kulussi 4 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ءيمّا كونّي ا‑يد‑سيديتسن، سكارات د‑يخدّامن‑نّون س‑لحقّ، ار‑اسن‑تاكّام ما‑تن‑د‑يوشكان. ا‑ور‑تتّوم ءيزد ءولا كونّي ءيلّا‑ياون يان ءيگان سيديتون غ‑يگنّا.

لوصيت ءي‑ايتماتن

² زايدات ار‑بدّا‑تّژالّام ار‑تضالابم ربّي، ترارم لعاقل س‑ماد‑اس‑تّينيم ار‑تي‑تّشكارم باهرا.

³ ضالبات‑ت ءولا ف‑سّيبت‑نّغ نكُّني، باش ا‑يرژم غ‑لگدّام‑نّغ يان‑يمي ا‑نتبرّاح ءي‑مدّن س‑واوال‑نس، نمل‑اسن مايلّي مي ءور‑جّو‑سفلدن ف‑لماسيح. ف‑سّيبت ن‑واوال‑اد ا‑ف‑لّيغ نكّي غ‑لحبس،

⁴ والاينّي ضالبات ربّي ا‑يّي‑يعاون اد‑تافاغ ءيواليون ما‑س‑ا‑سّفهامغ مدّن غمكلّي‑يّي‑د‑يقّان.

⁵ سكارات س‑تحكيمت د‑كولّو ويلّي ءور‑گينين وين ربّي، ار‑تسكارم افولكي نّا‑مي‑توفام كرايگاتّ تاساعت.

⁶ ساوالات س‑يواليون شوانين ميمنين، تيسّانم مامنك ا‑تّرارام ءي‑كرايگاتّ يان اوال نّا‑ت‑يخصّان.

توگّا ف‑ايتماتن

⁷ راد‑اون‑ييني تيخيكوس ف‑كولّو ما‑يگان لخبار‑ينو. ءيگا گماتنّغ ءيعزّان، ءيگ اخدّام ءيفولكين، ار‑ديدنّغ‑يتمعاوان غ‑تووري ن‑سيديتنّغ.

⁸ ماياد ا‑ف‑اون‑ت‑ين‑وزنغ، باش ا‑تيسّانم مامنك ا‑نگا ءيزّعام ءولاون‑نّون.

⁹ ازنغ‑ن ديدس گماتنّغ ءيفولكين ءيعزّان ءونيسيموس لّي‑يگان يان زغ‑گيگون. نتني ا‑راد‑اون‑ييني ف‑كولّو ما‑دارنّغ‑يجران غيد.

¹⁰ ار‑ن‑فلّاون‑يتسلّام اريستارخوس، ءيلّا ديدي غ‑لحبس. ار‑ن‑فلّاون‑يتسلّام مارقُس يوس ن‑وولّتماس ن‑بارنابا. نّيغ‑اون‑ياد فلّاس ا‑ت‑ين‑تشّكشمّ س‑دارون، تگم‑ت د‑ونبگي‑نّون ءيغ‑ن‑دارون‑يوشكا.

¹¹ ار‑ن‑فلّاون‑يتسلّام ءولا ياشوع لّي‑مي‑تّينين يوسطوس. غير كراض‑اد ا‑يگان ايت‑يودايا غ‑غويلّي ديدي ءيتمعاوانّ غ‑تووري ن‑تگلديت ن‑ربّي، ار‑يّي‑سّفجّيجن ءول‑ينو باهرا.

¹² ار‑ن‑فلّاون‑يتسلّام ابافراس. ءيگا زغ‑گيگون ءولا نتّا، ءيگ اخدّام لّماسيح ياسوع. س‑نّييت‑نس ا‑س‑ا‑يتژالّا باهرا ف‑سّيبت‑نّون، باش ا‑تدوسم تزگام غ‑وغاراس ن‑ربّي ار‑تسكارم كولّو ما‑گيگون‑يرا ربّي.

¹³ هاتي گيغ فلّاس ءينيگي ن‑منشك ا‑يتخدام باهرا ف‑سّيبت‑نّون ءولا ف‑سّيبت ن‑ايت‑لاوديكيّا ءولا ايت‑هيرابوليس.

¹⁴ ار‑ن‑فلّاون‑يتسلّام‑وطبيب ءيعزّان لوقا، نتّان ءولا ضيماص.

¹⁵ ار‑ن‑تسلّامغ ف‑ايتماتن ن‑لاوديكيّا ءولا ف‑نيمفا د‑ومناگّار لّي‑يتمونون غ‑تگمّي‑نس.

¹⁶ تيغوردين ن‑ما‑تغرام تابرات‑اد غ‑دارون، ريغ ا‑ستّي‑تازنم ءي‑ومناگّار غ‑لاوديكيّا باش ا‑ستّ‑غرن ءولا نتني. ءيريغ ا‑تغرم ءولا كونّي تابرات لّي‑دارسن‑يلّان غ‑لاوديكيّا.

¹⁷ ءينيات ءي‑ارخيبّوس ا‑يتلهو س‑تووري لّي‑ف‑ت‑يوصّا سيديتنّغ، باش ا‑ستّ‑يكمّل.

¹⁸ س‑وفوس‑ينو ا‑س‑اون‑ين‑وريغ اوال‑اد: نكّي بولُس ار‑ن‑فلّاون‑تسلّامغ. ا‑ور‑تتّوم ءيسكراف‑اد غ‑لّيغ. اد‑اون‑تيلي لباراكا ن‑ربّي.