kulussi 1 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

¹ زغ‑بولُس ارقّاس لّماسيح ياسوع غمكلّي ءيرا ربّي، د‑زغ‑گماتنّغ تيموتاوس.

² ءي‑ايتماتنّغ غ‑تمدينت ن‑كولوسّي، ا‑تن‑يگان د‑يمژلاين ن‑ربّي لّي‑زگانين غ‑وغاراس لّماسيح. اد‑اون‑تيلي لباراكا د‑سّلامت زغ‑ربّي باباتنّغ.

لخبار ءيفولكين

³ ار‑بدّا‑نتشكار ربّي باباس ن‑سيديتنّغ ياسوع لماسيح غاكود نّا‑ياس‑نتژالّا ف‑سّيبت‑نّون.

⁴ اشكو نسفلد ف‑مامنك ا‑تومنم س‑لماسيح ياسوع، عزّان دارون كولّو ءيمژلاين ن‑ربّي،

⁵ اشكو ءيلّا دارون رّجا ءيصحان ف‑مايلّي‑اون‑ين‑يحضا ربّي غ‑يگنّا. مايد‑غ‑ا‑تّرجوم، تسفلدم فلّاس غاكود لّيغ‑كُن‑ين‑يلكم‑واوال لّحقّ لّي‑يگان لخبار ءيفولكين.

⁶ لخبار‑اد ار‑يتكّا دّونيت كولّوتّ، ار‑ياكّا صّابت غ‑كرايگاتّ ماني، غمكلّي ءيسكار صّابت غ‑دارون زغ‑واسّ امزوارو لّي‑غ‑تسفلدم ف‑لباراكا ن‑ربّي تيسّانم لحقّ غمكلّي ءيگا، سول س‑غيلاد.

⁷ ءيلكم‑كُن‑ين ف‑يمي ن‑ابافراس لّي‑ديدنّغ‑يتمعاوانّ، ءيگ اخدّام ءيعزّان ءيفولكين لّماسيح ف‑سّيبت‑نّون.

⁸ ءينّا‑ياغ‑د ءيس‑كُن‑يعمّر رّوح لقودوس س‑تايري ن‑ايتماتن.

⁹ ف‑مايان ا‑ف‑ا‑بدّا‑نتژالّا ار‑نتضالاب ربّي ف‑سّيبت‑نّون، زغ‑واسّ لّي‑غ‑فلّاون‑نسفلد سول س‑غاسّاد. ار‑ت‑نتضالاب اد‑اون‑يسّبايّن كولّو ما‑گيگون‑يتّيري س‑تواسّنا ءولا تاحكيمت لّي‑راد‑اون‑يمالا رّوح لقودوس.

¹⁰ غمكان ا‑س‑راد‑كولّو‑تگم غمكلّي‑د‑يقّانّ غويلّي گانين وين سيديتنّغ، ار‑تسكارم س‑ما‑ت‑يرضان، تيلي گيگون صّابت ن‑كولّو ما‑يگان افولكي، تزايدم تيسّانم ربّي غمكلّي ءيگا.

¹¹ ار‑نتضالاب ربّي ا‑كُن‑يسّدوس س‑تحكيمت‑نس ءيتجهّدن باش ا‑تّصبارم بلا‑دا‑تّرمايم،

¹² ار‑تّفراحم ار‑تّشكارم ربّي باباتنّغ لّي‑اون‑يفكان تاغامت غ‑لوورت لّي‑را‑ييلي ءي‑يمژلاين‑نس غ‑تگلديت ن‑تيفاوت.

¹³ ءيجّنجم‑اغ‑د كولّو زغ‑تگلديت ن‑تيلّاس، ءيشّكشم‑اغ‑د س‑تگلديت ن‑يوس ءيعزّان

¹⁴ لّي‑اغ‑يفوكّان ءيسّيتّي فلّانّغ دّنوب‑نّغ.

لماسيح ا‑يزوارن كولّو ما‑يلّان

¹⁵ ءيگا لماسيح صّورت ن‑ربّي، ءيمل‑اغ مامنك ا‑يگا غوالّي ءور‑جّو‑يژري يان. ءيگ ءيخفدّي ءيزوور كولّو ما‑يخلق ربّي.

¹⁶ اشكو سرس ا‑س‑يتياوخلاق كرايگاتّ كرا غ‑يگنوان ءولا غ‑واكال، مايلّي ءيبانّ ءي‑والّن ن‑بنادم ءولا مايلّي ءور‑اسنت‑يبانّ، لمالايكا ءولا لارواح ءولا سّولطات ءولا لقوّات ن‑يگنوان. س‑لماسيح ا‑س‑يتياوخلاق كولّو ما‑يلّان، ءيگ كولّو وينس.

¹⁷ ءيلّا نتّا ءور‑تا‑يلّي كرا ياضني، د‑نتّان ا‑يزّگان كرايگاتّ كرا غ‑يلّيغ‑ت‑يد‑يقّان ا‑ييلي.

¹⁸ ءيگا لماسيح ءيخف ن‑دّات لّي‑يگان امناگّار ن‑مدّن‑نس. نتّان ا‑يگان امزوارو، ءيگ ءيخفدّي ن‑ويلّي‑د‑نكرنين زغ‑لموت، باش ا‑يگ نتّان انمغور ن‑كولّو ما‑يلّان.

¹⁹ اشكو ءيقصاد ربّي ا‑گيس‑ييلي‑وفولكي‑نس ءيكمّلن.

²⁰ ف‑وودم‑نس ا‑ف‑يقصاد ربّي ا‑يرار ءي‑يخف‑نس كولّو ما‑يلّان غ‑واكال ءولا غ‑يگنوان، ءيسكر سّلامت غ‑گراس د‑مدّن ف‑سّيبت ن‑يدامّن لّماسيح لّي‑فّينين لّيغ ءيمّوت ف‑وگّجدي.

²¹ ءيمّا كونّي تكّام‑تّين تاگّوگم‑ن زغ‑ربّي، تگم ءينوّاشن‑نس ف‑سّيبت ن‑يسوينگيمن‑نّون د‑يسكّيرن‑نّون لّي‑أُخشنّين.

²² ءيمّا غيلاد ءيسكر سّلامت غ‑گراتون ديدس ف‑سّيبت لّموت لّماسيح غاكود لّيغ ءيطّاف دّات ن‑بنادم. را‑كُن‑يشّكشم س‑لگدّام‑نس تغوسم تفولكيم بلا‑گيگون‑يلّا كرا لّعيب.

²³ غمكاد ا‑را‑يسكر ءيغ‑تزوويدم تزگام غ‑لماسيح تامژم‑بدّا گيس بلا تفلم رّجا ءيصحان لّي‑ف‑تسفلدم غ‑واوال لّخبار ءيفولكين. لخبار‑اد ا‑مي‑تّكّا‑تبرّاحت‑نس كولّو دّونيت، وورّيغ گغ اخدّام‑نس ءولا نكّي بولُس.

تاووري ن‑بولُس ءولا تارفوفنت‑نس

²⁴ فرحغ غيلاد س‑ترفوفنت‑اد غ‑ا‑زرايغ ف‑سّيبت‑نّون. اشكو ار‑تكمّالغ س‑دّات‑ينو ما‑يقامان غ‑ترفوفنت لّماسيح ف‑سّيبت ن‑دّات‑نس لّي‑يگان امناگّار ن‑مدّن‑نس.

²⁵ وورّيغ گيغ اخدّام ءي‑ومناگّار‑اد لّيغ‑يّي‑يژلي ربّي اد‑سكارغ تاووري‑اد، سّلكمغ‑اون‑ين كولّو ءيواليون‑نس.

²⁶ اشكو مايلّي ءينتلن كولّو غايد ءيزرين، ءور‑ت‑سّينّ مدّن ن‑تاسوتين لّي‑زرينين، هاتي ءيسّبايّن‑ت‑يد ربّي غيلاد ءي‑يمژلاين‑نس.

²⁷ ءيقصاد اد‑اغ‑د‑يمل تاغاوسا‑ياد باهرا ءيفولكين ءيهيّان لّي‑س‑را‑يبارك كولّو تيميزار ن‑دّونيت. غمكاد ا‑تگا: ءيلّا لماسيح غ‑وول‑نّون اد‑اون‑يفك رّجا ءيصحان ن‑يس‑را‑ن‑تكشمّ س‑لمجد‑نس.

²⁸ هاتي لماسيح ا‑ف‑ا‑نتبرّاح ءي‑كولّو مدّن، ار‑نتنصاح كود يان، ار‑نسّلماد كود يان س‑كولّو ما‑يگان تاحكيمت، باش ا‑ن‑نشّكشم كود يان س‑لگدّام ن‑ربّي ءيمقّور غ‑لماسيح.

²⁹ ف‑غمكان ا‑ف‑ا‑تنهاتافغ ار‑كّاتغ تاكرّايت س‑كولّو جّهد لّماسيح لّي‑يّي‑يسّدوسن س‑تحكيمت‑نس ءيگّوتن.