kulussi 3 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ س‑تنكرا لّماسيح ا‑س‑كُن‑د‑يسّنكر ربّي زغ‑لموت. مايان ا‑ف‑كُن‑د‑يقّان ا‑بدّا‑ترارم لعاقل س‑ما‑يگان وين ءيگنّا، اشكو غين ا‑غ‑يلّا لماسيح، ءيسكيوس ف‑وفاسي ن‑ربّي.

² سوينگيمات‑بدّا غ‑تغاوسيوين ن‑يگنّا ءورد تيغاوسيوين ن‑دّونيت‑اد.

³ اشكو تمّوتم ف‑تودرت لّي‑يزرين، ترگس تودرت‑نّون لّجديد غ‑دار ربّي غ‑يلّيغ ءيرگس لماسيح.

⁴ لماسيح ا‑يگان تودرت‑نّون. غاكود لّيغ را‑د‑يوورّي را‑كُن‑ياوي ا‑ديدس‑تيليم ءولا كونّي غ‑لمجد‑نس.

ما‑يُخشنّ ءولا ما‑يفولكين

⁵ ف‑مايان ا‑ف‑راد‑اون‑ينيغ، سكارات باش ا‑گيگون‑يمّت اينّا ءيگان وين دّونيت‑اد: لفساد ءولا شّهاوا ءولا اسماقّل س‑تيط يُخشنّ. ا‑ور‑سول‑تسوينگيمّ غ‑ما‑يعيبن ءولا‑دا‑تّيريم ما‑ور‑يگين وينّون، اشكو يان ءيتّيرين وين وييّاض ءيگا زوند يان ءيتعبادن ءيلاهات ن‑دّونيت‑اد.

⁶ ف‑سّيبت ن‑كولّو غايان ا‑ف‑را‑يضر لغاضاب ن‑ربّي ف‑ويلّي سرس رورنين تيغوردين‑نسن.

⁷ ءولا كونّي غايد ءيزرين تكّام‑تّين ار‑تسكارم غمكان، ار‑تّسالام تيغاوسيوين‑ان.

⁸ ءيمّا غيلاد، ءيلّا فلّاون ا‑تكّيسم كولّو غايان. ا‑ور‑تّژيم ءولا‑دا‑تّوفّم ف‑يان. ا‑ور‑تّنوّاشم ءولا‑دا‑ترگّمّ غ‑يان. ا‑ور‑تادجم كرا ن‑يواليون أُخشنّين ا‑تكّان ءينفورن‑نّون،

⁹ ءولا‑دا‑تسّكيركيسم ف‑ينگراتون. اشكو ءور‑سول‑تگيم غمكلّي تگام غايد ءيزرين، س‑يسكّيرن لّي‑تميارم ار‑تن‑تسكارم.

¹⁰ هاتي توورّيم تگام مدّن لّجديد. ربّي لّي‑كُن‑يخلقن ار‑كُن‑يتبدّال باش ا‑توورّيم تگم زوند نتّان، تيسّانم‑ت غمكلّي ءيگا.

¹¹ مايان ا‑ف‑ور‑ا‑نژّمژلاي گو‑يونان زغ‑گو‑يودايا، ءولا غوالّي دار تاژالّيت ن‑دّات زغ‑والّي ءور‑دار‑تلّي، ءولا گو‑تمازيرت‑اد زغ‑گو‑تمازيرت‑ان، ءولا ءيسمگ زغ‑واد‑يگان وين ءيخف‑نس. اشكو نگا كولّو وين لماسيح، ييلي لماسيح گينّغ كولّواغ.

¹² كونّي، ءيمژلاين ن‑ربّي ا‑تگام. ءيرا‑كُن ءيژلي‑كُن ا‑تگم وينس. ف‑مايان ا‑ف‑كُن‑د‑يقّان ا‑تعمّرم س‑لحنانت، ار‑تّمعاوانم ار‑تژّيمژايم ءيخف‑نّون، ار‑تّرخوم ار‑تّصبارم ءي‑نگراتون

¹³ بلا‑دا‑ياون‑تطيّار ف‑ينگراتون. ءيغ‑يلّا يان دار ما‑س‑ا‑يتاشتكّا س‑وايّاض، ءيلّا فلّاس اد‑اس‑يصامح. صامحات ءي‑نگراتون غمكلّي‑اون‑يصامح سيديتون.

¹⁴ زايدات ءي‑كولّو ماياد ا‑باهرا‑تّيريم ءي‑نگراتون، اشكو تايري ا‑يژضارن ا‑تسّمون كولّو ما‑يلّان س‑تامونت ءيكمّلن.

¹⁵ ادجات سّلامت لّماسيح ا‑تمالا ءي‑وولاون‑نّون كولّو ما‑گيگون‑يرا. اشكو ءيغرا‑ياون‑د ربّي ا‑كولّو‑تگم يان غ‑تامونت ن‑سّلامت‑اد. ييلي فلّاون ا‑بدّا‑تّشكارم ربّي.

¹⁶ ادجات اوال لّماسيح ا‑يعمّر ءولاون‑نّون، ار‑تسّلمادم ار‑تّنصاحم ءي‑نگراتون س‑كولّو ما‑يگان تاحكيمت، ار‑تّيريرم ءي‑ربّي ار‑تّاسيم ءيموريگن د‑تاهليلات د‑تالغاتين نّا‑ياون‑يمالا رّوح لقودوس، ار‑تي‑تّشكارم زغ‑وولاون‑نّون.

¹⁷ كولّو ما‑تّينيم ءولا كولّو ما‑تسكارم، سكارات‑ت س‑يسم ن‑سيديتنّغ ياسوع، ار‑تّشكارم ربّي فلّاس.

ايت‑تگمّي ءولا ايت‑تووري

¹⁸ وا‑تيمغارين، ءيلّا ف‑كرايگاتّ يات ا‑تسفليد س‑ورگاز‑نس غمكلّي ءيرا سيديتنّغ.

¹⁹ ءيمّا كونّي ا‑يرگازن، ءيلّا ف‑كرايگاتّ يان ا‑يتحنّو غ‑تمغارت‑نس بلا‑دا‑ديدس‑يتشقو.

²⁰ وا‑تاروا مژّينين، سكارات‑بدّا س‑واوال ن‑ايت‑دارون، اشكو ءيرضا ربّي س‑ماياد.

²¹ ءيمّا كونّي ا‑يد‑باباتسن، ا‑ور‑بدّا‑تّژيم تاروا‑نّون، باش ا‑ور‑غووضن غالن ءيس‑ور‑گين يات.

²² وا‑يخدّامن، سكارات‑بدّا س‑واوال ن‑يد‑سيديتون ن‑دّونيت‑اد. ا‑ور‑تّيريم غير ا‑تن‑ترضوم غاكود نّا‑گيگون‑تمنادن، والاينّي خدمات س‑نّييت ن‑وول‑نّون س‑مكلّي تّيريم ا‑ترضوم سيديتنّغ.

²³ اينّا‑غ‑ا‑تّخدامّ، خدمات گيس س‑تيقّي‑نّون زوند ءيغد سيديتنّغ ا‑مي‑تّخدامّ ءورد بنادم.

²⁴ اشكو تسّنم ءيزد سيديتنّغ ا‑راد‑اون‑يفك تيغراد‑نّون، ءيشّكشم‑كُن س‑لوورت‑نّون غ‑يگنّا. اشكو سيديتنّغ لماسيح، نتّان ا‑مي‑تّخدامّ.

²⁵ ءيمّا وانّا ءيسكارن ما‑يُخشنّ، راد‑اس‑يرار ربّي ف‑لخُشانت لّي‑يسكر. هان ربّي ءور‑ا‑يسكار س‑وودماون.