيغ‑يّي‑تگيت د‑واد ءيفولكين؟ ءور‑يلّي يان ءيفولكين ابلا ربّي واحدوت.

²⁰ كيّي تسّنت لوصيّات، ‹ا‑ور‑تزنوت، ا‑ور‑تنغت، ا‑ور‑تاكُرت، ا‑ور‑تفكت توگّا ن‑تكركاس. اوي‑تّ غ‑باباك د‑ينّاك.› »

²¹ ييني‑اس‑ونمغور: «ماياد كولّوت ار‑ت‑سكارغ زغ‑لّيغ مژّيغ سول س‑غيلاد.»

²² لّيغ ءيسفلد ياسوع ءي‑ماياد ييني‑اس: «يات‑تغاوسا اد‑اك‑يقامان. زايد تزّنزت كولّو ماد‑دارك‑يلّان تفكت‑ت ءي‑يمژلاض، ييلي‑اك‑وايدا غ‑يگنّا. تاشكيد‑د ءيلمّا تمونت ديدي.»

²³ ءيمّا نتّا لّيغ ءيسفلد ءي‑واوال‑اد تُگراژ‑ت باهرا اشكو ءيگّوت‑دارس‑وايدا.

²⁴ ياسوع ءيژرا ءيس‑تي‑تُگراژ، ييني‑اسن: «منشك ا‑س‑يشقا ف‑ويلّي دار ءيگّوت‑وايدا اد‑كشمن س‑تگلديت ن‑ربّي.

²⁵ را‑يرخو ف‑ورعام ا‑يكشم زغ‑تيط ن‑تاسمي ءولا ءيكشم يان دار ايدا ءيگّوتن س‑تگلديت ن‑ربّي.»

²⁶ ءينين‑اس غويلّي‑اس‑سفلدنين: «ءيغ‑يگا غمكاد، ما‑را‑ييژضار ا‑ينجم؟»

²⁷ ييني‑اسن ياسوع: «اينّا مي ءور‑يژضار بنادم، ءيژضار‑اس ربّي.»

²⁸ ءيساول بطرُس ييني‑اس: «ها‑نكُّني نفل‑ن تيگُمّا‑نّغ ناشك‑يد نمون ديدك.»

²⁹ ييني‑اسن ياسوع: «لحقّ ا‑راد‑اون‑ينيغ، وانّا‑ن‑يفلن تيگمّي‑نس نغد تامغارت‑نس نغد ايتماس نغد باباس نغد ءينّاس نغد تاروا‑نس ف‑سّيبت ن‑تگلديت ن‑ربّي،

³⁰ راد‑اس‑ييلي ماد‑باهرا‑يوگُرن ماياد غ‑دّونيت‑اد، تيلي‑اس غ‑ليخرت تودرت ءيدومن.»

ءيساول لماسيح تيس كراطّ‑توال ف‑لموت‑نس

³¹ ياوي ياسوع سين د‑مراو ن‑ومحضار‑نس واحدوتن، ييني‑اسن: «ژرات، را‑ندّو س‑وروشاليم، ءيجرو غين كولّو ماد‑وران لانبيا ف‑يوس ن‑بنادم.

³² را‑يّي‑دحين س‑گر ءيفاسّن ن‑يبرّانيين، طنژن گيگي رگمن‑يّي سّوفسن فلّا.

³³ را‑يّي‑سّغورشن نغن‑يّي، نكرغ‑د ءيلمّا زغ‑لموت غ‑ويس كراض‑ووسّان.»

³⁴ ءيمّا ءيمحضارن‑نس ءور‑فهيمن تيغاوسيوين‑اد. ءور‑سّينّ ما‑يرا اد‑اسن‑ييني، تنتل فلّاسن لمعنا.

لماسيح ءيجّوجّي ابوكاض

³⁵ ياكمور‑د ياسوع س‑تمدينت ن‑اريحا. ءيلّا غين يان‑وبوكاض ءيگاور غ‑تاما ن‑وغاراس ار‑يتضالاب.

³⁶ ءيسفلد ءي‑مدّن گّوتنين ار‑زراين غ‑وغاراس ءيسقسا‑تن ف‑ما‑يلّان.

³⁷ ءينين‑اس: «ياسوع گو‑ناصيرا ايد ءيزرين.»

³⁸ يالّ اوال‑نس غاكودان ءيغر‑اس ييني: «وا‑ياسوع يوس ن‑داود، حنّو گيگي.»

³⁹ گراولن مدّن لّي‑بيدّنين غ‑لگدّام‑نس، اكُين گيس ءينين‑اس ا‑يفسّا. ءيمّا نتّا ءيزوويد ار‑يتغوّات ار‑يتّيني: «وا‑يوس ن‑داود، حنّو گيگي.»

⁴⁰ ءيبيدّ ياسوع ييني ءي‑مدّن‑ان ا‑ت‑يد‑اوين س‑دارس. لّيغ‑ت‑يد‑يروح‑وبوكاض ءيسقسا‑ت ياسوع:

⁴¹ «ما‑تريت اد‑اك‑ت‑سكرغ؟» ييني‑اس: «ا‑سيدي، اد‑يسفيوغ.»

⁴² ييني‑اس ياسوع: «ءيسفيو غيلاد، ها‑كيّي تجّيت اشكو تومنت.»

⁴³ ييسفيو غاكودان ءيضفور ياسوع غ‑وغاراس ار‑يتالغ ربّي. مدّن‑ان كولّوتن، لّيغ‑ت‑ژران الغن ربّي باهرا.