kulussi 2 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ ريغ ا‑تيسّانم منشكا ن‑تكرّايت اد‑كّاتغ ف‑سّيبت‑نّون ءولا ف‑سّيبت ن‑ايتماتن ن‑لاوديكيّا ءولا ف‑كولّو وييّاض ءور‑جّو‑ژرينين ءودم‑ينو.

² والاينّي ار‑سكارغ كولّو ماياد باش اد‑زعمن‑وولاون‑نسن، گن كولّو يان س‑تايري ن‑ينگراتسن، تيلي‑اسن لباراكا ن‑تواسّنا ءيكمّلن ف‑مايلّي ءينتلن غايد ءيزرين. اشكو ربّي ءيسّبايّن‑اغ‑د لماسيح،

³ د‑نتّان ا‑غ‑تلّا‑كولّو‑تحكيمت ن‑ربّي ءولا تاواسّنا‑نس ءيهيّان.

⁴ نّيغ‑اون ماياد باش ا‑كُن‑ور‑يجلو يان س‑تكركاس.

⁵ واخّا‑د‑فلّاون‑ياگّوگ‑وودم‑ينو، ءيلّا‑ن‑ديدون‑وول‑ينو. هاتي فرحغ غيلاد غ‑فلّاون‑سفلدغ ءيس‑تزگام غ‑تامونت ن‑ينگراتون تامژم كولّو غ‑لماسيح.

تامونت د‑لماسيح

⁶ سّنغ ءيس‑تگام لماسيح ياسوع د‑سيديتون. د‑مايان ا‑ف‑راد‑اون‑ينيغ، سكارات‑بدّا ما‑يرا.

⁷ زّوگزات تادروت ن‑لّساس‑نّون غ‑لماسيح ار‑فلّاس‑تبنّوم، تامژم گيس ار‑تّدوسم غمكلّي تلمدم، ار‑بدّا‑تّشكارم ربّي.

⁸ اويات‑ستّ غ‑يخف‑نّون ا‑كُن‑ور‑يغوي يان س‑يسوينگيمن ن‑بنادم ءولا س‑تكركاس خوانين لّي‑مي‑تسفلدم زغ‑تاسوتين لّي‑زرينين. هان تينباضين ن‑دّونيت اد‑گانت، ءورد تين لماسيح.

⁹ ءيمّا لماسيح، نتّان ا‑غ‑يلّا‑كولّو‑وفولكي ن‑ربّي ءيكمّلن غ‑دّات‑نس.

¹⁰ ءولا كونّي، تلّا‑ياون تودرت ءيكمّلن ف‑سّيبت ن‑ما‑تگام وين لماسيح لّي‑يحكامن غ‑كولّو سّولطات ءولا لقوّات ن‑يگنوان.

¹¹ نتّان ا‑كُن‑يسّغوسن، ءورد س‑تژالّيت لّي‑تبّين مدّن غ‑دّات‑نسن، والاينّي ءيسّغوس‑كُن زغ‑ما‑يسّركان ءول ن‑بنادم.

¹² اشكو غاكود لّيغ تدّمّ س‑ودوم ن‑وامان، تّياومضالم د‑لماسيح تنكرم‑د ديدس، اشكو تومنم س‑تحكيمت ءيتجهّدن ن‑ربّي لّي‑ت‑يد‑يسّنكرن زغ‑لموت.

¹³ غايد ءيزرين تگام زوند ءيغ‑تمّوتم ءي‑ما‑يگان وين ربّي ف‑سّيبت ن‑دّنوب‑نّون ءولا ف‑سّيبت ما‑ور‑جّو‑تسكيرم س‑شّرع. ءيمّا غيلاد ءيسّدّر‑كُن ربّي د‑لماسيح. ءيصامح‑اغ ف‑كولّو دّنوب لّي‑نسكر،

¹⁴ ءيسفيض تالّوحت لّحساب لّي‑فلّانّغ‑يحكامن س‑لوصيّات لّي‑س‑ور‑نسكير. ءيكّيس‑ت‑ين فلّانّغ، يوت‑اس تيگوسين ف‑وگّجدي.

¹⁵ ف‑وگّجدي ا‑ف‑ينرا لماسيح سّولطات د‑لقوّات ن‑يگنوان، ءيكّيس‑اسنت ءيمقلاد‑نسنت، ءيمل ءي‑كولّو مدّن ءيس‑تنت‑ينرا.

¹⁶ ف‑مايان ا‑ف‑راد‑اون‑ينيغ، ا‑ور‑تادجم يان اد‑اون‑ين‑يشّكشم لوصيّات ف‑ما‑را‑تشتّام ءولا ما‑را‑تسّام، ءولا ف‑كرا لّعيد ءولا تالاليت ن‑وايّور ءولا كرا ن‑ووسّان ن‑وسونفو.

¹⁷ اشكو تيغاوسيوين‑ان گانت غير امالو ن‑ما‑را‑ييلي. ءيمّا لماسيح، نتّان ا‑يصحان.

¹⁸ ا‑ور‑تادجم مدّن‑ان ا‑فلّاون‑تحكامن. راد‑اون‑تّينين ا‑باهرا‑تّادرم ءي‑يخف‑نّون ار‑تّعبادم لمالايكا. ار‑بنّون نتني ف‑ماد‑ژرّان غ‑توارگيوين‑نسن، ار‑سّفورّوگن س‑يسوينگيمن لّعاقل‑نسن،

¹⁹ والاينّي ءور‑ومژن غ‑لماسيح لّي‑يگان ءيخف ن‑ومناگّار، ار‑يسّدوس دّات كولّوتّ، ار‑يسّميالّا ءيگزمان‑نس د‑يخسان‑نس باش ا‑تّيمغور دّات غمكلّي ءيرا ربّي.

تينباضين ن‑تودرت لّجديد

²⁰ س‑لموت لّماسيح ا‑س‑تمّوتم كونّي ءي‑تنباضين ن‑دّونيت‑اد. مايان ا‑ف‑را‑كُن‑سقساغ، ماخ ايلّيغ ا‑سول‑تسكارم زوند ءيغ‑تگام وين دّونيت؟ ماخ ايلّيغ ا‑تسكارم س‑لوصيّات ن‑مدّن؟ ار‑تّينين:

²¹ «ا‑ور‑تّاسيم غوان، ا‑ور‑تمضايم غواد، ا‑ن‑ور‑تّگّرم ءي‑غوان.»

²² والاينّي كولّو تيغاوسيوين‑ان ار‑زراينت. ءيغ‑تنت‑نشّا ءور‑سول‑قامانت. هان لوصيّات‑ان، غير ءيواليون ن‑بنادم د‑ولمّود ن‑بنادم اد‑گانت.

²³ كرا ن‑مدّن غالن ءيس‑گانت لمعقول اشكو ار‑ترارانت مدّن اد‑باهرا‑تعبادن ار‑تادرن ءي‑يخف‑نسن ار‑سّرفوفونّ دّات‑نسن، والاينّي ءور‑ژضارنت لوصيّات‑ان اد‑كّيسنت شّهوات أُخشنّين زغ‑بنادم.