irqqasn 7 - اغاراس ن-تودرت - ءينجيل لّماسيح - لعهد لّجديد لّي-يسكر ربّي غ-گراس د-بنادم

اوال ن‑ستيفانوس غ‑لمحكاما

¹ ءيساول‑ونمغور ن‑تگمّي ن‑ربّي س‑ستيفانوس ءيسقسا‑ت: «ءيس‑يُغژان غايد فلّاك تّينين مدّن‑اد؟»

² ءيساول ستيفانوس ييني‑اسن كولّوتن: «واي‑ايتما د‑يد‑خالي، سفلدات‑يّي. ءيبان‑د ربّي لّمجد ءي‑باباتنّغ ءيبراهيم غ‑تمازيرت ن‑ماسوبوطاميا، ءور‑تا‑يدّي ا‑يزدغ غ‑تمدينت ن‑حاران.

³ ييني‑اس: ‹فل ايت‑دارك د‑تمازيرت‑نّك، تدّوت س‑تمازيرت لّي‑راد‑اك‑ملغ.›

⁴ ءيفّوغ ءيلمّا تامازيرت‑نس ن‑ايت‑كالدان ءيدّو ءيزدغ غ‑حاران. لّيغ ءيمّوت باباس، ياوي‑ت‑يد ربّي س‑تمازيرت‑اد لّي‑غ‑تزدغم غيلاد.

⁵ والاينّي ءور‑اس‑گيس‑يفكي كرا ن‑ودغار ا‑يگ وينس غ‑ووسّان‑ان. كرا ن‑ووزون ءيمژّين ءور‑اس‑ت‑يفكي. والاينّي ءينّا‑ياس ربّي: ‹راد‑اك‑تّ‑فكغ غ‑مايد‑د‑يفتان، ا‑تگ تينّك كيّي د‑تاروا‑نّك.› غمكان اد‑اس‑ينّا واخّا ءور‑تا‑دارس‑يلول كرا ن‑وارّاو.

⁶ ءيساول‑داغ ربّي ييني‑اس: ‹تاروا‑نّك راد‑گن ءيغريبن غ‑يات‑تمازيرت ياگّوگن. كّوژ ءيد‑ميّا ن‑وسگُّاس ا‑راد‑گن ءيسمگان ار‑ترفوفونّ غين.

⁷ والاينّي راد‑وتغ لحوكم ف‑تمازيرت لّي‑تن‑يرورن اد‑گن ءيسمگان. تيگيرا ن‑ووسّان‑ان راد‑فّوغن زغ‑غين، اشكين‑د ار‑يّي‑تعبادن غ‑تمازيرت‑اد.›

⁸ ءيفك ءيلمّا ربّي ءي‑يبراهيم تاماتارت لّعهد لّي‑يسكر غ‑گراس ديدس، تگا تاژالّيت ن‑يحشماي‑نس. غاكودان ءيژّولّا ءيبراهيم ءي‑يوس ءيسحاق غ‑ويس تام‑ووسّان. ءيژّالّ ءيسحاق ءي‑يوس ياعقوب، ءيژّالّ ياعقوب ءي‑تاروا‑نس س‑سين د‑مراو، ا‑تن‑يگان د‑يد‑باباتنّغ نكُّني ن‑ايت‑ربّي.

⁹ «والاينّي ءيد‑باباتنّغ ءوسين تانوّاشت ف‑گماتسن يوسف، زّنزن‑ت ا‑يگ ءيسمگ غ‑تمازيرت ن‑ميصر. ءيمّا نتّان، ءيلّا ديدس ربّي

¹⁰ ءيفوكّو‑ت زغ‑كولّو تاسّاسين‑نس. لّيغ ءيبيدّ يوسف غ‑لگدّام ن‑فيرعاون اگلّيد ن‑ميصر، ءيفك‑اس ربّي تاحكيمت ءيگّوتن، ايلّيغ فلّاس ءيرضا‑وگلّيد، ءيفل غ‑دّو‑وفوس‑نس تامازيرت ن‑ميصر ءولا كولّو تيگمّي‑نس.

¹¹ والاينّي غ‑ووسّان‑ان ءيلّا‑وغني غ‑ميصر كولّوتّ ءولا غ‑تمازيرت‑اد ن‑كانعان، ار‑باهرا‑تاضنّ مدّن. ءور‑ژضارن ءيد‑باباتنّغ اد‑افن ماد‑شتّان.

¹² ءيسفلد ياعقوب ءيس‑يلّا ءيمندي غ‑ميصر، يازن ءيد‑باباتنّغ اد‑دّون س‑غين تاوالا تامزواروت.

¹³ دّون ءيلمّا تيس سنات‑توال س‑اسن‑يملا يوسف ءيزد گماتسن ا‑يگا، يوورّي فيرعاون ءيسّن ايت‑دارس ن‑يوسف.

¹⁴ يازن يوسف س‑باباس ياعقوب د‑مدّن‑نس كولّوتن، ءيضالب‑تن ا‑د‑دارس‑اشكين. سّا ن‑يد‑مراو د‑سمّوس (75) ن‑يان اد‑گان.

¹⁵ ءيدّو ياعقوب س‑ميصر، ءيمّت غين نتّان د‑يد‑باباتنّغ.

¹⁶ اوين‑تن‑د ءيلمّا س‑تمدينت ن‑شاكيم، مضلن‑تن غ‑ومضّال لّي‑ستّين ءيكّا ءيبراهيم ءيسغا‑ت س‑نّوقرت دار ايت‑حامور.

¹⁷ «زرين ءيسگُّاسن، ار‑تّيگاتن مدّن‑نّغ غ‑ميصر باهرا. ياكمور‑د‑وزمز لّي‑غ‑را‑يسّافو ربّي اوال لّي‑س‑ينّا ءي‑يبراهيم.

¹⁸ ءينكر يان‑وگلّيد ياضني ءيحكام ميصر، ءور‑يسّين يوسف.

¹⁹ ار‑تّ‑يزّراي ف‑يمزوورا‑نّغ ار‑ديدسن‑يتشقو. يامر‑تن اد‑سّوفوغن تاروا نّا‑ياسن‑لولنين، فلن‑تن‑ين اد‑مّتن غ‑لخلا.

²⁰ غ‑ووسّان‑ان ا‑يلول موسا، ءيگا احشمي باهرا ءيشوان. ربّان‑ت ايت‑دارس كراض‑ييرن غ‑تگمّي،

²¹ سّوفغن‑ت ءيلمّا فلن‑ت‑ين. والاينّي توفا‑ت ءيلّيس ن‑فيرعاون، تاسي‑ت تگ‑ت د‑يوس تربّا‑ت.

²² ار‑ياقرا موسا كولّو تاواسّنا ن‑ايت‑ميصر، يوورّي ءيگ ارگاز ءيتجهّدن غ‑يواليون‑نس د‑يسكّيرن‑نس.

²³ «لّيغ ءيرگل كّوژ ءيد‑مراو ن‑وسگُّاس، ءيضر‑د غ‑يخف‑نس ا‑يدّو ءيژر ايتماس، ا‑تن‑يگان د‑ايت‑ربّي.

²⁴ ءيژر يان گيسن، ار‑ت‑يسّرفوفون يان گو‑ميصر. ءيفتو موسا ا‑ت‑يعاون ءيرار ءي‑گو‑ميصر ف‑ما‑يسكر. يوت‑ت غاكودان ءينغ‑ت.

²⁵ ييني موسا د‑يخف‑نس: ‹راد‑يسّانّ ايتما‑ياد ءيس‑يرا ربّي ا‑تن‑يفوكّو ف‑وفوس‑ينو،› والاينّي ءور‑ا‑سوينگيمن نتني غمكان.

²⁶ نديد ازكّا س‑يژرا موسا سين ءيرگازن ن‑ايت‑ربّي مّاغن ءي‑نگراتسن، ءيفتو دارسن ييري ا‑تن‑يسّنگادّا. ييني‑اسن: ‹وا‑يرگازن ژرات، هاتي ايتماتن ا‑تگام. ماخ ايلّيغ تمّاغم ءي‑نگراتون؟›

²⁷ والاينّي غوالّي ءيسّرفوفنّ وايّاض ءينفر موسا ييني‑اس: ‹ما‑ك‑يگان د‑ومغار ءولا لحاكم فلّانّغ؟

²⁸ ءيس‑تريت ا‑يّي‑تنغت غمكلّي تنغيت گو‑ميصر ءيضگام؟›

²⁹ لّيغ ءيسفلد موسا ءي‑ماياد ءيروول، ءيفّوغ ميصر ءيدّو ءيگاور غ‑تمازيرت ن‑ماديان. لالن‑ين دارس سين تاروا غين.

³⁰ «زرين كّوژ ءيد‑مراو ن‑وسگُّاس، ءيبان‑اس‑د ءيلمّا يا‑لّمالاك س‑تمزيولت لّعافيت غ‑يات‑تزگُّارت تلّا غ‑لخلا غ‑تسگا ن‑ودرار ن‑سينا.

³¹ موسا، ءيضر‑اس لعجب غ‑ما‑يتمناد، ياكمور‑ن سرس ا‑ستّ‑يسّماقّل. غاكودان ا‑يسفلد ءي‑واوال ن‑سيدي ربّي ييني‑اس‑د:

³² ‹نكّي ا‑يگان ربّي ن‑يمزوورا‑نّك، ربّي ن‑يبراهيم د‑يسحاق د‑ياعقوب.› ييكساض موسا ار‑يترگيگيي باهرا، ءور‑يژضار ا‑يالّ الّن‑نس.

³³ ءيساول‑داغ سيدي ربّي ييني‑اس: ‹كّيس تورژيّين‑نّك. هان غين غ‑تبيدّت ءيگا اكال ءيتياوژلاين ءي‑ربّي‑نّك.

³⁴ هاتي ژريغ منشك اد‑ترفوفونّ مدّن‑ينو غ‑ميصر، سفلدغ ءي‑يسمومُّين‑نسن، گّوزغ‑د ا‑تن‑فوكّوغ. ءيمّا غيلاد نكر، را‑ك‑ازنغ س‑ميصر.›

³⁵ «موسا، نتّان ا‑ن‑لوحن ايت‑ربّي ءينين‑اس: ‹ما‑ك‑يگان د‑ومغار ءولا لحاكم فلّانّغ؟› ءيمّا ربّي يوزن‑ت‑يد اد‑اسن‑يگ امغار د‑ونجّام لّيغ‑اس‑د‑يبان لمالاك غ‑تزگُّارت.

³⁶ غاكودان ءيسّوفغ‑تن‑د زغ‑غين، ءيسكر لمعجيزات د‑تميتار تجهّدنين غ‑ميصر ءولا غ‑دار‑ومدا اژگُّاغ ءولا كّوژ ءيد‑مراو ن‑وسگُّاس غ‑لخلا.

³⁷ موسا، نتّان ا‑ينّان ءي‑ايت‑ربّي: ‹راد‑اون‑يفك ربّي يان زغ‑ايتماتون ا‑يگ نّابي زوند نكّي.›

³⁸ «ءيلّا موسا غ‑ومناگّار ن‑ايت‑ربّي غ‑لخلا، ييلي د‑يمزوورا‑نّغ، ييلي د‑لمالاك لّي‑سرس‑يساولن غ‑ودرار ن‑سينا. نتّان ا‑مي‑د‑يملا ربّي ءيواليون دّرنين اد‑اغ‑تن‑د‑يسّلكم نكُّني.

³⁹ والاينّي اگُين ءيمزوورا‑نّغ اد‑سرس‑سفلدن. نفرن‑ت ءيرين اد‑وورّين س‑ميصر.

⁴⁰ ءينين ءي‑هارون: ‹سكر‑اغ كرا ن‑يلاهات ما‑ياغ‑يزگّورون، اشكو موسا لّي‑اغ‑د‑يسّوفغن زغ‑ميصر، ءور‑نسّين ماد‑اس‑يجران.›

⁴¹ سكرن يا‑لاصنام زوند ءيگيز غ‑ووسّان‑ان، ار‑ن‑سراسن تيغرسيو غ‑لگدّام‑نس، سكرن لفيشتا فرحن س‑غايلّي سّنگادّان س‑يفاسّن‑نسن.

⁴² يوورّي فلّاسن ربّي غاكودان، ءيفل‑تن اد‑تعبادن ءيتران ن‑يگنوان، غمكلّي ءينّا غ‑وارّا لّانبيا ءيسقسا‑تن: ‹واي‑ايت‑ربّي، ءيزد نكّي ا‑مي‑ن‑تسّاكمورم تيغرسيو د‑توافكيو كّوژ ءيد‑مراو ن‑وسگُّاس غ‑لخلا؟

⁴³ هان اخيّام ن‑مولوخ ا‑توسيم، د‑يتري ن‑يلاه رافان. ار‑تّعبادم لاصنام لّي‑تسكرم. ف‑غايان ا‑ف‑را‑كُن‑سّيتّيغ س‑توگّوگت ن‑بابيل.›

⁴⁴ «غ‑ووسّان لّي‑غ‑لّان ءيمزوورا‑نّغ غ‑لخلا ار‑ديدسن‑تاوين اخيّام لّي‑غ‑لّانت‑تميتار ن‑يس‑ديدسن‑يلّا ربّي. ءيتياوسكار‑وخيّام‑ان غمكلّي‑س‑ينّا ربّي ءي‑موسا زوند مايلّي‑اس‑يملا.

⁴⁵ فلن‑د ءيلمّا اخيّام‑ان دار ويلّي‑اسن‑گُّرانين، اسين‑ت‑يد نتني لّيغ‑د‑كشمن د‑ياشوع س‑تميزار ن‑مدّن لّي‑يسّوفغ ربّي غ‑لگدّام‑نسن. ءيقاما دارنّغ ار ءوسّان ن‑وگلّيد داود.

⁴⁶ نتّان، ءيرضا فلّاس ربّي. ءيضالب‑ت داود ا‑ت‑يادج ا‑يسكر يات‑تگمّي ا‑گيس‑يزدغ ربّي لّي‑د‑يسّبايّنّ ءيخف‑نس ءي‑باباتنّغ ياعقوب.

⁴⁷ والاينّي سوليمان اد‑اس‑سول‑يبنان تيگمّي‑ان.

⁴⁸ ءيمّا ربّي اماتّوي ءور‑ا‑يزدّغ غ‑تگُمّا تياوسكارنين س‑يفاسّن ن‑بنادم. غمكلّي‑س‑ينّا ف‑يمي ن‑نّابي:

⁴⁹ ‹ءيگنّا ءيگا لعرش‑ينو، ءيگ‑واكال اژرو لّي‑ف‑ا‑ن‑سراسغ ءيضارن‑ينو. غمكاد ا‑ينّا سيدي ربّي: مان تيگمّي ا‑راد‑يّي‑تبنوم؟ مان تاحانوت ا‑غ‑راد‑سونفوغ؟

⁵⁰ ءيس‑ورد نكّي ا‑يسكرن كولّو مايد ءيلّان؟› »

⁵¹ ءيزايد ستيفانوس ييني‑اسن: «ماتّا غمكاد قّورن ءيخفاون‑نّون، زوند ءيغ‑ور‑تسّينم ربّي ءولا تسفلدم ءي‑واوال‑نس. تاگُيم‑بدّا ما‑يرا رّوح لقودوس زوند ءيمزوورا‑نّون.

⁵² ءيس‑يلّا كرا ن‑نّابي ءور‑يرفوفنّ ف‑يفاسّن ن‑يمزوورا‑نّون؟ نتني نغان ءولا غويلّي‑د‑يوينين لخبار ن‑يس‑را‑د‑ياشك يان ءيعمّرن س‑وفولكي ن‑ربّي. ءيمّا غيلاد غ‑د‑يوشكا، تزّنزام‑ت تنغم‑ت

⁵³ كونّي لّي‑مي‑يفكا ربّي شّرع ف‑وفوس لّمالايكا، والاينّي ءور‑جّو‑سرس‑تسكيرم.»

لموت ن‑ستيفانوس

⁵⁴ لّيغ سفلدن ايت‑لمحكاما ءي‑ماياد، نكرن‑د گيسن ءيريين باهرا، ار‑تگژاژن ءوخسان‑نسن.

⁵⁵ ءيمّا ستيفانوس ءيعمّر س‑رّوح لقودوس، ار‑ن‑يسّموقّول غ‑يگنوان ءيژر‑ن لمجد ن‑ربّي، ءيژر‑ن ياسوع ءيبيدّ ف‑وفاسي ن‑ربّي.

⁵⁶ ييني: «هاتي ژريغ‑ن ءيگنوان رژمن، ژرغ يوس ن‑بنادم ءيبيدّ ف‑وفاسي ن‑ربّي.»

⁵⁷ قّنّ ءيمزگان‑نسن ار‑تغوّاتن س‑جّهد، ازّلن سرس كولّوتن.

⁵⁸ دحين‑ت س‑برّا ن‑تمدينت ار‑ت‑كّاتن س‑يژران. كّيسن ءيناگان ءيسلهامن‑نسن، سرسن‑تن‑ين غ‑دار ءيضارن ن‑يان‑وعيّال ءيسم‑نس شاول.

⁵⁹ زايدن ار‑سول‑كّاتن غ‑ستيفانوس س‑يژران. ءيمّا ستيفانوس ءيغرا ءي‑سيديتنّغ ييني: «وا‑سيدي ياسوع، قبل رّوح‑ينو.»

⁶⁰ ءيضر ف‑يفادّن‑نس س‑واكال، يوت س‑يات‑تغويّيت ييني: «وا‑سيدي، ا‑ور‑فلّاسن‑تحاسبت لخُشانت‑اد.» غير ءينّا اوال‑اد ءيمّت. ءيمّا شاول ءيفرح لّيغ نغان ستيفانوس.