irqqasn 8 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

تارفوفنت لّي‑يزرين ف‑يمومنّ

¹ زغ‑واسّ‑ان ا‑تزراي‑ترفوفنت ءيشقان ف‑ومناگّار ن‑ايتماتن غ‑وروشاليم، اكوتن كولّو غ‑تسگيو ن‑يودايا ءولا ساميرا. غير ءيرقّاسن ا‑يقامان.

² ءيمّا ستيفانوس، مضلن‑ت كرا ن‑مدّن لّي‑توقّارنين ربّي، تاغ‑تن‑تگوضي‑نس باهرا.

³ ءيمّا شاول ءيگا‑ن تيقّي‑نس ا‑يهلك امناگّار كولّوت. ار‑يكشّم س‑تگُمّا يات س‑يات، ار‑د‑يزوكور ءيرگازن ءولا تيمغارين ار‑تن‑ين‑يتلوح غ‑لحبس.

فيليبّوس غ‑ساميرا

⁴ ءيمّا غويلّي اكوتنين، ار‑تكّان كرايگاتّ ماني ار‑تبرّاحن س‑واوال ن‑ربّي.

⁵ ءيدّو فيليبّوس س‑يات‑تمدينت غ‑ساميرا، ار‑يتبرّاح ف‑لماسيح.

⁶ گّوتن مدّن ن‑غين، لّيغ سفلدن ءي‑ما‑يتّيني فيليبّوس ژرن تيميتار تجهّدنين لّي‑يسكار، اوين‑تّ كولّو غ‑واوال‑نس.

⁷ مدّن گّوتنين، فّوغن زگيسن لجنون أُخشنّين س‑تغويّا تجهّدنين، جّين كيگان د‑يكوشامن د‑يبيضارن.

⁸ فرحن ايت‑تمدينت‑ان باهرا.

⁹ ييلي يان‑ورگاز غ‑تمدينت‑ان ءيسم‑نس سيمعون، ار‑يسكار سّيحر ار‑گيس‑تعجّابن ايت‑ساميرا. ار‑اسن‑يتّيني ءيزد واد ءيمقّورن ا‑يگا.

¹⁰ ار‑تّ‑گيس‑تاوين مدّن كولّوتن، ءودماون مقّورنين ءولا وييّاض، ار‑تّينين: «ارگاز‑اد تلّا‑گيس‑تحكيمت ن‑ربّي لّي‑مي ءيسم‑نس ‹امقّور›.»

¹¹ ار‑سرس‑سفليدن اشكو كيگان اد‑زّرين ار‑تعجّابن غ‑سّيحر لّي‑يسكار.

¹² والاينّي لّيغ سفلدن ءي‑ما‑ينّا فيليبّوس ف‑لخبار ءيفولكين ن‑تگلديت ن‑ربّي ءولا ف‑يسم ن‑ياسوع لماسيح، امنّ اوال‑نس. ءيسّدّم‑تن غ‑وامان، ءيرگازن ءولا تيمغارين.

¹³ يامن سيمعون ءولا نتّان، ءيسّدّم‑ت فيليبّوس غ‑وامان. ءيزايد ار‑يتمونو د‑فيليبّوس، ار‑يتعجّاب غ‑لقوّات د‑تميتار مقّورنين لّي‑دارس‑يژرّا.

ءوگوز ن‑رّوح لقودوس ف‑ايت‑ساميرا

¹⁴ سفلدن ءيرقّاسن غ‑وروشاليم ف‑ايت‑ساميرا ءيس‑قبلن اوال ن‑ربّي، ازنّ بطرُس د‑يوحانّا س‑دارسن.

¹⁵ لّيغ‑ن‑لكمن، ژّالّن ضالبن زغ‑ربّي ا‑د‑يفك رّوح لقودوس ءي‑ويلّي ءومنّين.

¹⁶ اشكو غاكودان ءور‑تا‑د‑فلّاسن‑يگّوز رّوح لقودوس. غير دّمن نتني غ‑وامان س‑يسم ن‑سيديتنّغ ياسوع.

¹⁷ سرسن فلّاسن ءيرقّاسن ءيفاسّن‑نسن س‑تن‑يكشم رّوح لقودوس.

¹⁸ غير ءيژرا سيمعون ءيس‑د‑يوشكا رّوح لقودوس لّيغ فلّاسن سرسن ءيرقّاسن ءيفاسّن‑نسن، ياوي‑د ءيقاريدن

¹⁹ ييني‑اسن: «فكات‑يّي ءولا نكّي تاژضّارت‑اد، باش ا‑يكشم رّوح لقودوس س‑وانّا‑ف‑سرسغ ءيفاسّن‑ينو.»

²⁰ ءيرار‑اس بطرُس: «ا‑تّهلكت كيّي ءولا نّوقرت‑نّك، اشكو تغالت ءيزد س‑يقاريدن ا‑س‑تلّا‑توافكا ن‑ربّي.

²¹ ءور‑دارك تاغامت غ‑تووري‑اد ءولا را‑گيس‑تكشمت، اشكو ءور‑يغوس‑وول‑نّك غ‑يژري ن‑ربّي.

²² فل لخُشانت‑ان تناولت، تضالبت ربّي اد‑اك‑يصامح ف‑غاين تنوّات غ‑وول‑نّك.

²³ اشكو ژريغ ءيس‑تعمّرت س‑واسمّوم، تياسّاست س‑يسكراف ن‑دّنوب.»

²⁴ ييني‑اسن سيمعون: «ضالبات ربّي ف‑سّيبت‑ينو، ا‑ور‑يّي‑ييلي كرا غ‑غايد فلّا تنّام.»

²⁵ ءيزايد بطرُس د‑يوحانّا فكن توگّا‑نسن ساولن ءي‑مدّن‑ان س‑واوال ن‑سيديتنّغ. وورّين ءيلمّا س‑وروشاليم. لّيغ فتان غ‑وغاراس ار‑تبرّاحن س‑لخبار ءيفولكين غ‑يدوران گّوتنين ن‑ساميرا.

فيليبّوس د‑لوازير ن‑حاباش

²⁶ ءيمّا فيليبّوس، ءينّا‑ياس‑د يا‑لّمالاك ن‑سيدي ربّي: «نكر تدّوت س‑تسگا لّجانوب س‑وغاراس لّي‑يتاوين زغ‑وروشاليم س‑تمدينت ن‑غازّا.» اغاراس‑ان ءيلّا غ‑لخلا.

²⁷ ءينكر فيليبّوس ءيدّو. ءيمناگّار يان‑ورگاز، ءيگا گو‑حاباش ءيگ لوازير ن‑صّندوق غ‑دار كانداكا تاگلّيتّ ن‑حاباش. يوشكا‑د غ‑ووسّان‑ان س‑وروشاليم ا‑گيس‑يتعباد ربّي، يامژ اغاراس‑ان ءيلمّا باش ا‑يوورّي س‑تمازيرت‑نس.

²⁸ غاسّان ءيسّودا غ‑لكورّيصا‑نس ار‑ياقرا غ‑وارّا ن‑نّابي ءيشاعيا.

²⁹ غاكودان فيليبّوس، ءينّا‑ياس رّوح لقودوس: «فتو‑ن دار بو‑لكورّيصا‑يان، تمونت ديدس.»

³⁰ يازّل فيليبّوس س‑دارس، ءيسفلد‑اس ار‑ياقرا غ‑وارّا ن‑نّابي ءيشاعيا. ءيسقسا‑ت فيليبّوس: «ءيس‑تسّنت لمعنا ن‑مايد تاقرات؟»

³¹ ييني‑اس لوازير: «مامنك ا‑س‑راد‑يسّانغ لمعنا‑نس ءيغ‑ور‑داري ماد‑يّي‑ستّ‑يمالان؟» ءيضالب‑ت ءيلمّا ا‑يغلي ءيسّودو ديدس غ‑لكورّيصا.

³² اگزّوم لّي‑ياقرا غ‑وارّا ن‑ربّي ءيگا غمكاد: «زوند ءيزيمّر لّي‑لدين اد‑اس‑غرسن، نغد زوند القّاغ لّي‑يفسّان غ‑گر ءيفاسّن ن‑ويلّي را‑ت‑يلاسّ، ءور‑يرژيم ءيمي‑نس.

³³ رگمن‑ت سّضرن فلّاس لباضل. ما‑را‑يادّر تاروا‑نس؟ اشكو بّين‑ت زغ‑تودرت ن‑دّونيت‑اد.»

³⁴ ءيساول‑داغ لوازير ءيسقسا فيليبّوس: «ءيني‑يّي، ما‑ف‑يساول نّابي لّيغ ءينّا ماياد؟ ءيزد ف‑يخف‑نس نغد كرا ن‑يان ياضني؟»

³⁵ ءيبدو فيليبّوس غاكودان زغ‑وارّا‑يان، ار‑اس‑يمالا لخبار ءيفولكين ف‑ياسوع.

³⁶ زايدن سّودون غ‑وغاراس ايلّيغ لكمن يان‑ودغار گيس امان، ييني لوازير ءي‑فيليبّوس: «هاي‑امان. ءيس‑يلّا ما‑راد‑يّي‑يكّيس ا‑يّي‑تسّدّمت؟»

³⁷ ييني‑اس فيليبّوس: «ءور‑يلّي ما‑راد‑اك‑ت‑يكّيس ءيغ‑تومنت س‑نّييت ن‑وول‑نّك.» ييني‑اس: «ها‑يّي ءومنغ ءيس‑يگا ياسوع لماسيح يوس ن‑ربّي.»

³⁸ ييني لوازير ءي‑وخدّام‑نس ا‑يسّبيدّ لكورّيصا، ءيگّوز س‑وامان نتّا د‑فيليبّوس، ءيسّدّم‑ت.

³⁹ ءيمّا فيليبّوس، غير غلين‑د زغ‑وامان س‑ت‑يسّيتّي رّوح ن‑سيديتنّغ، ءور‑سول‑ت‑يژري لوازير. ءيزايد نتّا ف‑وغاراس‑نس س‑لفرح ءيگّوتن.

⁴⁰ ءيمّا فيليبّوس يوفا‑ن ءيخف‑نس غ‑تمدينت ن‑اشدود، ءيزايد ار‑يتكّا كولّو تيمدينين ار‑گيسنت‑يتبرّاح س‑لخبار ءيفولكين ايلّيغ ءيروح قايصريّا.