irqqasn 9 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

شاول يوورّي يومن س‑لماسيح

¹ ءيمّا شاول ار‑سول‑يسكار ما‑س‑ا‑يسّيويد ءيمحضارن ن‑سيديتنّغ ار‑تن‑يتنوّا س‑لموت. ءيدّو س‑دار‑ونمغور ءيهيّان ن‑تگمّي ن‑ربّي،

² ءيضالب زغ‑گيس تيبراتين ءي‑يمغارن ن‑تگُمّا ن‑تژالّيت غ‑تمدينت ن‑ديماشق، باش ا‑يغوي وانّا‑ن‑يوفا زغ‑ايت‑وغاراس لّماسيح گن‑ييت ءيرگازن نغد تيمغارين، ياوي‑تن س‑وروشاليم.

³ ءيسّودو شاول ايلّيغ‑ن‑ياكمور س‑ديماشق، س‑د‑فلّاس‑تسفاو يات تيفاوت ءيتجهّدن زغ‑يگنوان.

⁴ ءيضر س‑واكال ءيسفلد ءي‑يان‑واوال ءينّا‑ياس: «شاول، شاول، ماخ ا‑يّي‑تسّرفوفونت؟»

⁵ ييني: «وا‑سيدي، ما‑تگيت كيّي؟» ييني‑اس: «نكّين ا‑يگان ياسوع لّي‑تسّرفوفونت.

⁶ ءيمّا غيلاد نكر تكشمت س‑تمدينت. راد‑اك‑يتياونّا ما‑ك‑يد‑يقّانّ ا‑تي‑تسكارت.»

⁷ دوهدون غويلّي ديدس سّودانين، بيدّن غين فسّان. سلّان نتني ءي‑واوال‑ان والاينّي ءور‑ژرين يان.

⁸ ءينكر شاول زغ‑واكال والاينّي لّيغ ءيرژم الّن‑نس ءور‑يسفاو يات. امژن‑اس افوس اوين‑ت س‑ديماشق.

⁹ ءيكّا كراض‑ووسّان ءور‑يسفاو، ءور‑ا‑يشتّا ءولا‑دا‑يسّا.

¹⁰ ءيلّا يان‑ومحضار لّماسيح غ‑ديماشق ءيسم‑نس حانانيّا، ءيبان‑اس‑د سيديتنّغ غ‑توارگيت ييني‑اس: «وا‑حانانيّا.» ييني: «ها‑نكّي ا‑سيدي.»

¹¹ ييني‑اس سيديتنّغ: «نكر تدّوت س‑تگمّي ن‑ياهودا غ‑تسوكت لّي‑مي‑تّينين ‹تاسوكت ءينمن›، تسقسات غ‑يان‑ورگاز گو‑طارسوس ءيسم‑نس شاول. اشكو ار‑يتژالّا،

¹² ءيژر غ‑توارگيت يان‑ورگاز ءيسم‑نس حانانيّا يوشكا‑د دارس، ءيسرس فلّاس ءيفاسّن‑نس باش ا‑ييسفيو.»

¹³ ءيساول حانانيّا ييني: «وا‑سيدي، سفلدغ ءي‑كولّو ما‑تّينين مدّن ف‑ورگاز‑ان ءولا كولّو ما‑يسكار يُخشن ءي‑يمژلاين‑نّك غ‑وروشاليم.

¹⁴ هاتي غيلاد يوشكا‑د س‑غيد، ياوي‑د ديدس تيبراتين زغ‑ينمغورن ن‑تگمّي ن‑ربّي باش ا‑يامژ كولّو غويد اقرانين س‑يسم‑نّك.»

¹⁵ ييني‑اس سيديتنّغ: «دّو س‑دارس، اشكو ارگاز‑ان ستيغ‑ت ا‑يگ اروكو لّي‑را‑ياسي ءيسم‑ينو دار ايت‑تميزار اگّوگنين د‑يگلدان ءولا دار ايت‑ربّي.

¹⁶ راد‑اس‑ملغ منشك ن‑ترفوفنت ا‑ت‑يد‑يقّانّ ا‑سرس‑يرفوفن ف‑يسم‑ينو.»

¹⁷ ءيدّو حانانيّا ءيكشم س‑تگمّي لّي‑غ‑يلّا شاول، ءيسرس فلّاس ءيفاسّن‑نس ييني‑اس: «وا‑گما شاول، يوزن‑يّي‑د سيديتنّغ، ا‑ت‑يگان د‑ياسوع لّي‑اك‑د‑يبانّ غ‑وغاراس غاكود لّيغ‑دي‑تسّوديت. يازن‑يّي‑د س‑دارك باش ا‑تيسفيوت تعمّرت س‑رّوح لقودوس.»

¹⁸ غير ءينّا ماياد س‑د‑يضر كرا زغ‑والّن ن‑شاول ءيرواس ءي‑يكرضن ن‑يسلمان، يوورّي ءيسفاو. ءينكر غاكودان، ءيسّدّم‑ت حانانيّا غ‑وامان.

¹⁹ ءيشّ ءيلمّا س‑يوورّي ءيدوس. ءيگاور شاول د‑يمحضارن لّماسيح غ‑ديماشق كرا ن‑ووسّان.

²⁰ ءيبدو ار‑يتبرّاح غ‑تگُمّا ن‑تژالّيت ار‑يتّيني: «ياسوع ءيگا يوس ن‑ربّي.»

²¹ ار‑تعجّابن كولّو ويلّي‑اس‑سفليدنين ار‑تّينين ءي‑نگراتسن: «ءيس‑ورد غواد ا‑يتهلاكن غويلّي اقرانين س‑يسم‑اد غ‑وروشاليم؟ ءيس‑ور‑د‑يوشكي س‑غيد باش ا‑تن‑يامژ ياوي‑تن س‑دار ءينمغورن ن‑تگمّي ن‑ربّي؟»

²² ءيمّا شاول ار‑يتزاياد ار‑يساوال س‑تحكيمت ءيتجهّدن ار‑يمالا ءيس‑يگا ياسوع غوالّي‑د‑يوزن ربّي ا‑يگ لماسيح، ايلّيغ ءور‑وفين ايت‑يودايا لّي‑زدغنين غ‑ديماشق مامنك ا‑فلّاس‑تراران اوال.

²³ زرين‑ووسّان گّوتنين س‑فلّاس‑مشاوارن كرا ن‑ايت‑يودايا، ءيرين ا‑ت‑نغن.

²⁴ گابلن ءيماون ن‑تمدينت غ‑ييض ءولا ازال باش ا‑ت‑هلكن. ءيمّا شاول ءيسفلد ءي‑غايلّي فلّاس نوّان.

²⁵ اوين‑ت ءيمحضارن‑نس غ‑ييض س‑يان‑وارّياح ءيلّا غ‑وغُراب، زّوگزن‑ت غ‑يان‑وريال س‑برّا ن‑تمدينت.

زّعامت ن‑شاول غ‑وروشاليم

²⁶ ءيدّو شاول س‑وروشاليم، ييري ا‑يژر ءيمحضارن ن‑سيديتنّغ. ءيمّا نتني كسوضن زغ‑گيس كولّوتن، اشكو ءور‑ت‑ومينّ ءيس‑يوورّي ءيگا امحضار لّماسيح.

²⁷ ياشك‑يد بارنابا ياوي شاول س‑دار ءيرقّاسن، ييني‑اسن ف‑مامنك اد‑اس‑د‑يبان سيديتنّغ غ‑وغاراس ءيساول سرس، ءولا مامنك ا‑يزعم شاول ار‑يساوال س‑يسم ن‑ياسوع غ‑ديماشق.

²⁸ ءيقاما ديدسن شاول، ار‑يتكّا كولّو تامدينت ن‑وروشاليم ار‑يساوال س‑يسم ن‑سيديتنّغ س‑زّعامت.

²⁹ ار‑يسّمقسا ار‑يتمجاحاد د‑ايت‑يودايا لّي‑د‑كّانين تيميزار ياضني، ءيمّا نتني سكرن ف‑ا‑ت‑نغن.

³⁰ لّيغ سفلدن ايتماتن ف‑مايلّي نوّان، اوين‑ت س‑لمرسا ن‑قايصريّا، ازن‑ت ءيلمّا س‑تمدينت‑نس ن‑طارسوس.

³¹ غ‑ووسّان‑ان ءيهنّا لحال دار كولّو ايت‑ومناگّار غ‑تميزار ن‑يودايا ءولا جاليل ءولا ساميرا. ار‑تّيگاتن ار‑تدوسن، ار‑تن‑يزّعام رّوح لقودوس. ار‑سكارن كولّو ف‑اد‑رضون سيديتنّغ.

اجّوجّي د‑تنكرا ف‑وفوس ن‑بطرُس

³² غ‑ووسّان‑ان ار‑يتكّا بطرُس كرايگاتّ ماني، ياشك‑يد س‑دار ءيمژلاين ن‑ربّي غ‑ودوّار ن‑لودّا.

³³ ياف‑ن غين يان‑ورگاز ءيكوشمن، ءيسم‑نس عينياس. تام ءيسگُّاسن ءور‑يژضار ا‑ينكر زغ‑تيسي‑نس.

³⁴ ييني‑اس بطرُس: «وا‑عينياس، هاتي ءيجّوجّي‑ك ياسوع لماسيح. نكر تسّمونت اسدّول‑نّك.» ءينكر غاكودان، ءيبيدّ ف‑يضارن‑نس.

³⁵ ژرن‑ت كولّو ايت‑لودّا ءولا غويلّي زدغنين غ‑وزاغار ن‑سارون، وورّين امنّ ءولا نتني س‑سيديتنّغ.

³⁶ تلّا يات‑تمحضارت لّماسيح غ‑تمدينت ن‑يافّا، ءيسم‑نس طابيتا. تگا لمعنا ن‑يسم‑نس ‹تاژنكطّ›. نتّات ار‑بدّا‑تسكار افولكي غ‑مدّن ار‑تّعاوان ءيمژلاض.

³⁷ توضن غ‑ووسّان‑ان تمّت. سيردنت‑ستّ سرسنت‑ستّ‑ين غ‑يان‑وحانو ن‑وفلّا.

³⁸ تامدينت ن‑يافّا ءور‑باهرا‑تاگّوگ ف‑ودوّار ن‑لودّا. لّيغ سفلدن ءيمحضارن ءيس‑يلّا بطرُس غ‑لودّا، ازنّ سين ءيرگازن س‑دارس ضالبن‑ت: «اشك‑يد غيل غيل.»

³⁹ ءينكر بطرُس ءيمون ديدسن. لّيغ ءيروح تيگمّي سّغلين‑ت س‑وحانو. اشكيند‑د‑تهجّالين كولّوتنت لولّينت ءي‑بطرُس ار‑الّانت ار‑اس‑مالانت ءيقشبان د‑يسلهامن لّي‑تسكر طابيتا لّيغ سول ديدسنتي تلّا.

⁴⁰ ءيمّا بطرُس ءيسّوفغ‑تنت كولّوتنت زغ‑وحانو، يوتش ف‑يفادّن‑نس ءيژّالّ ءيضالب ربّي. ءيگراول ءيلمّا غ‑تالّي ءيمّوتن ييني‑اس: «وا‑طابيتا، نكر،» س‑دي‑ترژم الّن‑نس تژر بطرُس، تنكر غ‑تيسي‑نس.

⁴¹ ءيمدي‑اس‑ن بطرُس افوس‑نس ءيسّبيدّ‑ستّ ف‑يضارن‑نس. ءيغر س‑يمژلاين ن‑ربّي د‑تهجّالين، ءيفك‑اسن‑تّ‑يد تدّر.

⁴² ار‑سفليدن كولّو ايت‑يافّا ف‑ما‑يجران، ايلّيغ ءيگّوت ما‑يوورّين يومن س‑سيديتنّغ.

⁴³ ءيگاور بطرُس غ‑يافّا يان‑منّاو‑ووسّان غ‑دار يان‑ودبّاغ ءيسم‑نس سيمعان.